دورے پر آئے ہوئے بوتسوانا کے بین الاقوامی امور اور تعاون کے وزیر ڈاکٹر لیموگانگ کواپے نے زراعت اور کسانوں کی بہبود کے مرکزی وزیر جناب نریندر سنگھ تومر کے ساتھ آج نئی دلّی میں ایک میٹنگ کی تاکہ دونوں ممالک کے درمیان زراعت اور اس سے منسلک شعبوں میں تعاون کے مسائل پر تبادلہ خیال کیا جا سکے۔

میٹنگ میں دونوں وزراء نے دونوں ممالک کے درمیان دوستانہ اور قریبی دوطرفہ تعلقات پر اطمینان کا اظہار کیا۔ جناب تومر نے کہا کہ سمندر پار بھارتی بوتسوانا کی معیشت میں اہم تعاون دے رہے ہیں۔ انہوں نے دوطرفہ تجارت کو مزید بڑھانے کے امکان کے بارے میں بات کی تاکہ دونوں ممالک کے کسانوں اور پیدا کرنے والوں کے فوائد میں اضافہ ہو سکے۔ دونوں وزراء نے تغذیہ سے بھرپور اناج کی غذائیت اور اہمیت کے پیش نظر بڑے پیمانے پر ان کی کاشت کو فروغ دینے پر زور دیا۔ جناب تومر نے بتایا کہ بھارت ، عالمی سطح پر جوار  کے بین الاقوامی سال کو منانے کی تیاری کر رہا ہے۔

دونوں فریقین نے اپنی زرعی مصنوعات کی منڈی تک رسائی کے مسائل پر بھی تبادلۂ خیال کیا اور ایک دوسرے کو جلد از جلد مسائل حل کرنے کی یقین دہانی کرائی۔ چونکہ جنوری 2010 ء میں دونوں حکومتوں کے درمیان زراعت اور اس سے منسلک شعبوں میں تعاون پر دستخط شدہ مفاہمت نامے کی میعاد ختم ہو چکی ہے، دونوں وزراء نے مفاہمت نامے کی جلد از جلد بحالی پر اتفاق کیا۔ ڈاکٹر کواپے نے پُر تپاک استقبال اور مہمان نوازی کے لئے  جناب تومر کا شکریہ ادا کیا اور انہیں بوتسوانا کا دورہ کرنے کی دعوت دی۔

۔۔۔۔۔۔۔۔۔۔۔۔۔۔۔ ۔ ۔ ۔ ۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔ ۔ ۔ ۔۔۔۔۔۔۔۔۔۔۔۔

( ش ح ۔ و ا ۔ ع ا )

U. No.  11759