কেন্দ্রগী গৃহ মন্ত্রী অমদি কোওপরেসন মন্ত্রী শ্রী অমিত সাহনা ঙসি অসামদা মায় পাক্লবা কেন্দিদেৎ ৪৪,৭০৩দা লৈঙাক্কী থবক খনবগী এপোইন্তমেন্ত লেত্তরশিং খুৎশিন্নখ্রে‍। অসামগী মুখ্য মন্ত্রী দোক্তর হিমন্ত বিস্বা সর্ম য়াওনা তোঙান তোঙানবা দিগ্নিতরীশিং থৌরমদুদা শরুক য়াখি‍।

মহাক্কী ৱারোলদা, শ্রী অমিত সাহনা স্তেত অসিগী এসেমব্লী মীখল মমাঙদা, দোক্তর হিমন্ত বিস্বা সর্মনা স্তেত অসিগী চাওখৎ থৌরাংশিংদা অসামগী নহাশিং য়াওহনগদবনি অমদি লমদমসিগী নহাশিংদা লৈঙাক্কী থবক লাখ ১ পীগনি হায়খিববু নীংশিংখি‍। প্রধান মন্ত্রী শ্রী নরেন্দ্র মোদীগী লুচিং মখাদা অসাম লৈঙাক্না চহি ২ দা নহা ৮৬,০০০ রোমদা লৈঙাক্কী থবক পীখ্রে অমদি মথঙগী থা খরদা থবক ১৪,০০০ অমগা পীরগা স্তেত অসিনা লৈঙাক্কী থবক লাখ ১ পীনবগী শকখিবা ৱাশক মপুং ঙাকপা ঙম্লগনি হায়না শ্রী সাহনা হায়খি‍।

প্রধান মন্ত্রী শ্রী নরেন্দ্র মোদীনা নৌনা শাবা পার্লিয়ামেন্ত হাউস লৈবাক্কী মফমদা মে ২৮দা কত্থোক্লগনি অদুগা ওপোজিসন্দা লৈরিবা মীওইশিংনা মসিবু বোইকোত তৌদুনা হন্থবা থাক্কী রাজনিতী তৌদুনা লৈরি হায়না কেন্দ্রগী গৃহ মন্ত্রী অমদি কোওপরেসন মন্ত্রীনা হায়খি‍। অনৌবা ভারত অমা শেম্নবগীদমক লৈবাক পুম্বগী মীয়াম্না দিমোক্রেসীগী অনৌবা লাইশঙ অমা শাবা পাম্মি অমদি দিমোক্রেসীবু হেন্না মপাঙ্গল কলহন্নবগীদমক মফমদুদা খন্নবা অমদি নৈনবা পাম্মি হায়না মহাক্না হায়খি‍। লৈবাকসিগী মীয়াম্না শ্রী নরেন্দ্র মোদীবু অনিরক হন্না, মপুং ফাবা মেজোরিতীগা লোয়ননা লৈবাকসিগী প্রধান মন্ত্রী ওইহল্লি, অসিগুম্বা মখলগী অনেম্বা থাক্কী রাজনিতী অসি লৈবাক মীয়াম্না পীরকপা অপাম্ববু ইকায়বা পীবনি হায়না শ্রী সাহনা হায়খি‍।

মমাঙদা অসামগী নহাশিংনা খুত্তা খুৎলায় পায়নরম্মি, থা কয়া কর্ফিউ থমদুনা থিংজিন্দুনা থম্লম্মি, বোম কয়া পোকখায়রম্মি অদুবু প্রধান মন্ত্রী শ্রী নরেন্দ্র মোদীনা চাওখৎপগী অনৌবা চক অমা পুরক্লে হায়না কেন্দ্রগী গৃহ মন্ত্রী অমদি কোওপরেসন মন্ত্রীনা হায়খি‍। অসামগী মীয়ামনা ইং-তপ্পা, চাওখৎপা অমদি ভারতকা পুনবা পাম্মি হায়না মহাক্না ফোঙদোকখি‍। মমাঙদা থবক লৌবদা অয়েৎপা অপনবা ময়াম লৈরম্মি‍। অদুবু বি.জে.পি. লৈঙাক্না মমাঙদা লৈঙাক্কী থবক ৪২,০০০ অদুগা হৌজিক্না ৪৫,০০০ লৌরি‍। মতমদুদা থবক লৌবগী থৌওংদা অরোন অথুপ লৈহন্দনা তৌবা য়াহন্দবা কাঙলোন কয়া লৈরম্মি, থবক লৌনবগী বোর্দ অমত্তা লৈরমদে‍। প্রধান মন্ত্রী শ্রী নরেন্দ্র মোদীনা লায়রবা ইমুংগী অঙাংশিংদা অরোন অথুপ লৈতনা অমদি অচুম্বা মওংদা থবক পীননবা থৌশিল পায়খৎলে, অদুগা মমাঙগী লৈঙাকশিংনা মখোয় মখোয়গী মীওইশিংদা থবক পীরম্মি হায়না মহাক্না হায়খি‍। অসামগী মফম অমা হেক্তদগী, ফুরুপ অমদি কাঙলুপ অমা হেক্তগী হৈথোই শিংথোইবা নহাশিংনা শেঞ্জা থুমজা য়াওদনা লৈঙাক্কী থবক ফংজনবগী থৌরাং প্রধান মন্ত্রী শ্রী নরেন্দ্র মোদীনা লুচিংবা লৈঙাক অসিনা শেম্লে হায়না মহাক্না হায়খি‍। মশানা ফংজবা মার্কতা য়ুম্ফম ওইরগা নহাশিংনা লৈঙাক্কী থবক ফংবসিনা মওং অমদা নেপোতিজমসু লৈহন্দ্রে‍। প্রধান মন্ত্রী শ্রী মোদীনা হৈথোই শিংথোইবা মীওইশিংনা থবক ফংজনবগী অনৌবা অমদি অরোন অথুপ লৈতবা সিস্তেম অমা হৌদোক্লে হায়না মহাক্না মখা তাখি‍।

শ্রী অমিত সাহনা ঐখোয় অজাদী কা অমৃৎ মহোৎসবকী চহিদা লৈরি অমদি প্রধান মন্ত্রী শ্রী নরেন্দ্র মোদীনা অমৃৎ কালসিদা ভারতপু মালেমগী মকোক থোংবা মফমদা পুখৎনবা ৱাশক অমা ঐখোয়দা পীবিখি হায়খি‍। ইং ২০৪৭দা নীংতম্বগী চহি ১০০ মপুং ফারকপগী মতমদুদা ঐখোয়গী ইরক্তগী মীওই কয়া অমদি লৈররোই, অদুবু ঙসিগী নহা মীরোলসিনা প্রধান মন্ত্রী শ্রী নরেন্দ্র মোদীনা মঙলম্বা ‘অনৌবা ভারত’ ওইরকপদু উবা ফংগদৌরিবনি‍। শ্রী সাহনা নহাশিংগী মফমদা থবক অসিনা অসাম চাওখৎহন্দুনা ভারত চাওখৎহন্নবা লাইৱা ওইদুনা মখোয়গী মপুন্সি চুপ্পা অসামগী মীয়ামগী থৌগল তৌননবা ৱাফম থমখি‍। দিপার্তমেন্তকী খেন্নবা লৈতনা, অচান মিরান নাইদনা থবক তৌদুনা খ্বায়দগী লায়রবশিংবুসু অসাম চাওখৎপগা মরী শম্নহন্নবগী থৌদাং লৌননবা ৱাফম মহাক্না নহাশিংদুগী মফমদা থমখি‍।

শ্রী অমিত সাহনা মমাঙগী লৈঙাক্কী মতমদা, হিংসা অমদি এক্সত্রিমিজম শাথিনা লৈরম্মি, অদুবু হৌখিবা চহি ৯ সিদা, প্রধান মন্ত্রী শ্রী নরেন্দ্র মোদীগী লুচিং মখাদা, হিংসাগী থৌদোক থোকপগী চাং চাদা ৬৭ হন্থরে, সিক্যুরিতী ফোর্সকী খুত্তা শিবগী চাং চাদা ৬০ হন্থরে অমদি মীচম শিবগী চাং চাদা ৮৬ হন্থরে হায়খি‍। প্রধান মন্ত্রী শ্রী নরেন্দ্র মোদীগী লুচিং মখাদা অসাম্না চাওখৎপা অমদি ইং-তপ্পগী লম্বীদা চঙশিল্লি হায়না মহাক্না হায়খি‍। মমাঙদা অসামদা চরাংনবা অমদি সিস্তেম অমত্তা লৈতবগী মওং অমা লৈরম্মি অদুবু শ্রী মোদীগী লুচিং মখাদা, মওং চুম্বা সিস্তেমশিং মফম চানা থম্বাগী থবক মমাঙদনা শ্রী সর্বনন্দ সোনোৱালনা তৌরম্মি অদুগা হৌজিক্না হায়রিবা অদুমক শ্রী হিমন্ত বিস্বা সর্মনা মখা চত্থরি হায়না শ্রী সাহনা হায়খি‍। প্রধান মন্ত্রী শ্রী নরেন্দ্র মোদীনা লুচিংবা লৈঙাক্না ব্রু, বোরো, কার্বি, অসাম-মেঘালয়, অসাম-অরুনাচল প্রদেশ ঙমখৈগী য়ানবা ৱাফম পুরকখ্রে, অফ্সপা চাদা ৭০ হন্থহনখ্রে অমদি চাওখৎপা পুরক্নবগী বজেৎ চাদা ৩০০গী চাংদা হেনগৎলে হায়না মহাক্না হায়খি‍। শ্রী হিমন্ত বিস্বা সর্মগী লুচিং মখাদা, অসাম লৈঙাক্না হকশেল, সর্ভিস, ইনফ্রাস্ত্রকচর, ত্রাইবেল ৱেলফ্যার, লো অমসুং ওর্দরনচিংবা হীরম পুম্নমক্তা স্তেত অসিবু মাঙদা পুখৎলি হায়না মহাক্না মখা তানা ফোঙদোকখি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা, প্রধান মন্ত্রী শ্রী নরেন্দ্র মোদীগী লুচিং মখাদা অসামদা চাওখৎ থৌরাংগী থবক কয়া পায়খৎলে হায়খি‍। লৈঙাক অসিনা অসামগী লোল অমদি নাৎ ঙাক্নবা অমদি য়োকখৎনবা থৌরাংশিং পায়খৎলি হায়না মহাক্না হায়খি‍। প্রধান মন্ত্রী শ্রী নরেন্দ্র মোদী মশামক শ্রী লচিৎ বোরফুকন জী গী ৪০০শুবা মপোক কুমওন থৌরমদা শরুক য়াখি অমদি মহাক্কী মফমদা শ্রদ্ধাঞ্জলি কৎখি‍। হন্দক্তা অসামগী নহাশিংনা প্রধান মন্ত্রী শ্রী নরেন্দ্র মোদী য়াওবা থৌরমদা মালেমগা মমিং লৈরবা বিহু জগোয়গী ৱর্ল্দ রেকোর্দ অমা শেমখি‍। কেন্দ্রদা প্রধান মন্ত্রী শ্রী নরেন্দ্র মোদীনা লুচিংবা লৈঙাক অমদি শ্রী হিমন্ত বিস্বা সর্মনা লুচিংবা অসাম লৈঙাক্না অসাম পুম্ববু অৱাং-নোংপোক ভারত অমদি নোংপোক্লোমদা লৈবাকশিংগী মেদিকেলগী কোনুং ওইহন্নবা খোঙথাঙ কয়া লৌখৎলে হায়না শ্রী সাহনা হায়খি‍। অসামগী শেন্মিৎলোনগী ফীভমসু ফগৎলে, স্তেত অসিগী জি.এস.দি.পি. ২০২১-২২দা লুপা করোর লাখ ৪ ওইরম্বদগী ২০২৩-২৪দা লুপা করোর লাখ ৫.৫০দা হেনগৎলে‍। স্তেত অসিদা ইন্দস্ত্রীশিং খুমাঙ চাওশিল্লি, ইন্দস্ত্রিএল পোলিসীগী মখাদা ইনভেস্তমেন্তশিং লাক্লি অমদি অরুনোদয়া স্কীমগা লোয়ননা অসাম্না চাওখৎ লম্বীদা চঙশৎল্লি‍। অসামগী লৌউ-শিংউ অমদি শঙ্গোমগী সেক্তর চাওখৎলক্লি, ইকোন ৩০০০ তৌখ্রে অমদি প্রধান মন্ত্রী শ্রী নরেন্দ্র মোদীনা লুচিংবা লৈঙআক অসিনা অসামবু মথঙগী চহি ৫সিদা ঈচাও মায়োক্নদবা স্তেত অমা ওইহন্নবা পায়খৎপা য়াবা থৌরাংশিং পায়খৎলি হায়না মহাক্না হায়খি‍।

***********