কেন্দ্রগী গৃহ মন্ত্রী অমদি কোওপরেসন মন্ত্রী, শ্রী অমিত সাহনা ঙসি নই দিল্লীদা ‘ভাইব্রেন্ত ভিলেজ প্রোগ্রাম’গী মখাদা পাঙথোকপা ৱর্কসোপ অমা হৌদোকখ্রে‍। কেন্দ্রগী গৃহ রাজ্য মন্ত্রী শ্রী নিত্যানন্দ রাই, শ্রী অজয় কুমার মিস্রা অমদি শ্রী নিসিথ প্রমানিক, কেন্দ্রগী হোম সেক্রেতরী, দি.জি., আই.তি.বি.পি., ভাইব্রেন্ত ভিলেজ প্রোগ্রামগী মখাদা লৈবা দিস্ত্রিক্তশিংগী দিস্ত্রিক্ত কল্লেক্তরশিং অমদি দিস্ত্রিক্ত দিভেলপমেন্ত ওফিসরশিং অমদি গৃহ মন্ত্রালয় অমদি কেন্দ্রগী অতৈ মন্ত্রালয়শিংগী মকোক থোংবা ওফিসরশিংনা ৱর্কসোপ অদুদা শরুক য়াখি‍।

মহাক্কী ৱারোলদা, শ্রী অমিত সাহনা, প্রধান মন্ত্রী শ্রী নরেন্দ্র মোদীনা কত্থোকপা কয়াগা লোয়ননা অমদি ঙমখৈগী খুঙ্গং পুম্নমক্তা লৈবাক্কী অতৈ মফমশিংদা লৈরিবা খুঙ্গংশিংগুম্না খুদোংচাবা পুম্নমক ফংহনগদবনি হায়বা সংবিধানগী ৱাখল্লোনগা লোয়ননা 'ভাইব্রেন্ত ভিলেজ প্রোগ্রাম' শেমগৎখিবনি হায়খি‍। ২০১৪দগী হৌরগা, প্রধান মন্ত্রী শ্রী নরেন্দ্র মোদীনা ঙমখৈগী মচাক মথুমশিং ফগৎহন্নবা হোৎনদুনা লাকপগা লোয়ননা ঙমখৈগী খুঙ্গংশিংগী মীয়ামগী য়াইফ-থৌরাংশিং পায়খৎলকখৎ অমদি হৌজিক্না ঙমখৈগী খুঙ্গংশিংদগী য়ুম হোংনরকপা লেপহন্নবা 'ভাইব্রেন্ত ভিলেজ প্রোগ্রাম পায়খৎলি হায়না মহাক্না হায়খি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা ভি.ভি.পি.গী মখাদা লৈরিবা ঙমখৈগী দিস্ত্রিক্তশিংদা দিস্ত্রিক্ত কল্লেক্তরশিংনা ভাইব্রেন্ত ভিলেজ প্রোগ্রামগী ইনোৎ হাপ্নবগীদমক ঙমখৈগী খুঙ্গং খুদিংমক্তা চহি খুদিংগী য়ামদ্রবদা থৌরাং ৫দি পায়খৎকদবনি হায়খি‍।

তুরিজমগা মরী লৈনবা থৌরাং ৫

ইমপ্লোইমেন্তকী খুদোংচাবা লৈহনবগা মরী লৈনবা থৌরাং ৫

লৌউ-শিংউ, হেন্দিক্রাফ্ত অমদি কোওপরেসনগা মরী লৈনবা থৌরাং ৫

তঙায় ফদবা ফেসিলিতীশিং হেনগৎহনবগা মরী লৈনবা থৌরাং ৫, অমদি,

কেন্দ্র অমদি স্তেতকী স্কীমশিংদা ১০০% ফংহন্নবা থৌরাং ৫‍।

হোম স্তে ফেসিলীতীশিংদা মরুওইবা মীৎয়েঙ থমবনা ভি..ভি.পি.বু তশেং তশেংবা মওংদা য়োকখৎপা অমদি পুক্নিং থৌগৎপা ঙমগনি হায়না শ্রী সাহনা হায়খি‍।

শ্রী অমিত সাহনা ভি.ভি.পি.গী মখাদা লৈবা খুঙ্গংশিংদা কোওপরেতিবকী খুত্থাঙদা থবক পীননবগী ওইথোকপা চাউনা লৈ হায়খি‍। আই.তি.বি.পি.গী নুংতীগী চাদিংগী য়ামদ্রবদা ৩০%দি খুঙ্গংদা ইমপ্লোইমেন্ত পীবগা মরী লৈনহনগদবনি হায়না মহাক্না হায়খি‍। মসিগা মরী লৈননা থাক খুদিংদা চাং নাইনা রিভিউ তৌগদনি হায়না মহাক্না হায়খি‍। স্তেত ৪ অমদি য়ু.তি.শিংদা লৈরিবা ঈ-পাউ নীংথিনা ফাওনফম লৈত্রিবা ঙমখৈগী খুঙ্গং ১৬৮দা কন্নেক্তিবিতী শেমগৎনবা অখন্নবা থৌরাংশিং পায়খৎকদবনি হায়না শ্রী সাহনা হায়খি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা ভারত লৈঙাক্না হৌখিবা চহি ৯ অসিদা ঙমখৈগী ইনফ্রাস্ত্রকচরদা লুপা করোর ২৫,০০০ হেন্না থাদখ্রে হায়খি‍। কিলোমিতর ১১৩৪ শাংবা ঙমখৈগী লম্বী শেম্লে অমদি চেক-পোস্ত অয়াম্বা শাবা লোইরে হায়না মহাক্না হায়খি‍। ঙমখৈগী খুঙ্গংশিং চাওখৎহন্নবগী মরুওইবা লম্বী ৩ লৈ – কেন্দ্রগী য়াইফ-থৌরাংশিং খুঙ্গংশিংদা ১০০% থবক্তা ওন্থোকপা, ফাইনেন্সিএল ইনক্লুজন য়োকখৎপা অমদি খুঙ্গংশিং অসিগা লৈবাক্কী মতৈ মফমশিংগগী মরক্তা দিজিতেল অমদি ইমোস্নেল কন্নেক্তিবিতী হেনগৎহনবনি‍। কেন্দ্র অমদি স্তেতকী থাক অনিমক্তা স্কীমশিং মেপ্পিং তৌনবগীদমক ভাইব্রেন্ত ভিলেজশিংদা প্রাইওরিতী পীগদবনি হায়না মহাক্না হায়খি‍।

প্রধান মন্ত্রী শ্রী নরেন্দ্র মোদীনা মতম পুম্বদা ঙমখৈগী খুঙ্গংশিং অসি লৈবাকসিগী অরোইবা খুঙ্গংশিং নত্তে অহানবা খুঙ্গংশিংনি হায়দুনতা লাক্লি হায়না শ্রী অমিত সাহনা হায়খি‍। ঐখোয়গী ঙমখৈ ঙাকপা হায়বসিনা মোদী লৈঙাক্কী প্রাইওরিতীনি অমদি মসি নেস্নেল সিক্যুরিতীগা মরী লৈনৈ অমসুং, খুঙ্গংশিং অসি ঙাক্তুনা থমদ্রবদি ঐখোয়না ঐখোয়গী ঙমখৈ শাফনা থম্বা ঙম্লোই হায়না মহাক্না হায়খি‍। ভাইব্রেন্ত ভিলেজশিং শেমগৎপনা লৈবাকসিগী ঙমখৈ ঙাকশেলদা অহেনবা মরোল অমা হাপকদৌরিবনি হায়না শ্রী অমিত সাহনা হায়খি‍। ভি.ভি.পি.গী ৱাখল্লোন অসি মরুওইবা ৱাফম ২ দা মীৎয়েঙ থমদুনা শেমগৎলকখিবনি –

সিক্যুরিতীদা মীৎয়েঙ থমদুনা মনুং হঞ্জিনবা মফমশিং অমদি খুদোংচাদবা ঈশিং নুংশিৎকী ফীভম লৈবা ঙমখৈদা মফমশিংদগী মীওইশিংনা ময়ুম মকৈ হোংলকপা তোকহনবা, অমদি, হায়রিবা খুঙ্গংশিং অসিবু শেমগত্তুনা সিকঞুরিতীগী অহেনবা মরোল অমা হাপচিনবনি‍।

ভারত সংবিধানগী ৱাখল্লোনগী মতুং ইন্না, খুঙ্গং খুদিংমক্না লৈবাকসিগী রিসোর্সশিংদা চপ মান্নবা মঙম লৈ অমদি খুঙ্গং অমত্তা হায়রিবা রিসোর্সশিং অসি ৱাৎহল্লোইদবনি হায়বসিনি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা, ভাইব্রেন্ত ভিলেজ প্রোগ্রামগী এক্রোনিম ওইরিবা ভি.ভি.পি.দা ‘আই.’ অমা হাপচিন্দুনা, মসিবু ভি.ভি.আই.পি., হায়বদি ভেরী ভেরী ইমপোর্তেন্ত প্রোগ্রাম ওইহনগদবনি হায়খি‍। নীং তম্লবা মতুংদা ঙমখৈগী খুঙ্গংশিংদা লৈরিবা খুঞ্জাশিংবু চাওখৎ লম্বী পরিংদা তুংওইনরগা থম্বিখি হায়না মহাক্না হায়খি‍।

হৌজিক্তি, প্রধান মন্ত্রী শ্রী নরেন্দ্র মোদীগী লুচিং মখাদা, থক্নবা ঈশিং, ইলেক্ত্রিকসিতী, হকশেলগী খুদোংচাবনচিংবা তঙায় ফদনা চঙদ্রবা য়াদ্রবা খুদোংচাবশিং ফংহন্দুনা লৈবাকসিগী মী পুম্নমক্তা মাইওন শুবা চাওখৎপগী ফীভম ফংহন্নবা মতমদু য়ৌরক্লে হায়না শ্রী অমিত সাহনা হায়খি‍।

*****