প্রধান মন্ত্রী শ্রী নরেন্দ্র মোদীনা ঙসি নই দিল্লীগী ইন্দিরা গান্ধী স্তেদিয়মদা ৪৪শুবা চেস ওলিম্পিয়দকী ইতিহাসিক ওইরবা তোর্চ রিলে লমথাখ্রে। এফ.আই.দি.ই.গী প্রসিদেন্ত অর্কেদী দ্বোরকোবিচনা প্রধান মন্ত্রীদা মৈরা অদু খুৎশিন্নখি, মহাক্না গ্রান্দমাস্তর বিশ্বানাথন অনন্দদা অমুক খুৎশিন্নখি। মৈরা অসি চেন্নাইগী মনাক্তা লৈবা মহাবলিপুরমদা অরোইবা ওইনা থুংদ্রিঙৈ মমাংদা নুমিৎ ৪০ চংনা সহর ৭৫দা পুদুনা চৎকনি। লমথুংফম খুদিংদা রাজ্য অদুগী চেস গ্রান্দমাস্তরনা মৈ অদু ওক্কনি। প্রধান মন্ত্রী মোদীনা খেলো চেস সেরেমোনিএল মুফ তৌখি মতুংদা মিস কোনেরু হম্পীনা মুফ অমসু তৌখি। কেন্দ্রগী মন্ত্রী শ্রী অনুরাগ সিংহ থাকুর অমসুং শ্রী নিসিথ প্রমানিক, চেসকী শান্নরোয়শিং অমসুং পামজবশিং, এম্বেসেদরশিং, চেস ওফিসিএলশিংনা থৌরম অসিদা শরুক য়াখি।

মীতিন অসিদা ৱারোল পীবদা প্রধান মন্ত্রীনা হায়খি, “ঙসি ভারত্তগী চেস ওলিম্পিয়স গেমসকী অহানবা তোর্চ রিলে হৌদোক্লি। অহানবা ওইনা চহি অসিদা ভারতনা চেস ওলিম্পিয়দ গেমসকী য়ুম্বু ওইরগনি। লমদম অসিদগী  হৌরক্তুনা মালেম শিনবা থুংবদা মফম কল্লিবা, স্পোর্তস অমনা লৈবাক কয়াগী অপাম্বা অমা ওইরকপা অসিদা ঐখোয়না চাউথোকচবা পোকই।” মহাক্না মখা তারদুনা হায়খি “চহিচা কয়াগী মমাংদা ভারত্তগী চতুরঙ্গাগী মওংদা মালেম শিনবা থুংবদা স্পোরতকী তোর্চ পুদুনা চৎখি। ঙসি চেসকী অহানবা ওলিম্পিয়দ তোর্চ অসিসু ভারত্তগী হৌদোক্লি। ঙসি ভারতনা মাগী নীংতম্বা ফংখিবগী ৭৫শুবগী অমৃত মহোৎসব পালন তৌরিবা মতম অসিদা চেস ওলিম্পিয়দ তোর্চ অসিনা লৈবাক্কী সহর ৭৫ থুংনা চৎকনি।” মহাক্না হায়খি “এফ.আই.দি.ই,না চেস ওলিম্পিয়দ গেম খুদিংমক্তা তোর্চ রিলে অসি ভারত্তগী লমথারগনি। মসিগী ইকাই খুম্নবা অসি ভারত খক্তগী ইকাই খুম্নবা নত্তনা চেসকী মতিক-মঙাল লৈরবা হেরিতেজ অসিবুসু ইকাই খুম্নবনি। ঐহাক্না মসিগীদমক এফ.আই.দি.ই. অমসুং মাগী মেম্বর পুম্নমক্তা থাগৎপা ফোঙদোকচরি।”

প্রধান মন্ত্রীনা চেসকী ভারতকী হেরিতেজ অসিগী মতাংদা ফোঙদোকখি। মহাক্না হায়খি, “ঐখোয়গী ইপা-ইপুনা এনালাইতিকেল অমসুং প্রোব্লেম সোলবিং ব্রেনশিংগীদমক চতুরঙ্গা নত্ত্রগা চেস অসিগুম্বা গেমশিং পুথোকখি। ভারতকী খুত্থাংদা চেসনা মালেমগী লৈবাক কয়াদা য়ৌখি অমসুং য়াম্না পাম্নরি। ঙসি চেস অসি স্কুলশিং নহা ওইরিবা মীওইশিং, অঙাংশিংগীদমক এজুকেসন তুল অমা ওইনা শীজিন্নরি।” মহাক্না চহি খরা অসিদা ভারতনা চেসতা মাগী পর্ফোরমেন্স অসি লেপ্পা লৈতনা হেনগৎহল্লি হায়না ফোঙদোকখি। চহি অসিদা ভারতকী চেস ওলিম্পিয়দকী কনতিঞ্জেন্তনা খ্বাইদগী চাউবা ওইখি। প্রধান মন্ত্রীনা ভারতনা চহি অসিদা মেদলশিংগী অনৌবা রেকোর্দ অমা থম্বা ঙমগনি হায়না থাজবা থমখি।

প্রধান মন্ত্রীগী মপুং ফাবা প্রেস রিলিজকীদমক লিঙ্ক অসিদা নম্বীয়ু

https://www.pib.gov.in/PressReleaseIframePage.aspx?PRID=1835336

মহাক্কী তরাম্না ওকপগী ৱারোলদা য়ুথ এফিয়র্স অমসুং স্পোর্তস মন্ত্রী শ্রী অনুরাগ সিংহ থাকুরনা ভারত্তা লৈরিবা চেসকী মমল য়াম্লবা পুৱারীগী মতাংদা ফোঙদোকখি। “চেস ওলিম্পিয়দ অসি অহানবা ওইনা ভারত্তা পাঙথোকপা অমসুং হৌদোকপগী চেস ওলিম্পিয়দ তোর্চ রিলে অসিনা লৈবাক ১৮৮ অমসুং শান্নরোয় ২০০০ য়াওবা মেগা ইভেন্ত অসি হৌদোকপা হায়বা অসি চাউথোকচনীংঙাই ওইবা ৱাফম অমনি”, হায়না মহাক্না ফোঙদোকখি।

“ভারতকী স্পোর্তসনা প্রধান মন্ত্রী শ্রী নরেন্দ্র মোদীগী লুচিং মখাদা খোঙথাং কয়া পাইখৎখি। মহাক্না স্পোর্তসকী বজেৎ চাউনা হেনগৎহনবা অমসুং খেলো ইন্দিয়া অমসুং ফিৎ ইন্দিয়া মুফমেন্ত হৌদোকপা খক্তা নত্তনা মমিং লৈরবা শান্নরোয়শিংবু নীংথিংনা সপ্পোর্ত তৌনবা অমসুং ফজবা পর্ফোরমেন্স পীবা ঙম্নবা মীৎয়েং চংনবা হোৎনখি,” হায়না মহাক্না ফোঙদোকখি।

এফ.আই.দি.ই. অর্কেদী দ্বোরকোবিচনা মালেম শিনবা থুংবদা গেম অসিবু খঙনহনগদৌরিবা অমসুং পাম্নহনগদৌরিবা তোর্চ রিলেগী অনৌবা চৎনবী অমা হৌদোক্নবগী থৌশিল পাইখৎখিবগীদমক ভারত সরকারবু থাগৎপা ফোঙদোকখি। “প্রধান মন্ত্রী নরেন্দ্র মোদীনা শরুক য়াবীবা অমসুং ঐখোয়বু ইকাই খুম্নবা উৎপীবগীদমক এফ.আই.দি.ই.না তৌবীমল খঙবা উৎচরি” হায়না মহাক্না ফোঙদোকখি অমসুং প্রধান মন্ত্রীনা ইং কুমজা ২০১০দা শান্নরোয় কয়ানা চেস শান্নখিবা অসিনা চেসকী গেম অসিদা অনৌবা মতিক-ময়াইশিং হাপ্পা অমসুং মাইপাক্নবগী লমজিংলিবা এজুকেসন অমসুং স্পোর্তসকী অপুনবগী থৌদাং অসিগী মতাংদা পীখিবা ৱারোল অদু নীংশিংখি।   এফ.আই.দি.ই.গী প্রসিদেন্তনা চেস অসি ভারত অমসুং মালেম শিনবা থুংবদা লৈরিবা স্কুল পুম্নমক্কী শরুক অমা ওইরক্কনি হায়না থাজবা থমখি। মহাক্না হায়খি, “ভারত অসি ঙসি মালেমগী ওইনা চেস খোঙজেল য়াংনা চাউখৎলক্লিবা লৈবাক অমা ওইরক্লি অমসুং মসিগীদমক নখোয়না চাউথোকচবা পোকফম থোকই। চেসকীদমক নখোয়না শীংথানীংঙাই ওইবা থবক পুম্নমক পাঙথোকপদা লমজিংলিবা অসিদা ঐখোয়না তৌবীমল খঙবা উৎচরি।”

নুমিৎ ৪০নিগী তোর্চ রিলে অসিদা ভারতকী চেস কম্ম্যুনিতীগী মমিং লৈরবা মীওই খরনা মৈরা পুবা উবা ফংগনি। তোর্চ রিলে অসি স্বিৎজর্লেন্দগী এফ.আই.দি.ই. হেদক্বাতর্সতা পুদ্রিঙৈ মমাংদা মহাবলিপুরমদা থুংগনি।

তোর্চ রিলে অসিগী মথক্তা সহর অমদগী সহর অমদা চৎপা ইন্তরেক্তিব বস তুর, রিজন অমদগী রিজম অমদা কলচরেল পরেদশিং পাঙথোক্কনি মসিদা নহা ওইরিবা চেস শান্নরোয়শিংগী কম্ম্যুনিতী উবা ফংবগনি হায়রিবশিং অসি য়াওনা কলচরেল ইভেন্তশিং পাঙথোক্নবা শেম-শারি।

ইং কুমজা ১৯৫৬তা মোস্কোদা দিব্যুৎ তৌখিবা ভারতনা (২৭শুবা পোজিসন) চেস ওলিম্পিয়দতগী গোল্দ মেদল অমা (ইং কুমজা ২০২০দা রসিয়াগা লোয়ননা জোইন্ত ৱিন্নরশিং ওইখিবা) অমসুং ব্রোঞ্জ মেদল অনি (ইং কুমজা ২০২১, ২০১৪) লৌখি। ইং কুমজা ২০২০ অমসুং ২০২১ ইদিসনশিং অসি কোবিদ১৯ লাইচৎনা মরম ওইদুনা ভর্চুএল ওইনা পাঙথোকখি, ২০২২ ইদিসন অসিনা জোর্জিয়াদা ইং কুমজা ২০১৮দা পাঙথোকখিবা চেস ওলিম্পিয়কী মতুংদা অহানবা ওইনা ওভর-দি-বোর্দতা পাঙথোকপা ওইরগনি।

ভারতনা অহানবা ওইনা মমিং লৈরবা চেস ওলিম্পিয়দকী য়ুম্বু ওইরগনি অমসুং এসিয়ানা চহি ৩০গী মতুংদা ইভেন্ত অসিগী য়ুম্বু ওইবা ফংলগনি। ফিলিপিন্সনা ইং কুমজা ১৯৯২দা এসিয়াগী ওইনা য়ুম্বু ওইখি। য়ুম্বু ওইনা ভারতনা শান্নরোয় ২০ – মাগী খ্বাইদগী চাউবা কন্তিঞ্জেন্ত – অসি ৪৪শুবা এফ.আই.দি.ই,. চেস ওলিম্পিয়দতা পুথোক্কনি। ভারতনা ফিল্দ তীম অনি ওপন অমসুং ৱুমরন কেতগোরীদা থাদোক্কনি। পার্তিসিপেন্ত ২০০০ হেনবনা লৈবাক ১৮৮কী মহুৎশিনগনি।

৪৪শুবা চেস ওলিম্পিয়দ অসি জুলাই ২৮দগী ওগস্ত ১০, ২০২২ ফাওবা চেন্নাইদা পাঙথোক্কনি।

*******