গুজরাতকী মীয়াম্না য়াবা মুখ্য মন্ত্রী, শ্রীমান ভুপেন্দ্র ভাই পতেল, কেন্দ্র মন্ত্রী মন্দলগী ঐহাক্কী খোঙলোই শ্রী ভুপেন্দ্র য়াদবজী, শ্রী অশ্বিনী চৌবেজী, রাজ্যশিংদগী লেংবীরক্লিবা মন্ত্রী, কেন্দ্র অমসুং রাজ্য সরকারগী মীহুৎ খুদিংমক অমসুং অতোপ্পা মীওইশিং!

অদোম খুদিংবু ঙসিগী নেস্নেল কনফরেন্স অসিদা অমসুং অখন্নবা ওইনা, এক্তা নগরদা ঐহাক্না তরাম্না ওকচরি। এক্তা নগরদা ঙসি নেস্নেল কনফরেন্স অমা পাংথোক্লিবা অসিমক মশানা য়াম্না অখন্নবা থৌওং অমনি। ঐখোয়না উমং, ঐখোয়গী ত্রাইবেল ইচিল ইনাওশিং, ৱাইল্দ লাইফ, ঈশিং য়োকশিনবা, তুরিজম, মহৌশা অমসুং অকোয়বগী ফিভম চাউখৎপগী ৱারী শাবা মতমদা, এক্তা নগরদা হোলিস্তিক ওইবা দিভেলপমেন্ত অমা ঐখোয়না উবা ফংলিবা, মসিনা মশানা ৱারোল অমা অদুমক পাউদম্লি, অদুগা ইনভাইরনমেন্তকী সেক্তরদা এক্তা নগরনা মরু ওইবা পন্থুংফম অমা ওইরে হায়বগী ঐখোয়দা থাজবা অমসু পীরি। অদোমসু সেক্তর অসিগা মরী লৈনবা মন্ত্রী অমসুং ওথোরিতী অমা ওইনা লাক্লিবনি। অদোম্না মফমসিদা লৈরিঙৈদা মফমসিবু মুন্না অমুক্তা য়েংহন্নীংই। এক্তা নগরনা অকোয়বগী ফিভম, ঐখোয়গী ত্রাইবেল খুন্নাই, ঐখোয়গী ৱাইল্দ লাইফকী চাউখৎ-থৌরাংগীদমক্তা পাংথোক্লিবা থবকশিং উবা ফংগনি। তুংগী মতমদসু, অকোয়বগী ফিভম ঙাক শেন্দুনা, লৈবাক্কী কাচিন কোয়দা লৈবা উমং খুদিংনা চাউখৎপগী মাইকৈদা চঙশিনবা য়াই হায়বসি মফমসিদগী অদোম্না উবা অমসুং তম্বা ফংগনি। 

মরূপশিং,

ভারতনা মথংগী চহি ২৫গী অমৃতকালগীদমক্তা ৱারেপ অমা লৌবগী মতমসিদা ঐখোয়না ঙসি উন্নরি। অদোম পুম্নমক্কী হোৎনজমন্দগী ইনভাইরনমেন্ত ঙাক শেনবগী থৌওংদা মতেং য়াম্না ফংগনি অমসুং ভারতকী চাউখৎ-থৌরাংগী খোঙজেলসু য়াম্না হেন্না য়াঙগনি হায়বগী ঐহাক্না থাজবা থম্মি।

মরূপশিং,

ঙসিগী অনৌবা ভারতনা অনৌবা ৱাখল্লোন অমসুং খোঙথাংগা লোয়ননা তুং লমচত্তা চঙশিল্লি। ঙসিদি ভারতনা খোঙজেল য়াঙনা চাউখৎলিবা শেন্মিৎলোন অমসু ওইরে, অদুগা ইশাগী ইকোলোজীসু লেপ্তনা মপাঙ্গল হাপ্লি। ঐখোয়গী ফোরেস্ত কভর হেন্না পাকথোক্লি, অমসুং ৱেৎলেন্দগী মফমসু য়াম্না য়াঙনা হেনগৎলি। রিনুএবল ইনর্জীগী মতাংদা ঐখোয়গী খোঙজেল অমসুং স্কেলগা পানবা ঙম্বা লৈবাক অমত্তা লৈতে হায়বসু ঐখোয়না মালেমদা উৎলে। ইন্তর্নেস্নেল সোলর এলাইএন্স ওইরো, কোওলিসন ফোর দিজাজতর রেজিলিএন্ত ইনফ্রাস্ত্রকচর ওইরো, নত্ত্রগা লাইফ মুবমেন্ত ওইরো, চাউরবা শিংনবা কয়াগা মাইয়োক্নবা ঙম্নবা ঙসিদি ভারতনা মালেম্বু লুচিংদুনা চৎলি। ঐখোয়গী খোঙফম চেৎপশিংবু মায় পাকহন্নবা হোৎনবগী ঐখোয়গী ত্রেক রেকোর্দনা মরম ওইরগা মালেম্না ঙসিদি ভারতকী মাইকৈদা লেপ্লি। হৌখিবা চহিশিংদা কৈ, শমু, মচি অমা পানবা শমু গন্দা অমসুং কবোকৈগী মশিংদা য়াম্না হেনগৎখ্রে। ঐখোয়গী ভুপেন্দ্র ভাইনা হৌজিক্তসু হায়বীখ্রিবা অদুনি, নুমিৎ খরনিগী মমাঙদা, মধ্য প্রদেশতা চীতাহশিংবু অমুক হন্না পুরকখিবনা হেন্না নুংঙাইবা পোকহল্লে। মহৌশা ইমাবু নুংশিজবা অমসুং থৌজাল হৈবগী মতৌনা ভারত মীয়াম খুদিংগী শিংলিদা চেল্লি অমসুং লৈবাক পুম্নমক্না চীতাহনা অমুক হল্লকপবু থম্মোই শেংনা তরাম্না ওক্নখি। নুংশিরবা মীথুংলেন অমা মশাগী ময়ুমদা হল্লকপগুম্না হিন্দুস্তানগী মফম খুদিংদা লৈবা মীওইনা ফাওনখি। মসি ঐখোয়গী লৈবাক্কী পাঙ্গলনি। মহৌশাগা মরী লৈনদুনা অদুমক লৈনবা হোৎনবগী থৌওংবু ঐখোয়না লেপ্তনা মখা চত্থরি। তুংগী চারোন শুরোনবুসু পুক্নিং থৌগৎলি। মসিগুম্বা পান্দমগা লোয়ননা, ভারতনা ইং ২০১০, হায়বদি, ঐখোয়গী নাক্তা হৌজিক চাউরাক্না দিকেদ মঙা লৈরি, ফাওবদা নেত জিরো ওইবগী পান্দম থম্লি। লৈবাক্কী মিৎয়েংনা গ্রীন গ্রোথতা ঙসি লৈরি অমসুং গ্রীন গ্রোথকী ৱারী শারি, মসিনা গ্রীন জোবকী খুদোংচাবা কয়াসু লৈহল্লি। অদুগা মসিগুম্বা পান্দমশিং ফংনবগীদমক্তা, রাজ্য খুদিংগী ইনভাইরনমেন্ত মন্ত্রালয়শিংনা য়াগদবা থৌদাং য়াম্না চাউরি।

মরূপশিং,

রাজ্য অমদা নত্ত্রগা কেন্দ্রদা লৈবা ইনভাইরনমেন্ত মন্ত্রালয়গী থৌদাং য়াম্না চাউনা লৈ। ঐখোয়না মসিবু অখুবা মিৎয়েংদা য়েংবা য়ারোই। অদুবু লাইবক থীবদি, মন্ত্রালয় অসিগী থৌদাংবু মতমগী মতুং ইন্না রেগ্যুলেতর ওইনা খনখিবসিনি। অদুবু, মন্ত্রালয় অসিগী থবক্তি রেগ্যুলেতর অমা ওইবদগী হেন্না চাওই হায়না ঐহাক্না লৌই। মখোয়গী থৌদাংদি ইনভাইরনমেন্তপু হেন্না চাউখৎহনবনি, মসিবু হেন্না খুমাং চাউশিলহন্নবা পুক্নিং থৌগৎপনি। ইনভাইরনমেন্ত ঙাক শেনবগী থবক খুদিংদা, অদোমগী মন্ত্রালয়গী অচৌবা থৌদাং লৈ। অদুগা, সর্ক্যুলর ইকোনোমীগী হীরমদা অমুক য়েংসি। সর্ক্যুলর ইকোনোমী হায়বসি ঐখোয়গী চৎনবীগী শরুক অমা ওইদুনা লাক্লি। ভারতকী মীয়াম্না সর্ক্যুলর ইকোনোমী করিনো তাক্তুনা লাক্লি। ঐখোয়না মহৌশাগী খল থুগাইবা কাঙবু কৈদৌনুংদা ওইরক্ত্রি, ঐখোয়না মসিবু য়োকখত্তুনা লাকখিবা ঙাক্তনি। ঐখোয়না পীক্লিঙৈদা, মহাত্মা গান্ধীনা মমাংগী চহি-চাগী অহৌবদা সাবর্মতি আশ্রমদা লৈরকই, অমসুং সাবর্মতি তুরেল অসি ঈশিংনা মরাং কাইরম্মি হায়না তাকপী তম্বীরকই। অদুগা কনাগুম্বা অমনা ঈশিং মাঙহনবা উবা মতম খুদিংগী গান্ধীজীনা চৈরম্মি, ঈশিং য়াম্না লৈরবা ফাওবদা ঈশিং অমত্তা মাঙহল্লমদে। ঐখোয়গী মফমদা ফি ওইরো, চে ওইরো, পোৎলম খুদিংবু অমুক্কা হন্না শিজিন্নবা, রিসাইকল তৌবগী মতৌ অদোম অয়াম্বনা উরম্লগনি, ইশাগী য়ুমদা থেংনরমগনি। পোৎলমশিং অদুনা পুম্লোই লোইদ্রিবমখৈ শিজিন্নবগী থৌওং থেংনরম্লগনি। মসি ঐখোয়গী ইমুং মনুংশিংগী সংস্কারনি। মসি লীকপা নত্তেকো, মসিদি মহৌশাবু ইকায় খুম্নবনি। লীকপনা মরম ওইরগা পোৎলম অমবু হন্না হন্না শিজিন্নবগী ৱাফম নত্তে। ঙসি ঐখোয়গী ইনভাইরনমেন্ত মন্ত্রী কয়া লাকপীরি, অদোমগী রাজ্যশিংদা সর্ক্যুলর ইকোনোমীবু য়ারিবমখৈ পুক্নিং থৌগৎপীয়ু হায়জনীংই। অদুগা স্কুলশিংদা, অঙাংশিংদা মখোয়গী ময়ুমশিংদা সর্ক্যুলর ইকোনোমীগা মরী লৈনবা করি করম্বা থৌদৌ পাংথোক্নৈ হংবদা, অঙাং খুদিংনা মরী লৈনবা খুদম পুদুনা লাক্কনি। করিবু ঐখোয়না সর্ক্যুলর ইকোনোমী হায়না খঙনবগে হায়বগী মতাংদা খঙহনবা ঙমগনি অমসুং মসিনা সোলিদ ৱেস্ত মেনেজমেন্ত অমসুং সিঙ্গল য়ুজ প্লাস্তিক থিংবগী খোঙজংদা ঐখোয়না তেংবাং অমসুং পাঙ্গল য়াম্না ফংগনি। মসিগীদমক্তা, পঞ্চায়ত, লোকেল বোদী, সেল্ফ হেল্প গ্রুপশিংদগী হৌদুনা এম.এস.এম.ই. ফাওববু ঐখোয়না পুক্নিং থৌগৎকদবনি। মখোয়দা মাইকৈ তাক্কদবনি, কাঙলোন তাক্কদবনি। 

মরূপশিং,

সর্ক্যুলর ইকোনোমীবু চাউখৎহন্নবগীদমক্তা ঐখোয়গী সরকারনা মমাংগী চহিদা ভেহিকল স্ক্রেপ্পিং পোলিসী হৌদোকখি। পোলিসী অসিগী কান্নবা লৌনবগীদমক্তা রাজ্যশিংনা মরী লৈনবা থৌরাং য়াৎপা হৌনরবরা? মসিগীদমক্তা প্রাইভেত পার্তীশিংদগী ইনভেস্তমেন্ত চঙগনি, স্ক্রেপ্পিংবু থবক ওইনা পাংথোকপা ঙম্নবগীদমক্তা মখোয়না লমগী তঙাই ফদবা লৈগনি। স্ক্রেপ্পিং পোলিসীবু খোঙজেল য়াঙখৎহনগদবনি হায়না ঐহাক্না সরকারদা হায়রি, অমসুং মসিগীদমক্তা ঐখোয়না ভারতকী সরকারগী মতম হেল্লবা গাড়ি, কিলোমীতর হেল্লবা গাড়ি হান্না পুথোরকপা তাবনি, মদুগী মতুংদগী ইন্দস্ত্রী অসি হৌবা তাবনি। ইনভাইরনমেন্ত মন্ত্রালয়নসু মশাগী রাজ্যশিংদা মসিগুম্বা গারীশিংবু পুথোকহন্নবা খঙহনবা তাবনি, মখোয়বু স্ক্রেপ্পিং পোলিসীদা খ্বাইদগী ইহান হান্না শিজিন্নবা হৌবা তাবনি। স্ক্রেপ্পিং তৌগদবা মীওইশিংবু কৌরসি, মদুগী অতুংদা অহেনবা গারীশিং অমুক থোক্লক্কনি। ফুএলসু কল্লগনি, মসিদা ঐখোয়না চাউনা তেংবাংবা ঙমগনি। অদুবু, ভারত সরকারনা পোলিসী শেম্লগা থবক্তা পাংথোক্ত্রবদি মহৈ ফংবদি ঙম্লোই। অদুগা, ইনভাইরনমেন্ত মন্ত্রালয় খুদিংনা লৈবাক্কী বাইওফুএল পোলিসীগী মতাংদা খোঙজেল য়াঙনা থবক পায়খৎপগী তঙাই ফদবা য়াম্না লৈ। বাইওফুএলগী মতাংদা ঐখোয়না কয়া য়াম্না খোঙজেল লৈনা চঙশিল্লি হায়বসু অমুক্তা খঙসি। অদুগা রাজ্যশিংগী ওইনসু মসিগুম্বা থৌরাং লৈরবা, রাজ্যশিংনা মখোয়গী গাড়ি কয়া য়াম্না লৈ খঙদোক্লবা, য়ারিবমখৈ বাইওফুএল ব্লেন্দিং তৌদুনা মখোয়শিংবু মদুনা চলাইহনবা য়াই। লৈবাক মনুংদা কম্পিতিসনগী ফিভম অমসু লৈরগনি। ইনভাইরনমেন্ত মন্ত্রালয়না পোলিসী অসিবু মশামক্কীনি খনবা তাবনি, গ্রাউন্দদা পুরক্তুনা খোঙফম চেৎনা থবক পায়খৎপা তাবনি। ঙসিদি, ইথানোল ব্লেন্দিংগী মতাংদা ভারতনা অনৌবা রেকোর্দ কয়া শেম্লি। রাজ্যশিংনসু মসিদা মতেং পাংশিল্লবদি, ঐখোয়না অহেনবা মায় পাকপা কয়া ফংবা ঙমগনি। ইথানোল পুথোকপা অমসুং ব্লেন্দিং তৌবগী মতাংদা রাজ্যশিংগী মরক্তা কম্পিতিসন লৈহন্নীংই। করম্বা রাজ্যনা খ্বাইদগী নীংথিজনা পাংথোকই হায়না চহি অমদা সর্তিফাই তৌবা য়াই, অদুগা মসিগী মরক অসিদা, লৈবাক্কী লৌমীশিংদসু মতেং য়াম্না ফংগনি। লবুক্কী অরেম্বশিংবুসু শেন্থোক্তা ওন্থোকপা য়াগনি। মতৌ অসুম্না, হেলদি ওইবা কম্পিতিসন অমবুসু পুক্নিং থৌগৎকনি। রাজ্যশিংগী মরক্তা লৈরক্কদবা মসিগুম্বা হেলদি কম্পিতিসন অসিমক শহরশিংগী মরক্তসু লৈহনবা য়াই। মসিদগী, ইনভাইরনমেন্ত ঙাক শেনবগী ঐখোয়গী পান্দম অসিদা জন ভাগিদারীগী পাঙ্গল ফংলক্কনি, অদুগা, ঙসি ঐখোয়না অয়েৎপনি খল্লিবশিংনা নোংমদি ঐখোয়গী শিংনবশিংগা মাইয়োক্নদুনা মায় পাকপগী মরু ওইবা পাম্বৈ অমা ওইরক্কনি। এল.ই.দি. বল্বনা মৈ য়াম্না চাদে হায়বা ঐখোয়না খঙনরবনি। মসিনা কার্বন ইমিসন থোকহন্দে, শেল য়াম্না কল্লি। ঐখোয়গী ইনভাইরনমেন্ত মন্ত্রালয়, রাজ্যগী ইলেক্ত্রিসিতী মন্ত্রালয়, ঐখোয়গী রাজ্যশিংগী অর্বান মন্ত্রালয়না স্ত্রীত লাইত খুদিংদা এল.ই.দি. বল্ব শিজিন্নরবরা নত্ত্রগা শিজিন্নদ্রিবরা হায়না ফম্মিন্নদুনা খন্নবা য়াদবরা? সরকারগী ওফিস খুদিংদা থালহন্নবা হোৎনবা য়াদবরা? শেল য়াম্না কল্লিবা, ইনভাইরনমেন্তপুসু ঙাক শেল্লিবা এল.ই.দি.গী অচৌবা ইহৌ অমা চলায়রি। অদোম্না ইহৌ অসি লুচিংবা য়াই। অদোমগী বিভাগনা লুচিংবা য়াই। ঐখোয়না মতৌ অসুম্না সরকারগী রিসোর্সশিংসু কনগদবনি। ঈশিংগী মতাংদা অমুক খন্নসি, ঈশিং কনবা হায়বসি য়াম্না মরু ওইবা থবক্নি হায়না মীয়াম পুম্বনা হায়নরি। নীংতম্বগী অমৃত মহোৎসব অসিদা অমৃত সরোবর ৭৫ শেমগৎনবা ঐখোয়না হায়রি। মসিদসু, ইনভাইরনমেন্ত মন্ত্রালয়না লুচিংবা য়াইনা। অদোম্না ঈশিং য়োকশিনবগী হীরমদা মিৎয়েং চঙলিবরা? মসিদসু অদোম অমসুং লৌউ-শিংউ মন্ত্রালয় পুন্দুনা দ্রিপ ইরিগেসনগা লোয়নবা মাইক্রো ইরিগেসন্দা অহেনবা মিৎয়েং চঙমিন্নবা য়াই। ইনভাইরনমেন্ত মন্ত্রালয় হায়বসি অতোপ্পা মন্ত্রালয় খুদিংদা মাইকৈ তাকপা ঙম্বা, থবক থৌরমগী খোঙজেল য়াঙহনবা ঙম্বা মন্ত্রালয়নি। ঈশিং মরাং য়াম্না কায়রম্বা, গ্রাউন্দৱাতরগী চাং ৱাংনা লৈরম্বা রাজ্যশিংনা ঈশিংগীদমক্তা অচৌবা শিংনবা থেংনবা রাজ্য কয়া ওইখোয়না উরে। ঈশিং য়াম্না ৱাৎলে, ঈশিংগীদমক্তা ফীত ১০০০-১২০০ লুনা কুম্থনরে।

মরূপশিং,

শিংনবা অসি ঈশিং খক্তগী নত্তে, অকোয়বগী ফিভমগসু মান্ননা মরী লৈনবা শিংনবনি হায়না ঐখোয়না খনফম থোকই। লৈবাক্কী জিলা খুদিংদা অমৃত সরোবরগী খোঙজং অমা চত্থরি হায়বা অদোম্না হৌজিক্কা উরে। হৌজিক্তি, অমৃত সরোবরগা ৱাতর সেক্যুরিতীগা লোয়ননা ইনভাইরনমেন্ত সেক্যুরিতীগসু মরী লৈনরে। ঐখোয়গী লৌমীশিংনা কেমিকেল য়াওদবা লৌউ-শিংউ, নেচরেল ফার্মিং চত্থরিবা অসি অদোম্না এগ্রিকলচর বিভাগনা চত্থবনি হায়বা খঙলি। মসিদা ইনভাইরনমেন্ত মন্ত্রালয়সু শরুক য়াশিল্লবদি, খোঙথাং অসিদা অহেনবা পাঙ্গল ফংগনি। নেচরেল ফার্মিং, মসিনসু ইনভাইরনমেন্ত ঙাক শেনবগী থবক তৌরিবনি। মসিদি ঐখোয়গী ইমা লৈহাওবু ঙাক শেনবনি, য়াম্না চাউবা খোঙথাং অমনি। অদুনা ঐহাক্না হায়নীংবদি, মতম্না হোংলকপগা লোয়ননা, ইনভাইরনমেন্ত মন্ত্রালয়না হীরম অসিদা শরুক য়াশিন্দুনা ইন্তিগ্রেতেদ এপ্রোচকা লোয়ননা থবক পাংথোকপগী তঙাই ফদবা চাউনা লৈরে হায়বসিনি। ইনভাইরনমেন্ত মন্ত্রালয়গী মিৎয়েং হোংলকপা মতমদা, অনৌবা পান্দম থম্লক্কনি, অনৌবা লম্বী য়াৎলক্কনি, মসিদা মহৌশা ইমাদা য়াম্না কান্নগনি হায়বগী ঐহাক্না থাজবা থম্মি।

মরূপশিং,

ইনভাইরনমেন্ত ঙাক শেনবগী য়াম্না মরু ওইবা হীরম খরা – মীয়াম পুন্না ভাব তামিন্নবা, মীয়াম পুন্না শরুক য়ামিন্নবা, মীয়াম্না শৌগৎপা হায়বসি য়াম্না তঙাই ফদে। মসিসু, ইনফোর্মেসন বিভাগ নত্ত্রগা এজুকেসন বিভাগ খক্তগী থবক নত্তে। অনৌবা নেস্নেল এজুকেসন পোলিসী অসিসু অদোমগী মন্ত্রালয়গী ওইনা য়াম্না কান্নবা অমা ওই। মসিদা হীরম অয়া য়াওরি, এক্সপেরিএন্সতা য়ুম্ফম ওইরগা মহৈ তম্বা। মসিগী মতাংদা, অদোমগী মন্ত্রালয়না এজুকেসন মন্ত্রালয়গী মফমদা স্কুলগী অঙাংশিংবু উ-ৱাগী মতাংদা তাকপী তম্বীবগী মতাংদা লৈকোলদা চত্তুনা পাংথোকপীয়ু হায়বা য়াই। খুঙ্গংগী ৱাংমদা লৈরিবা উ-ৱা কয়া শক্তাকপা য়াই। মসিদি অদোম অমসুং এজুকেসন মন্ত্রালয় পুন্না পাংথোকমিন্নগদবনি। অঙাংশিংনা মসিদগী ইনভাইরনমেন্তকী মতাংদা খঙবা য়াম্না হেনগৎকনি, অমসুং ইনভাইরনমেন্ত ঙাক শেনবগী মতাংদা পুক্নিং থৌগত্তুনা মখোয়না নোংমদি ইনভাইরনমেন্ত ঙাক শেনবগী লান্মী ফাওবা ওইরকপগী মতিক লৈগনি। মতৌ অসুম্না, অঙাংশিং অসিনা সমুদ্র তোর্বান নত্ত্রগা তুরেল মপান্দা লৈবা মতমদা, ঈশিংগী মগুন, সমুদ্রগী ইকোসীস্তেম করি ওইবগে, তুরেলগী ইকোসীস্তেম্না করি ওইবগে হায়বা তাকপী তম্বীবা য়াগনি। ঙাগী কান্নবনা করিনো খঙহনবা য়াগনি। ইনভাইরনমেন্ত ঙাক শেনবদা ঙাশিংসু অচৌবা থৌদাং য়ারিবনি। থবক অসিবুদি এজুকেসন বিভাগনা পাংথোক্কদবা ওইগনি, অঙাংশিংবু মফমশিং অসিদা পুদুনা খঙহনবা মতমদা ইনভাইরনমেন্ত বিভাগকীদমক্তা অনৌবা চারোন শুরোন অমা শেম-শাগদৌরিবনি। ঐখোয়না অঙাংশিংবু, অমসুং তুংগী চারোনশিংবু ইনভাইরনমেন্তকী ফিভমশিংগী মতাংদা খঙহন্দবা য়াদে, নীংথিনা ভাব তাহন্দবা য়াদে। রাজ্যশিংগী ইনভাইরনমেন্ত মন্ত্রালয়শিংনা ৱারোল অসিগা মরী লৈনবা খোঙথাং পায়খৎফম থোকই। স্কিম কয়া শেম্বা তাবনি। স্কুল অমদা উহৈ পানবা উ অমবু হেক হৌরবদি, মদুগী মতাংদা মখোয়দা ইহনগদবনি। মেদিসিনেল প্লান্ত অমা হেক্তগী মরমদা মখোয়না অখঙবা ইহনবা য়াই। মরী লৈনবা কম্পিতিসন শীনবা য়াই। ঐখোয়গী য়ুনিভর্সিতী অমসুং লেবোরেতরীশিংনা ইনভাইরনমেন্ত ঙাক শেনবগা মরী লৈনবা ইনোভেসনশিংদা অহেনবা মিৎয়েং চঙফম থোক্লবনি। ইনভাইরনমেন্ত ঙাক শেনবগা মরী লৈননা তেক্নোলোজী শিজিন্নবগী থৌওংসু য়ারিবমখৈ হেনগৎহনগদবনি। উমং, জংগল কয়া লৈরিবশিং অসিগা মরী লৈননা, মফমশিং অসিগী ওইরিবা ফিভমশিং লেপ্তনা নৈনবগী তঙাই ফদবা লৈ। ঐখোয়না স্পেস তেক্নোলোজী শিজিন্নদুনা ঐখোয় জংগলশিংবু লেপ্তনা য়েংশিনবা য়াই। অহোংবা লাকপা হেক থেংনবগা, মশক খঙজিন্দুনা শেমদোক্নবা থবক পায়খৎপা য়াই।

মরূপশিং,

লাম্মৈ চাকপনা ইনভাইরনমেন্তকা মরী লৈনবা য়াম্না মরু ওইবা শিংনবা অমসু ওইরি। জংগলদা লাম্মৈ চাকপগী থৌওংশিংগী মশিং হেনগৎলক্লি, অমসুং ভারত্তা অসিগুম্বা চাউনা চাকপা মৈ মুত্থৎপগী মোদর্ন তেক্নোলোজী লৈতবনা মরম ওইরগা শিংনবা অসিগা মাইয়োক্নবদা য়াম্না অরুবা অমা ওইগনি। নোর্থ অমেরিকা, কানাদা, ওস্ত্রেলিয়াগুম্বা লৈবাকশিংদা জংগল মৈ চাকপগী মমি কয়া অদোম্না তি.ভি.দা উরম্লগনি। অমাঙ অতা য়াম্না থোকপনি। লম্লক্কী শাশিংনা তৌফম খঙদনা চেনবা উবদা য়াম্না নুংঙাইতবা ফাওই। মৈ মুৎখ্রবা মতুংদা উৎ পায়বনা মাইল কয়া থাপ্না লৈবা মীওইশিংগী পুন্সি মহিংদা অয়েৎপা অপনবা কয়া অমুক পীরিবনি। ৱাইল্দ ফাইয়রনা মরম ওইবা গ্লোবেল ইমিসন্দা ভারতকী চাং য়াম্না নেম্মি, অদুবু ঐখোয়না চেকশিন্না লৈবগী মথৌদি অদুমক তারিবনি। মসিগীদমক্তা ঐখোয়না হৌজিক্তগী হৌনা থৌরাং য়াত্তুনা লৈফম থোকই। রাজ্য খুদিংদা ফোরেস্ত ফাইয়র ফাইতিং মেকানিজম মপাঙ্গল লৈফম থোকই, তেক্নোলোজীনা তেংবাংবা পথাপ অমা ওইহনগদবনি। করিদগী মৈ হৌই হায়বা ঐখোয়না নীংথিনা খঙফম থোকই। জংগলদা তারিবা অকঙবা উনাশিংনা শোইদনা মৈরি অপীকপা অমা থেংনরুবা মতমদা মৈ চাক্লকপনি। অদুগা, জংগলশিংদা ফত্ত-হৌদি কয়া তারিবা, উনা কয়া তারিবশিং অসি হৌজিক্তি সর্ক্যুলর ইকোনোমীদা শিজিন্নবা য়ারে। হৌজিক্কান্দি মসিদগী ফক শাবা য়ারে। মসিদগী মৈতান শেম্বা য়ারে। মসিনা হায়বদি, ঐখোয়গী জংগলশিংসু কনবা ঙম্লগনি, অমসুং ইনর্জীসু কনবা য়ারগনি। ঐহাক্না মসিদা হায়নীংবদি, লাম্মৈ চাকপগী হীরমদা নীংথিনা খঙবনা মফমদুগী মীয়ামগী শেন্দান লম্বী অমা শেম্বা ঙম্লগনি হায়বনি। ৱাখল্লোন অসিগা লোয়ননা ঐখোয়না জংগলশিংবু নীংথিনা শেন্নগদবনি। ঐখোয়গী ফোরেস্ত গার্দশিংসু অনৌবা মখলগী ত্রেনিং পীবগী মথৌ তারে, হ্যুমেন রিসোর্স হায়রিবা হীরমসিদা অনৌবা ৱাহন্থোক মরী লৈনহনবগী তঙাই ফদবা লৈরে। হান্নগী মতমগী বীত গার্দশিংনা হৌজিক মতমগী শিংনবা মাইয়োক্নবা ঙমগদবা নত্তে।

মরূপশিং,

ঐহাক্না মীয়ামদা মরু ওইবা ৱাফম অমা হায়বা পাম্মি। মতমগা চুনবা ইনফ্রাস্ত্রকচর য়াওদনা লৈবাক চাউখৎপা, লৈবাক মীয়ামগী পুন্সি মহিং হেন্না নুংঙাইহনবা ঙমগদবা নত্তে হায়বা অদোম্না মমুৎ তানা খঙনরবনি। ইনভাইরনমেন্ত ক্লিয়ারেন্সকী মিংদা লৈবাক অসিদা মতমগা চুনবা ইনফ্রাস্ত্রকচর কয়া হৌদোকপগী মতৌ ঐখোয়না উরে। অদোম্না হৌজিক লৈরিবা মফম, এক্তা নগর অসি ঐখোয় খুদিংবু মিৎ পাংহনবা য়াবা খুদম অমসু ওইরিবনি। অর্বান নক্সল, চাউখৎপগী মাইয়োক্তা লৈবা মীওই কয়ানা সর্দার সরোবর দামগুম্বা অচৌবা প্রোজেক্ত অসি মতম করম্না থিংদুনা থম্লকখি হায়বা অদোম্না উরবনি। অদুগা, অদোম্না হৌজিক ফম্লিবা এক্তা নগরগী সর্দার সরোবর দাম অসিগী অচৌবা রিজর্ভোইর অমা অদোম্না উরিবসিগী উরেপ উয়ুং অসি ভারতনা নীংতম্বা হেক ফংবদা য়ুংখিবনি খঙবদা অদোম্না অঙকপা ফাওগনি, মসিদা সর্দার পতেলনা অচৌবা থৌদাংসু য়াবীখিবনি। পন্দিত নেহরুজীনা উরেপ উয়ুং তমখিবনি, অদুদগীদি, অর্বান নক্সল চঙলকপা হৌরকখ্রে, মালেমগী মীয়াম কয়া লাক্লে। মসিনা ইনভাইরনমেন্ততা অকায়বা পীগনি হায়বগী ৱারী কয়া ফোংদোক্নরকখি, তোঙানবা খোঙজং কয়া চঙদুনা মসিগী থবক লেপহনখি। নেহরুজীনা হৌদোকপীরম্বা থবক অসি ঐহাক লাক্লবা তুংদা মপুং ফানা লোইশিনখি। অদুগা, ঙসিদি, মসিগুম্বা এক্তা নগরনা ইনভাইরনমেন্তকী পন্থুংফম অমা ওইরে। অরানবা পাউ কয়া শন্দোকখিবনি, অদুগা হায়রিবা অর্বান নক্সলশিং অসি ঙসিসু তুমিন্না লৈত্রি, ঙসিগী নুমিৎ অসিদসু মখোয়গী মশান্না অদুমক মখা চত্থরি। মখোয়গী অরানবা ঐখোয়না ফারে, মদু ফাওবদা মখোয়না লাল্লি হায়বা ঙমদ্রি অমসুং হৌজিক্তি মখোয় খরনা রাজনিতীগী তেংবাং ফাওবা ফংলি।

মরূপশিং,

ভারতকী চাউখৎ থৌরাংদা অপনবা পীনবা, লেপহন্নবা মালেমগী ইন্সতিত্যুসন অমদি তোঙানবা ফাউন্দেসন কয়ানা মীয়ামগী য়াইফগদবা হীরম কয়া শিজিন্নদুনা অচৌবা ৱাফম হেক্তা ওইহল্লি। ঐখোয়গী অর্বান নক্সলশিংনা মখোয়গা পুন্দুনা কোইচোং চোংলি। ইনভাইরনমেন্তকা মরী লৈনবা হীরম খুদিংদা তাইশিন্নবা লৈহন্দনা ঐখোয়না নীংথিনা খন্ন-নৈরবা তুংদা মসিগুম্বা মীওইশিংগী ফত্তবা খুজিং থৌরাংবু মাইথীবা পীখি। মসিগুম্বা ফত্তবা খুজিল থৌরাংশিংনা থবক থৌরমশিং লেপহন্দুনা থম্মি। মরম অদুনা, ঐখোয়না মসিগুম্বা মরী লৈনবা হীরমশিংদা হোলিস্তিক এপ্রোচকা লোয়ননা তুং লমচত্তা চঙশিনফম থোকই হায়না ঐহাক্না খল্লি।

মরূপশিং,

ইনভাইরনমেন্তকী মিংদা মরম চাদবা ৱারোল কয়া শিজিন্নদুনা পুন্সি মহিং লাইহনবা অমসুং কার্বার তৌবা লাইহনবগী থৌওংদা অয়েৎপা অমত্তা পীফম থোক্তনবা ঐখোয়না হোৎনফম থোকই। অয়েৎপা-অপনবা করম্না লৈহল্লি হায়বগী মতাংদা ঐহাক খুদম অমা পীজগে। গুজরাত্তা মতম পুম্বদগী ঈশিংগী অৱাবা লৈদুনা লাকখি, চহি ১০গী মনুংদা চহি ৭তি ঈকং থোকই। মদুদগী ঐখোয়না চেক দামগী অচৌবা খোঙথাং পায়খৎখি। ঐখোয়না উমংদসু ঈশিং ফংহনবা পামখি, অদুনা উমংগী চিংচেপ্তা ঈশিং খরা লৈরিবশিং অসিদা ঐখোয়না দাইনিং তেবলগুম্না পীকপা ঈশিংগী কোম তৌবগী ৱাফম খন্নখি। মসিদা ফোরেস্ত মন্ত্রালয়না অয়াবা পীবিখিদে তাবদা অদোম ঙক্কনি। ঈশিং লৈরবা মতুংদা অদোমগী উমং কনবা ঙমগদৌরিবনি হায়না ঐহাক্না হায়খি। মদুদগীদি, ঐহাক্না ফোরেস্ত বিভাগতা শেল পীরগে, দেক দাম শাবীরো, ঈশিং য়োকশিল্লসি অমসুং জংগলশিংদা মখোয়গী পাঙ্গল অমুক লৈহল্লসি হায়খি। মদুমকান্দা থবকশিং অসি য়াম্না ৱানা পাংথোকপা ঙমখি। মসিনা হায়বদি, ঐখোয়না ইনভাইরনমেন্তকী মিংদা উমংদা ফাওবা ঈশিং লৈহনবা ঙমদ্রবদি, ঐখোয়না তৌগদৌরিবসি করিনো হায়বনি।

মরূপশিং,

ইনভাইরনমেন্ত ক্লিয়ারেন্স য়াম্না য়াঙনা ফংলবকান্দা চাউখৎপগী খোঙজেলসু য়াঙগনি হায়বা ঐখোয়না কাওরোইদবনি। থৌওং অসি কম্প্রোমাইজ তৌদ্রবসু পাংথোকপা য়াবনি। রাজ্য কয়াগী মীওই কয়া ঙসি ফম্লি, অমসুং ঙসিগী নুমিৎ ফাওবসিদা অদোমগী মন্ত্রালয়গী ইনভাইরনমেন্ত ক্লিয়ারেন্সকা মরী লৈনবা থবক লিশিং ৬তগী হেন্না পন্দুনা লৈরি হায়বা ঐহাক্কী ইফমদা তম্বীরক্লে। মান্নবা ওইনা, ফোরেস্ত ক্লিয়ারেন্সকী চাউরাকপা প্রোজেক্ত ৬০০০কী এপ্লিকেসন কয়াসু অদোমগী তেবলদা তাদুনা পন্দুনা লৈরি হায়রি। ঐখোয়না পেরামীতর কয়াগী ৱারেপ লৌদুনা, ইনভাইরনমেন্ত ঙাক শেন্দুনা ক্লিয়ারেন্স পীবদা মতম য়াম্না লৌদনা য়াম্না থুনা থবকশিং পাংথোক্কদবনি হায়না ঐহাক্না খল্লি। ঐখোয় ইশানা অয়েৎপগী মরম ওইহল্লোইসি। পন্দুনা লৈবনা মরম ওইরগা প্রোজেক্তশিং অসিগী কান্নবা ফংবা ঙমদ্রিবনি হায়বা অদোমসু খঙবীয়ু। পন্দুনা লৈবগী মতৌ য়ারিবমখৈ অমসুং তসেংবা কেস খক্তদা পেন্দেন্সী লৈহন্সি, ক্লিয়ারেন্স থুনা পীথোকসি, ৱাখল্লোনশিং অসিগা লোয়ননা ঐখোয়না ৱর্ক ইনভাইরনমেন্তপুসু হোংদোকপগী মথৌ তাই। ঐখোয়না ইনভাইরনমেন্ত ঙাক শেনবগী ৱারী শারি, মসিদা ঐখয়না ৱর্ক ইনভাইরনমেন্তসু হোংদোকপগী মথৌ তাই। প্রোজেক্ত কয়া অমগী মতম শাংনা ইনভাইরনমেন্তেল ক্লিয়ারেন্স ফংদ্রিবা, ফোরেস্ত ক্লিয়ারেন্স ফংদ্রিবা অসিগী মতাংদা রাজ্য সরকারশিংনা ঐহাক্কী ইফমদা চিথী ইরকই, ভারত সরকারগী বিভাগশিংনা চিথী ইরকই, মসিগী রাজ্যদা পন্দুনা লৈরে হায়বা ৱাফম কয়া তম্লকই। রাজ্য খরনা ভারত সরকারদা পনবনি হায়রকই। ঐহাক্না প্রোজেক্তশিং অসিবু প্রগতীগী মখাদা পুশিল্লি, মসি হেক তৌবগা প্রোজেক্ত ক্লিয়ারেন্সকী থবক খুদক্তা হৌবগী মতৌ ঐহাক্না উই, রাজ্য অমসুং কেন্দ্র অনিমক্তা পাংথোকপা উই। হায়বদি, ইনভাইরনমেন্তকী হীরম্বু ওইরবদি, ক্লিয়ারেন্স হেক্তা ফংদে হায়বনি। মসিগুম্বা পামদবা থৌওং থোক্লিবগী মরম অমদি শোইদনা লৈরে হায়বা মসিনা তাক্লি। রাজ্য ওইরো, লোকেল লৈঙাক্লোই ওইরো, কনা কনাগী বিভাগ অমা হেক্তা ওইরো, মসিগুম্বা অপনবা অয়েৎপা অমত্তা লৈহন্দনবা হোৎনসি হায়না ঐহাক্না থমজনীংই। তেক্নোলোজী শিজিন্নবগী থৌওংসু অদোম্না হৌজিক উরম্লগনি। অদোম পুম্নমক্না পরিবেশ পোর্তেল উরম্লগনি, অমসুং পোর্তেল অসিগা মরী লৈনবা ক্লিয়ারেন্স মখল খুদিংগীদমক্তা মসিনা সিঙ্গল ৱিন্দো অমা ওইরবনি। মসিনা ত্রান্সপরেন্তসু ওই অমসুং মসিদগী এপ্রুবেল ফংবদা য়াম্না ৱানা চেন্থোক চেন্সিন তৌবগী মথৌসু ওইদে। চহি ৮গী মমাংদা, ইনভাইরনমেন্ত ক্লিয়ারেন্স ফংবদা নুমিৎ ৬০০তগী হেন্না চঙলম্বনি। তেক্নোলোজীগী মতেংদগী য়াম্না হেন্না নীংথিবা সাইন্তিফিক ওইবা মওংদা থবক পাংথোক্তুনা ঙসিদি থবক অসি শুপ্নগী নুমিৎ ৭৫নিগী মনুংদা পাংথোকপা ঙম্লে। ইনভাইরনমেন্তেল ক্লিয়ারেন্স পীবা মতমদা ঐখোয়না মরী লৈনবা কাঙলোনশিংসু নীংশিংগদবনি অমসুং সেক্তর অসিগী মীয়ামগী চাউখৎ-থৌরাংগীসু খনগদবনি। হায়বদি, মসিনা ইকোনোমী অমসুং ইকোলোজী অনিমক্কী মায় পাকপনি হায়বনি। ঐহাক্না খুদম অমা পীজগে। ঙসিদগী চয়োল খরগী মমাংদা, দিল্লীদা প্রগতী মাইদান তন্নেলবু লৈবাক মীয়ামদা খুৎশিন্নখি। তন্নেল অসিনা মরম ওইরগা দিল্লীগী মীয়াম্না ত্রাফিক জামদা প্নদ্রে। মসিনা চহি খুদিংগী ফুএল লীতর লাখ ৫৫ কনবদসু মতেং পাংবা হৌরে। মসিনা ইনভাইরনমেন্তপুসু ঙাক শেল্লে, চহিদা কার্বন ইমিসন চাউরাকপা  তোন লিশিং ১৩সু তৌহন্দ্রে। চাং অসিগুম্বা কার্বন ইমিসন কনবগীদমক্তা ঐখোয়না উ চারা লাখ ৬ হেন্না থাবগী মথৌ তাগনি হায়না অখঙ অহৈশিংনা হায়। মসিনা হায়বদি, মসিগুম্বা দিভেলপমেন্ত পুরকপগী থবক অসিনসু অকোয়বগী ফিভম ঙাক শেনবা ঙম্লে হায়বনি। ফ্লাইওভর ওইরো, শোরোক ওইরো, এক্সপ্রেসৱে ওইরো, রেলৱে প্রোজেক্ত ওইরো, পুম্নমক অসি পাংথোকপা মতমদা কার্বন ইমিসন য়ারিবমখৈ হন্থহন্নবা হোৎনগদবনি। ক্লিয়ারেন্স পীবা মতমদা ঐখোয়না মসিগুম্বা ৱাফম অসি মতম পুম্বদা নীংশিংগদবনি।

মরূপশিং,

পি.এম. গতিশক্তী নেস্নেল মাস্তর প্লান চৎনবা হৌরবা তুংদগী ইনফ্রাস্ত্রকচরগী প্রোজেক্তশিংগী মরক্তা তেংবাংনবগী মতৌ য়াম্না হেনগৎলে, অসুং রাজ্যশিংনসু মতৌসিদা য়াম্না নুংঙাইবা ফাওনরে অমসুং কান্নবসু য়াম্না ফংলে। মসিনা মরম ওইরগা, প্রোজেক্তশিংগী খোঙজেলসু য়াম্না হেনগৎলে। পি.এম. গতিশক্তী নেস্নেল মাস্তর প্লান্না ইনভাইরনমেন্ত ঙাক শেনবদসু মশক থোক্না তেংবাংলি। রাজ্য অমদা ইনফ্রাস্ত্রকচর অনৌবা অমা হৌদোকপা খুদিং ক্লাইমেত চেঞ্জনা মরম ওইবা শিংনবা কয়া থেংনরিবশিংসু য়েংবগী মথৌ তাই। মসিনা হায়বদি, মসিগুম্বা শিংনবা মাইয়োক্নবা ঙম্নবা দিজাজতর রেজিলিএন্ত ওইবা ইনফ্রাস্ত্রকচর শেমগৎপগী মথৌ তাই হায়বনি। ঐখোয়না ক্লাইমেত চেঞ্জকা মরী লৈনবা হীরম কয়া মাইয়োক্নদুনা, শেন্মিৎলোনগী চাউখৎলক্লিবা সেক্তর খুদিংবু মওং চুম্না শিজিন্নবা তাবনি। কেন্দ্র অমসুং রাজ্য সরকার অনিমক পুন্দুনা গ্রীন ইন্দস্ত্রীএল ইকোনোমীগী মাইকৈদা খোঙদাগদবনি।

মরূপশিং,

অদোম খুদিংনা নুমিৎ নিনি অসিদা ইনভাইরনমেন্ত ঙাক শেন্নবা ভারত সরকারনা হোৎনরিবা খুদিংদা অহেনবা পাঙ্গল হাপকনি হায়বগী ঐহাক্না থাজবা থম্মি। ইনভাইরনমেন্ত মন্ত্রালয়না রেগ্যুলেতর ওইবা খক নত্তনা, মীয়ামগী পাঙ্গল হাপ্পা অমসুং থবক্কী অনৌবা খুদোংচাবা পীবগী অচৌবা পাম্বৈ অমসু ওইগদবনি। এক্তা নগরদা অদোমগী তমজনীংঙাই ওইবা, য়েংজনীংঙাই ওইবা হীরম কয়া লৈগনি। গুজরাতকী মীওই করোর কয়া, রাজস্থানগী মীওই করোর কয়া, মহারাস্ত্রগী মীওই করোর কয়া, মধ্য প্রদেশকী মীওই করোর কয়াদা মৈ ফংহন্দুনা সর্দার সরোবর দাম্না রাজ্য মসিসিগী মীওইশিংবু তেংবাংলি। রাজস্থানগী মরুভুমী য়ৌনবা ঈশিং পীরি, কৎচকী মরুভুমীদা ঈশিং য়ৌহল্লে, মৈসু পীরি। মধ্য প্রদেশতা মসিনা হৌজিক মৈ পীরে। সর্দার সাহেবকী চাউরবা মীতম অসিনা ঐখোয়দা অমত্তা ওইবগী ইথিল পীরি। ইকোলোজী অমসুং ইকোনোমীগা লোয়ন-লোয়ননা চাউখৎপসু করম্না পুরক্কনি, ইনভাইরনমেন্তপু মপাঙ্গল হেন্না করম্না কলহনগনি, অদুগা থবক্কী অনৌবা খুদোংচাবা কয়া করম্না লৈহনগনি, বাইও-দাইবর্সিতী, ইকো তুরিজম্বু চাউখৎপগী পাম্বৈ করম্না ওইহনগনি, ঐখোয়গী উমংগী লন, ত্রাইবেল ইচিল ইনাওশিংগী স্কিল করম্না হেনগৎহনগনি, পুম্নমক অসিগী ৱারোইশিন অসি অদোম খুদিংনা এক্তা নগরদগী ফংবা ঙমগনি। এক্তা নগর দিক্লারেসন অসিনা নীংতম্বগী অমৃতকাল অসিদা অচৌবা ৱারোইশিন অমা পুদুনা লাক্লগনি, থাজবা অসিগা লোয়ননা ঐহাক্না পুম্নমকপু থাগৎচরি। অদুগা মরূপশিং, ঙসিগী থৌরম অসিবু শীন-লাঙবগীদমক্তা ঐহাক্না ভারত সরকারগী মন্ত্রালয় অসিগী অধিকারী, মন্ত্রীশিংবু থাগৎচরি।  লেকচর কয়া লৈগনি, খন্ন-নৈনবা কয়া লৈগনি, পুম্নমক অসিগী কান্নবা লোয়না লৈহনবীয়ু হায়না থমজনীংই। অদোম পুম্নমক্না নুমিৎ নিনি লৈমিন্নদুনা, কান্নবা ৱাফম কয়া খন্ন-নৈনবা অসিনা খ্বাইদগী হেন্না মরু ওইবা মতৌনি। অদোম্না অতোপ্পা রাজ্যশিংগী মীওইশিংগা খঙনবদা, অনৌবা ৱাখল্লোন কয়া থোক্লক্কনি। অদোম্নসু অতোপ্পদা অনৌবা ৱাফম কয়া পাউদম্বগী খুদোংচাবা ফংগনি। হায়বদি, নুমিৎ নিনি অসিদা অদোম্না অমগী চাউরবা ইথিল ওইনগনি হায়বনি। অদোমগী মরুপ্না অদোমদা ইথিল পীগনি। মসিগুম্বা থৌওং কয়া অসিনা মরম ওইরগা, নুমিৎ নিনি অসি লৈবাক্কী য়াম্না মরু ওইবা মতম ওইরগনি। লৈবাক্কী চাউখৎ-থৌরাং, ইনভাইরনমেন্ত ঙাক শেনবগী মতাংদা লাক্কদৌরিবা চারোন শুরোনগী মফমদা অদোম্না অচুম্বা মাইকৈ তাকপা ঙমগনি অমসুং মসিগুম্বা থাজবা অসিগা লোয়ননা অদোম্না মশক থোকপা রোদমেপ অমা শেমদুনা মরী লৈনবা হীরমশিংদা চাউখৎ-থৌরাং পুরক্নবগীদমক্তা চৎকনি। অদোম্বু ঐহাক্না অমুক হন্না থাগৎচরি।

***