কেন্দ্রগী পোর্তস, শিপিং অমসুং ৱাতরৱেজ অমসুং আয়ুশকী মন্ত্রী, শ্রী সর্বানন্দা সোনোৱালনা অরুনাচল প্রদেশ অমসুং অৱাং নোংপোক্কী মীওইবশিংদা মরা চেৎপা অমসুং নুংঙাই-য়াইফবা ভারত অমা শেমগৎপদা শরুক য়ানবা হায়খ্রে। অৱাং নোংপোক্কী লমশিংগী চাউখৎ-থৌরাংগীদমক্তা নরেন্দ্র মোদী সরকারনা উৎলিবা লেংদ্রবা অসমুং অচেৎপা ফিরেপ অসিনা মরম ওইরগা  লমদম অসিদা শান্তি অমসুং শেনমিৎলোনগী লম্বিসু হেনগৎহল্লে হায়না মহাক্না হায়খি। অৱাং নোপোক্কী চাওখৎপগী লম্বিদা অরুনাচল প্রদেসনা মরু ওইবা থৌদাং লৌরি। মন্ত্রী অসিনা ঙসি ইতানগরদা রিজনেল আয়ুরৱেদা রিসর্চ ইন্সতিত্যুত (আর.এ.আর.আই.) চৎলুরবা মতুংদা প্রেস কনফরেন্স অমদা ৱা ঙাংখি।

চহি ২০১৪দা ফম পায়বদগী মোদী সরকারনা পাংথোকপা থবকশিংগী মরমদা হায়বদা, শ্রী সোনোৱালনা ‘সবকা ৱিকাস সবকা প্রয়াস’ হায়রিবা মন্ত্র অসি ভারত অমসুং ভারতকী প্রজা মীয়াম্বু চাউখৎহন্নবগীদমক‌তা শ্রী নরেন্দ্র মোদীনা পীবা মন্ত্রনি হায়না হায়খি। মন্ত্র অসিগা লোইননা, সরকার অসিনা প্রজা খুদিংমক্কী পুন্সিবু লায়হনবা হায়বসি খ্বাইদগী মরু ওইবা অমা ওইনা লৌদুনা থবক পাংথোক্লি। অরুনাচল প্রদেশতা খুঙ্গংগী য়ুম লাখ ২.২০শিংদা জল জিৱন মিশনগী মনুং চন্না ঈশিংগী কনেক্সন পীখ্রে হায়না মহাক্না হায়খি। অরুনাচল প্রদেশতা, প্রধান মন্ত্রী আৱাস য়োজনানা য়ুম ৩৪,৫০০ শাদুনা রাজ্য অসিগী মীওইশিংদা মশাগী য়ুমনি হায়বা য়াবা য়ুম পীখ্রে হায়না মহাক্না হায়খি। মহাক্না উজজ্বালা য়োজনাগী মনুং চন্না মথৌ তাবা মীওই ৪৮০০০ দগীসু হেন্না এল.পি.জি. কনেক্সন পীখ্রে হায়না হায়খি। সরকার অসিনা লৈবাক অসিগী প্রজাশিংগী পুন্সিবু লায়হন্নবা অমসুং নুংঙাইহন্নবা লেপ্তনা হোৎনরি হায়নসু হায়খি।

ভারতকীদমক্তা চাউখৎ-থৌরাংগী অনৌবা অনৌবা ইঞ্জিন অমা ওইনা অৱাং নোংপোক্কী লমশিংনা লৌরিবা থৌদাং অদু পল্লদুনা  হৌখিবা চহি ৮ অসিদা অৱাং নোংপোক্কী মনুংগী কনেক্তিভিতি অসি য়াম্না ফগৎলে হায়না মহাক্না হায়খি। অৱাং নোংপোক্কী রাজ্যশিংগী মরক্তা অমসুং রাজ্যগী মনুংদা কনেক্তিভিতি হেনগৎহনবা অসিনা লোজিস্তিক্স অমসুং ত্রান্সপোর্তকী কনেক্তিভিতি হেনগৎহল্লে হায়নসু হায়খি। মেদ-ইন-ইন্দিয়া দোর্নিয়র প্লেন শিজিন্নদুনা অসাম অমসুং অরুনাচল প্রদেশকী মরক্তা অহানবা কমরসিএল ফ্লাইত হৌগৎপা হায়বসে মফম অসিগী চাওখৎপগী লম্বিদা অচৌবা খোংথাং অমনি হায়না মহাক্না হায়খি। ফ্লাইত অসিনা দিব্রুগর- পাসিঘাত অমসুং তেজু-লিলাবারি সেক্তরবু শম্নহল্লি হায়না মহাক্না হায়খি। অচৌ-অচৌবা ইন্ফ্রাস্ত্রকচর প্রোজেক্তশিং মীং ওইনা পল্লবদা শাংলবা মতম কয়া পন্দুনা লৈরক্লবা ব্রহ্মপুত্রগী মথক্তা শাবা বোগিবিল থোং অমসুং ধোলা সাদিয়া থোং অদুবু সাবা লোইশিনবা; ইম্ফাল-জিরিবাম লম্বিদা হৌজিক-হৌজিক শারিবা মালেমগী খ্বাইদগী ৱাংবা গির্দর রেল থোং; অরুনাচল প্রদেশ অমসুং অৱাং নোংপোক্কী মনুংদা শাখিবা য়াম্না শাংলবা লম্বি নত্রগা লম অসিগী ইকোনোমিক অমসুং বিজনেস পোতেন্সিয়েলবু হেনগৎহল্লিবা ৱাতরৱেজ ত্রান্সপোর্তপু অমুক হন্না হিংগৎহনবা অসি মফম অসিগী মীশিংনা মতম কুয়াদগী খনজরকপা কনেক্তিভিতীগী লমদা অচৌবা অহোংবা অমনি হায়না মহাক্না মখা তারকখি।  

কেন্দ্রগী মন্ত্রী অসিনা ইতানগরগী ওফিসিয়েল অমসুং প্রজাশিংগা লোইননা আর.এ.আর.আই.গী প্রিমিসেসতা পাংথোকখিবা স্বচ্ছতাগী থৌরমদসু শরুক য়াখি।

*****