ঙসি দোনর, তুরিজম অমসুং কলচরগী য়ুনিয়ন মিনিস্তর শ্রী জি.কিসন রেদ্দিনা অৱাং-নোংপোক্কী রাজ্য মরি হায়বদি অসাম, অরুনাচল প্রদেস, মনিপুর অমসুং মিজোরমগী চীফ মিনিস্তরশিংগা ৱারি শানখ্রে।

ফন্দশিং পীথোক-পীশিনগী সি.এন.এ সিস্তেম ফজনা শীজিন্ননবা অমসুং চাদিং তৌদ্রবা শেনফমশিং সি.এন.এ কাউন্ততা মতম চানা হল্লক্নবা শ্রী জি.কিসন রেদ্দিনা রাজ্য সরকারশিংদা খঙহনখি।

শ্রী রেদ্দিনা শেনবা চহি ২০২২-২৩গী বজেদ এক্সপেন্দিচরশু খন্নখি অমসুং দোনর মিনিস্ত্রিদা অফবা প্রোপোজেলশিং পীরক্নবা রাজ্য সরকারশিংদশু খঙহনখি। মহাক্না হায়খি দরকার ওইবা মতেং পাংনবা রাজ্যশিংদা দোনর মিনিস্ত্রিগী ফিল্দ তেক্নিকেল স্তেৎস য়ুনিতস(এফ তি এস য়ু)শিং লিংখৎলে। রাজ্যশিংনা বজেতকী চাকথুংশিং চাদা ১০০ শীজিন্নগদবনি।

দোনর মিনিস্ত্রিগী তোঙান-তোঙানবা স্কিমশিংগী মখাদা ২০২২-২৩ অমসুং ২০২৩-২৪দা সেঙ্কসন তৌগদবা প্রোজেকশিংগী পীশিনখ্রবা দি.পি.আরশিংগী ফিবমশু মিনিস্তরনা হন্না য়েংশিনখি। তাঙ্কক খুদিংমক্তা নকশিন্ননা থবক তৌমিন্নদুনা প্রোজেকশিংগী মতম অথুবা মতমদা লোইশিন্নবা রাজ্য সরকারশিং অমসুং দোনর মিনিস্ত্রিগী ওফিসিএলশিংদশু মহাক্না খঙহনখি।

হন্দক পাংথোক্কদৌরবা গ্লোবেল ইনভেস্তমেন্ত সম্মিৎকী মতাংদশু য়ুনিয়ন মিনিস্তরনা কুপ্না খন্নখি অমসুং মপুংফানা মতেং পাংনা খঙহনখি। মহাক্না মখা তানা হায়খি মীফম অসি অৱাং-নোংপোক্কী খুদোংচাবশিং ইনভেস্তরশিংদা উৎনবা অচৌবা খুদোংচাবা অমনি অমসুং সেক্তর খুদিংমক্তা লৈরিবা মশিং থিঙমদ্রবা খুদোংচাবশিংশু উৎবা য়াগনি। রাজ্যশিংনা ললোন-ইতিক পাংথোকপদা লাইহন্নবা থবকশিং পায়খৎকদবনি অমসুং ইনভেস্তরশিংনা খঙনিংবশিং খঙহন্নবা জিলা অমসুং রাজ্য থাকশিংদা নোদেল ওফিসারশিং হাপকদবনি।

য়ুনিয়ন মিনিস্তরনা হায়খি মার্চ ২০২৩দা মালেম থাক্কী তুরিজম ইনভেস্তেমেন্ত সম্মিৎ অমা পাংথোক্কনি অমসুং রাজ্য সরকারশিংনা মীয়ামদা পাউজেল শন্দোক্কদবনি অমসুং শরুক য়ানিংনবা পুক্নিং থৌগৎকদবনি। অনৌবা নোর্থ ইস্ত ইনভেস্তমেন্ত দিবলপমেন্ত স্কিম হৌদোক্নবা রাজ্যশিংনা মখোয়গী ওইবা ৱাফমশিং পীরক্কদবনি। অনৌবা স্কিম অসি মাইপাক্না পায়খৎপদা রাজ্যশিংনা মরুওইবা থৌদাং লৌগদবনি অমসুং স্কিম অসিগী পান্দমশিং ফংনবা অমসুং লমদম অসিদা অশেংবা শক্তমশিং উৎথোক্নবা রাজ্যশিংনা মতেং পাংগদবনি।

অৱাং-নোংপোক রাজ্যশিংদা জি-২০ মীফমগী থৌরাং তৌরিবশিংশু শ্রী রেদ্দিনা হন্না য়েংশিনখি অমসুং কেন্দ্র সরকারদগী দরকার ওইবা মতেংশিং পাংগনি হায়বগী থাজবা পীখি।

ইজুকেসন মিনিস্ত্রিনা মাংজিল থারগা দোনর মিনিস্ত্রি, য়ুথ এফেয়ার্স অমসুং স্পোর্তস মিনিস্ত্রি, ইনফোর্মেসন ওফ ব্রোদকাস্তিং অমসুং রেলৱে মিনিস্ত্রিনা মতেং পাংদুনা পাংথোক্কদৌরিবা “য়ুব শঙ্গম” খোঙচৎশিংগী মতাংদসু শ্রী জি. কিসন্না খন্নখি। মহাক্না হায়খি অৱাং-নোংপোক্কী মহৈরোয়শিং ভারতকী তোঙান-তোঙানবা মফমশিংদা লমকোয়বা চৎকনি অমসুং ভারতকী অতোপ্পা মহৈরোয়শিং অৱাং-নোংপোক্কী তোঙান-তোঙানবা মফমশিংদা চৎকনি। পরম্পারা, পরিয়াতন, প্রাগাতি, প্রোদয়োগিকি অমসুং পারাস্পার সম্পাক হায়রিবা ৱাখল্লোন মঙা অসিদা লমকোয়বগী থৌরমশিং অসি পাংথোক্কদবনি। মহৈরোয়শিং মিংচন্নবা অমসুং মসিগী মতাংদা খঙহন্নবা রাজ্যশিংনা থবক পায়খৎকদবনি।

******