ঙসি ভারত নেভিনা, দিমাপুরদগী কিলোমিতর ৩৫ লাপ্না লৈবা নাগালেন্দগী মনুং হুঞ্জিনবা নিউলেন্দ জিলাদা অখন্নবা মেদিকেল কেম্প অমা অমসুং ৱেলনেস কেম্প পাংথোকখ্রে। মসি অৱাং-নোংপোক রাজ্যশিংদা ভারত নেভিগী মরমদা খঙহন্নবা পরিং নাইনা চৎথরকপা থৌরমশিংগী শরুক অমা ওইনা পাংথোকপনি। কেম্প অদু এদিসনেল দিরেক্তর জেনেরেল মেদিকেল সর্বিসেস(নেভি), সর্জন রিয়ার এদমিরেল রবিন্দেরাজিত সিংহ অমসুং নিউলেন্দগী দি.সি সারা এস.জামিরনা হৌদোকখি। অখন্নবা মেদিকেল কেম্প অদুদা ভারত নেভিগী তোঙান-তোঙানবা কমান্দশিংদগী লাকপা মেদিকেল স্পিসিএলিস্তশিং, গাইনেকোলোজিস্ত, ই.এন.তি স্পিসিএলিস্ত, ওপথালমোলোজিস্ত, রেদিওলোজিস্ত অমসুং দেন্তেল স্পিসিএলিস্তশিংনা অনাবশিং লাইয়েংখি। স্পিসিএলিস্তশিংনা চাউ হায়বা হিদাক-লাংথকশিং অনাবশিংদা লেম্না য়েন্থোকখি।

কেম্প অদুদা স্পিসিএলিস্তশিংনা লাইয়েংবা অমসুং লেম্না হিদাক-লাংথকশিং য়েন্থোকপগী মথক্তা, কমপ্লিত বোদি এনালাইজর, বোন মিনরেল দেন্সিতোমেত্রি, উলত্রাসোনোগ্রাফি, লেব ইনভেস্তিকেসন অমসুং এনথ্রোপোমেত্রি পাংথোকখি। কেম্প অদুদা শরুক য়াখিবা মীয়ামদা হকচাং ফনা লৈনবা, কেন্সর মাঙজৌন্না ঙাকথোক্নবা ত্রেনিং অমসুং সি.পি.আরগী মতাংদা ত্রেনিং পীখি। ভারত নেভিগী মেদিকেল কেম্প অদু নবেম্বর ২৯-নবেম্বর ৩০, ২০২২ ফাওবা নুমিৎ নিনি পাংথোক্কনি। কেম্পকী অহানবা নুমিৎতা নিউলেন্দ অমসুং অনকপা খুঙ্গংশিংগী মীওই ২৫০ হেন্না শরুক য়াখি।

*****