প্রধান মন্ত্রী শ্রী নরেন্দ্র মোদীনা মে ১১, ২০২৩দা নই দিল্লীগী প্রগতি মৈদান্দা নেস্নেল তেক্নোলোজী দে ২০২৩ পালন তৌরিবা থৌরম অমা হৌদোকখ্রে। থৌরম অসিনা মে ১১-১৪দা পাঙথোক্কদবা নেস্নেল তেক্নোলোজী দেগী ২৫শুবা চহিগী পালন থৌরম হৌদোক্লি। মরু ওইবা থৌরম অসিদা প্রধান মন্ত্রীনা লুপা করোর ৫,৮০০ হেনবা লৈবাক্কী সাইন্তিফিক অমসুং তেক্নোলোজীকেল এদভান্সমেন্তগা মরী লৈনবা তোঙান-তোঙানবা প্রোজেক্তশিং উরেপ-উয়ুং তমখি অমসুং জাতিদা কত্থোকখি। মসি লৈবাক্কী সাইন্তিফিক ইন্সতিত্যুসনশিং মপাঙ্গল কনখৎহন্নবা প্রধান মন্ত্রীগী ‘আত্মনির্ভর ভারত’কী বিজনগী পরিং মখাদা পাইখৎপনি।

উরেপ-উয়ুং তমখিবা প্রোজেক্তশিংদা লেজর ইন্তরফেরোমিতর গ্রেবিতেস্নেল ৱে ওবজর্বেতরী – ইন্দিয়া (এল.আই.জি.ও.-ইন্দিয়া), হিঙ্গোলি; হোমি ভাভা কেন্সর হোস্পিতাল এন্দ রিসর্চ সেন্তর, জাৎনি, ওরিশা; অমসুং তাতা মেমোরিএল হোস্পিতাল, মুম্বাইগী প্লেতিনম জুবিলী ব্লোক য়াওখি।

জাতিদা কত্থোকখিবা প্রোজেক্তশিংদা ফিসন মোলীবদেনম-৯৯ প্রদক্সন ফেসিলিতী, মুম্বাই; রিয়র আর্থ পর্মিনেন্ত মেগনেৎ প্লান্ত, বিশাখাপতনম; নেস্নেল হেদ্রোন বীম থেরাপী ফেসিলিতী, নবী মুম্বাই; রেদিওলোজিকেল রিসর্চ য়ুনিৎ, নবী মুম্বাই; হোমি ভাভা কেন্সর এন্দ রিসর্চ সেন্তর, বিশাখাপতনম; অমসুং ৱুমেন এন্দ চিলদ্রেন কেন্সর হোস্পিতাল বিল্দিং, নবী মুম্বাই য়াওরি।

থৌরম অসিদা প্রধান মন্ত্রীনা হন্দক্তা নৌনা ভারত্তা তৌখিবা সাইন্তিফিক অমসুং তেক্নোলোজীকেল এদভান্সমেন্তশিং উৎলিবা এক্সপোসু শঙ্গাখি অমসুং ৱাক-থ্রু অমা তৌখি। মহাক্না থৌরম অসিদা কোম্মেমোরেতিব স্তাম্প অমসুং শেনয়েক ফোঙখি।

থৌরম অসিদা ৱা ঙাংলদুনা প্রধান মন্ত্রীনা হায়খি মদুদি মে ১১ অসি ভারতকী পুৱারীদা খ্বাইদগী মরু ওইবা নুমিৎ অমনি। ঙসিগী নুমিৎ অসি পোখ্রান্দা ভারতকী বিজ্ঞানিকশংনা অচৌবা মাইপাকপা অমা পুরক্তুনা লৈবাক পুম্ববু চাউথোকচবা পোকহনখিবা নুমিৎ অদুনি। প্রধান মন্ত্রীনা হায়খি, “অতলজীনা ভারতকী মাইপাক্লবা ন্যুক্লিয়র তেস্তিংগী মতাংদা লাউথোকখিবা অদু ঐহাক্না কৈদৌনুংদা কাওরোই”। মহাক্না হায়খি মদুদি পোখ্রান ন্যুক্লিয়র তেস্তিংনা ভারতকী বিজ্ঞানগী তৌবা ঙম্বশিং অদু উৎখিবা খক্তা নত্তনা লৈবাক্কী মালেমদা কল্লিবা মফম অদু থাক ৱাংখৎহনখি। প্রধান মন্ত্রীনা হায়খি, “অতলজীগী ৱাহৈশিংদা হায়রবদা ঐখোয়গী খোঙচৎতা ঐখোয়না কৈদৌনুংদা লেপ্পা তৌদে অমসুং ঐখোয়গী লম্বীদা লাকপা শীংনবা অমা হেক্তদা তুং হন্দুনা কৈদৌনুংদা চেল্লোই”। প্রধান মন্ত্রীনা নেস্নেল তেক্নোলোজী দেগী নুমিৎনা লাকপদা প্রজা খুদিংমক্তা য়াইফ পাউজেল পীখি।

ঙসি শঙ্গাখিবা অচৌবা প্রোজেক্তশিংগী মতাংদা প্রধান মন্ত্রীনা মুম্বাইগী নেস্নেল হেদ্রোন বীম থেরাপী ফেসিলিতী অমসুং রেদিওলোজী রিসর্চ য়ুনিৎ, বিশাখাপতনমগী ফিসন মোলীবদিনম-৯৯ প্রদক্সন ফেসিলিতী, রিয়র আর্থ পর্মিনেন্ত মেগনেৎ প্লান্ত অমসুং তোঙান-তোঙানবা কেন্সর রিসর্চ হোস্পিতালশিং পনখি অমসুং মসিনা ন্যুক্লিয়র তেক্নোলোজীগী মতেংগা লোয়ননা লৈবাক চাউখৎহনবদা শাহৌ অমা পীরগনি হায়না ফোঙদোকখি। এল.আই.জি.ও.-ইন্দিয়াগী মতাংদা পল্লদুনা প্রধান মন্ত্রীনা এল.আই.জি.ও. অসি ২১শুবা চহিচাগী খ্বাইদগী খুমাং চাউশিল্লিবা সাইন্স অমসুং তেক্নোলোজীগী থৌশিল অমনি হায়খি। ওবজর্বেতরী অসিনা মহৈরোয়শিং অমসুং বিজ্ঞানিকশিংগীদমক রিসর্চকী অনৌবা খুদোংচাবশিং পুরক্লগনি হায়না মহাক্না ফোঙদোকখি।

প্রধান মন্ত্রীনা নৌহৌনা ফোঙদোকখি মদুদি ঙসি অমৃত কালগী অহৌবা মতম অসিদা ২০৪৭কী পান্দমশিং ঐখোয়গী মাংদা ময়েক শেংনা লৈরি। গ্রোথ, ইন্নোবেসন অমসুং সস্তেনেবল দিবেলপমেন্ত গোলশিংগীদমক ইনক্লুসিব ইকোসিস্তেম অমা শেম্বা মথৌ তাই হায়রদুনা প্রধান মন্ত্রীনা হায়খি, “ঐখোয়না লৈবাক অসিবু বিক্ষিৎ অমসুং আত্মনির্ভর ওইহনবা তাই”। খোঙথাং খুদিংমক্তা তেক্নোলোজীগী মরু ওইবা অদু থম্লদুনা মহাক্না হায় ভারতনা হীরম অসিদা হোলিস্তিক অমসুং ৩৬০-দিগ্রী এপ্রোচ অমগা লোয়ননা মাংদা চংশিল্লি। প্রধান মন্ত্রীনা হায়খি, “ভারতনা তেক্নোলোজীবু মাগী দোমিনেন্স তাক্নবা পাম্বৈ অমগী মহুৎ লৈবাক চাউখৎহন্নবা খুৎলাই অমা ওইনা লৌই”।

ঙসিগী থৌরমগী থিম ‘স্কুল তু স্তার্ত-অপস – ইগনাইতিং য়ং মাইন্দস তু ইন্নোবেৎ’ অসিবু থাগৎলদুনা প্রধান মন্ত্রীনা হায়খি ভারতকী তুংলমচৎ অসি ঙসিগী নহারোল অমদি অঙাংশিংনা লেপকনি। মহাক্না হায়খি ঙসিগী অঙাংশিং অমসুং নহারোলশিংগী অনীংবা, শক্তি অমসুং তৌবা ঙম্বশিংনা ভারতকী অচৌবা শক্তি ওইরি। দা. এ.পি.জে. অব্দুল কলামনা হায়খিবা ৱাফম অমা পল্লদুনা প্রধান মন্ত্রীনা লৌশিংগী মরু ওইবা অদু থমখি অমসুং ভারত অসি নোলেজ সোসাইতী অমা ওইনা চাউখৎলক্লি, থোং মান্নবা মতৌগা লোয়ননা থবক পাইখৎলি হায়না ফোঙদোকখি। মহাক্না নহাগী ৱাখল্লোন্দা ইনোৎ হাপ্নবা হৌখিবা চহি মাপন্দা লৈবাক অসিদা শেমগৎখিবা মপাঙ্গল কনবা য়ুম্ফমগী মতাংদসু ফোঙদোকখি।

প্রধান মন্ত্রীনা হায়খি জিলা ৭০০তা অতল তিঙ্করিং লেব লিশিং ১০না ইন্নোবেসন নর্সরীশিং ওইরি। হেন্না মরু ওইরিবদি লেবশিং অসিগী চাদা ৬০দি সরকার অমসুং খুঙ্গংগী স্কুলশিংদা লৈরি। মহাক্না হায়খি মহৈরোয় লাখ ৭৫ হেনবনা অতল তিঙ্করিং লেবতা ইন্নোবেসন প্রোজেক্ত লাখ ১২ হেনবদা কন্না থবক তৌরি। প্রধান মন্ত্রীনা হায় মসি নহা ওইরিবা বিজ্ঞানিকশিং স্কুলশিংদগী থোকপগী খুদম অমনি অমসুং মসিনা লৈবাক্কী কাচিন-কোয়াদা য়ৌশিল্লি অমসুং মখোয়বু লমজিংবা, মখোয়গী তেলেন্ত য়োকখৎপা অমসুং মখোয়গী আইদিয়াশিং অদুবু ইমপ্লিমেন্ত তৌবদা মখোয়গী মতেং পাংবা হায়বা অসি মীপুম খুদিংমক্কী থৌদাংনি। মহাক্না হায়খি স্তার্ত-অপ কয়া অতল ইন্নোবেসন সেন্তরশিং(এ.আই.সি.)দা ইনক্যুবেৎ তৌখি অমসুং মসিনা ‘ন্যু ইন্দিয়া’গী অনৌবা লেবোরেতীশিং ওইরক্লি। প্রধান মন্ত্রীনা হায়খি, “ভারতকী তিঙ্কর-প্রিনোরশিংনা অথুবদা মালেমগী মাংজিল থারিবা ওন্তপ্রিনোরশিং ওইরগনি”।

হোৎনবা কনবা মরু ওই হায়না মহাঋসি পতাঞ্জলীগী মতাংদা পল্লদুনা প্রধান মন্ত্রীনা হায়খি ২০১৪গী মতুংদা পাইখৎখিবা খোঙথাংশিংনা মরম ওইদুনা সাইন্স অমসুং তেক্নোলোজীগী লমদা অচৌবা অহোংবশিং লাকখি। সাইন্সনা লাইরিক্কী মপান থোরক্তুনা এক্সপরিমেন্তশিংগী খুত্থাংদা পেতেন্তশিংদা ওল্লক্লি হায়না ফোঙদোক্লদুনা শ্রী মোদীনা হায়খি, “স্তার্ত-অপ ইন্দিয়া কেম্পেন, দিজিতেল ইন্দিয়া অমসুং নেস্নেল এজুকেসন পোলিসীনা ভারতপু লম অসিদা অনৌবা পনখৈশিং য়ৌবা ঙমহল্লি। প্রধান মন্ত্রীনা হায়, “পেতেন্তশিংগী মশিং অসি চহি ১০গী মমাংদা চহি অমদা ৪,০০০ ওইরম্বদগী ঙসিদি ৩০,০০০ হেন্না হেনবা ঙম্লে। দিজাইনশিংগী রেজিস্ত্রেসন অসি চপ মান্নবা মতম অসিদা ১০,০০০দগী ১৫,০০০দা হেনগৎলকখি। ত্রেদমার্কশিংগী মশিং অসি ৭০,০০০দগী তানা লৈরম্বা অদু ২,৫০,০০০দা হেনগৎলকখি”।

শ্রী মোদীনা হায়খি, “ঙসি ভারতনা তেক লীদর অমা ওইবগ মথৌ তাবা মাইকৈ খুদিংমক্তা খোঙজেল য়াংনা চংশিল্লি।  মহাক্না হায়খি লৈবাক অসিদা তেক ইনক্যুবেসন সেন্তরশিংগী মশিং অসি ২০১৪দা চাউরাক্না ১৫০ লৈরম্বদগী ঙসিদি ৬৫০ হেন্না লৈরে। প্রধান মন্ত্রীনা হায়খি ভারতকী গ্লোবেল ইন্নোবেসন ইন্দেক্স রেঙ্ক অসি ৮১দা লৈরমদগী ৪০দা হায়গৎলকখি, মসিদা লৈবাক্কী নহারোলশিংনা মখোয়গী মশাগী দিজিতেল ভেঞ্চরশিং অমসুং স্তার্ত-অপশিং লিংখৎলি। ২০১৪গা চাংদম্নরদুনা প্রধান মন্ত্রীনা হায়খি লৈবাক্কী স্তার্ত-অপশিংগী মশিং চাউরাক্না ১০০ লৈরম্বদগি ঙসিদি শকখঙলবা স্তার্ত-অপশিংগী মশিং লাখ অমদা হেনগৎলকখি অমসুং মসিনা ভারতপু মালেমগী অহুমশুবা খ্বাইদগী চাউবা স্তার্ত-অপ ইকোসিস্তেম ওইহনখি। ভারতকী মতিক-ময়াই অমসুং তেলেন্তকী মতাংদা প্রধান মন্ত্রীনা হায়খি মালেমনা শেন্মীৎলোন্দা খুদোংথিবা মায়োক্নরিঙৈ তানফম অমদা মফম অসিদা শাহৌ লৈরি। মীকুপ অসি পোলিসীমেকরশিং, সাইন্তিফিক কম্ম্যুনিতী, লৈবাক শিনবা থুংবদা লৈরিবা রিসর্চ লেবশিং অমসুং প্রাইবেৎ সেক্তরগীদমক য়াম্না মরু ওই। প্রধান মন্ত্রীনা নৌহৌননা ফোঙদোকখি মদুদি স্কুলদগী স্তার্ত-অপশিংগী খোঙচৎ অসি মহৈরোয়শিংনা শেমজরবসু স্তেকহোল্দরশিংনা মতম চুপ্পদা লমজিংলি অমসুং পুক্নিং থৌগৎলি। প্রধান মন্ত্রীনা হীরম অসিদা মতেং পুম্নমক পীখি।

প্রধান মন্ত্রীনা হায়খি তেক্নোলোজীগী সোসিএল কনতেক্স খঙনা ঐখোয়না মাংদা চংশিনবা মতমদা তেক্নোলোজীনা এম্পাৱরমেন্তগী শক্তি লৈরবা খুৎলাই অমা ওইরগনি। মসিনা খেন্নবা লৈরিবা অসি কোকহন্নবা অমসুং সোসিএল জস্তিস থৌগৎনবা খুৎলাই অমা ওইরি। প্রধান মন্ত্রী তেক্নোলোজী অসি মীচম প্রজানা লাম্বা ফংদনা লৈরমখিবা অমসুং দেবিৎ, ক্রেদিৎ কার্দশিং অসি স্তেতস সিম্বলশিং ওইরমখিবা মতম অদু নীংশিংখি। অদুবু ঙসিদি মসিগী অচম্বা মওংনা মরম ওইদুনা য়ু.পি.আই. অসি অনৌবা চৎনবী ওইরি। ঙসি ভারত অসি দেতা খ্বাইদগী ৱাংনা শীজিন্নবা লৈবাকশিংগী মনুংদা অমা ওইরি। রুরেল ইন্তর্নেৎ য়ুজরশিংগী মশিংনা অর্বান য়ুজরশিংদগী হেনখি। জে.এ.এম. ত্রিনিতী, জেম পোর্তেল, কোৱিন পোর্তেল, ই-নাম অসিনা তেক্নোলোজীবু ইনক্লুজন এজেন্ত অমা ওইহল্লি।

প্রধান মন্ত্রীনা হায়খি তেক্নোলোজী চুম্না শীজিন্নবনা খুন্নাইদা অনৌবা শক্তি পী, ঙসি সরকারনা পুন্সিগী তাঙ্কক খুদিংমক্কীদমক তেক্নোলোজী শীজিন্নদুনা সর্ভিসশিং পীরি। প্রধান মন্ত্রীনা হায়খি ওনলাইন বর্থ সর্তিফিকেৎশিং, ই-পাথশালা অমসুং দিক্ষা ই-লর্নিং প্লেৎফোর্মশিং, স্কোলরশিপ পোর্তেল, থবক তৌরিঙৈ মনুংদা য়ুনিভর্সেল এক্সেস নম্বর, অনা লায়েংগীদমক ই-সঞ্জীবনি, অমসুং অহলশিংগীদমক জীবন প্রমান, অসিগুম্বা সোল্যুশিং অসিনা প্রজাশিংবু খোঙথাং খুদিংমক্তা মতেং পাংলি। মহাক্না লাইনা  পাসপোর্তশিং লৌহনবা, দিজি য়াত্রা অমসুং দিজিলোক্করগী থৌশিলশিং অসিনা সোসিএল জস্তিস ফংহল্লি অমসুং ইজ ওফ লিবিং হেনগৎহল্লি হায়না খুদমশিং পীখি।

তেক্নোলোজীগী লমদা লেপ্পা লৈতনা হোংলক্লিবা অসিগী মতাংদা প্রধান মন্ত্রীনা ভারতকী নহারোলনা খোঙজেল অসি য়াংখৎহন্দিনা লৈবাক অসিবু লমজিংগনি হায়বগী থাজবা ফোঙদোকখি। মহাক্না হায়খি এ.আই. তুলশিংনা অনৌবা গেম চেঞ্জরশিং ওইরকখি, হেল্থ সেক্তরদা পুরক্লিবা লোইনাইদ্রবা ওইথোকপা য়াবশিং, অমসুং দ্রোন তেক্নোলোকীদা অনৌবা ইন্নোবেসনশিং তৌরিবা অমসুং থেরাপ্যুতিক সেক্তর অসিগী মতাংদা পনখি অমসুং হায়খি ভারতনা অসিগুম্বা রিভোল্যুস্নরী তেক্নোলোজীদা মাংজিল থাগদবনি।

মীপাল তাংদবা দিফেন্স সেক্তর অমগী লেরিবা ভারতকী পান্দমগী মতাংদা পল্লদুনা প্রধান মন্ত্রীনা ইন্নোবেসন্স ফোর দিফেন্স এক্সিলেন্স (আইদেক্স)গী মতাংদা  পনখি অমসুং ঙাকশেল মন্ত্রালয়না লুপা করোর ৩৫০ হেনবা আইদেক্সতগী ইন্নোবেসন ১৪ প্রোক্যুর তৌখিবদা নুংঙাইবা ফোঙদোকখি। প্রধান মন্ত্রীনা আই-ক্রিএৎ অমসুং দি.আর.দি.ই. য়ং সাইন্তিস্তস লেবশিংগুম্বা থৌশিলশিংগী মতাংদা পনখি অমসুং খোঙথাংশিং অসিনা অনৌবা মায়োল অমা পীখি হায়না ফোঙদোকখি। স্পেস সেক্তরদা পুরক্লিবা অনৌবা রিফোর্মশিংগী মতাংদা প্রধান মন্ত্রীনা হায়খি ভারতনা গ্লোবেল গেম চেঞ্জর অমা ওইরক্লি অমসুং এস.এস.এল.ভি. অমসুং পি.এস.এল.ভি. ওর্বিতেল প্লেৎফোর্মশিংগুম্বা তেক্নোলোজীশিংগী মতাংদা পনখি। শ্রী মোদীনা স্পেস সেক্তরদা নহারোলশিং অমসুং স্তার্ত-অপশিংগীদমক অনৌবা খুদোংচাবশিং পীবা মথৌ তাই হায়না অকনবা ৱাফম থমখি অমসুং কোদিং, গেমিং অমসুং প্রোগ্রামিংগী লমদা মাংজিল থানবসু হায়খি। প্রধান মন্ত্রীনা ভারতনা সেমিকন্দক্তরগুম্বা অনৌবা এভেন্যুশিংদা মাগী প্রজেন্স হেনগৎহল্লিবা তানফম অসিদা পি.এল.আই. স্কিমগুম্বা পোলিসী-লেবেল ইনিসিএতিবশিংগী মতাংদা পনখি।

ইন্নোবেসন অমসুং সেক্যুরিতীদা হেকাথোনশিংগী থৌদাংগী মতাংদা পল্লদুনা প্রধান মন্ত্রীনা হায়খি সরকারনা মহৈরোয়শিংনা অনৌবা শীংনবশিং পাইখৎনবা হেকাথোনগী কলচর অমা লেপ্পা লৈতনা প্রমোৎ তৌরি অমসুং মখোয়না হেন্দ-হোল্দিং তৌবগী মথৌ তাবা অমসুং মসিগীদমক ফ্রেমৱার্ক অমা শেম্বা মথৌ তাই। অতল তিঙ্করিং লেবশিংদগী থোরকপা নহারোলশিংগীদমক ইন্সতিত্যুস্নেলাইজ সিস্তেম অমা থম্বা মথৌ তাই হায়না মহাক্না অপাম্বা ফোঙদোকখি। প্রধান মন্ত্রীনা হায়খি, “তোঙান-তোঙানবা মফমশিংদা লৈবাক অসিদা লেব ১০০ মশক খঙদোক্তুনা য়ুথ দ্রিবন ওইহনবা য়ারোইদ্রা?”। ক্লীন ইনর্জী অমসুং মহৌশাগী লৌউ-পথাপতা অখন্নবা মীৎয়েং চংলিবা লমশিংগী মতাংদা প্রধান মন্ত্রীনা রিসর্চ অমসুং তেক্নোলোজী প্রমোৎ তৌবগী মতাংদা ফোঙদোকখি। ৱারোল পীবা লোইশিনবদা প্রধান মন্ত্রীনা নেস্নেল তেক্নোলোজী ৱীকনা মসিগী ওইথোকপা য়াবশিং অসি মঙফাওনহনবদা মরু ওইবা থৌদাং অমা লৌগনি হায়না থাজবা ফোঙদোকখি।

ঙাকশেল মন্ত্রী শ্রী রাজনাথ সিংহনা মহাক্কী ৱারোলদা হায়খি মদুদি ১৯৯৮গী পোখ্রান ন্যুক্লিয়র তেস্তশিংনা মালেমদা ভারত অসি শান্তি পাম্বা লৈবাক অমা ওইরবসু ‘বসুধৈব কুতুম্বকম’ অমসুং ‘অহিমসা পারামো ধর্ম’ হায়ব অসিদা থাজবা থম্মি অমসুং কনাগুম্বা অমত্তনা লৈবাক অসিগী সোবরেন্তী, ইন্তিগ্রিতী অমসুং য়ুনিতীদা অকাইবা পীবা য়ারোই।

ঙাকশেল মন্ত্রীনা হায়খি, “ভারতনা মশাগীদমক শান্তিগী ৱাখল্লোন পাম্বা খক্তা নত্তনা মালেমদা মসিগী পাউজেলসু পীখি। ভগবান বুদ্ধ অমসুং জাতিগী মপা মহাত্মা গান্ধীগুম্বা মীৎয়েং শান্না উবা ঙম্বা মীওইশিং অসি ভারতনা মালেমদা পীবা খুদোলনি। ঐখোয়না লৈবাক অমত্তা খুদুম চন্নবা হোৎনখিবা অমসুং মীখা পোন্না থম্না হোৎনখিবা লৈতে। অদুবু পোখ্রান তেস্তশিংনা ঐখোয়গী দিগনিতীদা শীংনরকপা খুদিংমক্তা মতিক চাবা পাউখুম পীগনি হায়বগী পাউজেল অমা পীখি।

শ্রী রাজনাথ সিংহনা নেস্নেল তেক্নোলোজী দে অসি লৈবাক্কী তেক্নোলোজীগী মাইপাকপশিং অদু শকখঙবগা লোয়ননা সাইন্তিফিক এপ্রোচ অমা পাইখৎনবা ইথিল অমা ওইনা লৌনরি। মহাক্না হায়খি লৈবাক অমা চাউখৎহনবদা সাইন্সকী থৌদাং অসি মরু ওই মসি শাক্তিগী হৌরকফমনি। মহাক্না হায়খি সাইন্তিফিক এপ্রোচনা নহাশিংবু জাতিদা শেমগৎপা অমসুং হোলিস্তিক দিবেলপমেন্ত পুরকপদা শরুক তম্নবা ইথিল পীরি।

ঙাকশেল মন্ত্রীনা ভারত অসি দেমোগ্রাফিক দিবিদেন্তগী তাঙ্কক অমদা লৈরি, শক্তি লৈরবা হ্যুমেন রিসোর্স অমা লৈজৈ মসিনা মালেমগী ফম্পাল অসিদা ইকাই খুম্ননীংঙাই ওইবা মফম অমা কন্নবা লমজিংখি। মহাক্না মপাঙ্গল কনবা, নুংঙাই য়াইফবা অমসুং চাউখৎপা ভারত অমগী পান্দম ফংনবা হ্যুমেন রিসোর্স মপুং ফানা শীজিন্ননবা হায়খি।

শ্রী রাজনাথ সিংহনা হায়খি, “প্রধান মন্ত্রী শ্রী নরেন্দ্র মোদীগী লুচিং মখাদা ঐখোয়না জয় জৱান, জয় কিসান, জয় বিজ্ঞান অমসুং জয় অনুসন্ধনগী ফিরেপকা লোয়ননা মাংদা চংশিল্লি। ঐখোয়না মালেমগী থাক য়ৌবা ঙমখি অমসুং মালেমনা ভারত্তা অনৌবা থাজবা থম্মি। ঐখোয়না মপাঙ্গল কনবা অমসুং মীপাল তাংদবা ‘অনৌবা ভারত’ অমা শেমগৎপগী ঐখোয়গী মঙলান অদু মঙফাওননবা হোৎনবদা মাইপাক্কনি”।

থৌরম পাঙথোকফম অসি নই দিল্লীগী প্রগতি মৈদান (হোল নম্বর ৫ অমসুং ৪) ওইখি। গ্রান্দ এক্সপো অসিদা অতল ইন্নোবেসন মিসন, নিতি আয়োগ, দি.এস.তি., দি.আর.দি.ও., দি.ও.এস., দি.এ.ই., সি.এস.আই.আর., দি.বি.তি., এম.ও.ই.এস., দি.ও.তি., মৈতী, এ.আই.সি.তি.ই. অমসুং দি.পি.আই.আই.তি. অসিগুম্বা স্তেকহোল্দর মন্ত্রালয়শিং অমসুং বিভাগশিংনা শরুক য়ারি।

দি.আর.দি.ও. পেবিলিয়ন্দা দি.আর.দি.ও. লেবোরেতরী ৩০গী মথক, দি.আর.দি.ও. য়ং সাইন্তিস্ত লেবোরেতোরীস (দি.ৱাই.এস.এল.শিং), তেক্নোলোজী দিবেলপমেন্ত ফন্দ (তি.দি.এফ.), দি.আর.দি.ও. ইন্দস্ত্রী একাদেমিয়া-সেন্তর ওফ এক্সিলেন্স (দি.আই.এ.-সি.ও.ই.) অমসুং ব্রহ্মোসনা থৌরম অসিগী থিম মখাদা ইন্দিজিনস ওইনা দিজাইন তৌবা অমসুং দিবেলপ তৌবা সিস্তেমশিং, তেক্নোলোজীশিং অমসুং ইন্নোবেসনশিংগী মখল কয়া উৎলি। দি.আর.দি.ই.না ইন্নোবেতিব তেক্নোলোজী অমসুং প্রদক্ত কয়া চহি খরা অসিদা ইন্দস্ত্রীগা লোয়ননা খুৎশম্নদুনা দিবেলপ তৌখিবশিং পুথোকখি। তি.দি.এফ. অমসুং দি.আই.এ.-সি.ও.ই.গী মখাদা এম.এস.এম.ই. অমসুং  ইন্দস্ত্রী ১২না শরুক য়ারি।

মমিং লৈরবা অতল ইন্নোবেসন মিসন (এ.আই.এম.) অসিদা দি.আর.দি.ও.না দি.ই.বি.ই.এল. বেঙ্গলুরুনা দিবেলপ তৌবা একজোস্কেলেতন, অমসুং সি.এ.বি.এস বেঙ্গলুরুনা দিবেলপ তৌবা এয়রবোর্ন কম্ম্যুনিকেসম সিস্তেম মীজরস (সি.এস.এম.)গী এ.আই. বেজ ওদিও ত্রান্সক্রিপ্সন ত্রান্সলেসন অমসুং এ.আই. তোলবোক্সশিং; এস.এস.পি.এল. দিল্লীনা দিবেলপ তৌবা লেজর বেজ অন্দরৱাতর কম্ম্যুনিকেসন সিস্তেম; অমসুং দি.ৱাই.এস.এল.-এ.আই.না দিবেলপ তৌবা ইন্তর্নেৎ ওফ বেত্তলফিল্দ থিংস (আই.ও.ব ই.তি.) উৎলি। দি.আর.দি.ই.না মে ১৩দা মোতিবেস্নেল তোকশিং শিল্লি মসিদা দি.ৱাই.এস.এল.গী দিরেক্তরশিং অমসুং ইন্দস্ত্রী অমসুং একাদেমিয়াগী স্পীকরশিংনা ৱা ঙাংগনি।

****