مرکزی وزیر داخلہ اور امداد باہمی کے وزیر جناب  امت شاہ نے آج نئی دہلی میں نئی دہلی میونسپل کارپوریشن کے 4400ملازمین کو مستقل کرنے پر تقرری نامے تقسیم کئے۔

جناب امت شاہ نے  مختلف پروجیکٹوں کا افتتاح بھی کیا۔ اس موقع پر دہلی کے لیفٹیننٹ گورنر جناب  ونے کمار سکسینہ ، مرکزی وزیر  مملکت برائے خارجہ امور  محترمہ میناکشی لیکھی اور مرکزی داخلہ سیکریٹری سمیت متعدد معزز شخصیات موجود تھیں۔

اپنے خطاب میں جناب امت شاہ نے کہا کہ وزیر اعظم جناب نریندر مودی جی نے فیصلہ لینے کی اپنی صلاحیت کے سبب کئی شعبوں میں غیر یقینی کو ختم کرنے میں کامیابی حاصل کی ہے اور اس کی ایک اہم مثال آج کا یہ پروگرام ہے۔ انہوں نے کہا کہ ملک کا ہربزرگ، بچہ اور نوجوان یہی کہتا ہے کہ مودی ہے تو ممکن ہے۔ جناب شاہ نے کہا کہ وزیر اعظم مودی نے خود حکومت ہند کی ہر وزارت میں نوکری کی شرائط اور بھرتی کے ضابطوں میں وقت کے مطابق تبدیلیوں پر بہت زور دیا ہے اور اسی کا نتیجہ ہے کہ آج ایک معنی میں صرف 4400ملازمین کے لئے ہی نہیں بلکہ آنے والے وقت میں کئی ملازمین کے لئے بھی سہولت دینے کا کام مودی جی نے کیا ہے۔

مرکزی وزیر داخلہ اور امداد باہمی کے وزیر نے کہا کہ مودی جی کے اس فیصلے کے سبب آج سماج کے پسماندہ طبقے کے لوگوں کو احترام، عزت اور مستقبل کا استحکام بھی حاصل ہوا ہے۔ انہوں نے کہا کہ آزادی کے امرت مہوتسو میں آج جب ہندوستان جی-20 کی صدارت کررہا ہے، اس وقت آپ کا بڑھا ہوا حوصلہ دہلی کو سنوارنے میں بہت کام آئے گا۔جناب شاہ نے کہا کہ این ڈی ایم سی کا شعبہ بہت اہم ہے، کیونکہ یہاں ملک کی پالیسیاں طے ہوتی ہے، غیر ملکی مہمان آتے ہیں اور پوری دنیا میں ہندوستان کے پیغام اور خوشبو کو پھیلانے کے لئے یہ شعبہ بہت اہم ہے۔ انہوں نے کہا کہ این ڈی ایم سی کے 43مربع کلو میٹر علاقے میں لاکھوں لوگوں کے لئے بنیادی سہولتیں فراہم کرنا این ڈی ایم سی کی ذمہ داری ہے۔

جناب امت شاہ نے کہا کہ این ڈی ایم سی کا کام ملک بھر میں اپنی ہم مرتبہ اِکائیوں میں سب سے اچھا مانا جاتا ہے اور اے اے+کریڈٹ ریٹنگ کے ساتھ اقتصادی طور سے بھی این ڈی ایم سی خود کفیل ہے۔ اس کا کم سے کم ایکولوجیکل اثرات کے ساتھ   ترقی کا کام کرنے کے لئے کئی اسکیمیں بنائی گئی ہیں۔انہوں نے کہا کہ این ڈی ایم سی کی 13000کرم یوگیوں کی اس ٹیم میں 4400 لوگ آج  قانونی طور سے جڑ گئے ہیں، اس  سے یہ خاندان بڑا ہو گیا ہے۔ انہوں نے کہا کہ ان 4400کرم یوگیوں کا تعارف نام سے زیادہ کام سے ہوتا ہے۔ چاہے صفائی ہو، علاقے کو سرسبز بنانا ہو، بلا رکاوٹ بجلی کی سپلائی ہو، ہر واہ واہی کی بنیاد میں ان 4400کرم یوگیوں کا پسینہ اور این ڈی ایم سی کے تئیں ان کی ایمانداری اور محنت دکھائی دیتی ہے۔ انہوں نے کہا کہ اب تک ان لوگوں کو اپنی محنت سے نام ملا تھا ، لیکن آج مودی جی نے انہیں نام کے ساتھ احترام اور تحفظ بھی  دیا ہے۔

مرکزی وزیر داخلہ نے کہا کہ  بھرتی کے ضابطوں میں ضروری تبدیلی کرنے اور ان لوگوں کو مستقل کرنے میں آرہی انتظامی رکاوٹوں کو دور کرنے میں  وزارت داخلہ کے حکام اور ڈی او پی ٹی نے بہت بڑا رول ادا کیا ہے۔ انہوں نے کہا کہ تقریباً 900اضافی عہدے وضع کئے گئے، جس کے بعد 4400 لوگوں کو مستقل کیا جاسکا ہے۔ انہوں نے کہا کہ مستقل ہونے کے بعد اوسطاً 32000روپے کی تنخواہ یقینی ہوجائے گی اور کچھ لوگوں کو اس سے اوپر کا لیول بھی ملے گا۔ این ڈی ایم سی کی   کیش لیس صحت اسکیم، ایل ٹی سی، عہدوں میں ترقی کے موقعے اور این ڈی ایم سی کے سرکاری مکانوں پر بھی ان کا حق  یقینی ہوجائے گا۔ انہوں نے کہا کہ یہ تمام لوگ ان سہولتوں کے حقدار کافی پہلےسے تھے، لیکن موجی کے اس فیصلے کے سبب انہیں اپنا حق آج مل رہا ہے۔

جناب امت شاہ نے کہا کہ آج پشپ وہار ہاؤسنگ کمپلیکس میں 120 نئے      فلیٹوں کا بھی وقف ہورہا ہے۔ اس کے علاوہ رنجیت سنگھ فلائی اوور اور صفدر جنگ فلائی اوور کی جدید کاری اور سجاوٹ بھی ہورہی ہے۔ انہوں نے کہا کہ وزیر اعظم مودی جی کئی شعبوں میں ترقی کی بنیاد رکھنے والے شخص ہیں۔جناب شاہ نے کہا کہ 2014 سے پہلے شہری ترقی کے شعبے میں سرکار کی کوئی پالیسی ہی نہیں تھی، لیکن 2014 کے بعد مودی جی نے ہر شعبے کو ترقی دینے کے لئے آگے بڑھ کر ذمہ داری لی اور ایک جامع ، نتیجہ خیز شہری ترقی کی پالیسی بنائی، جو   5ستونوں پر مبنی ہے ، جس کے تحت شہر کے گورننس کو بہتر بنانے کا بیڑا   اٹھایا۔ ای –گورننس ، اسمارٹ سٹی مشن ، اِنٹی گریٹیڈ کمانڈ اینڈ کنٹرول سینٹر اور سی سی ٹی وی نیٹ ورک کے توسط سے شہر کے گورننس کو بہتر بنانے کا کام کیا۔ اس کے ساتھ ہی شہر کے بنیادی ڈھانچے میں بھی کئی اسکیموں کے تحت حکومت ہند نے کئی تبدیلیاں کی۔ جیسے امرت مشن، ریرا قانون، میٹرو کے جال اور الیکٹرک بسوں سے شہروں کے بنیادی ڈھانچے اورماحولیات میں تبدیلی دیکھنے کو ملی ہے۔ انہوں نے کہا کہ شہر کی صاف صفائی پر بھی توجہ دی گئی۔شفاف توانائی، سوچھ بھارت ابھیان اور عوامی بیت الخلاء کی تعمیر ، صاف توانائی، سولر روف ٹاپ اور  ا یل ای ڈی لائٹس کے توسط سے شہر کی صاف صفائی کو بہتر کرنے کا کام نریندر مودی سرکار نے کیا۔ جناب شاہ نے کہا کہ شہری غریبوں کی بہبود کے لئے تقریباً ایک کروڑ 50 لاکھ  شہری غریبوں کے لئے گھر بنانے کا کام کیا۔ پردھان منتری سوندھی یوجنا کے کے توسط سے     ریہڑی پٹری والوں کو خود کفیل بنانے کا کام کیا اور ڈیجیٹل لین دین کے ذریعے انہیں آسانی سے بیکنگ سہولت مل سکے ، اس کے لئے کام کیا اور ریاستوں و شہروں کے درمیان ایک صحت مند مقابلہ آرائی کو بڑھاوا دینے کا کام بھی کیا۔

مرکزی وزیر داخلہ و امداد باہمی کے وزیر نے کہا کہ مودی جی کی نتیجہ خیز شہری ترقی کی پالیسی کے سبب آج ملک کے شہر بدل رہے ہیں۔ انہوں نے کہا کہ آنے والے دنوں میں این ڈی ایم سی کو مزید مضبوط کرناہے، خدمات کو خصوصی اور وسیع بنانا ہے۔ اس کے ساتھ ساتھ صاف صفائی کو فرض تسلیم کرکے پورے این ڈی ایم سی علاقے میں صاف صفائی کی عادت کو بڑھاوا دینا ہے۔ جناب شاہ نے کہا کہ آج مودی جی کے ایک اہم فیصلے کے سبب 4400ملازمین کی زندگی میں حوصلہ ، جوش  اور امید کی نئی کرن آئی ہے۔

***********

ش ح۔ج ق۔ن ع

(U: 4800)