مرکزی وزیر داخلہ اور امداد باہمی کے وزیر جناب امت شاہ نے آج آسام میں 44,703  کامیاب امیدواروں کو سرکاری ملازمتوں کے تقرری نامے سونپے۔ اس موقع پر آسام کے وزیر اعلیٰ ڈاکٹر ہمنت بسوا سرما سمیت کئی معززین موجود تھے۔

جناب امت شاہ نے اپنے خطاب میں کہا کہ ریاست میں اسمبلی انتخابات سے پہلے ڈاکٹر ہمنت بسوا سرما نے کہا تھا کہ ہمیں ریاست کی ترقی کے عمل میں آسام کے نوجوانوں کو شامل کرنا چاہیے اور ہم ایک لاکھ مقامی نوجوانوں کو سرکاری نوکریاں دیں گے۔   جناب شاہ نے کہا کہ وزیر اعظم جناب نریندر مودی کی قیادت میں آسام حکومت نے 2 سالوں میں تقریباً 86,000  نوجوانوں کو سرکاری نوکریاں دی ہیں اور اگلے چند مہینوں میں بہت جلد ریاست میں مزید 14,000 نوکریاں دے کر وہ ایک لاکھ سرکاری نوکریاں فراہم کرنے کا اپنا وعدہ پورا کرے گی۔

مرکزی وزیر داخلہ اور امداد باہمی کے وزیر نے کہا کہ وزیر اعظم جناب نریندر مودی 28 مئی کو پارلیمنٹ کی نو تعمیر شدہ عمارت کو قوم کے نام وقف کرنے جارہے ہیں اور اپوزیشن اس کا بائیکاٹ کرکے جھوٹ موٹ  کی سیاست کررہی ہے۔  انہوں نے کہا کہ پورے ملک کے لوگ چاہتے ہیں کہ نئے ہندوستان کی تشکیل کے لئے جمہوریت کا ایک نیا مندر تعمیر کیا جائے اور وہاں جمہوریت کو مضبوط بنانے پر بات چیت اور غور و خوض ہونا چاہئے۔ جناب شاہ نے کہا کہ ملک کے عوام نے جناب نریندر مودی کو پوری اکثریت سے دو بار ملک کا وزیر اعظم بنایا ہے، اپوزیشن کی طرف سے اس طرح کی گھٹیا سیاست عوام کے مینڈیٹ کی توہین ہے۔

مرکزی وزیر داخلہ اور امداد باہمی کے وزیر نے  کہا کہ، پہلے آسام کے نوجوانوں کے ہاتھوں میں ہتھیار ہوتے تھے، مہینوں تک بند اور کرفیو ہوتا تھا، بم دھماکے ہوتے تھے لیکن وزیر اعظم جناب نریندر مودی نے یہاں  ترقی کے ایک نئے دور کا آغاز کیا ہے۔ انہوں نے کہا کہ آسام کے لوگ امن، ترقی اور ہندوستان کے ساتھ تعلق چاہتے ہیں۔ جناب شاہ نے کہا کہ پہلے 42,000 اور اب 45,000 سرکاری بھرتیاں کرنے میں بہت سی رکاوٹیں تھیں۔ ایسے قوانین تھے جن کے تحت بھرتیاں شفافیت سے نہیں ہو سکتی تھیں، بھرتی کے لیے کوئی بورڈ نہیں تھا۔ انہوں نے کہا کہ شفافیت اور انصاف پسندی کے ساتھ وزیر اعظم جناب نریندر مودی نے غریبوں کے بچوں کو نوکریاں دلانے کا انتظام کیا ہے، جبکہ پہلے کی حکومتوں نے اپنے ہی لوگوں کو نوکریاں دی تھیں۔ انہوں نے کہا کہ وزیر اعظم جناب نریندر مودی کی قیادت والی حکومت نے ایسے انتظامات کیے ہیں کہ آسام کے کسی بھی علاقے، ذات اور طبقے کے باصلاحیت نوجوانوں کو بغیر کسی بدعنوانی کے سرکاری نوکریاں ملیں۔ انہوں نے کہا کہ میرٹ کی بنیاد پر نوجوانوں کو سرکاری ملازمتیں فراہم کرنا اقربا پروری کا خاتمہ ہے۔ انہوں نے کہا کہ وزیر اعظم جناب نریندر مودی نے ایک نیا اور شفاف نظام شروع کیا ہے ،جس میں باصلاحیت لوگوں کو ملازمتیں مل رہی ہیں۔

جناب امت شاہ نے کہا کہ ہم آزادی کا امرت مہوتسو کے سال میں ہیں اور وزیر اعظم جناب نریندر مودی نے ہمیں امرت کال کے دوران ہندوستان کو دنیا کے پہلے مقام پر لے جانے کا عہد کیا ہے۔ انہوں نے کہا کہ 2047 میں آزادی کی صد سالہ تقریب کے موقع پر ہم میں سے بہت سے لوگ وہاں نہیں ہوں گے، لیکن آج کی نوجوان نسل وزیر اعظم جناب نریندر مودی کے تصور کے مطابق ’نیو انڈیا‘ بننے کا مشاہدہ کرے گی۔ جناب شاہ نے نوجوانوں سے کہا کہ انہیں آسام کی ترقی کے ذریعے ہندوستان کی ترقی کا منتر بنا کر زندگی بھر آسام کے لوگوں کی خدمت کرنی ہے۔ انہوں نے کہا کہ خواہ کوئی بھی محکمہ ہو، نوجوانوں کی ذمہ داری ہے کہ وہ پوری دیانتداری کے ساتھ کام کرتے ہوئے غریب سے غریب کو آسام کی ترقی سے جوڑیں۔

جناب امت شاہ نے کہا کہ پچھلی حکومتوں کے دوران تشدد اور انتہا پسندی عروج پر تھی، لیکن وزیر اعظم نریندر مودی کی قیادت والی حکومت کے 9 سالوں میں تشدد کے واقعات میں 67 فیصد کمی آئی ہے، سکیورٹی فورسز کی  اموات میں  60  فیصد اور عام شہریوں کی ہلاکتوں میں 83 فیصد  کمی آئی ہے ۔ انہوں نے کہا کہ وزیر اعظم جناب نریندر مودی کی قیادت میں آسام ترقی اور امن کی راہ پر آگے بڑھ رہا ہے۔ جناب شاہ نے کہا کہ پہلے آسام میں افراتفری اور کسی نظام کی عدم موجودگی کا ماحول  تھا لیکن وزیر اعظم جناب نریندر مودی کی قیادت میں مناسب نظام  نافذ  کرنے کا کام پہلے جناب سربانند سونووال کر رہے تھے اور اب جناب ہیمنت بسوا سرما کے ذریعہ بھی یہی کام جاری ہے۔ انہوں نے کہا کہ وزیر اعظم جناب نریندر مودی کی قیادت والی حکومت نے برو، بوڈو، کاربی، آسام-میگھالیہ، آسام-اروناچل پردیش سرحدی معاہدے کیے ہیں، افسپا میں 70 فیصد کمی کی ہے اور ترقیاتی بجٹ میں 300 فیصد کا اضافہ کیا ہے۔ انہوں نے کہا کہ  جناب ہمنت بسوا سرما کی قیادت میں آسام کی حکومت صحت، خدمات ، انفراسٹرکچر، قبائلی بہبود، امن و امان جیسے تمام شعبوں میں ریاست کو آگے لے جا رہی ہے۔

مرکزی وزیر داخلہ اور امداد باہمی کے وزیر نے کہا کہ وزیر اعظم جناب نریندر مودی کی قیادت میں آسام میں بہت سے ترقیاتی کام ہوئے ہیں۔ انہوں نے کہا کہ حکومت نے آسام کی زبان، ثقافت کے تحفظ اور فروغ کے لیے کوششیں کی ہیں۔ وزیر اعظم جناب نریندر مودی نے ذاتی طور پر جناب لچیت بورفوکن جی کے 400 ویں یوم پیدائش کی تقریبات میں شرکت کی اور انہیں خراج عقیدت پیش کیا۔ انہوں نے کہا کہ حال ہی میں آسام کے نوجوانوں نے وزیر اعظم جناب نریندر مودی کی موجودگی میں دنیا کے مشہور بیہو  رقص کا عالمی ریکارڈ بنایا ہے۔ جناب شاہ نے کہا کہ مرکز میں وزیر اعظم جناب نریندر مودی کی قیادت والی حکومت اور جناب ہمنت بسوا کی قیادت والی آسام کی حکومت نے آسام کو شمال مشرقی ہندوستان اور مشرقی ممالک کا طبی دارالحکومت بنانے کے لیے کئی اقدامات کیے ہیں۔ انہوں نے کہا کہ آسام کی مالی حالت میں بہتری آئی ہے، ریاست کا جی ایس ڈی پی 22-2021 میں 4 لاکھ کروڑ روپے سے بڑھ کر 24-2023 میں 5.50 لاکھ کروڑ روپے ہو گیا ہے۔ ریاست میں صنعتیں بڑھ رہی ہیں، صنعتی پالیسی کے تحت سرمایہ کاری آرہی ہے اور آسام ارونودیا اسکیم سے ترقی کی راہ پر گامزن ہے۔ انہوں نے کہا کہ آسام میں زراعت اور ڈیری کا شعبہ ترقی کر رہا ہے، 3000 تالاب بنائے جا رہے ہیں اور وزیر اعظم جناب نریندر مودی کی قیادت والی حکومت اگلے 5 سالوں میں آسام کو سیلاب سے پاک بنانے کی ہر ممکن کوشش کر رہی ہے۔

۔۔۔۔۔۔۔۔۔۔۔۔۔۔۔۔۔۔۔

(ش ح- ج ق- ق ر)

U-5585