ঙসি ভারতকী উপ রাস্ত্রপতি শ্রী জগদীপ ধনকারনা হায়খি মদুদি মন কি বাত থৌরমগী ১০০শুবা ইপিসোদ মপুংফার, থৌরম অসি India @ 100গী য়ুম্ফম্নি। ২০৪৭দা লৈবাক অসিগী চহি ১০০শুবা থৌরম পাংথোকপা মতমদা ভারতনা মালেমগী মকোক্তা লৈরগনি।

ইনফোর্মেসন অমসুং ব্রোদকাস্তিং মিনিস্ত্রিনা শীনবা ‘Mann Ki Baat @ 100’গী জাতি থাক্কী মীফম হৌদোক্লদুনা শ্রী ধনকারনা হায়খি মন কি বাত লৈবাক অসিগী কাচিন-কোয়া শীনবা থুংনা য়ৌরে অমসুং মীয়াম্না তাবা অমসুং পাম্নবদা লাম্বা লৈত্রে। মন কি বাতনা লমদম অসিগী কলা অমসুং খুৎহৈবশিংগী কৈথেল অমা পীরে, অৱাং-নোংপোক অমসুং অতোপ্পা রাজ্যশিংগী কলচর মমিং চৎহল্লে।

উপ রাস্ত্রপতিনা হায়খি সরকারগী থবকশিং হায়বদি শ্বাছ ভারত, বেতি বচাউ বেতি পরাউ মীয়ামগী খোঙজং ওইহনবদা মন কি বাতনা অচৌবা ইথিল পীরে। কোবিদ লাইচৎ মনুংদা প্রধান মন্ত্রীগী ৱারোল অসিনা লৈবাক মীয়ামগী থাজবগী মৈরা অমা ওইখি।

মহাক্না হায়খি থৌরম অসিগী ১০০শুবা ইপিসোদ অসি (এপ্রিল ৩০,২০২৩দা শন্দোক্কদবা) পুৱারি ওইনা মাইপাকপা অমনি। থৌরম অসি লমদম অসিগী কলা অমসুং খুৎহৈবশিংগী কৈথেল অমা পীরে, অৱাং-নোংপোক অমসুং অতোপ্পা রাজ্যশিং ভারতকী অতৈ মফমশিং খঙহন্নবা অফবা মফম অমা ওইরে। তশেংনা হায়রবদা, মন কি বাত অসি ঐখোয়গী সভেত্যগী চৎনবীশিংদা লৈরিবা ঐখোয়গী ৱাখল্লোনগী মমি অমনি।

উপ রাস্ত্রপতিনা হায়খি কনাগুম্বা অমনা মতম পুম্নমক্তা লৈবাক্কী থবক্না অহানবা ওইনা লৌগদবনি। মীখলদা ত্রাইবেল নুপী অমা ভারতকী রাস্ত্রপতি ওইনা খনখিবা অসি নারি শক্তিনা লমজিংবা ভারতকী চাউখৎপগী ৱারিনি। তোঙান-তোঙানবা য়াইফ-থৌরাংশিং হায়বদি দাইরেক্ত বেনিফিদ ত্রান্সফর, পি.এম উজ্জৱালা য়োজনা, পি.এম কিসান সম্মান নিধি য়োজনা অমসুং অতোপ্পশিংনা লৈবাক অসিগী খুন্নাই অমসুং শেন্মিৎলোন্দা অচৌবা অহোঙবা অমা পুরক্লে।

থৌরম অসিদা উপ রাস্ত্রপতিনা লাইরিক অনি ফোঙখি। অহানবা লাইরিক, মন কি বাতকী খোঙচৎশিং ফোঙদোকপা অমসুং কমদৌনা থৌরম অসিনা প্রধান মন্ত্রী অমসুং মীয়াম মরক্তা হকথেংন্না পাউ ফাওনবগে হায়বা ফোঙদোকপা ‘Mann Ki Baat@100’ গী কোফি তেবল বুক ‘মাই দিয়ার ফেল্লো সিতিজন্স…’ শ্রী ধনকারনা ফোঙখি। অনিশুবা লাইরিক ওইনা, প্রসার ভারতিগী হান্নগী সি.ই.ও শ্রী এস.এস বেম্পাতিনা ইবা ‘কল্লেক্তিপ স্পিরিৎ, কনক্রিৎ এক্সন’ ফোঙখি। মালেমদা খ্বাইদগী চাউবা গনতন্ত্র চৎপা লৈবাক অসিগী খুন্নাই, শেন্মিৎলোন, অকোয়বগী ফিবম, কলচর, হকশেলগা মরী লৈনবা ৱাফমশিংগী মতাংদা প্রধান মন্ত্রীনা ফোঙদোকখিবশিং অদু লাইরিক অসিদা পল্লি।

হৌদোকপগী থৌরম অদুদা উপ রাস্ত্রপতিগা লোয়ন্না ইনফোর্মেসন অমসুং ব্রোদকাস্তিংগী য়ুনিয়ন মিনিস্তর শ্রী অনুরাগ সিংহ থাকুর, ইনফোর্মেসন অমসুং ব্রোদকাস্তিং মিনিস্ত্রিগী সেক্রেতরি শ্রী অপুরবা চন্দ্রা, প্রসার ভারতিগী সি.ই.ও শ্রী গৌরব দ্বিবেদি শরুক য়াখি। হৌদোকপগী থৌরম মতুংদা শক্নাইরবা পেনেলিস্তশিং হায়বদি কিরন বেদি, অমির খান, রবিনা তন্দন, শ্রী রিক্কি কেজ, নিখত জারিন অমসুং অতোপ্পা পেনেলিস্তশিং শরুক য়াদুনা তোঙান-তোঙানবা সেসনশিং পাংথোকখি। মন কি বাতকী ইপিসোদশিংদা প্রধান মন্ত্রীনা মমিং পনখিবা লৈবাক অসিগী তোঙান-তোঙানবা মফমশিংদগী লাকপা মীওই ১০০ থৌরম অদুদা শরুক য়াখি।

****