نائب صدرجمہوریہ جناب ایم وینکیا نائیڈو نے آج گورنروں سے زور دیکر کہا کہ وہ ریاستوں کے لیے ‘رہنما’ کے طور پر کام کریں اور اس بات کو دیکھیں کہ حکومت ہند کی طرف سے فنڈ فراہم کیے جانے والے پروگراموں کو ریاستوں کے ذریعہ صحیح طریقے سے نافذ کیا جارہا ہے۔ انہوں نے کہا کہ گورنر کا دفتر ‘‘نہ کوئی آرائشی عہدہ ہے اور نہ ہی کوئی سیاسی عہدہ ہے’’۔ انہوں نے کہا کہ ان کے طرز عمل کو ریاستی انتظامیہ کے لیے ‘مثال قائم کرنا’ چاہیے۔

نائب صدر جمہوریہ مختلف ریاستوں اور مرکز کے زیر انتظام علاقوں کے گورنروں، لیفٹیننٹ گورنروں اور منتظمین اور ان کی شریک حیات کو آج اُپ راشٹرپتی نواس میں ان کی طرف سے دئیے گئے ظہرانے سے خطاب کر رہے تھے۔

جناب نائیڈو نے گورنروں پر زور دیا کہ وہ یونیورسٹیوں کے چانسلر کے کردار میں اپنی ریاست میں زیادہ سے زیادہ یونیورسٹیوں کا کثرت سے دورہ کریں اور طلباء اور عملے کے ساتھ بات چیت کریں تاکہ ان کی حوصلہ افزائی کی جا سکے۔ انہوں نے یہ بھی تجویز کیا کہ وہ قومی تعلیمی پالیسی 2020 کے نفاذ کی اس کے خد و خال اور روح کے مطابق نگرانی کریں۔

نائب صدر جمہوریہ نے مشورہ دیا کہ گورنر ریاستوں اور مرکز کے زیر انتظام علاقوں میں تپ دق کے خاتمے اور صحت سے متعلق آگاہی کے دیگر اقدامات میں بھی اہم شراکت دار بن سکتے ہیں۔ ٹیکہ کاری کی مثال دیتے ہوئے جناب نائیڈو نے نشاندہی کی کہ کس طرح لوگوں کو ٹیکہ لگوانے کی ترغیب دینے کے مثبت نتائج برآمد ہوئے ہیں اور ملک میں اموات میں کمی آئی ہے۔ انہوں نے تجویز پیش کی کہ گورنرز مختلف ٹیکہ کاری مہموں میں شراکت دار بنیں اور لوگوں کے ساتھ بات چیت میں صحت مند کھانے پینے کی عادات کی اہمیت پر بھی زور دیں۔

اس ظہرانے میں مختلف ریاستوں اور مرکز کے زیر انتظام علاقوں کے گورنرز، لیفٹیننٹ گورنرز اور ایڈمنسٹریٹرز، ان کی شریک حیات، وزیر داخلہ جناب امت شاہ، سینئر افسران اور دیگر معززین موجود تھے۔

۔۔۔۔۔۔۔۔۔۔۔۔۔۔۔۔۔۔۔۔۔

ش ح۔م ع۔ع ن

                                                                                                                                      (U: 7675)