প্রধানমন্ত্রীগী লোইশঙ
প্রধান মন্ত্রীনা নিউ দিল্লিদা সেন্ত্রেল বিউরো ওফ ইনভেস্তিগেসন(সি বি আই)গী দাইমন্দ জুব্লি থৌরম হৌদোকখ্রে
“মখোয়গী থবক অমসুং হৈশিংবনা মরম ওইদুনা, লৈবাক অসিগী মীচম মীয়ামগী মরক্তা সি.বি.আইদা থাজবা থম্লে”
“শীনফম অমদা নিংথিনা খঙলবা মীওইশিং অমসুং মতিক চাবা লোয়শঙশিং য়াওদনা চাউখৎলবা ভারত অমা পুরকপা ওইথোক্লোই”
“সি.বি.আইগী মরুওইবা থৌদাংদি লৈবাক অসিদগী শেঞ্জা-থুমজা মুৎথৎপনি”
“শেঞ্জা-থুমজা অসি ইচম চম্বা অরানবা থবক অমা নত্তে, মসিনা লায়রবশিং হক মৎলি, মসিনা অতোপ্পা অরানবা থবক কয়া পাংথোকহল্লি, অচুম্বা অমসুং গনতন্ত্রগী লম্বীদা শেঞ্জা-থুমজানা খ্বাইদগী চাউবা অপনবা ওইরি”
“জাম ত্রিনিতিনা বেনিফিসরিশিংদা কান্নবা মপুংফানা পীরি”
“ ঙসিদি লৈবাক অসিদা শেঞ্জা-থুমজাগী মায়োক্তা থবক লৌখৎপদা রাজনিতিগী ফিরেপ্তা অকিবা অমতা লৈতে”
“শেঞ্জা-থুমজা তৌবা মীওই অমতা লেম্না থারোইদবনি। ঐখোয়গী থবকশিংদা কোমথোক্লোইদবনি। মসি লৈবাক অসিগী অপাম্বনি, মসি মীয়ামগী অনিংবনি। লৈবাক, আইন অমসুং সংবীধান নখোয়গীদমক লৈরি”
Posted On:
03 APR 2023 1:56PM by PIB Imphal
ঙসি প্রধান মন্ত্রী শ্রী নরেন্দ্র মোদীনা নিউ দিল্লিগী বিজ্ঞান ভাবন্দা সেন্ত্রেল বিউরো ওফ ইনভেস্তিগেসন(সি বি আই)গী দাইমন্দ জুব্লি থৌরম হৌদোকখ্রে। এপ্রিল ১,১৯৬৩দা ভারত সরকারগী হোম এফেয়ার্স মিনিস্ত্রিনা লৌখিবা ৱারেপ অমদা সেন্ত্রেল বিউরো ওফ ইনভেস্তিগেসন লিংখৎখিবনি।
থৌরম অদুদা পাংথোকপা মনা য়েন্থোকপগী থৌরম অমদা প্রধান মন্ত্রীনা রাস্ত্রপতিগী পুলিস মেদল ফোর দিসতিংগুইস সর্বিস অমসুং সি.বি.আইগী বেস্ত ইনভেস্তিগেসন ওফিসারশিংদা সনাগী মেদল মনা ফংলবশিংদা য়েন্থোকখি। শিল্লোং, পুনে অমসুং নাগপুরদা নৌনা শাবা সি.বি.আইগী ওফিস কমপ্লেক্সশিংশু প্রধান মন্ত্রীনা শঙ্গাখি। প্রধান মন্ত্রীনা সি.বি.আইগী দাইমন্দ জুব্লি থৌরমগী পোস্তেচ স্তাম্প অমসুং নিংশিং শেনয়েক অমা ফোঙখি। মহাক্না সি.বি.আইগী ত্বিৎতর হেন্দলশু হৌদোকখি।থৌরম অদুদা মহাক্না সি.বি.আইগী এদমিনিস্ত্রেতিপ মেনুএল, বেঙ্ক ফ্রোদশিং থিজিনবা অমসুং তম্বগী লাইরিক অমা, সি.বি.আই কেসশিংগী মতাংদা সুপ্রিম কোর্তকী ৱাৱেলশিং অমসুং মপান লৈবাকশিংদা লৈবা ইন্তিলিজেন্স অমসুং প্রমানশিং পীথোক-পীশিন তৌনবগী ইন্তরনেসনেল পুলিসকী হেন্দবুক অমা ফোঙখি।
থৌরম অদুদা ৱা ঙাংবদা প্রধান মন্ত্রীনা হায়খি লৈবাক অসিদা থিজিনবগী মাঙজিল থাবা এজেন্সি ওইনা লুপ অসি চহি ৬০ মপুংফারে। হায়রিবা চহি ৬০গী মতম অসিদা এজেন্সি অসিনা থবক কয়া মাইপাক্না পাংথোকখ্রে। সি.বি.আইগা মরী লৈনবা কেসশিংগী মতাংদা সুপ্রিম কোর্তকী ৱাৱেলশিংগী খোমজিনবা অমা ঙসি ফোঙলিবা অসিনা সি.বি.আইগী পুৱারি অমা ঐখোয়দা খঙহল্লে। সহর খরদা মসিগী অনৌবা ওফিসশিং, ত্বিৎতর হেন্দল নত্ত্রগা অতোপ্পা খুদোংচাবশিং ঙসি হৌদোক্লিবা অসিনা সি.বি.আই মপাঙ্গল কনখৎহনবদা অচৌবা থৌদাং অমা লৌরগনি। মখোয়গী থবক অমসুং হৈশিংবনা মরম ওইদুনা, লৈবাক অসিগী মীচম মীয়ামগী মরক্তা সি.বি.আইদা থাজবা থম্লে।
মহাক্না হায়খি ঙসি লংলা-লংজিন পুথোকপা ঙমদবা কেস অমা লাকপা মতমদা, কেস অদু সি.বি.আইদা শীন্নগদবনি হায়বা মীয়ামগী থাজবা অমা লৈরি। মতম অমদা কেস অমা সি.বি.আইদা শীন্নগদবনি হায়বদা সহরশিংদা ইরাং থোকপা লৈখ্রে। পঞ্চায়তকী থাক্তা ফাওবা কেস অমা লাকপা মতমদা, সি.বি.আইদা থিজিনহন্নবা মীয়াম মরক্তা য়ানবা অমা লৈরি। মীওই খুদিংমক্কী লৈতোন্দা সি.বি.আইগী মমিং লৈরে। মসি অচুম্বা অমসুং থাজবগী ব্রান্দ অমগুম্বনি। মীয়ামগী থাজবা লৈহনবা অসি অচৌবা মাইপাকপা অমনি। চহি ৬০গী খোঙচৎ অসিদা সি.বি.আইগা লোয়ন্না থবক তৌরকপশিং থাগৎচরি।
মনা ফংলবশিং প্রধান মন্ত্রীনা থাগৎখি অমসুং মখোয় মশামক ফিবম ফগৎনবা বিউরোদা খঙহনখি। মহাক্না হায়খি পাংথোক্কদৌরিবা চিন্তান সিবির অসিদা হৌখিবা থৌদোকশিংদগী তমগদবনি অমসুং চাউখৎলবা ভারত অমগীদমক ভারতমচা করোর কয়ানা ৱাশক অমা লৌরিবা অসি ফংনবা অমৃত কালগী মতমদা তুংগী য়েংলগা থৌরাং তৌগদবনি। শীনফম অমদা নিংথিনা খঙলবা মীওইশিং অমসুং মতিক চাবা লোয়শঙশিং য়াওদনা চাউখৎলবা ভারত অমা পুরকপা ওইথোক্লোই অমসুং মসিনা সি.বি.আইদা অচৌবা থৌদাং অমা শীন্নরে।
প্রধান মন্ত্রীনা হায়খি হিরম কয়াদা থিজিনবা ইনভেস্তিগেতিপ এজেন্সি অমা ওইনা সি.বি.আই মমিং চৎলে অমসুং মসিনা পাংথোক্লিবা থবকশিং পাক-চাউই। সি.বি.আইগী মরুওইবা থৌদাংদি লৈবাক অসিদগী শেঞ্জা-থুমজা মুৎথৎপনি। শেঞ্জা-থুমজা অসি ইচম চম্বা অরানবা থবক অমা নত্তে, মসিনা লায়রবশিং হক মৎলি, মসিনা অতোপ্পা অরানবা থবক কয়া পাংথোকহল্লি, অচুম্বা অমসুং গনতন্ত্রগী লম্বীদা শেঞ্জা-থুমজানা খ্বাইদগী চাউবা অপনবা ওইরি। সরকারদা শেঞ্জা-থুমজা তৌবা অসিনা গনতন্ত্রদা শোকহল্লি অমসুং মসিনা অহানবা ওইনা নহারোলশিংগী মঙলান কায়হল্লি অমসুং অসিগুম্বা ফিবম অসিনা হৈথোই-শিংথোইবা অমসুং লৌশিং হাৎতোকপগী ফিবম অমা শেমগৎলি। শেঞ্জা-থুমজানা মীচং-মীখাই নাইহল্লি অমসুং লৈবাক্কী মপাঙ্গল শোন্থহনবা, চাউখৎ-থৌরাংদা অপনবা পীবা শাগৈগী সাসন অমা লৈহল্লি।
প্রধান মন্ত্রীনা হায়খি ভারতনা নিংতম্বা মতমদা শেঞ্জা-থুমজাগী পোৎলুম অমা ফংহৌখি অমসুং মসি মুৎথৎপগী মহুত্তা, মীওই খরনা মসিগী লায়না অসি য়োকখৎখি। চহি ১০গী মমাঙদা ঐখোয়না স্কাম কয়া থেংনখ্রে। মসিগী ফিবম অসিনা লৈঙাক্তা অকায়বা থোকহল্লি অমসুং থৌশিল শোইবগী ফিবম অমনা হৌজিক ফাওবা চাউখৎপা থিন্থহল্লে।
প্রধান মন্ত্রীনা হায়খি ২০১৪গী মতুংদা সরকারনা মরুওইনা লৌবদি সরকারদা থাজবা লৈহনবনি অমসুং মিসনগী মওংদা অরোনবা শেন অমসুং বেনামি লন-থুমগী মথক্তা সরকারনা থবক লৌখৎপা হৌরে। সরকারগী তেন্দরশিং লাউবদা মনুং-মপান উবা ঙম্বা মওংদা পাংথোক্লে অমসুং তু-জি অমসুং ফাইব-জি স্পেকত্রমশিং পীবদা খেন্নবা লৈরে। কেন্দ্র সরকারগী দিপার্তমেন্তশিংগী পোৎ-চৈ লৈবদা অরোন-অথুপ লৈতনবা জি.ই.এম(গভর্নমেন্ত ই মার্কেতপ্লেস) পোর্তেল হৌদোক্লে। মমাংঙৈগী ‘ফোন বেঙ্কিং’গী অৱাবা অদুগা য়েংনবদা ঙসিগী ইন্তরনেত বেঙ্কিং অমসুং য়ু.পিনা য়াম্না ফরে। চহি খর অসিদা বেঙ্কিং সেক্তরগী ফিবম ফগৎলে। ফিউজিতিপ ইকোনোমিক ওফেন্দর্স এক্তনা ফিউজিতিপ ওফেন্দরশিংগী লুপা করোর লিশিং ২০গী লন-থুমশিং মৎলে।
সরকারগী পুক্কৈ-লনগৈ শগুন তৌবগী চহি কয়া কুইরবা চৎনবী অমা ফোঙদোক্লদুনা প্রধান মন্ত্রীনা হায়খি শেঞ্জা-থুমজাগী থবকশিং অসি কয়া য়াম্না মরা তারবগে হায়বদা সরকারগী স্কিমশিংদগী শগুন তৌনবা খাউবুনাইশিং থাদোকই। রেসনশিং য়েনবদা, য়ুমশিং শাবদা, স্কোলারশিপশিং , পেন্সনশিং নত্ত্রগা অতোপ্পা সরকাআরগী স্কিমশিংদা ওইগেরা, অশেংবা ফংগদবা মীওইশিং নমথাক তৌবী। লায়রবশিংগী লুপা ১ কাইথোকপা মতমদা, মখোয়না শুপ্নগী পৈশা ১৫ খক ফংই হায়না মমাঙদা প্রধান মন্ত্রী অমনা হায়খিবা লৈ।
দাইরেক্ত বিনিফিৎ ত্রান্সফর খুদম ওইনা পীরদুনা, প্রধান মন্ত্রীনা হায়খি হৌজিক ফাওবদা সরকারনা লায়রবশিংদা লুপা করোর লাখ ২৭ ফংহনখ্রে অমসুং লুপা ১গা পৈশা ১৫গী থিওরিদা য়ুম্ফম ওইরগা পাবদা মমাঙদা লুপা করোর লাখ ১৬ মাঙখ্রে। জন ধন, আধার অমসুং মোবাইলগী মখাদা বেনিফিসরিশিংনা মখোয়না ফংফম থোকপশিং মপুংফানা ফংলে অমসুং লৈঙাক অসিদগী শাশিন্নবা বেনিফিসরি করোর ৮ হেন্না লৌথোকখ্রে। দাইরেক্ত বিনিফিৎ ত্রান্সফরনা মরম ওইদুনা শেঞ্জা-থুমজা তৌবশিংনা ফংখিগদবা লৈবাক অসি লুপা করোর লাখ ২.২৫ কনবা ঙম্লে।
প্রধান মন্ত্রীনা হায়খি ইন্তরভিয়ুগী মিংদা থবক হাপ্পদা শেঞ্জা-থুমজা তৌখি। মরম অদুনা কেন্দ্র সরকারদা গ্রুপ-সি অমসুং গ্রুপ-দিগী থবক লৌবদা ইন্তরভিয়ু পাংথোক্তবনি। মসিগা চপ মান্ননা, নিম তৈরবা য়ুনিয়ানা য়ুরিয়াগা মরী লৈনবা ৱাথোকশিং থেংনরে। ঙাক-শেনগী খুৎলায়শিং লৈবদা অরোন-অথুপ লৈতনা থবক তৌরে অমসুং দিফেন্স সেক্তরদা অত্মানির্ভরতাগী থবক পায়খৎলে।
প্রধান মন্ত্রীনা হায়খি থিজিনবদা থেংবা অসিনা মরাল লৈবশিং চৈরাক পীবদা থেংই অমসুং মরাল লৈতবশিং খুদোংহন্দে। থবকশিং য়াংখৎহনবা, মালেমগী ওইনা চৎনরিবা খ্বাইদগী ফবা থবকশিং লৌশিনবা অমসুং ওফিসারশিংগী কেপাসিতি বিল্দিং হেনগৎহনবা দরকার ওই।
প্রধান মন্ত্রীনা নাখৈ শেংনা হায়খি মদুদি ঙসিদি লৈবাক অসিদা শেঞ্জা-থুমজাগী মায়োক্তা থবক লৌখৎপদা রাজনিতিগী ফিরেপ্তা অকিবা অমতা লৈতে। শক্তি লৈবা ওইরবসু, শেঞ্জা-থুমজাগী মাইয়োক্তা ওফিসারশিংনা চিংনবা লৈতনা থবক লৌখৎকদবনি। ইনভেস্তিগেসন এজেন্সিশিং মিংচৎ থিনবা মখোয়না পায়খৎপা থবকশিং অমসুং শেঞ্জা-থুমজাগী শক্তিগী ৱারিনা ওফিসারশিং নিংহন্নরোইদবনি। হায়রিবা মীওইশিং অসিনা অদোমগী পুক্নিং হন্থহনগনি, অদুবু নহাক্না নহাক্কী থবক্তা পুক্নিং চঙগদবনি। শেঞ্জা-থুমজাদা চেন্নবা মীওই অমতা লেম্না থারোইদবনি। ঐখোয়গী থবকশিংদা কোমথোকপা লৈরোইদবনি। মসি লৈবাক অসিগী অপাম্বনি, মসি মীয়ামগী অনিংবনি। লৈবাক, আইন অমসুং সংবীধান নখোয়গীদমক লৈরি।
প্রধান মন্ত্রীনা হায়খি হেন্না ফবা ফল পুরক্নবা তোঙান-তোঙানবা এজেন্সিশিংগী মরক্তা পাউ ফাওনদবা লৈরিবা অসি লৌথোকপা দরকার ওইরে। অমনা অমবু থাজনবগী ফিবম অমা লৈরবা মতমদা অপুনবা ওইনা অমসুং হিরম কয়াদা থিজিনবা ঙমগনি। অপনবা মীওই মশিং হেনগৎলকপদা লোয়ন্না ভারতকী শেন-থুমগী শক্তিশু হেনগৎলক্লি। ভারতকী খুন্নাই, লৈবাক অসিগী অপুনবা, লৈবাক অসিগী শেন-থুমগী থবকশিং অমসুং লৈবাক অসিগী ইন্সতিতুসনশিংদা খুৎথাবা হেনগৎলক্কনি। হায়রিবা থবকশিং অসিদা শেঞ্জা-থুমজাদগী ফংলকপা শেনফমশিং শীজিন্নরক্কনি। মরম অদুনা লৈবাক কয়া শরুক য়াদুনা চৎথবা ক্রাইম অমসুং শেঞ্জা-থুমজা মশক খঙবা অমসুং থিজিনবা দরকার ওই। থিজিনবদা ফোরেন্সিক সাইন্স শীজিন্নবা হেনগৎহনগদবনি। অনৌবা তেক্নোলোজিনা মরম ওইদুনা ক্রাইমশিং ফাওবা মালেমগী থাক্তা পাংথোক্লে, মরম অদুনা ফোরেন্সিক সাইন্সনা মসিগী পাম্বৈ ওইগদবনি।
সাইবর ক্রাইমশিং থেংন্নবা অনৌবা থৌরাং অমা মথৌ তাবগী ৱাফম পল্লদুনা প্রধান মন্ত্রীনা হায়খি তেক্নোলোজিগী লমদা থবক তৌরিবা ওন্ত্রেপ্রেনিউয়রশিং অমসুং নহারোলশিং অমসুং দিপার্তমেন্তদা লৈরিবা তেক্নোলোজি খঙবা নহা ওইরিবা ওফিসারশিংগা লোয়ন্না থবক তৌমিন্নগদবনি। বিউরো অসিদা লৈবা মুৎথৎপা য়ারবা থবক অমসুং সিস্তেম ৭৫ খোমজিনবগীদমক মহাক্না সি.বি.আই থাগৎখি অমসুং হিরম অসিদা মতম চানা থবক তৌনবা খঙহনখি। ইন্সতিতুসন অসি ইভালুএসন তৌবগী থবক চোকথবা লৈতনা লেপ্তনা পাংথোক্কদবনি।
থৌরম অদুদা পর্সোনেল, পব্লিক গ্রিভান্সেস অমসুং পেন্সন্সকী রাজ্য মন্ত্রী শ্রী জিতেন্দ্র সিংহ, প্রধান মন্ত্রীগী সেকুরিতি এদভাইজর শ্রী অজিৎ দোবাল, কেবিনেৎ সেক্রেতরি শ্রী রজিব গৌবা অমসুং সি.বি.আইগী দিরেক্তর শ্রী সুবোধ কুমার জাইশ্বাল শরুক য়াখি।
*****
(Release ID: 1913353)
Visitor Counter : 119
Read this release in:
Punjabi
,
English
,
Urdu
,
Marathi
,
Hindi
,
Bengali
,
Assamese
,
Gujarati
,
Odia
,
Tamil
,
Telugu
,
Malayalam