نیشنل آرکائیوز آف انڈیا کے 133ویں یوم تاسیس کے موقع پر جناب ارجن رام میگھوال نے آج نئی دہلی میں نیشنل آرکائیوز آف انڈیا میں نمائش ”خواتین اور قوم کی تعمیر: 1857 سے جمہوریہ تک“ کا افتتاح کیا۔

اس موقع پر جناب ارجن رام میگھوال نے کہا کہ یہ وزیر اعظم جناب نریندر مودی کا خیال تھا کہ وہ جدوجہد آزادی کے ان گمنام ہیروز کو اجاگر کریں جس میں خواتین نے اہم کردار ادا کیا ہے۔ انہوں نے کہا کہ نمائش میں 1857 سے لے کر اب تک قومی تعمیر اور جدوجہد آزادی میں خواتین کے کردار کو دلچسپ انداز میں اجاگر کیا گیا ہے۔ درگاوتی دیوی اور کستوربا گاندھی کی مثالیں پیش کرتے ہوئے، جناب ارجن رام میگھوال نے کہا کہ یہ نمائش ان کے تعاون کے اہم اور نامعلوم پہلوؤں پر روشنی ڈالتی ہے۔

یہ نمائش قوم کی تعمیر کے عمل میں خواتین کے کردار کو ظاہر کرنے کی ایک کوشش ہے۔ چاہے وہ ہندوستان کی جابرانہ نوآبادیاتی حکمرانی سے آزادی کی جدوجہد ہو، سماجی برائیوں جیسے بچپن کی شادی اور چھوت کا خاتمہ، خواتین کی تعلیم کو آسان بنانا، یا آزاد ہندوستان کے لیے آئین کی تشکیل، خواتین ہمیشہ سب سے آگے رہی ہیں اور ان کی جدوجہد کو آگے بڑھایا ہے۔

نمائش میں آرکائیو کے خزانے سے اخذ کردہ اصل دستاویزات، یعنی حکومت کی سرکاری فائلوں، نامور شخصیات کے نجی کاغذات کے ساتھ ساتھ این اے آئی لائبریری میں موجود نایاب کتابوں کے بھرپور ذخیرے سے انتخاب پیش کیا گیا ہے۔

نمائش میں ہندوستانی قوم کی تعمیر کے عمل میں جانی پہچانی، غیر معروف اور گمنام خواتین کا تعاون شامل ہے۔ اس میں 1857 سے 1950 تک 93 سال سے زیادہ کا سفر شامل ہے۔ یہ خواتین رہنما مختلف پس منظر سے آئیں اور متنوع پیشوں سے تعلق رکھتی تھیں۔ انہیں آزادی کے جنگجو، سپاہی (آئی این اے)، سماجی اصلاح کار، ماہر تعلیم، اور ادبا کے طور پر پہچان ملی۔

یہ نمائش 30 اپریل 2023 تک ہر دن صبح 10:30 بجے سے شام 5:00 بجے تک بشمول ہفتہ، اتوار اور قومی تعطیلات، عوام کے دیکھنے کے لیے کھلی رہے گی۔

نیشنل آرکائیوز آف انڈیا وزارت ثقافت کے تحت ایک منسلک دفتر ہے۔ نیشنل آرکائیوز آف انڈیا کے ذخیروں میں اس وقت 18.00 کروڑ صفحات سے زیادہ کا مجموعہ موجود ہے جس میں پبلک ریکارڈز کے صفحات، جن میں فائلیں، جلدیں، نقشے، صدر ہند کی طرف سے منظور شدہ بل، معاہدوں، نادر مخطوطات، مشرقی ریکارڈ، نجی کاغذات، کارٹوگرافک ریکارڈ، گزٹ اور گزٹیئرز کا اہم مجموعہ، مردم شماری کے ریکارڈ، اسمبلی اور پارلیمنٹ کے مباحث ممنوعہ لٹریچر، سفری احوال وغیرہ شامل ہیں۔ مشرقی ریکارڈ کا ایک بڑا حصہ سنسکرت، فارسی، اڑیہ وغیرہ میں ہے۔

**************

ش ح۔ ف ش ع- م ف

U: 2452