আয়ুশ
কেন্দ্র মন্ত্রী সর্বনন্দ সোনোৱালনা সিলচরদা রিজনেল রিছর্চ ইন্সতিত্যুৎ ওফ উননি মেদিসিন শঙ্গাখ্রে
লম একর ৩.৫ পাক্না শন্দোক্তুনা লৈরিবা স্তেত ওফ দি আর্ত ওইরবা আর.আর.আই.য়ু.এম. অসি লুপা করোর ৪৮ থাদদুনা শাগৎপনি
Posted On:
20 NOV 2022 4:34PM by PIB Imphal
অয়ুস অমসুং পোর্ত, সিপ্পিং অমদি ৱাতরৱেজকী কেন্দ্র মন্ত্রী শ্রী সর্বনন্দ সোনোৱালনা ঙসি সিলচরদা অনৌবা, স্তেত ওফ দি আর্ত ওইরবা রিজনেল রিছর্চ ইন্সতিত্যুৎ ওফ উননি মেদিসিন (আর.আর.আই.য়ু.এম.) শঙ্গাখ্রে। নৌনা হাংদোক্লিবা ইন্সতিত্যুৎ অসিঅয়ুস সিস্তেমগী মহৌশাগী ওইবা হিদাক কাঙলোনশিংগী মরক্তা অমা ওইরিবা উননি মেদিসিনগী অৱাং নোংপোক লমদমদা অহানবা সেন্তরনি। লম একর ৩.৫ পাক চাউনা শন্দোক্তুনা লৈরিবা অনৌবা কম্প্লেক্স অসি লুপা করোর ৪৮ থাদদুনা শাখিবনি। কম্প্লেক্স অসি ভারত লৈঙাক্কী এন্তরপ্রাইজ অমা ওসরিবা নেস্নেল প্রোজেক্তস কন্সত্রক্সন কোর্পোরেসন (এন.পি.সি.সি.)না শেমগৎপনি। মসি ভারত লৈঙাক্কী অয়ুস মন্ত্রালয়গী মখাদা লৈবা মনিং মখা তম্বা লূপ অমা ওইরিবা সেন্ত্রেল কাউন্সিল ফোর রিছর্চ ইন উননি মেদিসিন (সি.সি.আর.য়ু.এম.)দা শিন্নখি।
থৌরমদুদা ৱা ঙাঙলদুনা, শ্রী সর্বনন্দ সোনোৱালনা হায়খি, “অয়ুস হিদাক কাঙলোন অসি লাইচৎ মনুংদা মীওই লাখ কয়দা কান্নবা পীখ্রে হায়বা খঙলবা মতুংসিদা মীয়াম্না অমুক হন্না য়ানবা হৌরক্লি। মীয়ামগী পুন্সিগী মতিং হেনগৎহনবদা অয়ুস হিদাক কাঙলোন্না কান্নবা নিংথিনা পীরে হায়বা উৎলে, মরম অসিননি ঐখোয়না মতমসিগী ওইবা খ্বাইদগী ফবা হিদাক লাংথক্তা অয়ুসকী মহৌশাগী ওইবা হিদাক লাংথক্না মতেং পাংশিন্নবা লায়েং পথাপ অমগী লমদা থবক পায়খৎলিবসি।”
মখা তারদুনা, “উননি অসি ভারত খক্তদা নত্তনা লৈবাক অতৈদসু খ্বাইদগী হেন্না পাম্নবা মহৌশাগী হিদাক কাঙলোনশিংগী মরক্তা অমা ওইরি। অসিগুম্লবা স্তেত ওফ দি আর্ত ওইরবা ইন্সতিত্যুৎ অসি মীয়ামদা মতিং লৈবা লায়েং ফংহন্নবা অমদি পুন্সিগী মতিং হঞ্জিলহন্নবগীদমক সিলচরদা মথৌ তৌবা হৌবা হায়বসি তশেংনা চাউথোকচনিংঙাইনি। উননি হিদাক কাঙলোনগী নুংগী ওইবা থাজবা অসি মীওইবগী হকচাঙ অসি মশা মথন্তা ফহঞ্জবা ঙম্বগী মতিক লৈ অমদি মসিবু মতিং হাপকৎপা মথৌ তাই হায়বা ৱাখল্লোন অসিদা য়ুম্ফম ওইবনি। হিদাক কাংলোন অসিগী খ্বাইদগী চাউনা কান্নবদি মসিনা মনা মশিংগী হিদাক লাংথক শীজিন্নদুনা লায়না কয়া নাদ্রিঙৈদা ঙাকথোকপা অমদি লায়েংবা ঙম্বসিনি”, হায়না শ্রী সোনোৱালনা হায়খি।
উননি হিদাক কাংলোনগী লমদা থিজিন্নবগী মকোক থোংবা লৈঙাক্কী লূপ অমা ওইরিবা সি.সি.আর.য়ু.এম.গী মখাদা লৈগদৌরিবা, নৌনা শেমগৎলবা আর.আর.আই.য়ু.এম.গী কম্প্লেক্স অসিনা উননি হিদাক কাংলোন অমসুং অৱাং নোংপোক লমদমদা, মরুওইনা অসামদা থেংনবা লায়নাশিংগী মরমদা তোঙান তোঙানবা মশক মওং, ফন্দামেন্তেল অমদি এপ্লাইদকী লমদা সাইন্তিফিক রিছর্চ চত্থবগা লোয়ননা মখল মখা কয়াগী অনা লায়েংবগী খুদোংচাবশিং ফংহনগনি। সেন্তর অসি কার্দিয়াক, পল্মোনরী, স্ত্রোক, কেন্সর অমদি দাইবেতিসনচিংবা নন-কম্ম্যুনিকেবল দিজিজেজ (এন.সি.দি.শিং) স্ক্রীন তৌনবগী খুদোংচাবসু লৈগনি। অঙাংশিংদা অহেনবা মীৎয়েঙ থমদুনা, সেন্তর অসিনা স্কুল চৎলিবা অঙাংশিংগী হেল্থ চেক-অপ অমদি লায়না নারম্বা অঙাংশিংদা মতিং লৈবা লায়েংসু পীগনি। সেন্তর অসিনা তোঙান তোঙানবা লায়নাশিং নারিবা অনাবশিংগী মওং মতৌসু য়েংশিনগনি। স্তেত ওফ দি আর্ত ওইরবা আর.আর.আই.য়ু.এম.গী কম্প্লেক্স অসি জেনেরেল, রিছর্চ, ইলাজ-বিৎ-দতবীর (রেজিমেন্তেল), স্পিসিএলাইজ ইলাজ-বিৎ-দতবীর (রেজিমেন্তেল) লায়েং কাঙলোন, মাদর এন্দ চাইল্দ হেল্থ (এম.সি.ঐচ.) অমসুং গেরিয়াত্রিক্সকী অখন্নবা ও.পি.দি. ক্লিনিকশিংসু লৈগনি।
নৌনা হাংদোক্লিবা আর.আর.আই.য়ু.এম. অসিনা হেক য়ারিবমখৈ মীওই মশিং য়াম্না লায়েং ফংহন্নবগীদমক স্কুল হেল্থ প্রোগ্রাম, ক্লিনিকেল মোবাইল রিছর্চ প্রোগ্রাম, হেল্থ কেম্প অমসুং মেলানচিংবসু পাঙথোক্কনি। মতমগা চুনরবা ফেসিলিতী অসিদা মতমগী ওইবা পেথোলোজী লেবোরেতরী, বাইও-কেমিস্ত্রী লেবরেতরী, রেদিওলোজী য়ুনিৎ অমসুং ক্বালিতী কন্ত্রোল লেবোরেতরীসু লৈগনি। অথুবা মতমদা হিদাক পাম্বীশিং থানবা হর্বল লৈকোল অমগা লোয়ননা সর্ভেসু তৌননবা থৌরাংসু য়াৎলি।
ইন্সতিত্যুৎ অসিনা অকক্ননা গোস্ত্রো-ইন্তেস্তিনেল দিসওর্দর অমসুং রেস্পিরেতরী দিসওর্দর নৎত্রগা অৱাং নোংপোক স্তেতশিংদা তোয়না থেংনগনবা উননি হিদাক কাঙলোন্না য়াম্না মতিং লৈনা লায়েংবা ঙম্বা আই.বি.এস. অমদি চাবা তুমদবা, উনশাগী লায়না, অর্থ্রাইতিস, একজেমা, দাইবেতিস, গৌত, য়ু.আর.তি.আই., হায়পরতেন্সন, সিয়াতিকা অমদি হিমোরোইদনচিংবা লায়নাশিংদা লায়েং ফংহনগনি। ইন্সতিত্যুৎ অসিনা মফমসিদা লাক্লিবা অৱাং নোংপোক্কী মীয়ামশিংদা লৌনগন্দবা লায়নাশিং লৈব্রা হায়বসু য়েংগনি। ইন্সতিত্যুৎ অসিনা উননি হিদাক কাঙলোনগী মতিংগী মরমদা আই.ই.সি. কেম্পেনসু পাঙথোক্কনি অমদি তোঙান তোঙানবা লৌনগনবা অমদি লৌনগন্দবা লায়নাশিং ঙাকথোকপদা অমদি হকচাঙ ফনা থম্বদা অয়ুসকী মতিংগী মরমদা মীয়ামদা পাক শন্না খঙহনগনি।
রিজনেল রিছর্চ সেন্তর (উননি), সিলচর অসি এস.এম. দেব সিভিল হোস্পিতাল, সিলচর, কছার (অসামদা) মফমসিদা ও.পি.দি.দা লায়েংবা লাক্লিবা অনাবশিংগী উননিগী লায়েং ফংহন্নবগীদমক কাউন্সিল অসিনা জুন ২০০৬তা লিংখৎখিবনি। মতমদুদগী হৌরগা, সেন্তর অসিনা রিছর্চ ও.পি.দি., আর.সি.ঐচ. ও.পি.দি. অমদি এন.সি.দি. ক্লিনিক্নচিংবশিং পাঙথোক্তুনা লাক্লি অমদি উননি লায়েংনা লায়না কয়ানা নাহল্লবা য়াম্লবা অনাবা মীওইশিংদা কান্নবা ফংহনখ্রে।
থৌরম অদু অসাম লৈঙাক্কী ত্রান্সপোর্ত, ফিসরিজ অমসুং এক্সাইজকী মন্ত্রী পরিমল সুক্লবঅদ্য; সিলচরগী এম.পি. দোক্তর রাজদীপ রোই; করিমগঞ্জকী এম.পি. কৃপানাথ মল্লাহ; উধরবন্দরগী এম.এল.এ. মিহির কান্তি সোমে; হান্নগী দিপুতী স্পীকর অমদি সোনাইগী হান্নগী এম.এল.এ. অমিনুল হক লাস্কর; অয়ুস মন্ত্রালয়গী স্পিসিএল সেক্রেতরী প্রমোদ কুমার পাথক; সি.সি.আর.য়ু.এম.গী দাইরেক্তর জেনেরেল দোক্তর অসিম অলি খান; আর.আর.আই.য়ু.এম. সিলচরগী মকোক দোক্তর অখতর হুসেন জমালি অমসুং অয়ুস মন্ত্রালয় অমদি অসাম লৈঙাক্কী অতৈ মকোক থোংবা ওফিসিএলশিংসু শরুক য়াখি।
****
(Release ID: 1877573)
Visitor Counter : 135