রক্ষা মন্ত্রী শ্রী রাজনাথ সিংহনা সেপ্তেম্বর ২৯, ২০২২দা অরুনাচল প্রদেসকী দিবাং ভেল্লিদা লৈবা অনিনি খুঙ্গংদা লৈবা থ্রি কোরগী ফোরৱার্দ এরিয়াদা চৎখ্রে। ঙাক-শেনগা মরী লৈনবা হিরম খুদিংমক য়েংশিন্দুনা এল.এ.সি পরিংদা লৈবাক অসিগী ঙাক-শেনগী থৌরাং তৌরিবশিংগী ফিবম মহাক্না হকথেংন্না য়েংশিনখ্রে। মফম অদুদা মথৌ পাংথোক্লিবা লান্মীশিংগা রক্ষা মন্ত্রীগা উনবা অদুদা লান্মীগী মকোক জেনেরেল মনোজ পান্দে অমসুং ইস্তর্ন কমান্দগী জেনেরেল ওফিসার কমান্দিং-ইন-চীফ লেপ্তনেন্ত জেনেরেল আর.পি কালিতা অমসুং ভারত লান্মীগী অতোপ্পা সেনিয়র ওফিসিএলশিং শরুক য়াখি।

ফোরৱার্দ এরিয়াদা মহাক্কী খোঙচৎ লোইরবা মতুংদা, রক্ষা মন্ত্রীনা অসামগী তেজপুরদা আমর্দ ফোর্সকী মীওইশিংগা উনখি। থৌনা ফনা লৈবাক্কী নিংতম্বা, অপুনবা অমসুং ঙমখৈ ঙাক্লিবা ঙমখৈগী শরুকশিংদা মথৌ পাংথোক্লিবা লান্মীশিংগী কৎথোকপা অমসুং মথৌদা পুক্নিং চঙবা অদু মহাক্না শিংথাখি।

শ্রী রাজনাথ সিংহনা হায়খি আর্মদ ফোর্সশিংনা মরম ওইদুনা লৈবাক অসিগী মপাঙ্গল অমসুং থাজবা লৈবনি। দিফেন্স ইন্দস্ত্রিদা ‘অত্মানির্ভর’ অমগী মখাদা সর্বিসশিংদা মতমগা চুনবা খ্বাইদগী নৌবা খুৎলায়শিং ফংহন্নবা পান্দম অমগা লোয়ন্না, ২০১৪দগী সরকার অসি লৈরকপদগী ভারত লান্মীগী মপাঙ্গল কনখৎহন্নবা হায়বসি সরকারনা মরুওইনা লৌবা থবক অমনি।

রক্ষা মন্ত্রীনা হায়খি সরকারনা থবক কয়া পায়খৎপগী মহৈ ওইনা মপাঙ্গল কনবা লান্মী অমা শেমগৎতুনা শিংনবা খুদিংমক্তগী লৈবাক অসি ঙাকথোক্নবা মপুংফানা থৌনা লৈরে। মতম মতমগী মতুংইন্না মখোয়গী মপাঙ্গল অমসুং থৌনা উৎতুনা, মীয়াম অমসুং মরুওইনা নহারোলশিংদা মরৈবাক নুংশিবা অমসুং লৈবাক্কী চাউথোকচবগী ৱাখল্লোন অমা ফাওহনবগীদমক আর্মদ ফোর্সশিং থাগৎলি।

শ্রী রাজনাথ সিংহনা হায়খি প্রধান মন্ত্রী শ্রী নরেন্দ্র মোদীনা অচৌবা ৱারেপশিং লৌবদগী মপুংফানা অওনবশিং পুরকপা অমসুং আর্মদ ফোর্সশিংগী থৌনা ফবা থবকশিংনা মরম ওইদুনা মালেমদা ভারতকী শক্তম অসি মপুংফানা ওল্লে। মালেমগী থবক-থৌরমশিংদা ভারতকী মৱা লৌদবা মতম অমা লৈরমখি। ঐখোয়গী প্রধান মন্ত্রীনা হোৎনবদগী, ঙসিদি ইচম চম্না য়েংলগা লৈবা লৈবাক অমা ওইরম্বদগী হৌজিক মতেং পাংবা লৈবাক অমা ওইরে। মালেম শীনবা থুংনা ভারতকী লান্মী ইকায়খুম্নরে। ঐখোয়গা মরুপ-মপাং ওইরিবা লৈবাকশিংনা মখোয়দা থাজবা থম্লে। মসি ভারতনা খ্বাইদগী শক্তি লৈবা লৈবাক অমা ওইরকপগী মরম অমনি। ঙসিদি ঐখোয় মালেমদা ৫শুবা খ্বাইদগী চাউবা ইকোনোমি ওইরে অমসুং মাঙলোমদা য়াংনা চঙশিল্লি।

ইদু মিসমি ত্রাইবকী চহিগী ওইনা অতু পোপুদা পাংথোকপা অনিশুবা রিলিজিয়স এক্সপিদিসন্দা শরুক য়াবা মীওইশিংগা রক্ষা মন্ত্রীগা উনখি। মফম অদুগী মীয়াম মতেং পাংবা ওইনা অমসুং তুরিজম চাউখৎহন্নবা ২০২১দগী হৌনা ভারত লান্মীনা অসিগুম্বা থবকশিং পাংথোক্তুনা লাক্লি।

*****