وزیر جی کشن ریڈی نے نارتھ ایسٹ گلوبل انویسٹرس سمٹ کی تیاری کے سلسلے میں شمال مشرقی خطے کی ترقی(ڈی او این ای آر) کی وزارت کے ذریعہ منعقدہ ایک میٹنگ میں سفیروں اور ہائی کمشنروں سے خطاب کیا۔ میٹنگ میں شمال مشرقی خطے میں ابھرتے ہوئے امکانات اور مواقع کے ساتھ ساتھ تعاون اور عالمی سرمایہ کاری کے امکانات پر بات چیت پر توجہ مرکوز کی گئی۔

وزیر موصوف نے ہندوستان کے نئے ترقی کا انجن بننے کے لیے خطے کی صلاحیت پر زور دیا اور سرمایہ کاری کے سمٹ کو اس کی ترقی میں ایک اہم سنگ میل کے طور پر اجاگر کیا۔ انہوں نے عالمی سرمایہ کاروں کے لیے دستیاب متنوع مواقع اور پالیسیوں کو ہم آہنگ کرنے اور کاروبار کرنے میں آسانی کو بہتر بنانے کے لیے وزارت کی کوششوں پر روشنی ڈالی۔

وزیر  موصوف نے خطے کے وافر  قدرتی وسائل، زرعی صلاحیت، معدنی دولت اور قابل تجدید توانائی کے ذرائع پر زور دیا۔ انہوں نے شمال مشرقی خطے کے ثقافتی تنوع اور اسٹریٹجک محل وقوع پر بھی زور دیا، جو اسے تجارت اور کاروبار کے لیے ایک مثالی گیٹ وے بناتا ہے، خاص طور پر جنوب مشرقی ایشیا کے ساتھ۔

سیاحت کے شعبے میں تعاون بشمول بنیادی ڈھانچے کی ترقی اور خصوصی سیاحت کی بہترین پیشکشوں کی وزیر ریڈی نے حوصلہ افزائی کی۔ انہوں نے گزشتہ نو سالوں میں ہونے والی پیش رفت پر روشنی ڈالی، جس میں عالمی معیار کے بنیادی ڈھانچے جیسے ہوائی اڈوں، سڑکوں اور ریلوے میں 5 لاکھ کروڑ سے زیادہ کی نمایاں سرمایہ کاری کی گئی ہے۔

وزیر موصوف  نے ایک ماحولیاتی نظام کو فروغ دینے کے لیے حکومت کے عزم کا اظہار کیا جو اختراعات، اسٹارٹ اپس اور انٹرپرینیورشپ کو سپورٹ کرتا ہے۔ انہوں نے خطے کی بھرپور حیاتیاتی تنوع کو محفوظ رکھنے کے لیے پائیدار ترقی کو فروغ دینے کی اہمیت پر بھی زور دیا۔ وزیر ریڈی نے سفیروں اور ہائی کمشنروں سے گزارش کی  کہ وہ شمال مشرقی خطہ میں دستیاب متنوع مواقع کو تلاش کریں۔ سفیروں نے خطے کے مواقع میں گہری دلچسپی کا اظہار کیا اور اس اعتماد کا اظہار کیا کہ سرمایہ کاروں کا سربراہی اجلاس  سیاحت، زراعت اور ٹیکسٹائل جیسے نئے اور ابھرتے ہوئے شعبوں کو تلاش کرنے کے لیے ایک پلیٹ فارم فراہم کرے گا۔

تجارت کے وزیر مملکت ، جناب سوم پرکاش، خزانہ  کے وزیر مملکت جناب پنکج چودھری، امور خارجہ  کی وزارت کے وزیر  مملکت، جناب راجکمار رنجن اور شمال مشرقی خطے کی ترقی کے وزیر مملکت  ، جناب بی ایل ورما بھی میٹنگ میں موجود تھے۔

*****

ش ح – اک – رب

U: 5468