نائب صدرجمہوریہ جناب ایم وینکیا نائیڈو نے آج نوجوانوں سے اپیل کی کہ وہ سماج کے ضرورت مند اور نظر انداز طبقات کی مدد کے لیے باقاعدگی سے کچھ وقت نکالیں۔ انھوں نے کہا کہ مصیبت میں مدد کا ہاتھ بڑھانے سے بڑا اطمینان اور خوشی کوئی نہیں ہے۔’شیئر اور کیئر‘ہماری تہذیب کی بنیادی قدر ہے۔

جناب نائیڈو نے نئی دہلی میں ایک غیر منافع بخش سماجی خدمت کی تنظیم کے علاقائی مرکز راشٹریہ سیوا سمیتی (آر اے ایس ایس) کے لیے ’سیوا سمستھا‘ عمارت کا افتتاح کیا۔ حاضرین سے خطاب کرتے ہوئے نائب صدر نے کہا کہ ہر ایک کو اُس کمیونٹی کی ضروریات سے آگاہ ہونا چاہئے جس میں وہ رہ رہا ہے اور اسے مدد کا ہاتھ بڑھانے کی کوشش کرنی چاہئے۔

نائب صدر جمہوریہ نے مزید زور دیا کہ یہ بڑے اداروں اور خاص طور پر متمول طبقوں کی ذمہ داری ہے کہ وہ اپنے وسائل کا استعمال کریں اور دیہی بھارت میں خدمت پر مبنی پروگرام شروع کریں۔ جناب نائیڈو نے کہا کہ اپنی خدماتی سرگرمیوں میں انہیں خواتین اور بچوں کی صحت، نوجوانوں کی ہنر مندی اور کسانوں کی فلاح و بہبود پر خصوصی توجہ دینی چاہیے۔

نائب صدر جمہوریہ نے پسماندہ علاقوں میں پسماندہ طبقوں کے درمیان آر اے ایس ایس کی کوششوں کی ستائش کی اور وبا کے  عروج کے دوران ان کے تعاون کا ذکر کیا۔ جناب نائیڈو نے پدم ایوارڈ یافتہ، آر اے ایس ایس کے بانی آنجہانی شری منی رتنم نائیڈو کی کوششوں کو یاد کیا اور انہیں ’’حقیقی معنوں میں ایک سچا گاندھیائی‘‘ قرار دیا۔ انھوں نے کہا کہ دیگر تنظیموں کو بھی مختلف سماجی برائیوں جیسے غربت، ناخواندگی اور خواتین و کمزور  طبقات کے خلاف مظالم کے خاتمے کے لیے حکومتوں کی کوششوں میں اپنا تعاون دینا چاہیے۔

اس موقع پر آر اے ایس ایس کے نائب صدر جناب کے چرنجیوی، آر اے ایس ایس کے جنرل سکریٹری شری ایس وینکٹا رتنم اور دیگر معززین موجود تھے۔

******

ش ح۔ م م۔ م ر

U-NO.8492