امور داخلہ اور امداد باہمی کے مرکزی وزیر جناب امت شاہ نے آج راجستھان کے اپنے دورے کے دوسرے دن جیسلمیر میں بارڈر ٹورزم ڈیولپمنٹ پروگرام کے تحت شری تنوٹ مندر کمپلیکس پروجیکٹ کا سنگ بنیاد رکھا اور اس کا بھومی پوجن کیا۔

جناب امت شاہ نے ہماری سرحدوں کی حفاظت کے لیے اپنی جانوں کا نذرانہ پیش کرنے والے بہادر سپاہیوں کو ’تنوٹ وجےا ستمبھ‘ پر خراج عقیدت پیش کرتے ہوئے ایک شکر گزار قوم کی جانب سے خراج عقیدت پیش کیا۔

اس موقع پر بارڈر سیکورٹی فورس کےڈائرکٹر جنرل،  حکومت ہند کی وزارت سیاحت میں سکریٹری، ویسٹرن کمانڈکے ایڈیشنل ڈائریکٹر جنرل، راجستھان فرنٹیئرکے انسپکٹر جنرل، وزارت سیاحت کےاقتصادی مشیرسمیت کئی معززین موجود تھے۔ شری تنوٹ مندر کمپلیکس پروجیکٹ کو حکومت ہندکی مرکزی وزارت سیاحت، بارڈر ٹورازم ڈیولپمنٹ پروگرام کے تحت شروع کیا جا رہا ہے۔

وزیر اعظم جناب نریندر مودی کی قیادت میں پہلی بار ہمارے سرحدی علاقوں تک ترقی پہنچ رہی ہے اور سرحدی سیاحت کے تئیں دور اندیش اقدام کے نتیجے میں نہ صرف سرحدی علاقوں میں رہنے والے لوگوں کا معیار زندگی بلند ہو رہا ہے بلکہ علاقوں سے نقل مکانی بھی رک رہی ہے، جس کے نتیجے میں علاقے کی  سیکورٹی بھی مضبوط ہو رہی ہے۔ اس سمت میں، مرکزی وزیر داخلہ نے جیسلمیر میں بارڈر ٹورزم ڈیولپمنٹ پروگرام کے تحت 17.67 کروڑ روپے کے شری تنوت مندر کمپلیکس پروجیکٹ کا سنگ بنیاد رکھا، تاکہ شری تنوت ماتا مندر کا دورہ کرنے والے نوجوان ہمارے فوجیوں کی جرات مندی اور  بہادری کے بارے میں جان سکیں۔

اس پروجیکٹ کے تحت سیاحت کو فروغ دینے کے لیے ویٹنگ روم، ایمفی تھیٹر، انٹرپریٹیشن سینٹر، بچوں کے لیے کمرے اور دیگر کئی سہولیات تیار کی جائیں گی۔

جناب امت شاہ نے تنوٹ ماتا مندر  کا دورہ کیا اور ملک و قوم اور ہم وطنوں کی خوشی، امن اور خوشحالی کے لیے دعا کی۔

جیسلمیر کے تاریخی شری ماتیشوری تنوٹ رائے مندر کی ایک شاندار تاریخ ہے اور یہ خیال کیا جاتا ہے کہ ماتا تنوٹ سپاہیوں کو دشمنوں سے لڑنے کی طاقت دیتی ہے اور جنگ میں ملک کی حفاظت کرتی ہے۔

۱۹۶۵ کی ہند-پاکستان جنگ میں، پاکستان کی طرف سے شری تنوٹ رائے ماتا مندر کے احاطے پر کئی بم کے گولے گرائے گئے، لیکن تنوٹ ماتا کے معجزے سے کوئی بھی گولہ نہیں پھٹا۔ ۱۹۶۵ سے بارڈر سیکورٹی فورس اس مندر کی دیکھ بھال کر رہی ہے۔ بارڈر سیکورٹی فورس مندر کو ایک ٹرسٹ کے ذریعہ چلاتی ہے اور ہر صبح و شام ماتا کی آرتی اور بھجن سندھیا کا اہتمام کیا جاتا ہے جس میں ملک کے مختلف حصوں سے ہزاروں عقیدت مند حصہ لیتے ہیں۔تاریخ شاہد ہے کہ 1971 کی بھارت-پاکستان جنگ کے دوران لونگے والاکی جنگ میں  بارڈر سیکورٹی فورس کے بہادر جوانوں نے لونگے والا پوسٹ پر اہم اور فیصلہ کن کردار ادا کیاتھا۔

یاد رہے کہ مرکزی وزیر داخلہ نے 4 دسمبر 2021 کو جیسلمیر میں ہند-پاکستان سرحد پر فارورڈ پوسٹ کا بھی دورہ کیا تھا اور وہاں کی سرگرمیوں کے بارے میں پہلے معلومات حاصل کرتے ہوئے بی ایس ایف کے جوانوں سے بات چیت کی تھی۔

 (ش ح ۔ رض  ۔ ج ا  (

10118