কেন্দ্রগী গৃহ অমসুং কোওপরেসন মন্ত্রী শ্রী অমিত শাহনা ঙসি নাগালেন্দদা লুপা করোর ৫২রোমগী তোঙান-তোঙানবা চাউখৎ-থৌরাংগী থবক ৫ শঙ্গাখ্রে। মসিদা লুপা করোর ৮ চংনা শাবা গভর্নমেন্ত হায়র সেকেন্দরী স্কুল ৪২গী ভর্চুএল রিএলিতী (ভি.আর.) লেবোরেতোরীশিং, গভর্নমেন্ত হায়র সেকেন্দরী স্কুল ৯দা লুপা করোর ১ লাখ ৮০ চংনা শাখিবা অতল তিঙ্করিং লেবশিং, লুপা করোর ১৪ চংনা চৈফোবোজৌদা মেগাৱাত (এম.দবল্যু.) ১২.৫, মাউন্ত সরামাতি, থানামির ভিলেজ অমসুং কিফিরেদা ত্রেক্কিং অমসুং বেজ কেম্প অমসুং গভর্নরগী কেম্প লিফায়ন মনাক্তা লুপা করোর ২৮ চংনা শাবা দোয়ং তুরেলগী লেন অনিগী থোং য়াওখি। নাগালেন্দগী মুখ্য মন্ত্রী শ্রী নৈফ্যু রিও য়াওনা তোঙান-তোঙানবা মশক নাইবা মীওইশিংনা থৌরম অদুদা শরুক য়াখি।

মহাক্কী ৱারোলদা কেন্দ্রগী গৃহ মন্ত্রীনা হায়খি মদুদি নাগালেন্দ অসি তোঙান-তোঙানবা ত্রাইবশিংগী কলচরগী পুনফম ওইবা লমদম অমনি। নাগালেন্দ অসি অচৌবা তুরিজম পোতেন্সিএল লৈবা মালেমগী মমিং লৈবা বাইওদাইভর্সিতী মফম ২৫গী মনুংদা অমনি। নাগালেন্দ অসি মাগী প্রজাশিং, কলচর অমসুং মফম অদুদা নুপীদা চপ মান্নবা স্তেতস পীবগীদমক মালেম শিনবা থুংনসু খঙনরি।

শ্রী অমিত শাহনা হায়খি মদুদি ঙসি মফম অসিদা লুপা করোর ৫২গী তোঙান-তোঙানবা চাউখৎ-থৌরাংগী থবক ৫ শঙ্গাখি। মহাক্না হায়খি মদুদি অৱাং নোংপোক পুম্বদা নরেন্দ্র মোদীগী সরকারনা পাইখৎলিবা চাউখৎ-থৌরাংগী থৌশিলনা মরম ওইদুনা অৱাং নোংপোক্কী রাজ্যশিং অসি ঙসিদি চাউখৎপগী লম্বেলদা চংশিনবা ঙম্লে। শ্রী শাহনা হায়খি মদুদি মতম অমদা অপুনবা অৱাং নোংপোক অসি লালহৌ লুপশিংনা মরম ওইদুনা তংদু লৈতাদনা লৈরমখি অদুবু ঙসি প্রধান মন্ত্রী নরেন্দ্র মোদীনা অপুনবা লমদম অসিদা ফিজিকেল কন্নেক্তিবিতী ফগৎহনবা খক্তা নত্তনা থমোয়গী মরী ফগৎহনখি অমসুং লৈবাক্কী লেমহৌরিবা শরুক অমদি অৱাং নোংপোক্কী মরক্তা লৈরিবা মেন্তেল দিস্তেন্স অদুবু কোকহনবা ঙমখি।

কেন্দ্রগী গৃহ মন্ত্রীনা হায়খি মদুদি প্রধান মন্ত্রী নরেন্দ্র মোদীনা লুচিংবা সরকারনা নাগালেন্দদা পি অহুম হায়বদি পীচ, প্রোগ্রেস অমসুং প্রোস্পরিতী লৈহন্নবা পান্দম অদু মাইপাক্না ফংবা ঙমখি। মহাক্না হায়খি মদুদি শ্রী মোদী মশামক্না অৱাং নোংপোক অসি ভারতকী মেনস্ত্রীম রিজন ওইহন্নবা থৌরাং কয়ামরুম পাইখৎখি। মহাক্না হায়খি মদুদি শ্রী মোদীনা হৌখিবা চহি ৮ অসিদা অৱাং নোংপোক্কী তোঙান-তোঙানবা রাজ্যশিংদা ৫১রক চৎখি অমসুং অৱাং নোংপোক্তা ইনফ্রাস্ত্রকচরগী অচৌবা প্রোজেক্তশিং পুরক্তুনা ভারতকী মেনস্ত্রীমগা লমদম অসি শম্নহন্নবা মাইপাক্না হোৎনখি মসিনা অফবা ফলশিংসু পুরকপা ঙমখি।

শ্রী অমিত শাহনা হায়খি মমাংগী সরকারগী মখাদা ২০০৪-২০১৪গী মতাংগা চাংদম্নবদা প্রধান মন্ত্রী নরেন্দ্র মোদীগী লুচিং মখাদা ভারত সরকারনা ২০১৪দগী ২০২২ ফাওবদা চহি নিপালগী মনুংদা  নাগালেন্দদা থাদখিবা ফন্দশিং অসি শরুক মরি হেনগৎলকখি। মহাক্না হায়খি মদুদি ১৫শুবা ফাইনান্স কম্মিসন্না ২০২২-২৩দা নাগালেন্দগীদমক লুপা করোর ৪,৭৭৩গী প্রোবিজন অমা শেমখি অমরোমদা ২০০৯-১০দা লুপা করো ১,২৮৩ খক্তা এলোকেৎ তৌখি অমসুং মসিগী মথক্তা ২০২১-২২দা নাগালেন্দদা স্পেসিএল এসিস্তেন্স ওইনা লুপা করোর ২১৯সু পীখি। শ্রী শাহনা হায়খি মদুদি নাগালেন্দা ২০১৪গা চাংদম্নবদা ২০২১দা মিলিতেন্সীগী থৌদোক অসি চাদা ৭৪ হন্থরকখি অমরোমদা সেক্যুরিতী পর্সনেল অমসুং মীচম শীখিবগী মশিং অসি মথং শিৎনা চাদা ৬০ অমসুং ৮৪ হন্থখি মসিনা রাজ্য অসিদা লো অমসুং ওর্দর নীংথিনা লৈরে তাকখি। মহাক্না হায়খি মদুদি প্রধান মন্ত্রী নরেন্দ্র মোদীনা লুচিংবা ভারত সরকারনা নাগালেন্দগী রাজ্যদগী অফস্পা তপ্না-তপ্না লৌথোক্নবা থবক পাইখৎপা হৌখ্রে।

কেন্দ্রগী গৃহ মন্ত্রীনা হায়খি মদুদি ইনফ্রাস্ত্রকচর চাউখৎহনবগা লোয়ননা ভারত সকারনা পব্লিক ফেসিলিতীশিং মপাঙ্গল কনখৎহনবদা মীৎয়েংসু চংখি। লুপা করোর ৪,১২৭ চংনা কিমি ২৬৬ হেন্না শাংবা নেস্নেল হায়ৱে প্রোজেক্ত ১৫ শঙ্গাখি। মহাক্না হায়খি মদুদি জল জীবন মিসনগী মখাদা রাজ্য অসিগী মনুং হঞ্জিনবা মফমশিংদা লৈবা ইমুং লাখ ২.১৮দা তোতি ঈশিং ফংহনখ্রে। মসিগী মথক্তা ভারত সরকারনা আয়ুশ্মান য়োজনাগী মখাদা মীওই লাখ অহুম হেনবদা লুপা লাখ ৫ ফাওবগী হকশেলগী চাদিং তৌনবা খুদোংচাবা পীরি। শ্রী শাহনা হায়খি মদুদি প্রধান মন্ত্রী আৱাস য়োজনাগী মখাদা ইমুং ৫৪,৬৩৬তা য়ুমশিং ফংহনখি অমসুং য়ুমশিং অসিগী মনুংদা ১৫,০০০ শাবা লোইখ্রে।

শ্রী অমিত শাহনা হায়খি মদুদি লৈবাক পুম্বগা লোয়ননা প্রধান মন্ত্রী নরেন্দ্র মোদীনা লমজিংবা ভারত সরকারনা নাগালেন্দগী চীং অমদি উমংগী মনুং হঞ্জিনবা মফমশিংদা লৈবা প্রজা খুদিংমক্তা লেম্না কোবিদ ভেক্সিন অনি ফংহনখি। মসিগী মথক্তা ভারত সরকারনা চহি অনি মখাই অসিদা নাগালেন্দগী লায়রবা মীওই খুদিংমক্তা লেম্না থা অমদা চেং কিলোগ্রাম মঙাসু পীখি।

*****