ঝারখন্দগী রাজ্যপাল, শ্রী রমেশ বৈসজী, মুখ্য মন্ত্রী শ্রী হেমন্ত সোরেনজী, কেন্দ্রগী মন্ত্রী ঐহাক্কী মরুপ জ্যোতিরাদিত্য সিন্ধিয়াজী, ঝারখন্দ সরকারগী মন্ত্রীশিং, এম.পি. নিশিকান্তজী, অতোপ্পা এম.পি.শিং অমসুং এম.এল.এ.শিং, নুপী অমদি নুপাশিং।

বাবাধামা লাক্লবা মতুংদা মীপুম খুদিংমক্কী ৱাখল নুংঙাই। ঙসি দেওঘরদগী ঝারখন্দগী চাউখৎ-থৌরা খোঙজেল য়াংশিনহন্নবগী অফবা খুদোংচাবা অমা নখোয় পুম্নমক্না ঐঙোন্দা পীবিরি। বাবা বৈধ্যনাথকী থৌজালশিংগা লোয়ননা ঙসি লুপা করোর লিশিং ১৬ হেনবগী প্রোজেক্তশিং শঙ্গাখি অমসুং উরেপ-উয়ুং তমখি। মসিনা ঝার্খন্দগী মোদর্ন কন্নেক্তিবিতী, ইনর্জী, হকশেল, লাইনিং-লাইশোন অমসুং তুরিজমদা চাউনা শাহৌ পীরগনি। ঐখোয়না মতম কয়াদগী দেওঘর এয়রপোর্ত অমসুং দেওঘর এম্সকী মঙলান শাগৎচদুনা লাকখি। ঙসি মঙলান অদু মঙ ফাওনবা ঙম্লে।

মরুপশিং,

প্রোজেক্তশিং অসিনা ঝারখন্দগী মীওই লাখ কয়াগী পুন্সি লায়থোকহনবা খক নত্তনা ললোন-ইতিক, তুরিজম, থবক পীবা-ইশানা ইশাবু থবক পীজবা য়ানবগী অনৌবা খুদোংচাবা কয়া পীবিরি। ঐহাক্না চাউখৎ-থৌরাংগী প্রোজেক্তশিং অসিগীদমক ঝারখন্দগী মীয়াম পুম্বদা থাগৎপা ফোঙচোকচরি, অমসুং য়াইফ-মঙ্গোল পীজরি। ঝারখন্দদা প্রোজেক্তশিং অসি পাইখৎপা হৌখি অদুবু ঝারখন্দ খক নত্তনা বিহার অমসুং ৱেস্ত বেঙ্গলগী মফম কয়াদা হকথেংননা কান্নবা ফংহল্লগনি। হায়বদি প্রোজেক্তশিং অসি নোংপোক ভারতকী চাউখৎ-থৌরাদা শাহৌ পীরগনি।

মরুপশিং,

হৌখিবা চহি ৮দগী হৌনা রাজ্যশিং চাউখৎহন্দুনা লৈবাক অসিগী চাউখৎপা পুরকপা হায়বা ৱাখল্লোনগা লোয়ননা লৈবাক অসিবু চাউখৎনবা হোৎন্দুনা লাকখি। হৌখিবা চহি ৮ অসিদা হায়ৱেজ, রেলৱেজ, এয়রৱেজ, ৱাতরৱেজ, লম খুদিংমক্তা ঝার্খন্দবু শম্নহন্নবা লৌখৎখিবা খোঙথাংশিংদা মসিগী ৱাখল্লোন অসি মরু ওইনা লৌখি। শঙ্গাখিবা অমসুং উরেপ-উয়ুং তমখিবা হায়ৱে প্রোজেক্ত ১৩ অসিনা বিহার অমসুং ৱেস্ত বেঙ্গল লোয়ননা লৈবাক্কী লেমহৌরিবা শরুকশিংগা ঝারখন্দগী মরক্তা কন্নেক্তিবিতী মপাঙ্গল কনখৎহল্লগনি। মির্জাচৌকীদগী ফরক্কা ফাওবগী লেন মরিগী হায়ৱে অসিনা অপুনবা সন্থাল পরগনাদা মতমগা চুনবা খুদোংচাবশিং ফংহল্লগনি। রাঞ্চি-জমশেদপুর হায়ৱে অসিনা হৌজিক রাজধানি অমসুং ইন্দস্ত্রিএল সহরশংগী মরক্তা চত্থোক-চৎশিনগী মতম অমসুং শেল অনিমক হন্থহল্লগনু। পলমা গুমলা সেক্সনদগী ছত্তিসগর চৎপা অসি লায়হল্লগনি, পারাদীপ পোর্ত্তগী ঝারখন্দদা পেত্রোলিয়ম প্রদক্তশিং পুরকপদসু লায়হল্লগনি অমসুং হোংহল্লগনি। ঙসি পাকথোক-চাউথোকইবা রেল নেৎৱর্ক অসুইনা লমদম অসিদা অনৌবা ত্রেনশিং চেলহল্লগনি অমসুং রেল ত্রান্সপোর্ত খোঙজেল য়াংহল্লগনি। ফেসিলিতী পুম্নমক অসিনা ঝারখন্দগী ইন্দস্ত্রিএল চাউখৎহনবদা অফবা মওংদা শাফু পীরগনি।

মরুপশিং,

চহি মরিগী মমাংদা ঐহাক্না দেওঘরদা উরেপ-উয়ুং তম্বগী খুদোংচাবা ফংজখি। কোরোনাগী শীংনবশিং লৈজরবসু থবক চত্থখি অমসুং ঙসি ঝারখন্দনা অনিশুবা এয়রপোর্ত ফংবা ঙম্লে। দেওঘর এয়রপোর্তনা চহি অমদা পেসেঞ্জর লাখ মঙা হেন্না হেন্দল তৌবা ঙমগনি। মসিনা বাবাগী সর্শন তৌবা লাকপা মীয়ামদসু খুদোংচাহল্লগনি।

মরুপশিং,

হৌজিক্তা জ্যোতিরাদিত্যনা হায়বীখ্রে মদুদি হৱায় চপ্পল তোংবা অমনসু এয়র ত্রেবেল তৌবা ঙম্লে, মসিগী ৱাখল্লোন অসিগা লোয়ননা সরকারনা উরান স্কিম হৌদোকখি। ঙসি সরকারগী খোঙথাংশিংগী কান্নবশিং লৈবাক শিনবা থুংবদা উবা ফংলে। উরান স্কিমগী মখাদা হৌখিবা চহি ৫-৬ অসিদা এয়রপোর্তশিং, হেলীপোর্তশিং অমসুং ৱাতর এরোদ্রোমশিংগী খুত্থাংদা অনৌবা লোকেসন ৭০রোম হাপচিনখ্রে। ঙসি মীচম প্রজাশিংনা অনৌবা রুত ৪০০ হেনবদা এয়র ত্রেবেল তৌবগী খুদোংচাবা ফংলি। মীওই করোর ১ হেনবনা য়াম্না হোংনা এয়র ত্রেবেল তৌবা ফংলে, মখোয়গী মরক্তা অহানবা ওইনা চৎপা কয়াসু য়াওরি। মতম অমদা চত্থোক-চৎশিন তৌনবা বস অমসুং রেল তোংদুনা চৎলম্বা ঐখোয়গী লায়রবা অমসুং মিদল ক্লাসকী ইচিল-ইনাওশিংনা হৌজিক্তি প্লেন তোংলে। ঙসি দেওঘরদগী কোলকাতা ফাওবা ফ্লাইৎ পাইবা হৌখিবা অসিদা নুংঙাইবা ফোঙদোক্লদুনা রাঞ্চি, দিল্লী, পতনাদসু অথুবদা পাইবা হৌরগনি। বোকারো অমসুং দুমকা এয়রপোর্তশিংগী থবক পাইখৎপা হৌখ্রে।

মরুপশিং,

কন্নেক্তিবিতীগা লোয়ননা কেন্দ্র সরকারনা লৈবাক অসিগী লাইনিং-লাইশোন অমসুং স্পিরিচুএলিতীগা মরী লৈনবা মরু ওইবা মফমশিংদা খুদোংচাবশিং লৈহন্নবা মীৎয়েংসু চংলি। প্রসাদ য়োজনাগী মখাদা বাবা বৈধ্যনাথ ধামদা মতমগা চুনবা খুদোংচাবশিং ফংলিবা অসি হেনগৎহনখ্রে। প্রোজেক্তশিংবু হোলিস্তিক এপ্রোচ অমনা লমজিংবা মতমদা খুন্নাইগী তোঙান-তোঙানবা শরুকশিংগীদমক শেন্থোক লৈনবা অনৌবা লমশিং পুথোরকই অমসুং অনৌবা ফেসিলিতীশিংনা অনৌবা খুদোংচাবশিং ফংহল্লি। অসিগুম্বা মতমগা চুনবা খুদোংচাবশসিং অসিনা ত্রাইবেলনা খুন্দাবা মফমগী মরাইবক লেপকনি।

মরুপশিং,

হৌখিবা চহি ৮দা ঝারখন্দনা ফংখিবা খ্বাইদগী চাউবা কান্নবা অসিনা লৈবাক অসিবু গ্যাস বেজ ইকনোমী অমা ওইহনবা মাইকৈদা চংশিল্লিবা খোঙথাংশিং ওইরি। অসিগুম্বা মখলগী ইনফ্রাস্ত্রকচর অসি নোংপোক ভারত্তা লৈবনা মরম ওইদুনা গ্যাস বেজ ইকনোমী অসি ওইথোকলোই হায়না লৌরমখি। অদুবু প্রধান মন্ত্রী উর্জা গঙ্গা য়োজনানা অরিবা মতমগী ফীভম অদুদা অহোংবা পুরক্লি। ঐখোয়না খুদোংচাদবশিংবু খুদোংচাবশিংদা ওন্থোক্তুনা পুৱারী ওইরবা ৱারেপ কয়া লৌরি। জি.এ.আই.এল.গী জগদিশপুর-হলদিয়া-বোকারো ধমরা পাইপলাইনগী বোকারো-অঙ্গুল সেক্সন্না সিতী গ্যাস দিস্ত্রিব্যুসন নেৎৱার্কপু ঝার্খন্দ অমসুং ওরিশাগী জিলা ১১দা শন্দোকহল্লগনি। মসিনা য়ুমশিংদা পাইপশিংদগী হোংনা গ্যাস ফংহনবা খক নত্তনা সি.এন.জি. বেজ ত্রান্সপোর্ত, ইলেক্ত্রিসিতী, ফর্তিলাইজর্স, স্তীল, ফুদ প্রোসেসিং, কোল্দ স্তোরেজ অসিনচিংনা ইন্দস্ত্রী কয়াদা শাহৌ পীরগনি।

মরুপশিং,

ঐখোয়না সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্র ঙাক্না চৎলি। ইনফ্রাস্ত্রকচরদা শেল থাদদুনা চাউখৎ-থৌরাংগী, থবক ফংনবা- ইশানা ইশা থবক পীজনবা অনৌবা লম কয়া পুথোরক্লি। ঐখোয়না চাউখৎ-থৌরাংগী অনীংবা-অপাম্বদা মীৎয়েং থমখি, এস্পিরেস্নেল জিলাশিংদা ফোকস তৌখি। ঐখোয়গী সরকারনা খুদোংচাদে খনবা মফমশিং, উমং-ৱামংশিং, চীংশিংনা কোইশিনবা ত্রাইবেলনা খুন্দাবা মফমশিংদা অখন্নবা মীৎয়েং চংলি। নীংতম্বা ফংলবা মতুং শাংলবা মতমগী মতুংদা মৈ ঙালহনখিবা খুঙ্গং ১৮,০০০ অসিদা অয়াম্বদি মনুং হঞ্জিনবা অমসুং লম্বী-থোং নাতৈ চাদবা মফমশিং ওইখি। অফবা লম্বী লৈতবা মফমশিংগী চাং অসি খুঙ্গং, ত্রাইবেলনা খুন্দাবা মফম, মনুং হঞ্জিনবা মফমশিংনা ৱাংখি। হৌখিবা চহি ৮ অসিদা সরকারনা মিসন মোদতা তোতি ঈশিং ফংহন্নবা, লম্বী শেম্নবা অমসুং গ্যাস কন্নেক্সনশিং পীনবা হোৎন্দুনা লাকখি। ঐখোয়না হান্না খঙলে মদুদি অফবা হকশেলগী খুদোংচাবশিং অসি অচৌবা সহর খক্তদা লৈ। হৌজিক ঐখোয়না ত্রাইবেলনা খুন্দাবা মফমশিংদা এম্সকী মতমগা চুনবা ফেসিলিতীশিং লৈবা উরে। প্রোজেক্তশিং অসিনা ঐখোয়না মীচম প্রজাশিংগী পুন্সি হিংবদা লায়থোকহন্নবা খোঙথাংশিং লৌখৎপা মতমদা লৈবাক্কী লনশিং শেমগৎলি অমসুং লৈবাক্কী চাউখৎ-থৌরাংগীদমক অনৌবা খুদোংচাবশিং থোরকই হায়বগী খুদম ওইরি। মসি অচুম্বা চাউখৎ-থৌরাং অদুনি অমসুং মসিবু খোঙজেল য়াংশিনহন্নবা ঐখোয়না পুন্না হোৎনরসি। অমুক্কা হন্না ঐহাক্না ঝারখন্দগ মীয়ামদা নুংঙাইবা ফোঙদোকচরি। ঐহাক্না পুম্নমক্তা য়াইফ মঙ্গোল পীজরি! হন্না-হন্না থাগৎচরি!

***