ৱাই-২০ সন্মিলনৰ আৰম্ভণিৰ দ্বিতীয় দিনটো গুৱাহাটীৰ আইআইটি-ৰ বিস্তৃত চৌহদত আৰম্ভ হয়। যুৱ প্ৰতিনিধিসকলে পুৱা যোগাভ্যাস আৰু সাতশ একৰজুৰি বিয়পি থকা আইআইটি চৌহদত খোজকাঢ়ি এই সন্মিলনৰ শুভাৰম্ভ কৰে।

কেন্দ্ৰীয় ক্ৰীড়া, যুৱ পৰিক্ৰমা আৰু তথ্য আৰু সম্প্ৰচাৰ মন্ত্ৰী শ্ৰী অনুৰাগ সিং ঠাকুৰে 'যুৱ মন্ত্ৰীৰ সৈতে যুৱ বাৰ্তালাপ'ত অংশগ্ৰহণ কৰি কয় যে ৱাই-২০ ভাৰত সন্মিলনে যুৱকেন্দ্ৰিক প্ৰচেষ্টাৰ উদাহৰণ দাঙি ধৰিছে আৰু যুৱসকলৰ নীতিগত ব্যৱস্থাসমূহ প্ৰদৰ্শন কৰিছে। তেওঁ কয় যে ভাৰতৰ জনগাঁথনি দ্ৰুত সামাজিক, অৰ্থনৈতিক, পাৰিপাৰ্শ্বিক আৰু প্ৰযুক্তিগত উদ্ভাৱন তথা উন্নতিৰ যুগৰ সূচনা কৰিবলৈ অনন্যভাৱে সাজু হৈছে।

ভাৰতীয় গণতন্ত্ৰৰ অমৃত কালত যুৱসকলৰ বাবে সুযোগ সন্দৰ্ভত মন্তব্য কৰি মন্ত্ৰীগৰাকীয়ে কয় যে অমৃত কাল হৈছে সুযোগ আৰু দেশৰ প্ৰতি কৰ্তব্যৰ কাল।

আইআইটি গুৱাহাটীত আৰম্ভণি সন্মিলনৰ দ্বিতীয় দিনা যুৱ আৰু ক্ৰীড়া মন্ত্ৰালয়ৰ যুৱ পৰিক্ৰমা সচিব শ্ৰীমতী মিতা ৰাজীৱলোচনে আদৰণি ভাষণ প্ৰদান কৰে। সচিবগৰাকীয়ে জি-২০ অধ্যক্ষতাৰ মূল বিষয়- "এক পৃথিৱী, এক পৰিয়াল, এক ভৱিষ্যত"ৰ ওপৰত গুৰুত্ব আৰোপ কৰি কয় যে ই আমাক সকলোকে একাধিক ধৰণে প্ৰভাৱিত কৰে আৰু ৱাই-২০ৰ লক্ষ্য হৈছে যিকোনো দেশৰ গঠনমূলক নীতি গ্ৰহণ কৰাৰ সামৰ্থ্য বিকশিত কৰা যি এক সুন্দৰ, সামগ্ৰিক, সুখী আৰু সমৃদ্ধ সমাজৰ বাবে এক উন্নত ভৱিষ্যত গঢ়ি তোলাৰ বাবে তেওঁলোকৰ সামৰ্থ্য নিৰ্ধাৰণ কৰিব।

দ্বিতীয় দিনটোত বিশিষ্ট বক্তা আৰু নেতাসকলৰ সৈতে পেনেল বৈঠকৰ আয়োজন কৰা হয়:-

থীম ১: শান্তি-নিৰ্মাণ আৰু মীমাংসা: যুদ্ধবিহীন যুগৰ সূচনা

পেনেলত উপস্থিত আছিল ভাৰত চৰকাৰৰ ৰাজ্যিক মন্ত্ৰী জেনেৰেল ভি কে সিং (অৱসৰপ্ৰাপ্ত); তেজস্বী সূৰ্য, সাংসদ; লেফটেনেণ্ট জেনেৰেল সতীশ দোৱা (অৱসৰপ্ৰাপ্ত), ভাৰতীয় সেনা ; জ্ঞানেন্দ্ৰ প্ৰতাপ সিং, আইপিএছ, ডিজিপি, অসম চৰকাৰ; শ্ৰী হীৰেন চন্দ্ৰ নাথ, আইপিএছ, এডিজিপি (এছটিএফ/এছবি), অসম; বিপুল কলিতা, আত্মসমৰ্পণকাৰী বিদ্ৰোহী আৰু বিনাল ৱাৰী, আত্মসমৰ্পণকাৰী বিদ্ৰোহী আৰু এই পেনেল তথ্য আৰু সম্প্ৰচাৰ মন্ত্ৰালয়ৰ জ্যেষ্ঠ উপদেষ্টা কাঞ্চন গুপ্তাই পৰিচালনা কৰিছিল।

পেনেলিষ্টসকলে আৰম্ভণিৰে পৰা বিশ্বৰ মঞ্চত শান্তি স্থাপন কৰা আৰু ভাৰতে পালন কৰা ভূমিকাৰ বিষয়ে আলোচনা কৰে। জেনেৰেল ভি কে সিঙে তেওঁৰ প্ৰাৰম্ভিক ভাষণত মন্তব্য কৰি কয় যে যুদ্ধ আৰু শান্তিৰ ধাৰণাই যিকোনো ৰাষ্ট্ৰৰ যুৱপ্ৰজন্মক আটাইতকৈ বেছি প্ৰভাৱিত কৰে। তেওঁ কয় যে "ভাৰতত আমি উগ্ৰপন্থীৰ সৈতে আলোচনাত মিলিত হওঁ । আমি কেৱল শেষ উপায় হিচাপেহে বল প্ৰয়োগ কৰোঁ। এনেদৰেই আমি বাৰে বাৰে সংঘটিত হোৱা বিভিন্ন বিবাদ সমাধান কৰিবলৈ সক্ষম হৈছো।"

এই সন্দৰ্ভত তেজস্বী সূৰ্যই গুৰুত্ব আৰোপ কৰি কয় যে ভাৰতে একতা আৰু বৈচিত্ৰ্যৰ বৈষম্যসমূহ সফলতাৰে পৰিচালনা কৰিছে। জেনেৰেল সতীশ দোৱাই শান্তি বৰ্তাই ৰখা আৰু যুদ্ধত লিপ্ত নোহোৱাত সৈন্যবাহিনীৰ ভূমিকাৰ ওপৰত গুৰুত্ব আৰোপ কৰে। তেওঁ কয় যে ৰাষ্ট্ৰসংঘৰ শান্তিৰক্ষী বাহিনীত ভাৰতৰ নিৰন্তৰভাৱে সৰ্বাধিক উপস্থিতি আছে।

জিপি সিঙে অসম আৰু চুবুৰীয়া ৰাজ্যসমূহত বিদ্ৰোহৰ বিৰুদ্ধে যুঁজ দিয়াৰ অভিজ্ঞতা ভাগ-বতৰা কৰি কয় যে বিদ্ৰোহৰ মূল উদ্দেশ্য অনুধাৱন কৰি বিদ্ৰোহ সমাপ্ত কৰাৰ ৰণনীতি নিৰ্ধাৰণ কৰাটো এক অপূৰ্ব অভিজ্ঞতা হিচাপে বিবেচিত হৈছে ৷ এই সন্দৰ্ভত বিপুল কলিতাই (প্ৰাক্তন আলফা) কয় যে স্বাধীনতা বা বিচ্ছিন্নতাবাদৰ লক্ষ্য এটা ভুল সিদ্ধান্ত আছিল। যোৱা ১০ বছৰত চৰকাৰৰ সৈতে এই সম্পৰ্ক যথেষ্ট উন্নত হৈছে। তেওঁ কয় যে "সেই সময়ত দিল্লীৰ সৈতে অসমৰ যি দূৰত্ব আছিল আৰু এতিয়া আৰ্থ-সামাজিক, ৰাজনৈতিক আৰু সাংস্কৃতিক সম্পৰ্কৰ ক্ষেত্ৰত আমাৰ দূৰত্ব সময়ৰ লগে লগে সম্পূৰ্ণৰূপে পৰিৱৰ্তন হৈছে। আন্তঃগাঁথনি, শিক্ষা আৰু স্বাস্থ্য খণ্ডৰ দৰে ক্ষেত্ৰত ৰাজ্যখনৰ বৰ্তমানৰ বিকাশৰ সাক্ষী হৈ আমি অনুভৱ কৰিছো যে স্বাধীন অসমৰ সপোন দৰাচলতে ভুল আছিল। ৰাষ্ট্ৰৰ বিকাশৰ প্ৰকৃত অৰ্থ উপলব্ধি কৰি আমি সামাজিক সেৱাৰ জৰিয়তে নিজকে সমৰ্পিত কৰিবলৈ আৰম্ভ কৰিছো আৰু এটা এনজিঅ' মুকলি কৰিছো। স্বচ্ছ ভাৰত অভিযানৰ দ্বাৰা অনুপ্ৰাণিত হৈ ২০১৬ চনৰ পৰা মই এই এনজিঅ'ৰ সৈতে জড়িত হৈ আছোঁ আৰু আনৰ জীৱনো পৰিৱৰ্তন কৰাত সহায় কৰিছো।"

থীম ২: দ্বিতীয় কাৰিকৰী অধিৱেশন-কৰ্মৰ ভৱিষ্যত: উদ্যোগ ৪.০, উদ্ভাৱন, আৰু একবিংশ শতিকাৰ দক্ষতা

উদ্যোগপতি ড০ জিডি ধনুকা; ডি. উমা মহেশ্বৰ, জিই এভিয়েচনৰ মুখ্য পৰামৰ্শ অভিযন্তা; প্ৰেম কুমাৰ, মাৰুত ড্ৰোনটেকৰ প্ৰতিষ্ঠাপক আৰু মুখ্য উদ্ভাৱক তথা তিৰুপতি হাইড্ৰজেন এনাৰ্জি লেবৰ আইআইটিৰ অধ্যাপক ড. পি. মুথুকুমাৰৰ লৈ এই পেনেলখন গঠন কৰা হৈছিল। অধিৱেশনখন গুৱাহাটীৰ ভাৰতীয় প্ৰযুক্তিবিদ্যা প্ৰতিষ্ঠানৰ জৈৱ বিজ্ঞান আৰু জৈৱ অভিযান্ত্ৰিক বিভাগৰ অধ্যাপক আৰু মুৰব্বী ড০ ৰাখী চতুৰ্বেদীয়ে পৰিচালনা কৰিছিল। প্ৰেম কুমাৰে তেওঁৰ ভাষণত কৃষি, সামগ্ৰী বিতৰণ আদি ক্ষেত্ৰত ড্ৰোন প্ৰযুক্তিৰ বহুমুখী ব্যৱহাৰ উপস্থাপন কৰে।

জিই এভিয়েচনৰ মুখ্য পৰামৰ্শ অভিযন্তা ড০ উমা মহেশ্বৰে উদ্যোগ ৪.০-য়ে কেনেদৰে কৰ্ম  বিপ্লৱৰ সূচনা কৰিছে সেই সন্দৰ্ভত মন্তব্য কৰে ।

থীম ৩: জলবায়ু পৰিৱৰ্তন আৰু দুৰ্যোগৰ বিপদাশংকা হ্ৰাস: বহনক্ষমতাক জীৱনৰ এক উপায় হিচাপে প্ৰস্তুত কৰা।

পেনেলখনত ড০ শিলপী কুছৱাহা, বিজ্ঞানী; পূৰ্ণিমা দেৱী বৰ্মন, হাড়গিলা আৰ্মীৰ প্ৰতিষ্ঠাপক; সামাজিক উদ্যমী ঋতুৰাজ ফুকন, ড০ অক্ষয় কুমাৰ এএছ, আইআইটি গুৱাহাটীৰ অধ্যাপক আৰু উদ্যোগী ড০ প্ৰতীক কানাকিয়া উপস্থিত আছিল ৷ জলবায়ু পৰিৱৰ্তন আৰু সম্প্ৰদায়ৰ অংশগ্ৰহণৰ দ্বাৰা জৈৱ বৈচিত্ৰ্য বৰ্তাই ৰখাৰ ৰণনীতিৰ ওপৰত এক গভীৰ আলোচনা এই বৈঠকখনত কৰা হয়। বৈঠকখন আইআইটি গুৱাহাটীৰ অধ্যাপক অনামিকা বৰুৱাই পৰিচালনা কৰিছিল।

থীম ৪: ভাগ-বতৰা কৰা ভৱিষ্যত: গণতন্ত্ৰ আৰু শাসনত যুৱসমাজ

অসম যুৱ আয়োগৰ সদস্য মিতা নাথ বৰা; কুমাৰ ভাস্কৰ বৰ্মা সংস্কৃত আৰু প্ৰাচীন অধ্যয়ন বিশ্ববিদ্যালয়ৰ ৰাজনীতি বিজ্ঞান বিভাগৰ সহকাৰী অধ্যাপক অংকুৰ জ্যোতি ভূঞা,  গুৱাহাটী বিশ্ববিদ্যালয়ৰ ৰাজনীতি বিজ্ঞান বিভাগৰ সহকাৰী অধ্যাপক ড০ বিকাশ ত্ৰিপাঠী আৰু দিল্লী বিশ্ববিদ্যালয়ৰ সহকাৰী অধ্যাপক অভিনৱ প্ৰকাশৰ সৈতে গঠিত পেনেলখনক আইআইটি গুৱাহাটীৰ সহযোগী অধ্যাপক (ৰাজনীতি বিজ্ঞান) পাহি ডেকাই পৰিচালনা কৰিছিল।

যুৱসমাজে কেনেকৈ এখন ৰাষ্ট্ৰৰ বিকাশত অৰিহণা যোগাব পাৰে তাৰ ওপৰত বিশদ আলোচনা অনুষ্ঠিত কৰা হয়। ভাৰতে ২০২৩ চনত জি-২০ৰ অধ্যক্ষতা কৰাৰ পৰিপ্ৰেক্ষিতত মানৱকেন্দ্ৰিক বিকাশক অগ্ৰাধিকাৰ দিয়া আৰু বিশ্বক এনে এটা পৰিয়াললৈ ৰূপান্তৰ কৰাৰ ধাৰণা যি বিশ্ব ভ্ৰাতৃত্বৰ ধাৰণা প্ৰতিষ্ঠা কৰে আৰু ইয়াক সাৰ্বজনীনভাৱে গ্ৰহণ কৰাটো প্ৰয়োজন, এই সন্দৰ্ভত পেনেলিষ্টসকলে গুৰুত্ব আৰোপ কৰে । পেনেলিষ্টসকলে আত্মনিৰ্ভৰ ভাৰতৰ বিভিন্ন দিশো উল্লেখ কৰে আৰু কয় যে, "যুৱসমাজ হৈছে এনে এক তন্ত্ৰ যি একেলগে উদ্ভাৱন তথা বিকাশক একত্ৰিত কৰে আৰু আত্মনিৰ্ভৰ ভাৰতৰ পৰিস্থিতিতন্ত্ৰই উদ্ভাৱনৰ দিশে আগুৱাই গৈছে য'ত যুৱচামে সম্পূৰ্ণ শক্তিৰে অংশগ্ৰহণ কৰিছে।"

থীম ৫: স্বাস্থ্য, কল্যাণ আৰু ক্ৰীড়া: যুৱসকলৰ বাবে কাৰ্যসূচী

এই পেনেলত উপস্থিত আছিল লাইশ্ৰম সৰিতা দেৱী, খেলুৱৈ; ড০ অসীমা হাওবিজাম, জ্যেষ্ঠ চিকিৎসক; শ্ৰেয়াসী সিং, বিধায়ক আৰু ড০ উজ্জল মাস্কে, বিভাগীয় মুৰব্বী, যোগ বিজ্ঞান আৰু প্ৰাকৃতিক চিকিৎসা, মহাপুৰুষ শ্ৰীমন্ত শংকৰদেৱ বিশ্ববিদ্যালয়, গুৱাহাটী। গুৱাহাটীৰ ভাৰতীয় প্ৰযুক্তিবিদ্যা প্ৰতিষ্ঠানৰ জৈৱ বিজ্ঞান আৰু জৈৱ অভিযান্ত্ৰিক বিভাগৰ অধ্যাপক ড০ বিথিয়াহ গ্ৰেছ জগনাথনে বৈঠকখন পৰিচালনা কৰে।

পেনেলিষ্টসকলে মানসিক সুস্থতা, মানসিক কল্যাণত ক্ৰীড়াৰ ভূমিকা আৰু পৰম্পৰাগত ভাৰতীয় ঔষধে যুৱসকলৰ সামগ্ৰিক কল্যাণত কেনেদৰে সহায় কৰিব পাৰে সেই বিষয়ে আলোচনা কৰে। যুৱসকলৰ মাজত ক্ৰীড়াৰ প্ৰতি উৎসাহ বৃদ্ধি কৰাৰ বাবে চৰকাৰে ব্যক্তিগত বিকাশ তথা খেলো ইণ্ডিয়াৰ দৰে মহান পদক্ষেপৰ জৰিয়তে দেশৰ বিকাশত ক্ৰীড়াৰ প্ৰচাৰ আৰু সমৰ্থন আগবঢ়াইছে।

BN/PG/PN/SM/HD

(Release ID: 1897166) Visitor Counter : 199