কেন্দ্ৰীয় গৃহ আৰু সহযোগিতা মন্ত্ৰী অমিত শ্বাহে আজি নতুন দিল্লীত দূৰদৰ্শনৰ ‘স্বৰাজ: ভাৰতৰ স্বাধীনতা সংগ্ৰাম’ শীৰ্ষক ধাৰাবাহিকখনৰ উন্মোচনী আৰু বিশেষ প্ৰদৰ্শনী অনুষ্ঠানত বিশিষ্ট অতিথি হিচাপে অংশগ্ৰহণ কৰে। কেন্দ্ৰীয় তথ্য আৰু সম্প্ৰচাৰ মন্ত্ৰী অনুৰাগ সিং ঠাকুৰ, তথ্য আৰু সম্প্ৰচাৰ বিভাগৰ ৰাজ্যিক মন্ত্ৰী ড০ এল. মুৰুগান, তথ্য আৰু সম্প্ৰচাৰ মন্ত্ৰালয়ৰ সচিব অপূৰ্ব চন্দ্ৰ, প্ৰসাৰ ভাৰতীৰ মুখ্য কাৰ্যবাহী বিষয়া মায়ংক কুমাৰ আগৰৱালাকে ধৰি কেইবাগৰাকী বিশিষ্ট ব্যক্তি উপস্থিত থাকে।

এই উপলক্ষে মন্ত্ৰী অমিত শ্বাহে কয় যে দূৰদৰ্শন আৰু আকাশৱাণীয়ে বিভিন্ন অনুষ্ঠানৰ জৰিয়তে সময়ে সময়ে দেশক আলোড়িত কৰা, আৱেগিক কৰা আৰু অৱশেষত সৃষ্টিশীল শক্তি সংগ্ৰহ কৰাৰ কাম কৰিছে। শ্বাহে কয় যে কেৱল আকাশৱাণী আৰু দূৰদৰ্শনেহে ভাৰতৰ অনুভৱবোৰ প্ৰকাশ কৰিব পাৰে।

কেন্দ্ৰীয় গৃহমন্ত্ৰীয়ে কয় যে আজিৰ কাৰ্যসূচীৰ এক বিশেষ তাৎপৰ্য্য আছে কাৰণ প্ৰধানমন্ত্ৰী নৰেন্দ্ৰ মোদীৰ নেতৃত্বত আমি স্বাধীনতাৰ অমৃত মহোৎসৱ উদযাপন কৰিছো আৰু এই অমৃত মহোৎসৱ আমাৰ দেশৰ বাবে অতি গুৰুত্বপূৰ্ণ। আমি দেশ আৰু বিশ্বৰ স্বাধীনতা আৰু ৭৫ বছৰত দেশৰ সাফল্যক মহিমামণ্ডিত কৰি আছো। লাখ লাখ মানুহে জ্ঞাত-অজ্ঞাতে স্বাধীনতা লাভৰ বাবে প্ৰাণ ত্যাগ কৰিছিল, আমিও তেওঁলোকক স্মৰণ কৰি আছো। ইয়াৰ সমান্তৰালভাৱে অমৃত উৎসৱৰ পৰা শতবাৰ্ষিকীলৈকে ভাৰত কিমান মহান হ’ব সেই সৃষ্টিৰ বাবেও তেওঁলোকে সংকল্প গ্ৰহণ কৰিছো আৰু সংকল্পৰ সাফল্যৰ বাবেও অগাধ বিশ্বাস প্ৰকাশ কৰিছো। তেওঁ কয় যে ইয়াৰ পৰা দেশখনে যি উত্থান কৰিবলৈ লৈছে, তাৰ পাছত ভাৰতক মহান হোৱাত কোনেও বাধা দিব নোৱাৰে৷ দূৰদৰ্শনে কেন্দ্ৰীয় তথ্য আৰু সম্প্ৰচাৰ মন্ত্ৰী অনুৰাগ সিং ঠাকুৰৰ নেতৃত্বত ‘স্বৰাজ’ ধাৰাবাহিকৰ ৭৫টা খণ্ড নিৰ্মাণৰ কাম হাতত লৈছে। এয়া এক অতি সাহসী পদক্ষেপ।

মন্ত্ৰী শ্বাহে কয় যে ভাৰতত ‘স্বৰাজ’ শব্দৰ অৰ্থ কেৱল স্ব-শাসনতে সীমাবদ্ধ নহয়, স্বৰাজ শব্দটোৰ অৰ্থ হ’ল সমগ্ৰ ভাৰতক স্বাধীন কৰি নিজস্ব পদ্ধতিৰে চলাব লাগিব৷ ইয়াত স্ব-ভাষা, স্ব-ধৰ্ম, স্ব-সংস্কৃতি আৰু নিজস্ব কলাকো সামৰি লোৱা হৈছে৷ যেতিয়ালৈকে আমি আক্ষৰিক অৰ্থত স্বৰাজৰ মনোভাৱেৰে চিত্ৰ অংকন নকৰো, তেতিয়ালৈকে ভাৰতে প্ৰকৃত অৰ্থত স্বৰাজ লাভ কৰিব নোৱাৰে৷ তেওঁ কয় যে ৭৫ বছৰীয়া শাসন কালত প্ৰত্যেকেই দেশক আগুৱাই নিয়াৰ বাবে পুৰুষাৰ্থ কৰিছে৷ কিন্তু যদি শতবৰ্ষত আমি আমাৰ ভাষাসমূহক ৰক্ষা কৰিব নোৱাৰো, ইতিহাসক উঠি অহা প্ৰজন্মক প্ৰদান কৰিব নোৱাৰো আৰু হাজাৰ হাজাৰ বছৰ ধৰি চলি অহা সংস্কৃতিক ৰক্ষা কৰিব নোৱাৰো, তেতিয়া জানো স্বৰাজ লাভ কৰিম৷

গৃহমন্ত্ৰীগৰাকীয়ে কয় যে ভাৰতৰ শাসকসকলে আমাৰ সকলো উৎকৃষ্ট ব্যৱস্থাক নষ্ট কৰি পেলাইছিল, তেওঁলোকে আমাৰ জনসাধাৰণৰ মাজত এক হীনমন্যতা সৃষ্টি কৰি আমাক শাসন কৰিছিল কাৰণ আমি প্ৰতিটো ক্ষেত্ৰতে তেওঁলোকৰ তুলনাত বহু আগবাঢ়ি আছিলো৷

কেন্দ্ৰীয় গৃহমন্ত্ৰীগৰাকীয়ে কয় যে ৭৫ সপ্তাহজোৰা এই স্বৰাজ ধাৰাবাহিকখন সকলো ভাৰতীয় ভাষাত অনুবাদ কৰাৰ লগতে প্ৰদৰ্শন কৰা হ’ব৷ স্বৰাজ’ ধাৰাবাহিকখনৰ উদ্দেশ্য হ’ব লাগে প্ৰতিটো হীনমন্যতা নিৰ্মূল কৰি জনসাধাৰণৰ মাজত গৌৰৱবোধ কঢ়িয়াই অনা, তেতিয়াহে আমি স্বৰাজৰ উদ্দেশ্য পূৰণ কৰিবলৈ সক্ষম হ’ম আৰু এয়াই হ’ব স্বাধীনতাৰ অমৃত উৎসৱৰ আটাইতকৈ ডাঙৰ সাফল্য৷ তেওঁ যুৱক-যুৱতীসকলক কয় যে যিসকলে নিজৰ ইতিহাসৰ ভাল দিশবোৰৰ গৌৰৱ নকৰে, তেওঁলোকে কেতিয়া মহান ভৱিষ্যত গঢ় দিব নোৱাৰে৷ গৃহমন্ত্ৰীগৰাকীয়ে বিশ্বাসেৰে কয় যে এই ধাৰাবাহিকখনে আমাৰ যুৱক-যুৱতীসকলক শিহৰিত কৰি তুলিব আৰু দেশৰ ইতিহাসক লৈ তেওঁলোকৰ মনত গৌৰৱ সৃষ্টি কৰিব আৰু প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত আমি মহান ভাৰত গঢ় দিয়াৰ দিশত দ্ৰুত গতিত অগ্ৰসৰ হ’বলৈ সক্ষম হ’ম৷

***