প্রধান মন্ত্রী শ্রী নরেন্দ্র মোদীনা ঙসি নই দিল্লিগী ইন্দিয়ন এগ্রীকলচরেল রিসর্স ইন্সতিত্যুত্তা পি.এম. কিসান সম্মান সম্মেলন ২০২২ হৌদোকখ্রে। প্রধান মন্ত্রীনা কেমিকেল্স অমসুং ফর্তিলাইজর্স মন্ত্রালয়গী মখাদা প্রধান মন্ত্রী কিসান সামরুদ্ধি কেন্দ্র (পি.এম.কে.এস.কে.) ৬০০সু হৌদোকখি। মখা তারকপদা প্রধান মন্ত্রীনা প্রধান মন্ত্রী ভার্তিয়া জন উর্ভারক পরিয়োজনা – ৱান নেসন ৱান ফর্তিলাইজরসু হৌদোকখি। থৌরম অদুগী মনুংদা প্রধান মন্ত্রীনা দাইরেক্ত বেনেফিত ত্রান্সফরগী খুত্থাংদা প্রধান মন্ত্রী কিসান সম্মান নিধি (পি.এম.-কিসান)গী মখাদা লুপা করোর ১৬,০০০কী শেনফম ওইবা ১২শুবা ইন্সতোলমেন্তসু থাদোকখি। প্রধান মন্ত্রীনা এগ্রী স্তার্তঅপ কনক্লেব অমসুং একজিবিসনসু হৌদোকখি। থৌরম মনুংদা প্রধান মন্ত্রীনা ফর্তিলাইজরদা ই-মেগজিন অমা ওইরিবা ‘ইন্দিয়ন এদজ’সু হৌদোকখি। শ্রী মোদীনা স্তার্তঅপ একজিবিসনগী থিম পেভিলিয়নদা কোয়না চৎখি অমদি দিসপ্লেগী পোত্থোকশিং য়েংশিনখি।

 

 

মীয়াম তিনখিবা অদুদা ৱা ঙাংলদুনা, প্রধান মন্ত্রীনা প্রিমাইজ অমদা জয় জৱান, জয় কিসান, জয় বিগ্যান অমসুং জয় অনুসানধনবু খংবগা লোয়ননা হায়খি মদুদি ঙসি ঐখোয়না মফম অসিদা মন্ত্রা অসিগী অহিংবা মওং মতৌ অদু উবা ফংলে। 

“পি.এম. কিসান সম্মান সম্মেলন ২০২২”দা পীখিবা মহাক্কী ৱারোলদা কেন্দ্রগী এগ্রীকলচর অমসুং ফার্মর্স ৱেলফেয়র মিনিস্তর শ্রী নরেন্দ্র সিংহ তোমারনা হায়খি মদুদি মোদী সরকারনা ২০১৪দগী লৌমীশিংদা শকখিবা ৱাশকশিং অদু মপুং ফাহল্লি।

শ্রী তোমারনা হায়খি মদুদি পি.এম.-কিসান অসি মালেমগী খ্বাইদগী চাউবা দাইরেক্তা বেনেফিৎ স্কিমনি অমদি মসি শ্রী মোদীগী মখা চত্থরকপা ৱারেপকী মহৈনি।

শ্রী তোমারনা নৌহৌনা নিংশিংখি মদুদি, অমুকখক ভারতকী প্রধান মন্ত্রী অমনা য়াম্না চুম্না ফোংদোকখি মদুদি সরকারনা চাদিং তৌরিবা লুপা অমমম খুদিং, মরী লৈনবা বেনেফিসরীশিংদা পৈশা ১৫ খক্তমক য়ৌই। অদুবু ঙসিদি লুপা ৬,০০০কী ওইবা চহিগী গ্রান্তকী শেনফম খুদিংমক মরক্কী মীওই অমা হেক্তা নত্রগা কমিসন অমা হেক্তা নত্রগা শেল কক্থবা য়াওদনা দি.বি.তি.গী খুত্থাংদা লৌমীশিংদা দাইরেক্ত ওইনা য়ৌরে হায়না মন্ত্রীনা ফোংদোকখি। মহাক্না ফোংদোকখি মদুদি, পি.এম. কিসান সম্মান অসি মতিক চাবা তেক্নোলোজীগা লোয়ননা মনুং মপান ফাওনা ইমপ্লিমেন্ত তৌরে। শাশিন্নবা বেনেফিসরীশিং লৌথোক্তুনা মতিক চাবা লৌমীশিংগী লিস্ত শেমদোক্নবা কেন্দ্র অমসুং রাজ্যশিংনা পুন্না থবক তৌমিন্নরি হায়নসু মন্ত্রীনা ফোংদোকখি।

 

শ্রী তোমারনা পুসা মেলা গ্রাউন্দদা তিল্লিবা লৌমী লিশিং ১৭,০০০ হেনবা অমদি লৈবাক্কী মফম কয়াদগী থৌরম অসিবু ভর্চুএল্লি ওইনা শরুক য়ারিবা লৌমী করোর অমগীদা ফোংদোকখি মদুদি কিসান সম্মান ফন্দ অসি লৌমীশিংনা কৈদৌনুংদা তাল্লকখিবা লৈতে, অদুবু মসি লৌমীশিংগী শেন্থোক শরুক অনি ওইহনবা অমদি মখোয়গী শেল থুমগী ফিভম ফগৎহন্নবা প্রধান মন্ত্রীগী ৱাফম অদুগা লোয়ননা স্কিম অসি চত্থবনি।  

শ্রী তোমারনা নুংঙাইবা ফোংদোকখি মদুদি ঙসিগী থৌরম অসিনা লৌমীশিং অমসুং এগ্রী স্তার্তঅপশিংবু চপ মান্নবা প্লেতফোর্মদা পুরক্লে। মহাক্না হায়খি মদুদি, থৌরম অসিদা ভর্চুএল ওইনা শরুক য়ারিবা লৌমী করোর অমগী মথক্তা, কৃশি বিগ্যান কেন্দ্র ৭৩২, আই.সি.এ.আর. ইন্সতিত্যুত ৭৫, স্তেত এগ্রীকলচরেল য়ুনিবর্সিতী ৭৫, পি.এম. কিসান সেন্তর ৬০০, প্রাইমারী এগ্রীকলচরেল কোওপরেতিব সোসাইতী ৫০,০০০ অমসুং কম্যুনিতী সর্বিস সেন্তর লাখ ২না থৌরম অসি ভর্চুএল ওইনা শরুক য়ারি।

শ্রী তোমারনা হায়খি মদুদি প্রাইম মিনিস্তর কিসান সমুরুধি কেন্দ্র ৬০০ হৌদোকখিবগা লোয়ননা ফর্তিলাইজর রিতেল শোপশিং হৌজিক ৱান স্তোপ শোপতা ওন্থোক্লগনি। মসিগী সেন্তরশিং অমসিনা লৌমীশিংদা ইনপুতশিং ফংহনবা খক্তা নত্তনা মখোয়গী অতোপ্পা প্রোব্লেমগী মখলশিংসু রিজোলব তৌরগনি হায়না মহাক্না হায়খি।

ৱান নেসন ৱান ফর্তিলাইজর স্কিমগী মতাংদা ঙাংলদুনা শ্রী তোমারনা হায়খি মদুদি হৌজিক্তি দি.এ.পি. এন.কে.পি নত্রগা য়ুরিয়া ওইগেরা মখল খুদিংমক্কী ফর্তিলাইজর পুম্নমক “ভারত” হায়বা ব্রান্দ অমগী মখাদা য়োল্লগনি।

<><><><><>

(Release ID: 1869819) Visitor Counter : 119