মালেমগী হেরিতেজ নুমিৎ নত্ত্রগা ইন্তর্নেস্নেল দে ফোর মোন্যুমেন্ত অমসুং সাইত (IDMS) অসি হেরিতেজ চেঞ্জস হায়বা থীমগা লোয়ননা ঙসি পাংথোক্লি। মীওইবা খুন্নাইগী হেরিতেজ ঙাক শেন্দুনা থম্নবা অমসুং মরী লৈনবা ওর্গনাইজেসনশিংনা হীরম অসিগীদমক্তা হোৎনরিবশিংবু শকখঙনবগীদমক্তা মালেমগী হেরিতেজ নুমিৎ অসি চহি খুদিংগী এপ্রিল 18দা পাংথোকই। করিগুম্বা অমা খঙনবা হোৎনবগী ত্রেদিস্নেলগী ওইবা পাম্বৈ অমসুং ক্লাইমেত এক্সনগা মরী লৈনবা লৌশিংগী পথাপ তম্বা, UNগী দিকেদ ওফ এক্সনগী মতুং ইন্দুনা চৎপগা লোয়ন-লোয়ননা ক্লাইমেত এক্সনগী খুত্থাংদা শোত্থবা খুন্নাইশিংবু অতৈগা চপ মান্নবা মওংদা ঙাক শেন্নবগীদমক্তা কলচরেল হেরিতেজ ফোকস মতৌ করম্না শিজিন্নগদগে হায়বনচিংবা হীরম কয়াগী পাউখুম পীবগী খুদোংচাবা কয়া হন্দক্কী চহিগী থীম অসিনা পীরি। 

কেন্দ্রগী মন্ত্রী, শ্রী জি. কিশন রেদ্দীনা মহাক্কী প্রেসকী ৱারোলদা মালেমগী হেরিতেজ নুমিৎকী মতাংদা শন্দোক্না পাউদম্লদুনা অসুম্না হায়খি, “হন্দক্কী চহিগী মালেমগী হেরিতেজ নুমিৎ অসিদা, ইপা ইপুদগী ফংহৌবা ইনাক খুল্লবা নাৎকী হেরিতেজ কয়াবু নিংথীনা শেন্ননবা হোৎনবগী থৌওংশিংবু শকখঙনবা মালেম্না হোৎনরিবা অসিদা, ভারতসু হীরমসিগী মতাংদা চাউথোকচবা ফাওজরি। ভারতকী নাৎকী চৎনবী অমসুং মমল নাইদ্রবা হেরিতেজশিংবু মমাংগী চহি 9 অসিদা মশক থোকপা মিৎয়েং চঙলে। প্রধান মন্ত্রী, শ্রী নরেন্দ্র মোদীনা লুচিংবা ভারত সরকারনা ঐখোয়গী নাৎকী ওইবা হীরম ঙাক শেনবগা চাউখৎ থৌরাংগী থবক অমসুং শাহৌ লৌবগী থবকশিংগা খুৎশম্ননা চত্তুনা ‘বিকাস ভি, ভিরাসত ভি’ হায়বা থীম অসিদা থবক পায়খৎলি। ভারতকী ইনাক খুল্লবা সিভিলাইজেসনগী পুৱারীবু মালেম্না শকখঙন্নবগীদমক্তা প্রধান মন্ত্রী শ্রী নরেন্দ্র মোদীনা মরী লৈনবা হীরম কয়াদা খোঙদারি। মোদী সরকারনা লৈবাক্কী ইনাক খুল্লবা হেরিতেজকী মতাংদা নিংথীজনা খঙই অমসুং মসিবু ঙাক শেন্নবগীদমক্তা পায়খৎফম থোকপা থবক খুদিংমক পায়খৎলি। অরিবা ফুরা দলালশিংবু ঙাক শেনবগী থৌওংশিংদা ইনোৎ হাপ্পদগী হৌরগা হীরম অসিগা মরী লৈনবা ঙাক-শেনবগী থৌরাংগী মতাংদা ত্রেনিং পীবা ৱর্ল্দ ক্লাস ইন্সতিত্যুসন লিংখৎপা ফাওবদা, সরকারনা ঐখোয়গী নাৎকী লনশিংবু নিংথীনা শেন্নদুনা থম্নবা খোঙথাং কয়া পায়খৎলি। ঐখোয়গী নহা ওইরিবা চারোন-শুরোনশিংনা ভারতকী পুৱারীগী মমুৎ তানা খঙহন্নবগীদমক্তা সরকারনা লৈবাক্কী মফমদা মরু ওইবা মোন্যুমেন্ত কয়া শারি”।

শ্রী জি. কিশন রেদ্দীনা মালেমগী হেরিতেজ নুমিৎ অসিদা ত্বীত তৌরদুনা মীয়াম্না ঐখোয়গী হেরিতেজশিংবু তুংগী চারোন-শুরোনশিংগীদমক্তা ঙাক শেন্দুনা থমসি হায়খি।

অরিবা মতমগী সিভিলাইজেসনগী ইথোস ঙাক শেন্নবা, নাৎ অমসুং স্পিরিচুএল হেরিতেজ ঙাক শেন্দুনা থম্নবা অমসুং ভারতকী লৌশিংগী পথাপ অসুং চৎনবীবু মালেম শিনবা থুংবগী মফমদা খঙহন্নবগীদমক্তা ভারত সরকারনা খোঙথাং কয়া থাংজিনখ্রে। ঐখোয়গী ইশ্বরশিংবু য়ুমদা অমুক পুরকপা হায়বসি ঐখোয়গী হেরিতেজ ঙাক-শেনবা, পুক্নিং থৌগৎপা অমসুং চাউখৎহনবগী অচেৎপা পান্দমগা লোয়নবা অখন্নবা খোঙথাং অমনি। মসিগী মতাংদা হোৎনখিবা কয়াগী মতাংদা পল্লদুনা, কেন্দ মন্ত্রীনা অসুম্না হায়খি, “ভারতকী হেরিতেজতা লৈবাক অসিগী সরকারনা মিৎয়েং চঙলিবা অসিগী মহৈ ময়েক শেংনা উবা ফংলি। ইং 2014দগী হৌনা, এন্তিক 230 হেনববু লৈবাক অসিদা অমুক হন্না পুরকখ্রে। মীরমদগী অমুক হন্না পুরকখ্রবা ভারত মশাগী মমল নাইদ্রবা অপুনবা এন্তিকিতী 244গী মনুংদগী 231দি ইং 2014গী মতুংদা পুরকখিবনি। USA, UK, সিঙ্গাপোর অমসুং ওস্ত্রেলিয়া য়াওনা তোঙান-তোঙানবা লৈবাকশিংদগী মসিগুম্বা এন্তিকিতী 72 অমুক হন্না লৈবাক অসিদা পুরক্নবা থবক হৌজিক কন্না চত্থরি। ঐখোয়গী প্রধান মন্ত্রীগী মীরম লৈবাক্কী মশিং য়াম্লবা খোঙচৎশিংদা মালেমগী লুচিংবা অমসুং মলতিলেতরেল ইন্সতিত্যুসনশিং কয়াগা লোয়ননাহীরম অসিগী মতাংদা ৱারী শাখি, অদুনা ঙসিদি, মশিং য়াম্লবা লৈবাক কয়ানা ভারত্তগী হুদুনা পুখ্রবা পোৎলমশিং ভারত্তা অমুক হন্না পীরক্নবা মশানা ওইনা হোৎনরক্লি, পাউ পীরক্লি”।

ইন্তর্নেস্নেল কাউন্সিল ওন মোন্যুমেন্ত অমসুং সাইত (ICOMOS)না এপ্রিল 18বু মালেমগী হেরিতেজ নুমিৎ হায়না ইং 1982দা লাউথোকখি। নাৎকী হেরিতেজ, মোন্যুমেন্তশিংগী মরু ওইবা অমসুং মখোয়বু ঙাক শেন্নবগী মরু ওইবশিংগী মতাংদা এৱিয়র্নেস হেনগৎহন্নবগীদমক্তা নুমিৎ অসিবু UNESCOগী জেনেরেল এসেমব্লীনা অয়াবসু পীখি। য়ুনাইতেদ নেসন্স এজুকেস্নেল, সাইন্তিফিক অমসুং কলচরেল ওর্গনাইজেসন (UNESCO)না মালেম শিনবা থুংবদা ৱর্ল্দ হেরিতেজ সাইত হায়না লাউথোক্লবা অপুনবা মোন্যুমেন্ত 1,154 লৈ। ভারতকী মথক্তা, ইতালী, স্পেন, জর্মনী, চাইনা অমসুং ফ্রান্সনা ৱর্ল্দ হেরিতেজ সাইত 40 নত্ত্রগা হেন্না লৈ। UNESCOগী ৱর্ল্দ হেরিতেজ সাইতকী মশিংদগী ভারত্তগী মশিং হেনগৎহল্লিবা অসিগী মতাংদা কেন্দ্র মন্ত্রীনা অসুম্না হায়খি, “ৱর্ল্দ হেরিতেজ ইন্সকৃপ্সন 40গী মনুংদা, ভারত শিনবা থুংবদগী দাইভর্সিতীগী মখল কয়াগা লোয়ননা 10দি মমাংগী চহি 9দা পাংথোকখি। ভারতকী তেন্তেতিব লিস্ত অসি ইং 2014দগী 2022দা 37, ইং 2014দা লৈরম্বা 15দগী ইং 2022দা 52দা হেনগৎখি। মসিনা ভারতনা মীরম লৈবাক্কী লমকোয়বশিংগী পুক্নিং চিংশিনবগী অচৌবা মতিক লৈহল্লি। ভারতকী ৱর্ল্দ হেরিতেজ তেন্তেলিব লিস্ততা মফম 52 হেনগৎলকপা অসিদগী, ঐখোয়গী হেরিতেজ মোন্যুমেন্তশিংনা ঐখোয়গী তুরিজম সেক্তরদা অচৌবা অহোংবা অমা পুরকপদা চাউনা থৌদাং য়াগনি”।

নরেন্দ্র মোদী সরকারনা সিভিলাইজেসন মতাংদা মরু ওইবা তোঙান-তোঙানবা মফম কয়া দিকেদ কয়াগী মতুংদা নৌনা শেমগৎলে অমসুং অমুক্কা হন্না মিৎয়েং চঙলে। স্পিরিচুএল হেরিতেজ মফম খুদিংদা ৱর্ল্দ ক্লাস এমেনিতীশিং লৈহন্নবা হোৎনবগী মতাংদা পল্লদুনা কেন্দ্র মন্ত্রীনা অসুম্না হায়খি, “ভারত শিনবা থুংবগী হেরিতেজ মফম খুদিংবু নৌনা শেমগৎনবা অমসুং মিৎয়েং চঙনবগীদমক্তা ঐখোয়না লেপ্তনা হোৎনরি। কাশী বিস্বানাথ কোরিদোর অমসুং ভরানসীদা পাংথোক্লিবা অতোপ্পা প্রোজেক্ত কয়ানা মফমসিগী ঘাত, লৈরক অমসুং শহরসিগী লাইশঙগী কমপ্লেক্সশিংদা অহোংবা পুরক্লিবা কয়াগী মশিং থীঙমদ্রবা খুদম কয়া লৈরে। তসেংবদি, মসিনা অহিলীভাই হোলকরনা ইং 1777দা কাশীবু নৌনা শেমদোকখিবা অদুগী মতুংদা চাউরাকপা চহি 250গী মতুংদা কাশীবু নৌনা শেমদোক্নবা পাংথোকপা অহানবা থৌওংনি। খুদম অমা ওইনা হায়রগদি, কেদার্নাথ, বদ্রিনাথ, য়মুনোত্রী অমসুং গঙ্গোত্রীগী শেংলবা ধামগী সিম্লেস কন্নেক্তিবিতী পীগদবা কিলোমীতর 900কী চার ধাম প্রোজেক্তসু অমনি। সোম্নাথ লাইশঙবু নৌনা শেমগৎপগী প্রোজেক্ত, উজেন মহাকাল কোরিদোর অমসুং অয়োধ্যাদা হৌজিক চত্থরিবা রাম মন্দির শাবগী থবকশিং অসিসু ঐখোয়গী স্পিরিচুএল হেরিতেজ মফমশিংবু নৌনা শেমগৎ শাগৎপগী খুদমশিংনি”।

ভারত সরকারনা বুদ্ধগী হেরিতেজ ঙাক শেনবদা অহেনবা মিৎয়েং চঙলি অমসুং ভগ্বান বুদ্ধগী পাউজেলবু মালেম শিনবা থুংবদা শন্দোক্লি। বুদ্ধিস্ত হেরিতেজ খুমাং চাউশিলহনবগী মতাংদা ৱা ঙাঙবা মতমদা কেন্দ্র মন্ত্রী শ্রী জি. কিশন রেদ্দীনা হায়খি, “প্রধান মন্ত্রীনা ভগ্বান বুদ্ধগী হেরিতেজ লৈবা লৈবাকশিংগা লৈনরিবা মরী চেৎশিলহনবা হায়বসি মহাক্কী ধর্মনি খন্দুনা চৎলি। ঐখোয়গী সরকারনা লাইনীংবশিংদা মপুং ফাবা স্পিরিচুএল এক্সপেরিএন্স অমা ফংহন্নবগীদমক্তা ৱর্ল্দ ক্লাস ইনফ্রাস্ত্রকচর লৈবা বুদ্ধিস্ত সর্কিত অমা শেমগৎলি। ঐখোয়গী প্রধান মন্ত্রী শ্রী নরেন্দ্র মোদীনা নবেম্বর 2021দা ভগ্বান বুদ্ধনা মঙাল (নির্ভানা) ফংখিবা মহাপরিনির্ভানা লাইশঙদা লায়না চৎপা য়াহন্নবগীদমক্তা উত্তর প্রদেশতা কুশিনগর ইন্তর্নেস্নেল এয়রপোর্ত শঙ্গাখি। প্রধান মন্ত্রী শ্রী নরেন্দ্র মোদীজীনা মে 2022দা ভগ্বান বুদ্ধগী পোক্নফম লমদম, লুম্বিনীদা লুপা করোর 100 চঙগদবা তেক্নোলোজীগী থাক য়াম্না ৱাংবা ইন্দিয়া ইন্তর্নেস্নেল সেন্তর ফোর বুদ্ধিস্ত কলচর অমসুং হেরিতেজকী উরেপ উয়ুং তমখ্রে। স্বদেশ দর্শন স্কিমগী শরুক অমা ওইনা কুশিনগর স্রবস্তী অমসুং কপিলাবস্তুগী অকোয়বদা বুদ্ধিস্ত সর্কিত অমসু তুরিজম মন্ত্রালয়না শেমগৎলি। পুম্নমক ওইনা য়েংলুবা মতমদা, উত্তর প্রদেশ, মধ্য প্রদেশ, বিহার, গুজরাত অমসুং আন্ধ্র প্রদেশতা বুদ্ধিস্ত সর্কিত শেমগৎপগী তোঙান-তোঙানবা প্রোজেক্ত কয়াসু লোইশিল্লক্কদৌরে”।   

ভারতকী নাৎ অমসুং চৎনবী ঙাক শেন্দুনা থম্নবগীদমক্তা সরকার অসিনা ‘সরকার অপুনবনা’ হায়বা ৱাখল্লোন ইন্দুনা চৎলি। তুরিজম মন্ত্রালয়, কলচর মন্ত্রালয়, সিভিল এভিএসন মন্ত্রালয়, ত্রাইবেল এফিয়র্স মন্ত্রালয়গুম্বা কেন্দ্রগী মন্ত্রালয়শিং, নমামী গঙ্গে অমসুং স্বচ্ছ ভারতনচিংবা খোঙথাং কয়া অসি অমত্তা ওইনা পুনশিন্দুনা ভারতকী হেরিতেজ ঙাক-শেনবগী পান্দম থম্বা থবক কয়া পাংথোক্লি।

****