প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সকী থোংদা রোজগার মেলাগী মখাদা নৌনা ইন্দক্ত তৌবা রিক্রুইৎশিংদা এপোইন্তমেন্ত লেত্তর ৭১,০০০ য়েন্থোকখ্রে। রোজগার মেলানা এমপ্লোইমেন্ত জেনরেসন হেনগৎহনবদা কেতলিস্ত অমা ওইনা মথৌ তৌরগনি অমসুং নহারোলশিংবু শক্তি পীনবা মখোয়দা অফবা খুদোংচাবশিং পীরগনি লোয়ননা জাতি শেমগৎপদা হকথেংননা শরুক তম্লগনি পান্নরি। মমাংদা ওক্তোবরদা রোজগার মেলাগী মখাদা নৌনা ইন্দক্ত তৌবা এপোইন্তী ৭৫,০০০দা এপোইন্ত লেত্তরশিং খুৎশিন্নখি।

থৌরম অদুদা ৱা ঙাংলদুনা প্রধান মন্ত্রীনা হায়খি ভারতকী সহর ৪৫ হেনবদা এপোইন্তমেন্ত লেত্তরশিং নহারোল ৭১,০০০ হেনবদা পীবনা ইমুং কয়াগীদমক নুংঙাইবগী অনৌবা মায়োল অমদা পুরগনি। মহাক্না ধন্তেরসকী নুমিৎতা কেন্দ্র সরকারনা নহারোলশিংদা এপোইন্তমেন্ত লেত্তর ৭৫,০০০ য়েন্থোকখিবা অদু নীংশিংখি। প্রধান মন্ত্রীনা হায়খি, “ঙসিগী রোজগার মেলা অসি কেন্দ্র সরকারনা লৈবাক্কী নহারোলশিংদা থবক্কী খুদোংচাবশিং পীনবা মিসন মোদতা থবক তৌরি হায়বগী খুদম অমা ওইরি”।

থা অমগী মমাংদা পাইখৎখিবা রোজগার মেলাগী থৌশিল অদুবু নীংশিংলদুনা প্রধান মন্ত্রীনা হায় মতম মতমগী মতুং ইন্না অসিগুম্বা রোজগার মেলাশিং য়ুনিয়ন তেরিরোরীশিং অমসুং রাজ্য কয়ানা পাঙথোক্কনি। মশা-মশাগী সরকারশিংনা মহারাস্ত্র, গুজরাত, উত্তর প্রদেশ, জম্মু অমসুং কাশ্মির, লদাখ, অন্দমান অমসুং নিকোবর, লক্ষদ্বীপ, দামন অমসুং দিয়ু, দদ্রা অমসুং নগর হবেলি অমসুং চান্দিগরদা নহারোল লিশিং কয়াদা এপোইন্তমেন্ত লেত্তরশিং খুৎশিন্নখিবদা মহাক্না নুংঙাইবা ফোঙদোকখি। মহাক্না মখা তারদুনা হায় গোৱা অমসুং ত্রিপুরানা নুমিৎ খরনি অসিদা অসিগুম্বা রোজগার মেলাশিং পাঙথোক্নবা শেম-শারি। প্রধান মন্ত্রীনা অসিগুম্বা অচৌবা মাইপাকপা অসিগীদমক দবল-ইঞ্জিন সরকারদা মনা পীখি অমসুং অসিগুম্বা রোজগার মেলাশিং অসি ভারতকী নহারোলশিংবু শক্তি পীনবা মতম মতমগী ওইনা পাঙথোক্কনি হায়না থাজবা পীখি।

ধান মন্ত্রীনা হায়খি নহারোলশিং অসি জাতিগী খ্বাইদগী অচৌবা শক্তিনি। কেন্দ্র সরকারনা মখোয়গী তেলেন্ত অমসুং ইনর্জী অসিবু জাতি শেমগৎপদা শীজিন্নবদা খ্বাইদগী মরু ওইবা মীৎয়েং চংলি। মহাক্না অনৌবা পব্লিক সর্ভেন্তশিংবু তরাম্না ওকখি অমসুং নুংঙাইবা ফোঙদোকখি। মহাক্না মখোয়দা য়াম্না মরু ওইবা তানফম হায়বদি অমৃত কালদা মখোয়দা মরু ওইবা থৌদাং শীন্নরি হায়না নীংশিংখি। মহাক্না অমৃত কালদা চাউখৎপা লৈবাক অমা ওইহন্নবা লৈবাক্কী ফিরেপতা মখোয়না লৌগদৌরিবা থৌদাং অদু খঙহনখি।

নই দিল্লীগী ছাৱলা বি.এস.এফ. কেম্পতা পাঙথোকপা রোজগার মেলাদা মহাক্কী তরাম্না ওকপগী ৱারোল পীরদুনা দি.ও.পি.তি.গী কেন্দ্র মন্ত্রী দা. জিতেন্দ্র সিংহনা হায়,  নহারোল, নুপীশিং, শোত্থরবা কাংলুপশিং অমসুং খুদোংচাবা ফংদ্রবা খুন্নাইগী শরুকশিংগী য়াইফনবা হোৎনবা অসিদা মতম চুপ্পদা প্রধান মন্ত্রী নরেন্দ্র মোদীনা খ্বাইদগী মরু ওইবা মীৎয়েং চংদুনা লাকখি।

দা. জিতেন্দ্র সিংহনা হায়খি হেক হৌবদগী হৌনা পি.এম.না নহারোলগা মরী লৈনবা সমস্যাশিং অমসুং হীরমশিংদা মরু ওইবা মীৎয়েং চংদুনা লাকখি অমসুং নহারোলশিংগীদমক হিংনবগী পাম্বৈ, সরকারগী থবকশিং অমসুং ইনকম লৈনবগী অনৌবা লমশিং অমসুং খুদোংচাবশিং পীনবা লেপ্পা লৈতনা হোৎন্দুনা লাকখি।

ওক্তোবর ২২দা নহারোলশিংদা এপোইন্তমেন্ত লেত্তর ৭৫,০০০ য়েন্থোকখ্রবা মতুংদা ঙসি রোজগার মেলাগী মখদা নৌনা ইন্দক্ত তৌখিবা রিক্রুইৎশিংদা এপোইন্তমেন্ত লেত্তর ৭১,০০০ পীখিববু অপেনবা পোকই হায়না ফোঙদোকখি। মহাক্না প্রধান মন্ত্রীদা মহাক্কী বিভাগনা য়াম্না অথুবদা মথংগী থা খরা অসিদা সরকারগী থবক লাখ ১০ পীনবগী পান্দম থুংহন্নবা মথংগী ইনস্তোলমেন্তগী এপোইন্তমেন্ত লেত্তরশিং পীরগনি হায়না থাজবা পীখি। মহাক্না হায়, প্রধান মন্ত্রীগী য়াথং মতুং ইন্না মন্ত্রালয় অমসুং বিভাগ পুম্নমক্না মিসন মোদতা সেঙ্কসন তৌখিবা পোস্তশিং মেনশিন্নবা মাইকৈদা থবক পাইখৎলি।

দা. জিতেন্দ্র সিংহনা হায়খি প্রধান মন্ত্রীনা থা খরগী মমাংদা জাতিদা অথুবদা নহারোলশিংদা সরকারগী থবক লাখ ১০ পীনবা ৱাশকখি। মন্ত্রীনা হায় অমুক্কা হন্না প্রধান মন্ত্রীনা মহাক্না হায়দোকখিবা অদু থবক ওইনা পাঙথোকই অমসুং পুম্নমক ওইথোকপা ঙম্বগী মতিক-ময়াই লৈ হায়বগী খুদম পীখ্রে।

দা. জিতেন্দ্র সিংহনা হায়খি সরকারদা চংলক্লিবা নহা ওইরিবা অনৌবা রিক্রুইৎশিংনা ২০৪৭ ফাওবদা চহি চামা ফারবা ভারতকী মঙলান অদু মঙফাওনবা ঙম্নবা মথংগী চহি ২৫ অসিদা জাতি শেমগৎপগী থৌওংদা শরুক তম্নবগী খুদোংচাবা ফংলগনি।

*****