লৌউ-শিংউ অমসুং লৌমীশিংগী য়াইফ য়ুম্বালগী কেন্দ্র মন্ত্রী, শ্রী নরেন্দ্র তোমারনা ভারত সরকারনা লৈবাক অসিদা হীরম খুদিংদা অমসুং খল মান্ননা চাউখৎপগী পান্দম ফংবা পাম্মি হায়না ফোংদোকখ্রে। অৱাং নোংপোক লমদমগী মপাঙ্গল হেনগৎলকপা মতমদা, লৈবাক্কী পাঙ্গল হেনগৎলক্কনি অমসুং মসিগী পাঙ্গল অসিগা লোয়ননা লৈবাক অসিনা তুংলমচত্তা চঙশিনগনি হায়বসি প্রধান মন্ত্রী, শ্রী নরেন্দ্র মোদীগী থাজবনি হায়না শ্রী তোমারনা হায়খি।

“হীরম খুদিংদা চাউখৎপা পুরকপগী মতাং লাকপদা অৱাং নোংপোক লমদম্বু নাথৈদুনা চৎপা য়ারোই। মরম অদুনা, সরকারগী স্কিম প্রোগ্রাম, ফন্দিং অমসুং ইন্সতিত্যুসনশিংগী খুত্থাংদা অৱাং নোংপোক লমদম্না কনা অমত্তগী মখা পোলহন্দনা, মশা মথন্তনা লেপ্পা ঙমজদুনা লৈবাক্কী চাউখৎ-থৌরাংদা অচৌবা থৌদাং য়াবা ঙমহন্নবা ঐখোয়না লেপ্তনা হোৎনরি। মসিনা মরম ওইরগা, প্রধান মন্ত্রীনা লমদম অসিদা তোয়না চৎলিবনি অমসুং মহাক্কী কেবিনেতশিংনসু লমদমসিদা চাং নাইনা চত্তুনা মখোয়গী বিভাগকা মরী লৈনবা শিংনবশিংগী অথুবা মতমদা ৱারোইশিন পুরক্নবা কন্না হায়রিবনি। মতম শাংনা মীরাইদুনা লাকখিবশিংগী থবক্তা মেনখৎনবগীদমক্তা মহাক্না লমদমসিগী চাউখৎ-থৌরাংগীদমক্তা চহি খরগী মমাংদা স্কিম কয়া অমা হৌদোকখ্রে”, হায়না ঙসি চুমাওকেদলমাদা পাংথোক্লিবা নোর্থ ইস্ত এগ্রি এক্সপোগী শরুক অমা ওইনা শীন-লাঙবা থৌরমদা মহাক্না হায়খি।

লৈবাক অসিনা থাজবা য়াম্না থম্লিবা প্রধান মন্ত্রী, শ্রী নরেন্দ্র মোদীবু পাম্নবগী মতৌনা মালেমদসু মশক থোক্না হেনগৎলক্লিবসি ঐখোয়গী লাইবক ফবনি অমসুং চাউথোকচনীংঙাইনি হায়না শ্রী তোমারনা হায়খি।

“লৈবাক অমগী লুচিংবনা মতিক লৈবা অমসুং মপাঙ্গল লৈবা অমা ওইবা মতমদা, লৈবাক্কী মীয়াম্না তুংলমচৎকীদমক্তা চঙশিনবসু অরায়বা ওইরকই। লৈবাক মীয়াম্না করিগুম্বা মতিক চানা শেম-শাদুনা লৈরবদি লুচিংবশিংগী মপাঙ্গলসু হেনগৎলি অমসুং লৈবাক্না থেংনরিবা শিংনবা কয়াগী ৱারোইশিন পুরকপা ঙমদুনা ঐখোয়না ঐখোয়গী পান্দম ফংবদা লাইহল্লি”, হায়না মহাক্না হায়খি।

কেন্দ্র সরকারনা মমাংগী চহি ৮গী মনুংদা লৈবাকসিদা লৈরিবা লাইরবা, মান্নদবা মিৎয়েং য়েংবা অমসুং থবক ফংদবগী খুদোংচাবশিং লৈহন্দনবা থম্মোই শেংনা লেপ্তনা হোৎনদুনা লাকখি হায়না শ্রী তোমারনা হায়খি।

 “খুন্নাই অমসুং লৈবাক অসিদা করিগুম্বা খল কায়বগী ফিভম লৈরবদি তুংলমচত্তা খোঙদাবদা ৱানা থোকই। শ্রী মোদীনা ৱাশক লৌরবা তুংদা, লাইরবা অমসুং খল মান্নদবগী ফিভম মুত্থৎনবা মশক থোকপা থবক পাংথোকপা হৌখি। থৌওং অসিগী মনুং চনবা ওইনা, লাইরবশিংগী জন ধন একাউন্ত করোর কয়া অমা হাংদোকখি অমসুং মখোয়না স্কিম কয়াগী খুত্থাংদা কান্নবা কয়া অমা ফংখি। প্রধান মন্ত্রী কিসান সম্মান নিধী স্কিমগী মখাদা কেন্দ্র সরকারনা হৌজিক ফাওবগী ওইনা অপুনবা লৌমী করোর ১১.৫গী মফমদা লুপা করোর লাখ ২ হেন্না পীথোকখ্রে, লৌমী খুদিংনা চহি খুদিংগী লুপা ৬০০০ ফংলিবসি অচম্বা ৱাফমদি নত্তে। কোবিদ লাইচৎ মনুংদসু, মীওই করোর ৮০দা লেম্না রাসন য়েন্থোকখি অমসুং কেন্দ্র সরকারনা অতোপ্পা খুদোংচাবা কয়াসু পীখি”, হায়না মহাক্না হায়খি।

 

শ্রী তোমারনা মখা তারকপদা নাগালেন্দগী দিমাপুরদা লৈবা হনী তেস্তিং লেবোরেতরীদা চৎখি। লেবোরেতরী অসিনা খোই য়োকপশিংদা তেংবাংবগা লোয়ননা প্রোসেসরশিংনা পুথোক্লিবা খোইহীগী চাংয়েং তৌবদসু মতেং পাংগনি। মহাক্না বেম্বু ম্যুজিয়ম অমসুং ওর্গানিক মার্কেত্তসু চৎখি। থৌরমশিং অসিদা নাগালেন্দগী লৌউ-শিংউ মন্ত্রী, শ্রী জি. কাইতো; চীফ সেক্রেতরী, শ্রী জে. আলম; সেন্ত্রেল হোর্তিকলচর কম্মিস্নর, শ্রী প্রভাত কুমার, অতোপ্পা সেনিয়র ওফিসর, শক্নাইরবা মীওই, লৌমী অমসুং সাইতিস্তশিংনা শরুক য়াখি।

 

*****

(Release ID: 1837408) Visitor Counter : 121