ঙসি নিউ দিল্লিগী দোক্তর অম্বেকার ইন্তরনেসনেল সেন্তরদা পঞ্চায়তি রাজ মিনিস্ত্রিনা শীন্দুনা ১৫শুবা ফাইনান্স কম্মিসনগী মখাদা পঞ্চায়তি রাজ ইন্সতিতুসনশিংদা ওনলাইন ওদিৎ পাংথোক্নবা অমসুং ফন্দ থাদোক্নবগী মতাংদা রাজ্যশিংগা লোয়ন্না খন্ন-নৈনবা মীফম পাংথোকখ্রে।

মীফম অদু পঞ্চায়তি রাজ মিনিস্ত্রিগী সেক্রেতরি শ্রী সুনিল কুমারনা চিয়ার লৌখি লোয়ন্না দ্রিকিং ৱাতর অমসুং সেনিতেসন দিপার্তমেন্তগী সেক্রেতরি বিনি মহাজন, দিপুতি কম্পতোল্লর অমসুং ওদিতর জেনেরেল(লোকেল বোদিস) দোক্তর চন্দ্র সেখর কুমার অমসুং পঞ্চায়তি রাজ মিনিস্ত্রিগী জোইন্ত সেক্রেতরি শ্রী অলোক প্রেম নাগর শরুক য়াখি। মীফম অদুদা লোকেল ফন্দ অমসুং ওদিৎ দাইরেক্তোরেতকী মীহুৎশিং অমসুং রাজ্য ২০গী পঞ্চায়তি রাজ দিপার্তমেন্তশিংগী সেনিয়র ওফিসিএলশিং শরুক য়াখি।

মহাক্কী মরুওইবা ৱারোলদা পঞ্চায়তি রাজ মিনিস্ত্রিগী সেক্রেতরি শ্রী সুনিল কুমারনা ওনলাইন ওদিৎকী খুৎথাংদা পি.আর.আইশিংদা অরোন-অথুপ লৈতনা মরম চানা থবক তৌনবা রাজ্যশিংনা পায়খৎলিবা থবকশিং থাগৎখি অমসুং অন্ধ্র প্রদেস অমসুং তেলাঙ্গানা রাজ্যশিংদা পায়খৎলিবা তমজনিঙাই ওইরবা থবকশিং শিংথাখি। মহাক্না হায়খি মীয়ামগা খ্বাইদগী নক্নবা বোদিশিংনা থবক তৌবা মতমদা মায়োক্নবা শেন-থুমগী খুদোংচাদবশিং রাজ্যশিংনা মশক খঙদোক্কদবনি অমসুং ওদিৎ পেরা, ওদিৎ য়েংশিনবা অমসুং থবক ওইনা পাংথোকপদা অহেনবা মীৎয়েং থমগদবনি।

মহাক্কী হৌদোকপগী ৱারোলদা দ্রিকিং ৱাতর অমসুং সেনিতেসন দিপার্তমেন্তগী সেক্রেতরি বিনি মহাজন্না হায়খি খুঙ্গংশিংদা থক্নবা ঈশিং ফংহন্নবা অমসুং সেনিতেসনগী মচাকশিং লৈহন্নবা থবক পায়খৎকদবনি। ১৫শুবা ফাইনান্স কম্মিসনগী গ্রান্তশিংগা জল জিবন মিসনগা পুনশিল্লে অমসুং স্তেৎ ফাইনান্স কম্মিসনগী গ্রান্তশিং শীজিন্নদুনা খুঙ্গংশিংদা ঈশিং পীনবা অমসুং সেনিতেসনগী থবকশিং পাংথোক্নবা পি.আর.আইশিংদা অঙকপা খুদোংচাবা অমা পীরে।

এদিসনেল দিপুতি সি.এ.জি শ্রী সুবির মাল্লিক্না হায়খি পঞ্চয়তি রাজ ইন্সতিতুসনশিং মপুংফানা ওদিৎ পাংথোকপদা ই-গ্রামশ্বারাজ, ওদিৎ ওনলাইন অমসুং ই-জি.এস.পি.আইগী থবকশিংনা মতেং য়াম্না পাংলে। জিলা থাক্তা অমসুং গ্রাম সভাগী থাক্তা ওদিৎ ওবজরবেসনগী খুদোংচাদবশিং কোকহন্নবা অমসুং মরম চানা থবক তৌবদা থেংনরিবা খুদোংচাদবশিং হন্থহন্নবা মোনিতর তৌবগী থবকশিং মপাঙ্গল কনখৎহনবা দরকার ওইরে।

পঞ্চায়তি রাজ মিনিস্ত্রিগী এদিসনেল সেক্রেতরি দোক্তর চন্দ্র সেখর কুমারনা হায়খি পঞ্চয়তশিংদা ওনলাইন ওদিৎ পাংথোক্নবা অমসুং ফাইনান্স কম্মিসনগী গ্রান্তশিং য়েন্থোক্নবা রাজ্যশিংনা মসিগী প্লেতফোর্ম অসি শীজিন্নগদবনি।

পঞ্চায়তি রাজ মিনিস্ত্রিগী জোইন্ত সেক্রেতরি শ্রী অলোক প্রেম নাগরনা ১৫শুবা ফাইনান্স কম্মিসনগী ফন্দ থাদোকপগী চৎন-কাংলোনশিংগী মতাংদা শন্দোক্না তাকখি অমসুং ই-গ্রামশ্বারাজ অমসুং ওদিৎ ওনলাইনগী মতাংদা রাজ্যশিংনা পায়খৎলিবা থবকশিংশু উৎখি। হৌজিক চৎনরিবা গ্রান্ত ত্রান্সফর সর্তিফিগেদতা শেমদোকপা দরকার ওইবগী মতাংদা রাজ্যশিংদগী পাউতাকশিং লৌখি। ই-গ্রামশ্বারাজ অমসুং ওদিৎ ওনলাইন্দা চাদা ১০০ শরুক য়ানবা লাল্লোং অমা পায়খৎনবা রাজ্যশিংদশু পাউতাক  পীখি।

মীফম অদুদা অসাম, অন্ধ্র প্রদেস, অরুনাচল প্রদেস, বিহার, ছতিসগর, গুজরাত, হরিয়ানা, হিমাচল প্রদেস, ঝরখান্দ, কর্নাতকা, কেরলা, মধ্য প্রদেস, মহারাস্ত্রা, মনিপুর, মিজোরম, ওরিসা, রাজস্থান, সিক্কিম, তামিল নাদু, তেলঙ্গানা, উত্তর প্রদেস, উত্তরখান্দ অমসুং নোংচুপ বেঙ্গল শরুক য়াখি অমসুং ই-গ্রামশ্বারাজ অমসুং ওদিৎ ওনলাইন্দা মখোয় শরুক য়ানবা মখোয়গী থৌরাংশিং অমসুং ফাইনান্স কম্মিসনগী গ্রান্তশিং মরমচানা অমসুং নিংথিনা শীজিন্ননবগী মতাংদা মরুওইবা পাউতাকশিং থমখি।

*****