ইজুকেসন অমসুং স্কিল দিবলপমেন্ত অমসুং ওন্ত্রেপ্রেনিউয়রশিপকী য়ুনিয়ন মিনিস্তর শ্রী ধর্মেন্দ্র প্রধান অমসুং কলচর, তুরিজম অমসুং দোনরগী য়ুনিয়ন মিনিস্তর শ্রী জি কিসন রেদ্দি অনিনা পুন্না চিয়ার লৌদুনা ঙসি ইন্দিয়ান ইন্সিতিতুৎ ওফ ওন্ত্রেপ্রেনিউয়রশিপ, গুৱাহাতিগী ১৮শুবা জেনরেল বোদি মীফম পাংথোকখ্রে।

ইন্সতিতুৎ অসিগী থবক তৌরিবা মওং মিনিস্তরশিংনা হন্না য়েংশিনখি অমসুং চাউখৎনবা লম্বীশিং খন্নখি। অৱাং-নোংপোক লমদমদা স্কিল হেনগৎহন্নবা সরকারনা পায়খৎলিবা থবকশিং মীফম অদুদা খন্নখি।

য়ুনিয়ন মিনিস্তর শ্রী প্রধান্না হায়খি তুংগী কান্নগদবা স্কিলশিং শেমগৎনবা মীৎয়েং থমগদবনি অমসুং আই.আই.ইনা মিনিস্ত্রি কয়াগা লোয়ন্না থবক তৌমিন্নগদবনি। দেতা এনালাইসিসগুম্বা অৱাংবা থাক্কী কোর্সশিংদা মহৈরোয়শিংগী দিগ্রি কোর্সশিং পীনবা অমসুং আই.আই.তিশিং অমসুং আই.আই.এমশিংগা থবক তৌমিন্নগদবনি। মসিনা মখোয় থবক ফংবগী খুদোংচাবশিং হেনগৎহনগনি অমসুং ইন্সিতিতুৎ মপাঙ্গল কনখৎহনগনি।

দোনরগী য়ুনিয়ন মিনিস্তর শ্রী জি.কিসন রেদ্দিনা হায়খি আই.আই.ইনা দোনর মিনিস্ত্রি অমসুং মসিগী এজেন্সিশিং হায়বদি নেরামেক অমসুং এন.ই.ঐচ.ঐচ.দি.সিগা নকশিন্না থবক তৌমিন্নগদবনি। স্কিল হেনগৎহনবা হায়বসি মরুওইবা অমনি অমসুং প্রোজেক কয়া পি.এম-দিভাইন স্কিমগী মখাদা মতেং পাংগনি।

মহাক্না হায়খি আই.আই.ইনা হোস্পিতেলিতি, নর্সিং, প্রাইভেদ সেকুরিতি অমসুং লৌউ-শিংউ অসি মরুওইবা হিরমশিং ওইনা লৌগদবনি। ‘এক ভারত, শেস্থা ভারত’কী মখাদা পায়খৎলিবা থবকশিংগী শেম-শারিবশিং য়েংশিনবগী মীফম অমশু মিনিস্তর অনিনা কো-চিয়ার ওইদুনা পাংথোকখি। মীফম অদুদা দোনর মিনিস্ত্রি, ইজুকেসন মিনিস্ত্রি, রেজৱেজ মিনিস্ত্রি অমসুং য়ুথ এফেয়ার্স অমসুং স্পোর্তস মিনিস্ত্রিগী সেনিয়র ওফিসিএলশিং শরুক য়াখি।

প্রধান মন্ত্রীগী পাউতাক মতুংইন্না, তোঙান-তোঙানবা কলচরশিং, চৎনবীশিং অমসুং লোনশিং খঙবদা মখোয়গী মতেং পাংনবা মহৈরোয়শিং অৱাং-নোংপোক্কী তোঙান-তোঙানবা মফমশিং কলচরেল একচেঞ্জ তুরশিং পাংথোক্কনি।

য়ুনিয়ন দোনর মিনিস্তরনা হায়খি কলচর অমসুং থম্মোয়গী মরি হেন্না চেৎশিন্নবা ভারতকী অতৈ লমকোয়ফমশিং য়েংহন্নবা অৱাং-নোংপোক্কী মহৈরোয়শিং খনগনি। চাংয়েং ওইনা পাংথোকপা তাকপী-তম্বীগী খুদোংচাবা অমা লৌনবা ভারতকী তোঙান-তোঙানবা য়ুনিভর্সিতি ১০০দগী য়ামদ্রবদা মহৈরোয় ২০,০০ খনগনি।

খোঙচৎশিং অদু মাইপাক্নবা মতেং পাংনবা অমসুং খনগৎলবা য়ুনিভর্সিতিশিংদা দরকার ওইবা মতেং পীনবা  মল্তি-মিনিস্ত্রি কম্মিতি অমা শেম্নবা মিনিস্তর অনিমক্না পাউতাক পীখি।

মিনিস্তরশিংনা মখা তানা হায়খি মদুদি খোঙচৎশিং অদুদা লেমজনিঙাই ওইরবা ওর্গনাইজেসনশিংদা চৎপা, শক্নাইরবা মীওইশিংগা উনবা, মাইপাক্লবা স্তার্দঅপশিং য়েংবা অমসুং লমদম অসিগী তুরিজমগী খুদোংচাবশিং খঙহনবা হায়বসি মরুওইবা এজেন্দাশিংগী মনুংদা য়াওরি। মসি লমদম অসিগী খ্বাইদগী ফবা থবকশিং তম্নবা অমসুং লমদম অসিগী অঙকপা খুদোংচাবশিং খঙনবা অখন্নবা খুদোংচাবা অমনি।

*****