مرکز نے نیشنل ایگریکلچرل کوآپریٹو مارکیٹنگ فیڈریشن آف انڈیا لمیٹڈ (نفیڈ) اور نیشنل کنزیومر کوآپریٹو فیڈریشن آف انڈیا لمیٹڈ (این سی سی ایف) کو قیمتوں میں کمی کی خبروں کے پیش نظر سرخ پیاز کی خریداری بڑھانے کے لیے مارکیٹ میں مداخلت کرنے کی ہدایت دی ہے اور ساتھ ہی ساتھ اسی وقت ملک بھر میں پھیلے کھپت مراکز کو بھی بھیجنے اور فروخت کرنے کو کہا ہے۔

اس نے 40 خریداری مراکز کھولے ہیں جہاں کسان اپنا اسٹاک بیچ سکتے ہیں اور اپنی ادائیگی آن لائن وصول کر سکتے ہیں۔ نفیڈ نے اسٹاک کو خریداری مراکز سے دہلی، کولکتہ، گوہاٹی، بھونیشور، بنگلور، چنئی، حیدرآباد اور کوچی منتقل کرنے کے انتظامات کیے ہیں۔

پیاز کی پیداوار 2022-23 کے دوران تقریباً 318 ایل ایم ٹی ہونے کا تخمینہ ہے، جو کہ گزشتہ سال کی پیداوار 316.98 ایل ایم ٹی سے زیادہ ہے۔ برآمدات کے ساتھ طلب اور رسد میں تسلسل کے باعث قیمتیں مستحکم رہیں۔ تاہم، فروری کے مہینے میں سرخ پیاز کی قیمتوں میں کمی دیکھی گئی ہے، خاص طور پر ریاست مہاراشٹر میں جہاں اوسط شرح 500-700 روپے فی کوئنٹل پر آ گئی ہے۔ ماہرین قیمتوں میں اس گراوٹ کی بڑی وجہ دیگر ریاستوں میں پیداوار میں اضافے کو قرار دیتے ہیں۔جس کی وجہ سے ناسک جیسے ملک کے بڑے پیداواری ضلع سے سپلائی پر انحصار کم ہوا ہے۔

پیاز تمام ریاستوں میں اگائی جاتی ہے، حالانکہ مہاراشٹر ملک کی کل پیداوار میں تقریباً 43 فیصد حصہ کے ساتھ سب سے بڑا پروڈیوسر ہے، اس کے بعد مدھیہ پردیش 16 فیصد، کرناٹک اور گجرات 9 فیصد ہے۔ خریف، پچھیتی خریف اور ربیع کے دوران ایک سال میں 3 فصلوں کے موسموں میں پیداوار حاصل کی جاتی ہے۔

ربیع کی فصل سب سے اہم ہے کیونکہ یہ قومی پیداوار میں تقریباً 72-75 فیصد حصہ ڈالتی ہے اور پیداوار مارچ سے مئی کے مہینوں میں حاصل کی جاتی ہے۔ ربیع کی فصلوں کو زیادہ دیر تک رکھا جا سکتا ہے اور ذخیرہ کیا جا سکتا ہے جبکہ خریف اور دیر خریف کی فصلیں براہ راست استعمال کے لیے ہیں اور ذخیرہ کرنے کے لیے موزوں نہیں ہیں۔ ملک بھر سے مختلف اوقات میں پیاز کی فصل کی وصولی کی وجہ سے سال بھر تازہ/ ذخیرہ شدہ پیاز کی باقاعدہ فراہمی دستیاب رہتی ہے۔ لیکن بعض اوقات موسم کی خرابی کی وجہ سے یا تو گودام میں رکھی ہوئی پیاز خراب ہو جاتی ہے یا فصل کھیتوں میں تباہ ہو جاتی ہے جس سے سپلائی میں خلل پڑتا ہے اور ملکی قیمتوں میں اضافہ ہو جاتا ہے۔

اس طرح کے چیلنجوں سے نمٹنے کے لیے، حکومت ہند نے پیاز کی خریداری اور ذخیرہ کرنے کے لیے ایک پرائس اسٹیبلائزیشن فنڈ قائم کیا ہے تاکہ کم پیداوار کے دوران سپلائی چین کو برقرار رکھا جا سکے۔

گزشتہ سال، صارفین کے امور کے محکمے کی ہدایت کے تحت، نفیڈ نے بفر اسٹاک کے لیے 2.51 ایل ایم ٹی ربیع پیاز کی خریداری کی تھی۔ پیاز کی بروقت اور اچھی طرح سے سوچی سمجھی فراہمی نے اس بات کو یقینی بنایا کہ قیمتوں میں غیر معمولی اضافہ نہ ہو۔ ہموار سپلائی کو یقینی بنانے کے لیے گودام میں رکھے پیاز کو ملک بھر میں سپلائی کیا گیا۔ اس سال بھی صارفین کے امور کے محکمے نے 2.5 ایل ایم ٹی پیاز کو بفر اسٹاک کے طور پر رکھنے کا فیصلہ کیا ہے۔

پیاز کا ذخیرہ کرنا مشکل ہے کیونکہ زیادہ تر ذخیرہ کھلے ہوادار ڈھانچے (چالوں) میں کھلے میدانوں میں ذخیرہ کیا جاتا ہے اور اس طرح کے ذخیرہ کے اپنے چیلنج ہوتے ہیں۔ اس وجہ سے پیاز کو طویل مدت کے لیے فٹ رکھنے کے لیے سائنسی کولڈ چین اسٹوریج کی ضرورت ہے، جس کی آزمائشیں جاری ہیں۔ اس طرح کے ٹیسٹوں کی کامیابی حال ہی میں قیمتوں میں نظر آنے والے اتار چڑھاؤ سے بچنے میں مدد کرے گی۔ مارکیٹ پر نظر رکھنے والے بھی ایکسپورٹ پالیسی میں تسلسل کا مشورہ دیتے ہیں۔مارکیٹ پر نظر رکھنے والے ایکسپورٹ پالیسی میں مستقل مزاجی کا مشورہ دیتے ہیں، کیونکہ یہ ہندوستانی پیاز کے لیے ایک بہتربرآمدی منڈی کو یقینی بنائے گا۔

زراعت اور کسانوں کی بہبود کا محکمہ ریاستی حکومتوں کے ساتھ مسلسل رابطے میں ہے اور مارکیٹ کی قریب سے نگرانی کر رہا ہے تاکہ کسانوں کے فائدے کے لیے اگر ضرورت ہو تو اضافی اقدامات کیے جا سکیں۔

ش ح۔   ش ت۔ج

Uno-2431