ساٹھویں قومی میری ٹائم ڈے کے موقع پر، بندرگاہوں، جہاز رانی اور آبی گزرگاہوں (ایم او پی ایس ڈبلیو) اور آیوش کے مرکزی وزیر جناب سربانند سونووال نے آج یہاں ’میری ٹائم بیداری واکیتھون‘ کو جھنڈی دکھا کر روانہ کیا۔ واکیتھون کو ایم او پی ایس ڈبلیو کے وزیر مملکت جناب شریپد وائی نائک کی موجودگی میں جھنڈی دکھا کر روانہ کیا گیا۔ اس موقع پر جناب سدھانش پنت، آئی اے ایس، سکریٹری، ایم او پی ایس ڈبلیو؛ جناب سنجیو رنجن، آئی اے ایس، چیئرمین، نیشنل شپنگ بورڈ؛ جناب راجیش کمار سنہا، آئی اے ایس، ایڈیشنل سکریٹری، ایم او پی ایس ڈبلیو؛ کیپٹن راجندر پوسوال، ناٹیکل سرویئر، چیئرمین نیشنل میری ٹائم ڈے اور دیگر معززین موجود تھے۔

تقریب کے دوران جناب سربانند سونووال نے لوگوں کا خیرمقدم کیا اور بحری جہازوں، بندرگاہوں کے کارکنوں اور بحری شعبے سے وابستہ تمام لوگوں کو ان کے عزم اور محنت کے لیے سلام پیش کیا۔

ہندوستان کی اقتصادی ترقی کے لیے بحری شعبے کی اہمیت کو اجاگر کرتے ہوئے، جناب سربانند سونووال نے کہا کہ ’’جہاز رانی ملک کی خوشحالی کا لائف لائن اور راستہ ہے۔ یہ پہلا قومی سمندری دن ہے جسے ہم امرت کال کے دوران منا رہے ہیں۔ ہندوستان کے امرت کال میں، جہاز رانی آتم نربھر بھارت کی تعمیر کی قیادت کرنے کے لیے نئی سرحدیں کھولے گی۔‘‘

جناب سونووال نے کہا کہ ’’وزیر اعظم جناب نریندر مودی کی متحرک قیادت میں امرت کال کا وژن نوجوانوں کے لیے بہترین روزگار کے مواقع پیدا کرنا ہے۔ ہمیں جہاز رانی کو تیزی سے ترقی کرنے والا شعبہ بنانے کے لیے سخت محنت کرنی ہوگی، تاکہ ہندوستان بحری بنیادی ڈھانچے کے ساتھ ساتھ بحری معیشت میں ایک اہم شراکت دار بن سکے۔‘‘

انھوں نے کہا کہ ’’ خواتین بحری جہازراں بھی میری ٹائم شعبے میں اہم کردار ادا کر رہی ہیں۔ میں ان کے زبردست تعاون کے لیے ان کا شکر گزار ہوں‘‘۔

پانچ اپریل 1919 کو پہلی بار ہندوستانی کمپنی سندھیا اسٹیم نیوی گیشن کمپنی لمیٹڈ کا جہاز ایس ایس لائلٹی تجارت کے لیے ہندوستان سے لندن گیا۔ اس کی یاد میں بندرگاہوں، جہاز رانی اور آبی گزرگاہوں کی وزارت ہر سال 5 اپریل کو قومی سمندری دن کے طور پر مناتی ہے۔

قومی میری ٹائم ڈے ہندوستانی معیشت کی ترقی میں سمندری تجارت کے اہم کردار اور عالمی تجارت میں اس کے اسٹریٹجک مقام کے لیے وقف ہے۔

******

ش ح۔ م م۔ م ر

U-NO.3763