12ویں برکس وزرائے زراعت کی میٹنگ ورچول طور پر کل شام منعقد ہوئی۔ اجلاس میں چین، جنوبی افریقہ، برازیل، روس اور بھارت کے وزرائے زراعت نے شرکت کی۔

زراعت اور کسانوں کی بہبود کی مرکزی وزیر مملکت محترمہ شوبھا کرندلاجے نے میٹنگ میں شرکت کی۔ وزیر موصوفہ نے زراعت کے میدان میں اور کسانوں کی فلاح و بہبود کے لئے، حکومت ہند کی طرف سے کئے گئے مختلف اقدامات اور پہل پر روشنی ڈالی جن میں پی ایم کسان، پی ایم فصل بیما یوجنا، سوائل ہیلتھ کارڈز، قدرتی کاشتکاری، ایف پی او کی تشکیل اور فروغ وغیرہ شامل ہیں۔

وزیر نے زراعت میں ڈیجیٹل ٹکنالوجی کے استعمال کو بڑھانے کے لئے زراعت کی وزارت کی طرف سے اٹھائے گئے حالیہ اقدامات کا ذکر کیا جیسے ایگری اسٹیک اور انڈیا ڈیجیٹل ایکو سسٹم فار ایگریکلچر (آئیڈیا)۔

محترمہ شوبھا کرندلاجے نے بھوک کو ختم کرنے اور قدرتی وسائل کے پائیدار استعمال کے ذریعے، زراعت کی پیداوار اور پیداواری صلاحیت کو بڑھانے کے پائیدار ترقی کے اہداف کو پورا کرنے کے ہندوستان کے عزم کا اعادہ کیا۔

وزیر موصوفہ نے غذائی اناج اور فصلوں کی بائیو فورٹیفائیڈ اقسام کی ترقی پر توجہ مرکوز کرتے ہوئے، خوراک اور غذائیت کے قومی مشن پر روشنی ڈالی اور خوراک اور غذائی تحفظ اور موسمیاتی لچک میں باجرے کی اہمیت کو بھی اجاگر کیا۔ انہوں نے برکس ممالک کی طرف سے جوار کے بین الاقوامی سال 2023 کی حمایت اور جشن منانے پر زور دیا۔

برکس کے وزرائے زراعت نے بارہویں میٹنگ کا ایک مشترکہ اعلامیہ اپنایا جس کا موضوع تھا’’مربوط زرعی اور دیہی ترقی کے لیے برکس تعاون کو مستحکم بنانا‘‘۔ علاوہ از ایں برکس کے رکن ممالک کے درمیان فوڈ سیکیورٹی تعاون پر برکس کی حکمت عملی بھی اپنائی گئی۔

*****

U.No.6308

(ش ح - اع - ر ا)