ঙসি ভারতকী রাস্ত্রপতি শ্রীমতি দ্রৌপতি মুর্মু গুৱাহাতিদা পাংথোকপা গৌহাতি হায় কোর্ত চহি ৭৫ মপুংফারকপগী থৌরমদা শরুক য়াখ্রে। থৌরম অদুদা, মহাক্না নুপীশিং অমসুং অহলশিং অশোই-অঙাম থোক্তনবা শেম্বা মোবাইল এপ্প ‘ভোরোজা’ হৌদোকখি। 

থৌরম অদুদা তিনখিবা মীয়ামদা ৱা ঙাংবদা রাস্ত্রপতিনা হায়খি ভারতকী ৱায়েল-থৌদাগী লমদা গৌহাতি হায় কোর্তনা অখন্নবা মফম অমা কল্লে। ১৯৪৮তা কোর্ত অসি লিংখৎলবা মতুংদা, মসিনা চহি ৬০ হেন্না অতোপ্পা রাজ্য ৭ গী থবক তৌখি অমসুং হৌজিক ফাওবা রাজ্য মরি হেনবা কোনশিল্লি। আইনগী লমদা শক্নাইরবা মীওই কয়া পুথোক্তুনা কোর্ত অসিগী তোপ-তোপ্পা মশক অমা তাক্লে। কোর্ত অসিনা শিংথানিঙাই ওইরবা ৱারেপশিং লৌখ্রে। লাক্লিবা চহিশিংদা গৌহাতি হায় কোর্তনা মখা তানা মীয়ামগী থবক তৌগনি হায়বগী থাজবা থম্লি।

রাস্ত্রপতিনা হায়খি পুৱারিদগী হৌনা কমদৌনা তোঙান-তোঙানবা ফুরুপশিং পুন্না হিংমিন্নবগে হায়বগী খ্বাইদগী ফবা খুদম অৱাং-নোংপোক লমদম্না ওইগনি। মদুগী ফল ওইনা, লমদম অসিদা ফুরুপ কয়া অমসুং লোন কয়া লৈরি। অসিগুম্বা লমদম অমদা, মীয়াম লৈবাক ঙাক্নবা তোঙান-তোঙানবা চৎনবীশিং অমসুং আইনশিং লৈবা মরম্না, ইন্সিতুতুসনশিংনা মীকুপ-নাহুম শিংবা অমসুং দাইত্ব লৈনা থবক তৌবা দরকার ওই। লেজিসলেসনশিংগী শীজিন্নফম তোঙান-তোঙানবা মফমশিংগী খেন্নবা য়াই,

অদুবু অপুনবা লমদম অসি হায় কোর্ত অমগী মখাদা লৈরি। কোর্ত অসিগী মখাদা লৈরিবা রাজ্য খরগী চৎনবীগী আইনশিং ঙাক্না গৌহাতি হায় কোর্তনা চৎপা উবদা হরাওই। য়েলহৌমীশিংগী অনিংবা-অপাম্বশিং ইকায়খুম্নদুনা, অৱাং-নোংপোক লমদমদা শান্তি ওইনা পুন্না হিংমিন্নবগী চৎনবীগী থাক ৱাংখৎহনবদা গৌহাতি হায় কোর্তনা মতেং পাংলে।

মহৌশাগী অকোয়বগী ফিবম কায়থরক্লিবা অসিগী মতাংদা ৱা ঙাংবদা রাস্ত্রপতিনা হায়খি ঐখোয়গী মতম অসিদা ইকোলোজিগী অচুম্বা পুরক্নবা ঐখোয় ৱাখল তাগদবনি। মহৌশাগী অকোয়বগী ফিবম কায়থরকপা অসিনা মালেমগী ফুরুপ কয়াদা অরানবা কয়া তৌরে। মীওইবা খুন্নাইনা মমাঙদা অমুক্তা ওইখিদ্রিবা মওংদা অমাং-অতা থোকহনবা মরম্না, অতোপ্পা থৱায় পানবশিং অমসুং অপুনবা ইকোলোজিদা অকায়বা পীদনবা ৱাখল তাবা দরকার ওইরে অমসুং ঐখোয়না পাংথোক্লিবা অরানবা অসিনা মহৌশা লাইরেম্বী ইমাগী অতোপ্পা মচাশিংদা শোকহল্লে। ইকোলোজিগী অচুম্বা পুরকপা অসি মওং কয়াদা পাংথোকপা য়াই। থবক অসিদা আইনগী লমদা থবক তৌরিবশিংনশু মতেং পাংগদবনি।

রাস্ত্রপতিনা হায়খি অচুম্বা ৱায়েল হায়বসি পুম্নমক কোনশিনগদবনি অমসুং মীওই খুদিংমক্না ফংগদবনি। অদুবু মরম কয়াদগী অচুম্বা ৱায়েল ফংবদা অপনবা পীরি। অচুম্বা ৱায়েল ফংবদা শেন য়াম্না চঙবা অসি মরম ময়ামগী মনুংদা মরম অমনি। ৱায়েলবদা শীজিন্নরিবা লোন অসিশু অপনবা পীবা অতোপ্পা মরম অমনি, অদুবু অৱাংবা থাক্কী ৱায়েলশঙশিংদা লম-লমগী লোনশিং শীজিন্নবা হেনগৎলক্লে। ৱায়েল-থৌদাগী থবকশিংদা তেক্নোলোজি শীজিন্নবা অসিনা মতম কয়াগী মমাঙদগী সিস্তেম অসিদা অপনবা পীরম্বা খুদোংচাদবা কয়া কোকহনবা ঙম্লে। লায়রবশিং অমসুং তোল্লবশিং মতেং পাংবা ঙমগদবা আইনগী লমদা শীজিন্নবা য়াবা তেক্নোলোজিগী পাম্বৈশিং উকিলশিং অমসুং লোগী মহৈরোয়শিংনা থিগদবনি।

*****