প্রধান মন্ত্রী, শ্রী নরেন্দ্র মোদীনা ঙসি নই দিল্লীদা ‘বানিজ্য ভবন’ শঙ্গাবগা লোয়ননা নিরয়াত পোর্তেলসু হৌদোকখ্রে। কেন্দ্র মন্ত্রী, শ্রী পিয়ুশ গোয়ল, শ্রী সোম প্রকাশ অমসুং শ্রীমতি অনুপ্রিয়া পতেলসু অতোপ্পা মীওইশিংগা লোয়ননা থৌরম অসিদা শরুক য়াখি।

প্রধান মন্ত্রীনা থৌরমসিদা তিল্লিবা মীয়ামদা ৱা ঙাঙবদা মমাংগী চহি ৮দগী চত্থদুনা লাক্লবা অনৌবা ভারতকী মীয়ামদা মিৎয়েং চঙবা লৈঙাকপগী খোঙচত্তা মরূ ওইবা অতোপ্পা খোঙথাং অমা ঙসি পায়খৎলে হায়না ফোংদোকখি। লৈবাক অসিনা অনৌবা অমসুং মতমগা চুনবা কম্মর্সিএল বিলদিংগা লোয়ননা এক্সপোর্ত পোর্তেল, ফিজিকেল ইনফ্রাস্ত্রকচর অমা অমসুং অতোপ্পা দিজিতেল ইনফ্রাস্ত্রকচর কয়াগী খুদোল অমা ফংলে হায়না মহাক্না ফোংদোকখি।

প্রধান মন্ত্রীনা ইকুই কুইদ্রিবা মতমশিংগী খুদম পীরদুনা অনৌবা ভারতকী থবক পাংথোকপগী অনৌবা চৎনবীদা থবক লোইশিনবগী তারিখনা এস.ও.পি.গী শরুক অমা ওইরে অমসুং মসিবু অহকপা মওংদা ইন্নরি হায়না পাউদমখি। সরকারগী প্রোজেক্তশিংনা চহি কয়া পন্দুনা লৈতনা মতম চানা লোইশিল্লকপা মতমদা সরকারগী স্কিমশিংনা মখোয়গী পান্দম ফংগনি, মসিগী মতমসিখক্তদা লৈবাক্কী তেক্সপেয়রশিংবু ইকায় খুম্নবা হৌরক্কনি হায়না মহাক্না ফোংদোকখি। ঐখোয়না পি.এম. গতিশক্তি নেস্নেল মাস্তর প্লানগী মওংদা অনৌবা মতমগা চুনবা প্লেতফোর্ম অমা ঙসিদি লৈরে। মসিগী বানিজ্য ভবন্না লৈবাক্কী ‘গতি শক্তি’দা শাফু পীগনি হায়না মহাক্না ফোংদোকখি।

মমাংগী চহিদা, মালেমগী ওইবা পুৱারী ওইরবা অয়েৎপা কয়া লৈখ্রবসু, ভারতকী অপুনবা এক্সপোর্তনা বিলিয়ন দোল্লর ৬৭০, হায়বদি, লুপা করোর লাখ ৫০ য়ৌখি হায়না প্রধান মন্ত্রীনা ফোংদোকখি। লৈবাক অসিনা মমাংগী চহিদা, শিংনবা কয়া থেংনরবসু, বিলিয়ন দোল্লর ৪০০, হায়বদি লুপা করোর লাখ ৩০গী পোত্থোক এক্সপোর্ত তৌবগী থ্রেসহোল্দ শোইদনা লানগনি হায়বা ৱারেপ লৌখিবনি। ঐখোয়না মসিবু ৱাংমা লানখি অমসুং বিলিয়ন দোল্লর ৪১৮, হায়বদি, লুপা করোর লাখ ৩১গী এক্সপোর্ত তৌবগী অনৌবা রেকোর্দ থমখি। “মমাংগী চহিশিংগী মায় পাকপশিংনা পুক্নিং থৌগত্তুনা, হৌজিক্তি ঐখোয়না ঐখোয়গী এক্সপোর্তকী পান্দম হেনগৎলে অমসুং মদুবু ফংনবা হোৎনবগী চাংসু শরুক অনি হেনগৎলে। মসিগুম্বা অনৌবা পান্দমশিং ফংনবগীদমক্তা মীয়াম পুম্নমক্না হোৎনমিন্নবগী তঙাই ফদবা লৈ”, হায়না মহাক্না অতেনবা মতমগী পান্দম খক্তা নত্তনা অশাংবা মতমগী পান্দমসু থমগদবনি হায়না মখা তানা ফোংদোকখি।

প্রধান মন্ত্রীনা বানিজ্য ভবনবু মহাক্কী সরকারনা মতমসিগী মনুংদা কম্মর্সকী লমদা মায় পাকপগী খুদম অমনি হায়না ফোংদোকখি। মসিগী উরেপ উয়ুং তমখিবগী মতমদা মহাক্না ইন্নোভেসন পাংথোকপা অমসুং গ্লোবেল ইন্নোভেসন ইন্দেক্সতা ফগৎপগী তঙাই ফদবা লৈ হায়না ফোংদোকখিববু মহাক্না ঙসি অমুক্কা হন্না নীংশিংখি। ঙসিদি, ভারত অসি গ্লোবেল ইন্নোভেসন ইন্দেক্সতা ৪৬শুবা থাক্তা লৈরে অমসুং লেপ্পা লৈতনা ফগৎলি। মহাক্না মতমদুদা কারবার তৌবদা হেন্না লাইথোকহনবগী মতাংদসু ৱাফম থমখিবনি, অদুগা ঙসিদি, কান্নদবা কমপ্লাইএন্স ৩২০০০ হেনববু লৌথোকখ্রে। মান্নবা অমা ওইনা, বিলদিং অসিগী উরেপ উয়ুং তম্বা মতমদা জি.এস.তি. অসি য়াম্না নৌরি, অদুবু, থা অমদা লুপা করোর লাখ ১গী জি.এস.তি. খোমগৎপা হায়বসিদি মফম খুদিংদা পাংথোক্নরে। জি.ই.এম.গী মতাংদা পল্লগসু, লুপা করোর লিশিং ৯গী ওরদরসু মতমদুদা অদুমক পাংথোক্লম্মি, অদুগা হৌজিক, পোর্তেল অসিদা স্মোল ওন্তোপ্রিনর লাখ ৪৫ হেনবনা রেজিস্তর তৌরে অমসুং লুপা করোর ২.২৫ হেনবগী ওর্দর পীরকখ্রে। ইং ২০১৪দা মোবাইল য়ুনিত ২খক লৈরম্বদগী মতমদুদা মোবাইল য়ুনিত ১২০ য়ৌখিবগী মতাংদসু প্রধান মন্ত্রীনা ৱাফম থমখিবনি। মসিগী মশিংনা হৌজিক্তি ২০০ হেনখ্রে। ঙসিদি, ভারত্তা চহি ৪গী মমাংদা লৈরম্বা রেজিস্তর তৌরবা ফিন্তেক মশিং ৫০০দগী য়াম্না হেনগত্তুনা ২৩০০ লৈরে। বানিজ্য ভবনগী উরেপ উয়ুং তমখিবা মতমদা ভারতা স্তার্তঅপ ৮০০০ চহি খুদিংগী শকখঙলম্মি, অদুবু ঙসিদি, মসিগী মশিংনা ১৫০০০ হেল্লে হায়না প্রধান মন্ত্রীনা ফোংদোকখি।

লৈবাক অমনা দিভেলপিংদগী দিভেলপ ওইবগী থাক্তা লাকপদা এক্সপোর্তনা লৌবা মরু ওইবা থৌদাংশিংদা প্রধান মন্ত্রীনা মিৎয়েং চঙখি। মমাংগী চহি ৮দা, ভারতনা মশাগী এক্সপোর্ত লেপ্তনা হেনগৎহনবগা লোয়ননা এক্সপোর্তকী পান্দম কয়া ফংদুনা লাক্লি হায়না প্রধান মন্ত্রীনা ফোংদোকখি। এক্সপোর্ত হেনগৎহন্নবা হান্নদগী হেন্না ফবা থৌশিল থৌরাং, কাঙলোনশিং লাইথোকহনবা অমসুং পোত্থোকশিংবু অনৌবা কৈথেলদা পুবগী থৌওংনা মতেং চাউনা পাংখি। মন্ত্রালয়, বিভাগ খুদিংনা ‘হোল ওফ গভর্নমেন্ত এপ্রোচ’কা লোয়ননা এক্সপোর্ত হেনগৎহনবদা ঙসি খ্বাইদগী অহানবা মিৎয়েং চঙলি হায়না মহাক্না হায়খি। এম.এস.এম.ই. মন্ত্রালয় নত্ত্রগা এক্সতর্নেল এফিয়র্স, এগ্রিকলচর নত্ত্রগা কম্মর্স মন্ত্রালয় ওইরো, পুম্নমক্না মান্নবা পান্দম অমগীদমক্তা মান্ননা হোৎনরি। “অনৌবা লমদগী এক্সপোর্ত তৌবসু হেনগৎলক্লি। এস্পিরেস্নেল জিলাশিংদগীসু হৌজিক এক্সপোর্ত য়াম্না হেনগৎলক্লি। লশিং অমসুং হেন্দলুমগী পোত্থোক্কী এক্সপোর্ত্তা ৫৫%গী চাংদা হেনগৎলক্লিবা অসিনা গ্রাসরুত লেভেলদা করম্না থবক পায়খৎলি হায়বা তাক্লি”, হায়না মহাক্না অখন্ননা তমখি।

প্রধান মন্ত্রীনা নিরয়াত- নেস্নেল ইম্পোর্ত-এক্সপোর্ত ফোর য়র্লী এনালাইসীস ওফ ত্রেদ পোর্তেলনা স্তেকহোলদরশিংগী রিএল তাইম দেতা পীদুনা সাইলোশিংবু লৌথোকপদা তেংবাংগনি হায়না ফোংদোকখি। “মালেমগী লৈবাক ২০০ হেনবদা এক্সপোর্ত তৌরিবা কম্মোদিতী গ্রুপ ৩০ হেনবগা মরী লৈনবা মরু ওইবা ই-পাউশিং পোর্তেল অসিদগী লৌবা য়াগনি। জিলাশিংগী এক্সপোর্ত তৌবগী ই-পাউশিংসু পোর্তেল অসিদগী মতুং তারকপা মতমশিংদা লৌবা য়ারগনি। মসিনা জিলাশিংবু এক্সপোর্ত তৌবগী মরু ওইবা সেন্তর ওইনা চাউখৎহন্নবা হোৎনরিবা থবকশিংবু হেন্না মপাঙ্গল লৈহনগনি”, হায়না প্রধান মন্ত্রীনা হায়খি।

কম্মর্স অমসুং ইন্দস্ত্রী, কঞ্জ্যুমর এফিয়র্স, ফুদ অমসুং পব্লিক দিস্ত্রিব্যুসন অমসুং তেক্সতাইলগী কেন্দ্র মন্ত্রী, শ্রী পিয়ুশ গোয়লনা ঙসিগী থৌরমদা থমখিবা ৱারোলদা প্রধান মন্ত্রীগী পান্দমদি লৈবাক্কী পথাপশিংদা নুং পান ফাওবগী ফিভম লৈহন্দুনা মতমগা চুনবা ভারত অমা শেম্বনি হায়খি। দি.জি.এস. অমসুং দি. (দাইরেক্তোরেত জেনেরেল ওফ সপ্লাই অমসুং দিস্পোজেল)গুম্বা চপ মান্নবা মফমদা লৈবা মথৌ নীংথিনা পাংথোক্তবা অমসুং মীয়াম্না খুদোংচাবা লৌবদা লুবা ওর্গনাইজেসন অমবু নাকল অমরোমদা লোইশিনখি অমসুং মান্নবা নাকল অমদনা নুং-পান ফাওনা উবা পোত্থোক লৈবগী পথাপ, গবর্নমেন্ত-ই-মার্কেতপ্লেস (জি.ই.এম.) হৌদোকখি। জি.ই.এম.না নুপী ওন্তোপ্রিনর, স্তার্তঅপ, এম.এস.এম.ই. সেক্তর অমসুং অতোপ্পশিংদা প্লেৎফোর্ম পীদুনা পথাপ অসিদা তেংবাংবগী খুদোংচাবা পীবগা লোয়ননা মসিগী মথৌ নীংথিনা পাংথোকপগী মতৌবুসু হেনগৎহল্লি।

মহাক্না মখা তারদুনা, প্রধান মন্ত্রীনা জুন ২২, ২০১৮, ঙসিদগী চপ চানা চহি ৪গী মমাংদা, বানিজ্য ভবনগী উরেপ উয়ুং তমখিবনি হায়না ফোংদোকখি। বিলদিং অসি শাবদা চঙগনি পারম্বা লুপা করোর ২২৬তগী তানা চঙদুনা শাবা লোইশিনখিবনি। মসিদি প্রোজেক্তশিংবু অকক্নবা মতমগী মনুংদা লোইশিনবগী অনৌবা ৱাখল্লোনগী শরুক অমনি হায়না শ্রী গোয়লনা হায়খি। মহাক্না ‘হোল ওফ গবর্নমেন্ত’ এপ্রোচনা বানিজ্য ভবনবু মায় পাক্না লোইশিন্নবগীদমক্তা তোঙানবা বিভাগশিংবু অমত্তা ওইনা পুরকপদা য়াম্না তেংবাংখি হায়না ফোংদোকখি। বানিজ্য ভবনবু মপুং ওইনা দিজিতেল ওইহনগনি অমসুং মসিনা ভারতকী হেনগৎলক্লিবা পাঙ্গলগী খুদম ওইগনি হায়না শ্রী গোয়লনা মখা তানা ফোংদোকখি।

*****