ঙসি তুরিজম, কলচর অমসুং দোনরগী য়ুনিয়ন মিনিস্তর শ্রী জি.কিসন রেদ্দিনা ম্যান্মারগী বোর্দর এফেয়ার্সকী মিনিস্তরগা লোয়ন্না ভর্চুএল মীতিং অমা পাংথোকখ্রে। হন্দক ম্যান্মর মনুংদা ওইরক্লিবা ফিবমশিং অমসুং ভারত-ম্যান্মার ঙমখৈ লমদমদা ওইরিবা ফিবম, ঙমখৈ পরিংদা শান্তি থম্নবা অমসুং শেন-থুমগী ফিবম চাউখৎনবা নাকল অনিনা ৱা খন্নখি।

ম্যান্মারগী লম্বী-থোংগী ইনফ্রাস্ত্রকচর চাউখৎনবা ম্যান্মারদা পায়খৎলিবা ভারতকী গ্রান্ত-ইন প্রোজেকশিং অমসুং ম্যান্মারগী শেন-থুমগী ফিবম ফগৎনবগী মতাংদা নাকল অনিনা খন্নখি।

অথুবা মতমদা শান্তি হঞ্জিলহনবা অমসুং ম্যান্মারদা চাউখৎ-থৌরাংগী প্রোজেকশিং পায়খৎদুনা লৈবাক অনিমক্কী ঙমখৈ পরিংদা লৈরিবা মীয়াম কান্নবা পীনবা মীফম অদুদা খন্নখি।ম্যাৱাদিদা পন্দুনা লৈরিবা ভারতমচাশিং অথুবদা মতমদা মরৈবাক্তা হল্লক্নবা মতেং পাংনবা ভারতনা তকশিনখি।

মীফম অদুদা খন্নখিবা অতোপ্পা ৱাফমশিংগী মনুংদা হৌজিক ভারত্তা চংজফম লৌদুনা লৈরিবা ম্যান্মারমচাশিং হল্লক্নবা থৌরাং তৌবা, দ্রগ পুথোক-পুশিন তৌবা লাকশিনবা অমসুং ঙমখৈ লান্না চৎথবা ক্রাইমশিং থেংনবা, ঙমখৈগী শরুকশিংদা লৈবাক অনিগী মীওইশিং চংথোক-চংশিন তৌবা হেনগৎহনবা, অথিংবা থমদনা চৎথোক-চৎশিন তৌহনবা অমসুং ঙমখৈ লান্না ললোন-ইতিক পাংথোকপা হেনগৎহনবা য়াওখি।

*****