কেন্দ্রগী গৃহ অমসুং কোওপরেসন মন্ত্রী শ্রী অমিত শাহনা মনিপুরগী মোইরাংদা ঙসি লুপা করোর ১,৩১১গী ওইগদবা চাউখৎ খোঙথাংগী প্রোজেক্ত ২১ শঙ্গাখ্রে অমসুং উরেপ উয়ুং তমখ্রে। মসিদা চুরাচান্দপুরদা লুপা করোর ৪৬কী ওইগদবা মেদিকেল কোলেজ, লুপা করোর ৩৯গী ফীত ১২২ ৱাংবা মার্জিং পোলো, সঙাইথেলগী মনিপুর ওলিম্পিয়ন পার্ক, ইম্ফাল ইস্তকী মনিপুর একজিবিসন সেন্তর, দিস্ত্রিক্ত য়ুথ স্কিলিং অমসুং ইমপ্লোইমেন্ত সেন্তর, রাজ্য অসিগী জিলা মঙাদা ফ্রুত প্রিজর্ভেসন ফেক্তরী, নীলকুথি য়াওরি। শ্রী অমিত শাহনা মোইরাংদা লৈরিবা পুৱারী ওইরবা অজাদ হিন্দ ফৌজকী ময়ায় লোইশঙদা অৱাং নোংপোক লমদম পুম্বদা খ্বাইদগী ৱাংবা ফিরাল ওইরগদবা ফীত ১৬৫ ৱাংবা মচু অহুমগী ফিরাল মায়খুম হাংখি। থৌরম অসিদা মনিপুরগী মুখ্য মন্ত্রী শ্রী এন. বিরেন সিংহ অমসুং অতোপ্পা ইকাই খুম্ননিংঙাই ওইরবা কয়াসু শরুক য়াখি।

মহাক্কী ৱারোলদা শ্রী অমিত শাহনা হায়খি মদুদি প্রধান মন্ত্রী নরেন্দ্র মোদী অমসুং মুখ্য মন্ত্রী শ্রী এন.বিরেন সিংহগী লুচিং মখাদা মনিপুর অসি তেরোরিজম, বন্ধ অমসুং ব্লোকেত্তগী ঙসিদি লাপ্না লৈরে, মনিপুর অসি চাউখৎ খোঙথাং, শান্তি অমসুং তংদু লৈতাবগী মায়কৈদা মাংজিল থানা চঙশিল্লি অমসুং মসিগী মহৈনা মমাং চহিগী জনুৱারী ৬তা  লুপা করোর ২৪৫০গী ওইগদবা প্রোজেক্ত ২৯গী উরেপ উয়ুং তমখি অমসুং ঙসিদি লুপা করোর ১,৩০০গী ওইগদবা প্রোজেক্ত ২১ শঙ্গাখ্রে অমসুং উরেপ উয়ুং তমখ্রে।

কেন্দ্রগী গৃহ মন্ত্রীনা লৌশিং লৈরবা অমসুং হৈ শিংলবা নিংথৌ শ্রী ভগ্য চন্দ্র, মহারানি মমা, মহারাজা কুলচন্দ্র অমসুং পুখোতিন্থাংগী মফমা ইকাইখুম্নবা উৎখি অমসুং হায়খি মদুদি মনিপুরগী ওইবা চহি ৩০০০ হেল্লবা পুৱারী লৈজৈ। মহাক্না হায়খি মদুদি মনিপুরগী প্রজা মীয়াম্না মহারাজা কুলচন্দ্রনা মনিপুরবু বৃতিশশিংগী মাইয়োক্তা লেপতুনা বৃতিশশিংগী মখুৎতগী কনবদা মতেং পাংখি। লৈবাক অসিবু মসিগুম্বা মনিপুরগী লংলবা পুৱারী অসিবু খঙনবগীদমক, লৈবাক অসিনা মহারাজা কুলচন্দ্রগী জেনরেল সেক্রেতরী, লুহুপ হুপখ্রবা নিংথৌ মচা অমসুং নীংতম লান্মী ২২বু ফাজিনখিবা মাউন্ত হেরিয়তপু মাউন্ত মনিপুর হায়না থোনখি। শ্রী শাহনা হায়খি মদুদি অৱাং নোংপোক লমদমগী খ্বাইদগী ফিরাল অসি ঙসি মোইরাং, মনিপুরদা চিংখৎলে, মসিনা ভারতকী মরুওইবা লমদা নীংতমখিবগী ইহান হানবা মফম্নি। 

মমিং লৈরবা নীংতম লান্মী সুভাশ চন্দ্র বোসকী লুচিং মখাদা ‘আজাদ হিন্দ ফৌজ’না বৃতিশকী মায়োক্তা লান্থেংনখি অমসুং মনিপুরবু বৃতিশ লৈঙাক্তগী মনীং তমহনখি হায়না কেন্দ্র গৃহ অমসুং কোওপরেসন মন্ত্রীনা ফোঙদোকখি। মনিপুর সরকারনা বৃতিশকী মতমদা মাংহন তাকহল্লম্লবা য়ুমশিং শেমজিন্দুনা ‘আজাদ হিন্দ ফৌজ’গীদমক মথ্বাই কৎখ্রবশিং অদুগীদমক নীংশিং খুভম শারি অমসুং মসিগী নীংশিং খুভম অসিনা মনিপুরগী নহারোলশিংদা ইনোৎ হাপ্পা খক্তা নত্তনা মফম অসি লমকোইবশিংগী পুক্নীং চিংশিন্নীংঙাই ওইরবা মফম অমা ওইনা শেমগৎপদা মতেং পাংলগনি হায়না মহাক্না ফোঙদোকখি।

শ্রী অমিত শাহনা হায়খি লুপা করোর ৪৬ চংনা শাখিবা চুরাচান্দপুর মেদিকেল কোলেজতা অঙাং ১০০না মেদিকেল সাইন্স তম্লি। মহাক্না মখা তারদুনা হায় মমাংদা অৱাং নোংপোক্তগী অঙাংশিংনা মহৈ তম্নবা বেঙ্গলুরু, দিল্লী, মুম্বাই অমসুং অহমদাবাদগুম্বা অচৌবা সহরশিংদা চৎলমখি অদুবু হৌজিক্তি ভারতকী তোঙান-তোঙানবা রাজ্যশিংদগী অঙাংশিংনা মোইরাংদা মহৈ তম্লি, মসি অচৌবা মাইপাকপা অমনি। মহাক্না হায়খি ফিৎ ১২২ ৱাংবা মার্জিং পোলোগী মীতম অমা মনিপুরদা শঙ্গাখি অমসুং মনিপুর সেন্ত্রেল য়ুনিভর্সিতী অমসুং মনিপুর য়ুনিভর্সিতীনা মনিপুরনা মালেমদা খুদোল তমখিবা পোলোগী মশান্না অসিগী মতাংদা মালেম পুম্বদা খঙহন্নবা রিসর্চ তৌগদবনি। শ্রী শাহনা হায়খি মদুদি মফম অসি মালেম শিনবা থুংবদগী লাকপা পোলো পামজবা মীওইশিংগীদমক মীৎয়েং চীংশিন্নীংঙাই ওইবা মফম অমা ওইরগনি।

কেন্দ্রগী গৃহ মন্ত্রীনা হায়খি মদুদি প্রধান মন্ত্রী নরেন্দ্র মোদীনা হৌখিবা চহি ৮ অসিদা অৱাং নোংপোক লমদমদা ৫১রক চৎখি অমসুং মহাক্কী সেন্সিতিব এপ্রোচ অমসুং হোৎনবা কনবা অসিনা অৱাং নোংপোকনা মখোয়গীদমক ভারত পুম্বনা চাউথোকচবা পোকই হায়বা খঙহনবা ঙমখি। মহাক্না হায় প্রধান মন্ত্রী নরেন্দ্র মোদীগী লুচিং মখাদা লম্বী, রেল অমসুং এয়র কন্নেক্তিবিতী ফগৎহন্দুনা অৱাং নোংপোক্কী কন্নেক্তিবিতী অসি লৈবাক্কী লেমহৌরিবা শরুক্কা শম্নহনখি। মহাক্না মখা তারদুনা হায় হৌখিবা চহি ৮দা প্রধান মন্ত্রী নরেন্দ্র মোদীগী লুচিং মখাদা ভারত সরকারনা অৱাং নোংপোক্তগী মিলিতেন্সী, ইনফিলত্রেসন, বন্ধ, দ্রগ, আর্ম ত্রাফিকিং, শেঞ্জা-থুমজা অমসুং জাৎ-বিজাৎকী মরক্তা লৈরিবা খেন্নবা অসি কোকহন্নবা অমদি চাউখৎপা, কন্নেক্তিবিতী, ইনফ্রাস্ত্রকচর, স্পোর্তস, ইনভেস্তমেন্ত অমসুং ওর্গানিক এগ্রিকলচরগী হব অমা ওইহন্নবা মাইকৈদা লুপা করোর লাখ ৩.৪৫ হেন্না চাদিং তৌখি। শ্রী শাহনা হায়খি মদুদি প্রধান মন্ত্রী নরেন্দ্র মোদীনা অৱাং নোংপোক্কী লমদমবু রেলৱেজ অমসুং এয়র রুৎশিংগা শম্নহনবা খক্তা নত্তনা অৱাং নোংপোকপু লৈবাক পুম্বগা শম্নহনখি। শ্রী শাহনা হায়খি মদুদি ২০১৯দা সরকারনা বোদো একোর্দ, এন.এল.এফ.তি. একোর্দ, কার্বি-অঙ্গলোং একোর্দ, ব্রু একোর্দ খুৎয়েক পীনখি অমসুং অপুনবা অৱাং নোংপোকপু মিলিতেন্সীদগী কনবা ঙমখি। মসিগা ইরোইননা সরকারনা মনিপুরগী জিলা ৬তগী মিলিতেন্সী অমদি অফস্পা লৌথোকখি মসিনা মরম ওইদুনা মমাংদা ব্লোকেৎকী চৈথেং ফংলম্বা মনিপুরনা চাউখৎপা অমদি মীপাল তাংদনা লেপচবা ঙম্বগী মাইকৈদা চংশিল্লি।

কেন্দ্রগী গৃহ অমসুং কোওপরেসন মন্ত্রীনা হায়খি মদুদি লুক-ইস্ত পোলিসীগী মহুৎ প্রধান মন্ত্রী নরেন্দ্র মোদীনা এক্ত-ইস্ত পোলিসী পাইখৎখি মসিনা মরম ওইদুনা মনিপুরনা আশা লৈবা অমদি তংদু লৈতাবগী খুদম অমা ওইবা ঙমখি। মহাক্না হায়খি লৈবাক্কী অহানবা স্পোর্তস য়ুনিভর্সিতী অসি মনিপুরবু স্পোর্তস হব ওইহনবদা মতেং পাংনবা লুপা করোর ৮১৬ চংনা একর ৩২৫ পাকচাউবা মনিপুরগী মফম অমদা শাগৎলি। মুখ্য মন্ত্রী শ্রী এন. বিরেন সিংহনা শাখিবা ওলেম্পিয়ন পার্ক অসিনা নহারোলশিংদা ইথিল পীনবগী হৌরকফম অমা ওইরগনি।

শ্রী অমিত শাহনা হায়খি মদুদি চীংগী জিলাশিংদা ত্রাইবেল ম্যুজিয়ম ৩১ শাগৎলি অমসুং হকশেলগী লমদা চাউখৎহন্নবগীদমক আয়ুশ্মান ভারত স্কিমগী মখাদা বেনিফিসরী লাখ ৩.৬৩দা লেম্না লায়েং ফংহন্নবা লুপা লাখ ৫ ফাওবগী হকশেলদা চাদিং তৌরি। মহাক্না হায়খি নুপীশিংবু শক্তি পীবগী থবক তৌরিবা ইমা কৈথেল অসি লুপা করোর ১৩০ চংনা মফম ১৭তা শাগৎলি। শ্রী শাহনা হায়খি মনিপুরদা প্রধান মন্ত্রী আৱাস য়োজনাগী মখাদা মীয়ামদা য়ুম ৬৮,০০০ ফংহনখি অমরোমদা রাজ্য সরকারনা লুপা করোর ১১০ চংনা স্তার্তঅপ কয়া থৌগৎনবা হোৎনখি। চীফ মিনিস্তরগী হেল্থ ফোর ওল স্কিমগী মখাদা মরু ওইবা লাইনা ১৩গী য়ুম-য়ুমদা চৎতুনা স্ক্রিনীং তৌখি। মহাক্না হায়খি মনিপুর সরকারনা দ্রোনশিং শীজিন্নদুনা লম একর ১,৭৮০রোমদা পোপী থারম্বা মফম খঙদোক্তুনা মাংহনখি। শ্রী শাহনা হায়খি মদুদি প্রধান মন্ত্রী নরেন্দ্র মোদীগী লুচিং মখাদা আজাদী কা অমৃত মহোৎসবকী চহি অসিদা ভারত সরকারগী গৃহ মন্ত্রালয়না ভারতপু দ্রগ-ফ্রী ওইহন্নবা ৱাশক শকখি, অসুম তৌবনা নীংতম্বগী চহি চামা শুরকপা মতমদা ভারত অসি দ্রগকী সমস্যাদগী মপুং ফানা কোকহনবা ঙমগনি। মহাক্না হায়খি মদুদি সরকারনা মনিপুরদা ওপিয়ম থাবা থিংদুনা রাজ্য অসিবু দ্রগ-ফ্রী স্তেৎ অমা ওইনবা ফিরেপ লৌখি অমসুং এজুকেসন, স্পোর্তস অমসুং স্তার্ত-অপশিংগী লমদা থবক পাইখৎতুনা মনিপুরবু চাউখৎপা অমদি নুংঙাই য়াইফবা রাজ্য অমা ওইহন্নবা মাইকৈদা চংশিল্লি।

***************