ভারত সরকারগী ত্রাইবেল এফিয়র্সকী ইকায় খুম্ননিংঙাই ওইরবা কেন্দ্র মন্ত্রী, শ্রী অর্জুন মুন্দানা অৱাং নোংপোক লমদমগী সেদ্যুল ত্রাইবশিংদা কান্নবা পীনবা অনৌবা সেন্ত্রেল সেক্তর স্কিম -“অৱাং নোংপোক লমদমগী ত্রাইবেল পোত্থোকশিংবু খুমাং চাউশিলহন্নবা মার্কেতিং অমসুং লোজিস্তিক্স দিভেলপমেন্ত (PTP-NER)” অসি মনিপুরগী ইম্ফালগী কোনুং মমাংদা লৈবা MSFDS ওদিতোরিয়মদা মনিপুরগী মুখ্য মন্ত্রী, শ্রী এন. বিরেন সিংহ অমসুং অতোপ্পা দিগ্নিতরীশিং য়াওবা থৌরম অমদা ঙসি হৌদোকখ্রে। 

 

 

ঙসিগী থৌরমসিদা তিনখিবা মীয়ামগী মফমদা ইকায় খুম্ননিংঙাই ওইরবা মুখ্য মন্ত্রীনা ৱা ঙাঙবদা অসুম্না হায়খি, “ইকায় খুম্ননিংঙাই ওইরবা প্রধান মন্ত্রী শ্রী নরেন্দ্র মোদীগী লুচিং মখাদা ত্রাইবেল এফিয়র্স মন্ত্রালয়না TRIFEDকী খুত্থাংদা ত্রাইবেলশিংগী তোঙান-তোঙানবা কলচরগী হেরিতেজ কয়া য়েংলদুনা অৱাং নোংপোক লমদমদা মীপুম খুদিংবু মরোমদোম লেপচবা অমসুং মশানা থবক পীজবা ঙমহন্নবা মপাঙ্গল হাপ্নবা পান্দম থম্লি। ইকায় খুম্ননিংঙাই ওইরবা প্রধান মন্ত্রীগী পান্দমদি লুক ইস্ত, চাউখৎ থৌরাংদা মিৎয়েং চঙবা অমসুং ত্রাইবেল ওন্তোপ্রিনরশিংগী পুন্সি মহিং ফগৎহন্নবগীদমক্তা ত্রাইবেলগী পোত্থোকশিংবু খুমাং চাউশিলহনবা অমসুং কারবার তৌবগী লোইবা নাইদবা খুদোংচাবা কয়া শেমগৎপনি। লমদম অসি সংবিধানগী মখা পোন্না ত্রাইবেলগী মফম ওইবনা, ত্রাইবেল খুন্নাইবু নিংথীনা খঙবা অসি য়াম্না তঙাই ফদবনি।   

   

মসিগা লোয়ননা, ইকায় খুম্ননিংঙাই ওইরবা PMনা তোপ-তোপ্পা ত্রাইবেল পোত্থোকশিংবু খুমাং চাউশিলহন্নবা ‘ৱান দিস্ত্রিক্ত, ৱান প্রদক্ত’ নেস্নেল প্রোগ্রাম অসিদা মতম পুম্বদা মিৎয়েং চঙলিবা অসিগী মতুং ইন্না পোত্থোকশিং অসিগী মরী লৈনবা ৱারোইশিন পুরকপা অমসুং ভেল্যু ইদিসন তৌনবা তীমৱর্ক্কী খুত্থাংদা পোত্থোকশিং অসিবু মপুং ফানা খুমাং চাউশিলহন্নবগীদমক্তা TRIFEDনা রাজ্য সরকার অমসুং এজেন্সীশিংগা খুৎশম্ননা চৎকনি। অৱাং নোংপোক লমদম অসিদা হীরম খুদিংগী তৌবা ঙম্বগী চাউরবা মতিক মগুন কয়া মতম পুম্বদা লৈদুনা লাক্লি অমসুং লমদমসিগী সেদ্যুল ত্রাইবশিংনা মখোয়গী হোৎনজমনগী খুত্থাংদা লৈবাকপু মপুং ওইনা চাউখৎহন্নবা থৌদাংসু য়ারি। ঐখোয়গী ত্রাইবেল বেনিফিশরীংদা তেংবাংনবা অমসুং মখোয়না লৈবাক অমসুং মালেমগী থাক্কী কৈথেলদা হেন্না চাউখৎচবা ঙমহন্নবগীদমক্তা, ঐখোয়না স্কিম কয়া অমসু মরী লৈনবা থৌওংশিংদা তেংবাংনবা হৌদোকখিগনি”। 

ঙসিগী থৌরম অসিদা মনিপুর শিনবা থুংবগী VDVKগী অনৌবা পোত্থোক অহুম, মিং ওইনা পল্লবদা, কামজোং জিলাগী সিনামোম রোল্স (দাল চীনি – পোলিশ অমসুং সেমি পোলিশ), উখ্রুল জিলাগী ব্লেক রাইস (চাকহাও) অমসুং শোইবুম অকঙবসু লোঞ্চ তৌখি।

           

মনিপুরগী ইকায় খুম্ননিংঙাই ওইরবা মুখ্য মন্ত্রী, শ্রী এন. বিরেন সিংহনা অসুম্নসু হায়খি, “দিভেলপমেন্ত স্কিমগী মতাংদা ঐখোয়গা কেন্দ্রগগী মরক্তা লৈরম্বা পল অদুসু লৌথোকখ্রে, ভারত সরকারনা ঐখোয়গী লমদমগী ত্রাইবেলশিংদা অফবা পুন্সি মহিং অমা হিংহন্নবা মিৎয়েং চঙলি হায়বসু ঐখোয়না খঙলে। শান্ন-খোৎনবা, কারবার নত্ত্রগা এজুকেসন ওইরো, ত্রাইবেল এফিয়র্স মন্ত্রালয়না পীবিরিবা শেন্থোক হেন্না তান্নবা অহেনবা খুদোংচাবা কয়া অসিনা মরম ওইদুনা, ঐখোয়গী লমদম অসিনা লৈবাক্কী চাউখৎ থৌরাংদা মশক থোক্না শরুক তম্লি অমসুং লৈবাক চাউখৎপগা লোয়ননা ঐখোয়সু খোঙজেল য়াঙনা চাউখৎলক্লি”।

মনিপুরগী ত্রাইবেল এফিয়র্স অমসুং চিংগী মন্ত্রী, শ্রী লেতপাও হাওকিপ্না হায়খি, “ভারত সরকারগী ত্রাইবেল এফিয়র্স মন্ত্রালয়বু মখোয়গী ইনক্লুসিব ওইবা স্কিম অমসুং লমদম অসিগী ওন্তোপ্রিনরশিংগী অপাম্বশিং ফংহন্নবা তেংবাংবা খোঙথাংশিংগীদমক্তা ঐখোয়না থম্মোই শেংনা থাগৎচরি”।  

মেঘালয়গী লৌউ-শিংউ অমসুং লৌমীশিংগী য়াইফ থৌরাংগী ইকায় খুম্ননিংঙাই ওইরবা মন্ত্রী, দাঃ মাজেল অম্পারীন লিংদোনা হায়খি, “ঐহাক্না ইকায় খুম্ননিংঙাই ওইরবা মন্ত্রীবু ঐখোয়গী লমদমগী তেলেন্তশিংবু তেংবাংবা অমসুং অৱাং নোংপোক লমদমগী মীয়ামগী ত্রাইবেল পোত্থোকশিংবু খুমাং চাউশিলহন্দুনা মখোয় মশা অমসুং মখোয়গী পুন্সি মহিংবু মপাঙ্গল হাপ্পীবা স্কিম অসি হৌদোকপীবগীদমক্তা থাগৎচরি”। 

স্কিম অসি চলায়নবগীদমক্তা লুপা করোর 1.43গী মশক থোকপা বজেত অমসু কাইথোকখ্রবনি।

অৱাং নোংপোক লমদমদগী ত্রাইবেল পোত্থোকশিং লৈবা, লোজিস্তিক্স অমসুং মার্কেতিংগী থৌওং হেন্না ফগৎহনবগী মতৌগা লোয়ননা ত্রাইবেল ক্রাফমেনশিংদা পুন্সি মহিং তানবগী অহেনবা খুদোংচাবা পীবা ঙমহন্নবা প্রোগ্রাম অসিগী মওং-মতৌ শেম্বনি। প্রোগ্রাম অসিনা কোনগদবা রাজ্যশিংদি অরুনাচল প্রদেশ, অসম, মনিপুর, মেঘালয়, মিজোরম, নাগালেন্দ, ত্রিপুরা অমসুং সিক্কিম্নি।

ইনক্যুবেসন সপ্পোর্ত, এগ্রিগেসন, স্কিল অমসুং ওন্তোপ্রিন্যুরিএল দিভেলপমেন্ত, সোর্সিং, প্রোক্যুর্মেন্ত, মার্কেতিং, ত্রান্সপোর্তেসন অমসুং পব্লিসিতীগী খুত্থাংদা বেকৱার্দ অমসুং ফোরৱার্দ লিঙ্কেজ পীদুনা, PTP-NER স্কিম অসিনা ত্রাইবেল ক্রাফমেনশিংদা মখোয়গী শেন্থোক হেনগৎহন্নবা পীরিবা খুদোংচাবা কয়াগী কান্নবা লৌবদা তেংবাংগনি হায়বসি পনবা য়াবা ৱাফম অমনি। অৱাং নোংপোক্কী তোঙান-তোঙানবা জিলা কয়াদা এপ্রিল 18, 2023দগী হৌদুনা ত্রাইবেল আর্তিসান মেলা (TAM) 68 শীন-লাঙদুনা লমদমশিং অদুগী ত্রাইবেল আর্তিসানশিং মিং চনবা হৌহনবগী থৌরাং অমসু লৈরে।

মসিদা নত্তনা, অৱাং নোংপোক লমদমদা মতম শাংনা লৈরকপদগী এক্সপেরিএন্স কয়া লৈরবা ভারত সরকারগী অৱাং নোংপোক লমদমগী চাউখৎ থৌরাং মন্ত্রালয় (MDoNER)গী এদমিনিস্ত্রেতিব কন্ত্রোলগী মখাদা লৈবা কোর্পোরেসন অমা ওইরিবা, নোর্থ ইস্তর্ন হেন্দিক্রাফ অমসুং হেন্দলুম দিভেলপমেন্ত কোর্পোরেসন (NEHHDC); ভারত সরকারগী দিপার্তমেন্ত ওফ পোস্তকী মখাদা লৈবা ইন্দিয়া পোস্ত; অমসুং অৱাং নোংপোক রাজ্য সরকারশিংগী বিভাগ/এজেন্সীশিংবু স্কিম অসিগী মখাদা পার্ত্নর ওইনা শিজিন্নগনি।

মখা তারকপদা, ত্রাইবেল আর্তিসান মেলা (TAM) শীন্দুনা ত্রাইবেল আর্তিসান/প্রদ্যুসরশিংবু স্কিম অসিগী মখাদা হকথেংননা ইম্পেনেল তৌগনি। TAMশিং অসিদি দিস্ত্রিক্ত এদমিনিস্ত্রেসন অমসুং হীরম অসিদা থবক পায়খৎলিবা মরী লৈনবা অতোপ্পা ওর্গনাইজেসন/বিভাগশিংগা তান্নদুনা অমসুং মখোয়গী মতেং লৌদুনা শীনগনি। PMJVM স্কিম/FPO/ত্রাইবেল সোসাইতী/ত্রাইবেল প্রদ্যুসর ওর্গনাইজেসনগী মখাদা লৈবা ত্রাইবেল আর্তিসান, মখোয়গী মখাদা শেম্বা ত্রাইবেল SHG অমসুং সরকারগী ওর্গনাজেসন/এজেন্সী/VDVKশিংসু ইম্পেনেল তৌবা য়াই। স্কিম অসিগী মখাদা তোঙান-তোঙানবা ওনলাইন অমসুং ওফলাইনগী পাম্বৈ কয়াগী খুত্থাংদা NERগী ত্রাইবেল পোত্থোকশিংদা নেস্নেল অমসুং ইন্তর্নেস্নেল মার্কেতিং লিঙ্কেজ কয়াসু পীগনি।    

ত্রাইবেল রেসিপিএন্তশিংগী মার্কেতকী তঙাই ফদবশিং ফংহন্নবা অখন্ননা শেম-শারবা দিজাইন অমসুং স্কিল দিভেলপমেন্ত ত্রেনিং চাং নাইনা পীবগী থৌওংসু প্রোগ্রাম অসিগী মনুং চল্লি। স্কিম অসিগী পান্দম ফংবদা তেংবাংনবা ইন্দিয়া পোস্তনা লোজিস্তিক্স সপ্পোর্ত পীগনি। পুর্বোতর আদী মহোৎসব, পুর্বোতর আদী বাজার, এক্সক্লুসিব নোর্থ ইস্ত ক্রাফ মেলানচিংবা কয়া য়াওনা তোঙান-তোঙানবা একজিবিসন কয়াগী খুত্থাংদা প্রোগ্রাম অসিগী মখাদা লৈবা ইম্পেনেল তৌরবা ত্রাইবেল আর্তিসানশিং খুদিংদা এক্সপোজরসু পীগনি।    

ত্রাইবেল এফিয়র্সকী ইকায় খুম্ননিংঙাই ওইরবা কেন্দ্র মন্ত্রী, শ্রী অর্জুন মুন্দানা রাজ্যসিদা ঙসি য়ৌরকখিবগা মনিপুরগী ইকায় খুম্ননিংঙাই ওইরবা রাজ্যপাল, কুমারী অনুসুইয়া উইকেগা রাজ ভবন্দা লৈবা মহাক্কী ওফিস্তা উন্নখি। মখোয়না রাজ্যসিগী ত্রাইবেলশিংগী চাউখৎ থৌরাং অমসুং পুন্সি মহিংগা মরী লৈনবা হীরম কয়াগী মতাংদা য়াম্না কুপ্না খন্ন-নৈনখি। অতেনবা মীফম অসিদা চেয়রমেন (BoD TRIFED), শ্রী রামসিনহ রথৱাসু য়াওখি।   

   

শ্রী অর্জুন মুন্দানা ঙসিগী থৌরমগী মফমদা ফমখিবা বন ধন বিকাস কেন্দ্রগী স্তোল 50দা চঙখি। অৱাং নোংপোক রাজ্য পুম্নমক্কী VDVK খুদিংবু PTP-NER স্কিমগী সপ্লাই চেন অমগী মখাদা পুরক্নবগীদমক্তা মখোয় পুম্নমক্কী মফমদা মার্কেত লিঙ্কেজ লৈহনগনি। 

   

ঙসিগী থৌরম অসিদা শরুক য়াখিবা অতোপ্পা মীথুংলেনশিংগী মনুংদা মনিপুর সরকারগী পাৱর, ফোরেস্ত, ইনভাইরনমেন্ত অমসুং ক্লাইমেত চেঞ্জ, লৌউ-শিংউ, সাইন্স অমসুং তেক্নোলোজী মন্ত্রী, শ্রী তি.ঐচ. বিস্বাজিত; মনিপুর সরকারগী চীফ সেক্রেতরী, শ্রী রাজেশ কুমার সিংহ (IAS); TRIFEDকী চেয়রমেন, শ্রী রামসিনহ রথৱা অমসুং TRIFEDকী শ্রীমতি গীতাঞ্জলি গুপ্তসু য়াওখি।

******

(Release ID: 1917779) Visitor Counter : 154