কেন্দ্রগী স্কিল দেবেলপমেন্ত অমসুং এন্ত্রপ্রেনরশিপ অমসুং ইলেক্ত্রোনিক্স অমসুং আই.তি.গী রাজ্য মন্ত্রী, শ্রী রাজীৱ চন্দ্রসেখরনা ঙসি ত্রিপুরা রাজ্যগী কোনুং আগর্তলা মনাক্তা লৈবা চারিপরাদা ইন্তর্নেস্নেলরেলৱে স্তেশন প্রোজেক্ত য়েংশিনবা চৎখ্রে অমসুং থবক্কী ফিভম য়েংশিনখ্রে।

ইঞ্জীনীয়রিংগী অঙকপা অমা ওইনা খন্নরিবা প্রোজেক্ত অসিনা নোর্থ-ইস্তগী কোলকাতা ফাওবা চৎপদা চংবা মতম অদু তংখাই হন্থরগনি অমসুং ত্রিপুরা অমসুং নোর্থ-ইস্তকীদমক্তা ইকোনোমিক কোরিদোর অমা ওইরগনি অমসুং শেন্মিৎলোন চাউখৎহনবদা, বিজনেস অমসুং কমর্সতা ইনোৎ হাপ্লগনি। 

থৌরম অদুদা ৱা ঙাংলদুনা, শ্রী রাজীৱ চন্দ্রসেখরনা হায়খি, “প্রধান মন্ত্রী, শ্রী নরেন্দ্র মোদীনা ভারত শিনবা থুংনা ইনফ্রাস্ত্রকচরগী শক্তমদা অহোংবা পুরকখ্রে, মরু ওইনা নোর্থ-ইস্ততা, মসিনা ত্রিপুরা অমসুং নোর্থ ইস্তর্ন রিজনগীদমক্তা পুন্সি মহিংবু য়াম্না কোমহনলে অমসুং শেন্মিৎলোনগী খুদোংচাবশিং হেনগৎহল্লে।”

মন্ত্রী অসিনা ত্রিপুরাগী নুমিৎ হুম্নিংগী খোচত্তা নিংথৌকাবা নুমিত্তা আগর্তলাদা থুংখি, মসিগী মনুংদা মহাক্না তোঙান-তোঙানবা কাংলুপকী মীওইশিংগা উনখি অমসুং মখোয়গী অৱাবশিং আদুবু য়েংশিনখি। মহাক্না স্কিল দেবেলপমেন্তকী দাইরেক্তর, শ্রী সঞ্জোয় সক্রবোর্তিগা লোইননা মীফম পাংথোকখি অমসুং রাজ্য অসিদা পাইখৎলিবা স্কিলিংগী থবক-থৌরমশিং অদুবু য়েংশিনখি। খন্ন-নৈনবা অদুদা মার্কেত লিঙ্কেজশিং, কেপাসিতী বিল্দিংগী খুদোংচাবশিং অমসুং এস.ঐচ.জি.শিংগীদমক্তা লৌখৎলিবা অনৌবা থৌরাংশিংগা মরি লৈনবা শিংনবশিং অদুগী মতাংদা খন্নখি।

মন্ত্রী অসিনা লাইরিক-লাইশু হৈরবশিংগী কাংলুপ অমগশু ৱারি-ৱাতাই শানখি অমসুং মখোয়দা প্রধান মন্ত্রী, শ্রী নরেন্দ্র মোদীগী ৱিকসিত ভারতকী ভিজন অমসুং মীয়ামগী য়াইফনবগীদমক্তা মহাক্কী সরকার অসিনা লৌখৎখিবা অনৌবা থৌরাংশিং অদুগী মতাংদা শিয়র তৌখি। মহাক্না মখোয়দা সরকার অসিনা নোর্থ-ইস্তকী চাউখৎ-থৌরাংগীদমক্তা অৱাবা খঙদবমখৈ করম্না হোৎনরিবগে হায়বদুশু খঙহনখি।

“২০১৪গী মমাংদা নোর্থ-ইস্ততা চাউখৎ-থৌরাং অমত্তা লৈরমদে অমসুং লম্বি-থোং মতিকচানা লৈতবা, রেলৱে নেতৱার্ক নত্রাগ প্লেনগী কনেক্তিবিতী লৈতবনা মরম ওইরগা ইনভেস্তরশিংনা লাক্নিংঙমদে। ঙসিদি লমদম অসি লৈবাক অসিগী অতোপ্পা মফমশিংগুম্না নিংথিনা কনেক্ত তৌরে। লমদম অসিনা প্রধান মন্ত্রী, শ্রী নরেন্দ্র মোদীগী গোবর্নেন্সকী চহি মাপল অসিদা য়াম্না চাউনা খুমাং চাউশিল্লকখ্রে অমসুং মপান লমগী লৈবাকশিংনা ঐখোয়গা থবক তৌনবা য়াম্না খৌরাংনা ঙাইরি,” হায়না রাজীৱ চন্দ্রসেখরনা হায়খি।

মহাক্কী অতোপ্পা এনগেজমেন্তশিংগী মনুংদা, মন্ত্রী অদুনা অখিল ভার্তিয়া সফাই সংঘগী নেস্নেল সেক্রেতরী, সুকুমারি তনুজ সাহাগা উনখি, মহাক্না প্রধান মন্ত্রী, শ্রী নরেন্দ্র মোদীবু শিন্মীশিংগী ইজৎ য়োকখৎপীবগীদমক্তা হায়নিংঙাই লৈতনা থাগৎপা ফোংদোকখি।

মন্ত্রী অসিনা ঙসি নুমিদাং দিল্লীদা হল্লগনি। শ্রী রাজীৱ চন্দ্রসেখরনা প্রধান মন্ত্রী, শ্রী নরেন্দ্র মোদীগী কেবিনেত্তা মন্ত্রী অমা ওইরবা মতুংদা মসি ত্রিপুরাদা মহাক্কী অনিশুবা ওফিসিয়েল ওইবা খোংচৎনি। মহাক অসি মমাংদা ২০০২গী ওগস্ততা মফম অসিদা লাক্লম্মি অমসুং তিরঙ্গা রেলীদা শরুক য়াখি।

****