প্রধান মন্ত্রী, শ্রী নরেন্দ্র মোদীনা ফাইনান্স অমসুং কোর্পোরেত এফিয়র্স মন্ত্রালয়গী আইকোনিক ৱিক সেলেব্রেসন ঙসি মফমসিদা হৌদোকখ্রে। চয়োল অসি ইং ২০২২গী জুন ৬তগী হৌদুনা ১১ ফাওবা ‘নীংতম্বগী অমৃত মহোৎসব’ (এ.কে.এ.এম.)গী শরুক অমা ওইনা ফাইনান্স অমসুং কোর্পোরেত এফিয়র্স মন্ত্রালয়না নুংঙাইবা ফোংদোকপা ওইনা পাংথোকপনি। ফাইনান্স অমসুং কোর্পোরেত এফিয়র্সকী কেন্দ্র মন্ত্রী, শ্রীমতি নির্মলা সিতারামন, কোর্পোরেত এফিয়র্সকী কেন্দ্রগী রাজ্য মন্ত্রী, শ্রী রাও ইন্দর্জিত সিংহ, ফাইনান্সকী কেন্দ্রগী রাজ্য মন্ত্রী, শ্রী পঙ্কজ চৌধুরী অমসুং ফাইনান্সকী কেন্দ্রগী রাজ্য মন্ত্রী, দাঃ ভাগ্বত কিসনরাও কারাদসু ঙসিগী হৌদোকপগী থৌরমদা শরুক য়াখি।

প্রধান মন্ত্রীনা ক্রেদিত লিঙ্ক গভর্নমেন্ত স্কিমগী নেস্নেল পোর্তেল – জন সামর্থ পোর্তেলসু লোঞ্চ তৌখি।

প্রধান মন্ত্রীনা মন্ত্রালয় অনি অসিগী মমাংগী চহি ৮গী খোঙচৎ তাকপা দিজিতেল এগজিবিসন অমসু শঙ্গাখি।

প্রধান মন্ত্রীনা ₹১, ₹২, ₹৫, ₹১০ অমসুং ₹২০গী শেনয়েক্কী অখন্নবা পরিং অমসু পুথোকখি। মসিগী অখন্নবা পরিংগী শেনয়েক অসিনা এ.কে.এ.এম.গী লোগো য়াওগনি অমসুং মিৎ নীংথিনা উদবা মীওইশিংনা অরায়বা মওংদা মশক খঙবসু ঙমগনি।

প্রধান মন্ত্রীনা তিল্লিবা মীয়ামদা ৱা ঙাঙবদা নীংতম্বগী শাংলবা ইহৌসিদা শরুক য়াখিবা, ইহৌ অসিদা তোঙানবা মাইকৈ হাপখিবশিংনা মসিগী শক্তি হেনগৎহনখি হায়খি। মীওই খরনা সত্যগ্রহগী লম্বীদা চৎখি, খরনা খুৎলায় পায়বা, লাইনীং-ধর্মা অমসুং স্পিরিচুএলিতীদা চঙখি অমসুং খরা অমনা নীংতম্বগী ইহৌগী মৈরীনা ঙান্না চাক্তুনা লৈহন্নবা লাইরিক লাইশুগী লমদা চঙনখি। ঙসি অসি পুম্নমক অসিবু শকখঙবগী নুমিৎনি।

ঙসি ঐখোয়না নীংতম্বগী চহি ৭৫ মপুং ফাবগী নুংঙাইবা ফোংদোক্লিবা অসিদা লৈবাক মীয়াম খুদিংগী মথৌদাংনা লৈবাক চাউখৎপদা মশাগী ওইবা থাক্তা করিগুম্বা অঙম্বা খরা অখন্ননা তেংবাংগদবনি হায়না প্রধান মন্ত্রীনা য়াম্না মরু ওইনা ফোংদোকখি। হৌজিক্কী মতমসিদি ঐখোয়গী নীংতম লান্মীগী মঙলানশিংদা অনৌবা শক্তি হাপ্পা অমসুং ঐখোয়না মরী লৈনবা অনৌবা ৱারেপ লৌবগী মতম্নি হায়না মহাক্না হায়খি।

ভারতনা মমাংগী চহি ৮ অসিদা তোঙানবা মাইকৈ কয়াদা থবক তৌখি হায়না প্রধান মন্ত্রীনা পনখি। মীয়াম্না শরুক য়াবা হেনগৎলকপনা লৈবাক্কী চাউখৎ-থৌরাং অমসুগ লাইরবশিংদা মপাঙ্গল হাপ্পদা শাফু পীরি। স্বচ্ছ ভারত অভিয়ান্না লাইরবশিংদা মশাবু ইকায় খুম্ননা হিংবগী খুদোংচাবা পীখি হায়না প্রধান মন্ত্রীনা পাউদমখি। পক্কা য়ুম, মৈ, গ্যাস, ঈশিং অমসুং লেম্না লাইয়েংবগী খুদোংচাবশিংনা লাইরবশিংগী মশাবু ইকায় খুম্নজবগী চাং হেনগৎহনখি অমসুং খুদোংচাবা কয়াবু হেন্না ফগৎহনখি। কোরোনাগী মতমদা লেম্না রাসন য়েনবগী স্কিম্না লৈবাক মীয়াম করোর ৮০ হেনববু চরা হেনবগী অৱাবদগী মনীং তমহনখি। “ঐখোয়না লৈবাক মীয়াম্না মীচঙ-মীখাই নাইবগী ৱাখল্লোন্দগী থোক্লক্নবা অমসুং অচৌবা মঙলান মঙনবা মশাদা হেন্না থাজবগী থৌওং উরি”, হায়না মহাক্না মখা তাখি।

মমাংগী মতমদা লৈঙাকপশিংদা অহেনবা মিৎয়েং চঙবা সরকার লৈবগী অৱাবা কয়া লৈবাক অসিনা থেংনখ্রে হায়না প্রধান মন্ত্রীনা হায়খি। অদুবু, ঙসিগী ২১শুবা চহি-চাগী ভারতনা মীয়ামদা মিৎয়েং চঙবা লৈঙাক লৈদুনা তুংলমচত্তা খোঙদারি। স্কিমগী কান্নবা ফংনবগীদমক্তা মীয়াম্না সরকারগী মনাক্তা চৎপগী মথৌ তারম্মি হায়না মহাক্না হায়খি। হৌজিক্কী মতমসিদদি, লৈঙাকপগী থৌওংবু মীয়ামদা ওইনা পুদুনা মখোয়না তোঙানবা মন্ত্রালয় অমসুং ৱেবসাইতশিংদা চঙবগী থবকশিংদগী মখোয়বু মনিং তমহনবদা মিৎয়েং চঙলি। ক্রেদিত লিঙ্ক স্কিমগী লৈবাক্কী পোর্তেল – জন সামর্থ পোর্তেল লোঞ্চ তৌরিবা অসিসু মাইকৈ অসিদা চঙশিনবা খোঙথাং অমনি। পোর্তেল অসিনা মহৈরোই, লৌমী, কারবার তৌবা, এম.এস.এম.ই. ওন্তোপ্রিনরশিংগী পুন্সি হেন্না ফগৎহনগনি অমসুং মখোয়গী মঙলান মঙফাওনবদা তেংবাংগনি হায়না মহাক্না মখা তাখি।

করিগুম্বা রিফোর্ম অমা হেক্তগী পান্দম অমসুং অপাম্বনা ময়েক শেংলবা অমসুং মদুবু থবক ওইনা পাংথোকপদা য়াম্না লুনা খল্লবদি, মদুগী অফবা মহৈ শোইদনা ফংগনি হায়না প্রধান মন্ত্রীনা হায়খি। হৌখিবা চহি ৮দা, লৈবাক্কী রিফোর্ম পাংথোকপা মতমদা লৈবাক অসিগী নহারোলশিংবু খ্বাইদগী ময়োলদা থমদুনা পাংথোকই হায়না ফোংদোকখি। মসিনা মখোয়গী অশেংবা তৌবা ঙম্বগী মতিক উত্থোকপদা তেংবাংগনি। “ঐখোয়গী নহারোলশিংনা মশানা পাম্বা কম্পেনী অমা লাইনা হাংবা ঙম্মি, মখোয়না মশাগী ইন্তর্প্রাইস লাইনা হৌদোকপা ঙম্মি অমসুং মখোয়দু মদুবু য়াম্না লাইনা চলায়বসু ঙম্মি। মরম অদুনা, কমপ্লাইএন্স লিশিং ৩০ হেন্না অমসুং আইন ১৫০০ হেন্না লৌথোক্তুনা অমসুং কম্পেনী এক্তকী প্রোবিজন কয়া অমবু দিক্রিমিনেলাইজ তৌদুনা, ঐখোয়না ভারতকী কম্পেনীশিংবু মাংজিল থানা খোঙদাবা ঙমহনবগা লোয়ননা অনৌবা অৱাংবা থাক্তসু য়ৌহনবা ঙম্লে”, হায়না মহাক্না মখা তাখি।

প্রধান মন্ত্রীনা হায়খিবদা, রিফোর্ম পাংথোকপা মতমদা সরকারনা লাইথোকহনবা হায়বা হীরমদা মিৎয়েং চঙই। জি.এস.তি.না কেন্দ্র অমসুং রাজ্যগী থাক্তা লৈবা তেক্স কয়া মহুৎ শিনখ্রে। লৈবাক অসিনা অসিগুম্বা লাইথোকহনবা থৌওংগী মহৈসু উবা ফংলে। হৌজিক্কী মতমসিদা, জি.এস.তি.না থা খুদিংগী লুপা করোর লাখ ১ খোম্বা হায়বসি য়াম্না লাইনা থোক্লে। জি.ই.এম. পোর্তেলনা সরকারনা পোৎ লৈবা অমসুং সরকারদা পোৎ য়োনবদা য়াম্না হেন্না লাইথোকহল্লে হায়না মহাক্না হায়খি। পোর্তেল অসিদা পোৎ লৈবগী চাংনা লুপা করোর কাখ ১ হেনখ্রে হায়না প্রধান মন্ত্রীনা পাউদমখি। মহাক্না কারবার তৌবদা লাইথোকহনবা পোর্তেল কয়াগী মতাংদসু পাউদমখি। মহাক্না ইনভেস্তমেন্তকী খুদোংচাবগা মরী লৈনবা ইনভেস্ত ইন্দিয়া পোর্তেল অমসুং কারবারগী তৌফম থোকপা থৌওংশিংগী সিঙ্গল ৱিন্দো ক্লিয়ারেন্স পোর্তেলগী মতাংদা ৱা ঙাঙখি। “হায়রিবা পরিং অসিদা জন সামর্থ পোর্তেলনা লৈবাক্কী নহাশিং অমসুং স্তার্ত-অপশিংবু তেংবাংগনি”, হায়না প্রধান মন্ত্রীনা অখন্ননা হায়খি।

“ঐখোয়না ঙসি রিফোর্ম, লাইথোকহনবা অমসুং লাইথোকহনবগী শক্তিগা লোয়ননা খোঙদাবা মতমদা ঐখোয়না নুংঙাইবগী তোঙানবা থাক অমা য়ৌই...ভারতনা করিগুম্বা পুন্না পাংথোকমিন্নগে খনবা মতমদা ভারতনা মালেমগী আশা ওই হায়বসি ঐখোয়না মমাংগী চহি ৮দা উৎখ্রে। ঙসিদি, মালেম্না ঐখোয়বু মতিক লৈবা, অহোংবা পুরকপা ঙম্বা, অনৌবা পুথোকপা অমসুং ইন্নোভেতিব ওইবা ইকোসীস্তেম অমা ওইনা অনৌবা আশা অমসুং থাজবগা লোয়ননা য়েংলি”, হায়না প্রধান মন্ত্রীনা মখা তানা ফোংদোকখি।

মালেমগী চাউরবা শরুক অমনা ভারতনা মখোয়গী শিংনবা কয়াগী ৱারোইশিন পুরক্কনি হায়না খল্লিবনি হায়না প্রধান মন্ত্রীনা হায়খি। ঐখোয়না মমাংগী চহি ৮দা মীচম মীয়ামগী লৌশিংদা থাজবা থম্বদগী হায়রিবসি ওইথোকপা ঙম্লিবনি। “ঐখোয়না মীয়াম্বু চাউখৎপদা শরুক য়াবা হৈ-শিংলবা মীওইনি হায়না পুক্নিং থৌগৎলি। অফবা লৈঙাকপগীদমক্তা তেক্নোলোজী শিজিন্নবা মতমদা, মীয়াম্না মসিবু শিজিন্নবতা নত্তনা থাগৎপসু ফোংদোকই”, হায়না প্রধান মন্ত্রীনা য়ু.পি.আই.গী মায় পাকপগী খুদম পীরদুনা হায়খি।

শেল-থুম মন্ত্রী, শ্রীমতি নির্মলা সিতারামন্না ঙসিগী মীতিন্দা ৱা ঙাঙবদা ঙসিগী আইকোনিক ওইবা থৌরমসিবু হৌদোকপীবগীদমক্তা প্রধান মন্ত্রীবু থাগৎখি। শেল-থুম মন্ত্রালয় অমসুং কোর্পোরেত এফিয়র্স মন্ত্রালয়গী বিভাগ খুদিংনা লৈবাক্কী সেবা করম্না তৌখিবগে হায়বা চয়োল অসিগী মনুংদা ঐখোয়না পুন্না নীংশিংগনি। ইং ১৯৪৭তগী হৌদুনা ভারতকী শেন্মিৎলোন্দা চাউখৎপা পুরকখিবশিংবু তোঙানবা থৌরমগী খুত্থাংদা উৎকনি।

শ্রীমতি সিতারামন্না হায়খি, “ঐখোয়গী মিৎয়েংদি পীপল-তু-পীপল কন্তেক্তনি, মমাংগী চহি ৭৫দা শেল-থুম মন্ত্রালয় অমসুং কোর্পোরেত এফিয়র্স মন্ত্রালয়না করি তৌখিবগে হায়বা মীয়ামদা খঙহনবনি, ঐখোয়গী প্রধান মন্ত্রীগী মখাদা মমাংগী চহি ৮দা করি পাংথোকখিবগে হায়বখক খঙহনগদবা নত্তে। ফাইনেন্সিএল ইনক্লুজনগী ৱারী অসি ঐখোয়না ভিদিও অমদা উৎলি (রুপায়া কা রোহচক সফর) অমসুং মসি ঐখোয়না উৎকনি। অসিগুম্বা ফাইনেন্সিএল ইনক্লুজনগী শাফুনা মীচম মীয়াম্বু ক্রেদিত পথাপ্না য়াম্না চাউনা কোনবা ঙমহনখি”।

শ্রীমতি সিতারামন্না হায়খি, “প্রধান মন্ত্রী মশামক্না মমাংগী চহি ৮দা য়েংশিনখিবা মীচম মীয়ামগী য়াইফনবা পায়খৎপা থৌরাং কয়া লৈখি। জন সামর্থ হায়বসি প্রধান মন্ত্রীগী মীচম মীয়াম্বু তেংবাংবগী সেবাগী শরুক অমনি অমসুং মসিনা মখোয়বু খুদোংচাবা কয়া পীগনি”।

মমাংগী চহি ২দা পায়খৎখিবা অসিগুম্বা অখন্নবা পান্দম থম্বা থৌওংনা অপাম্বা মহৈ পুথোকখি হায়না শেল থুম মন্ত্রীনা হায়খি। ফুদ সেক্যুরিতী অমসুং ভারতকী শেন্মিৎলোন্না থেংনদবা য়াদবদগী থেংনখিবা অতোপ্পা মতমগা মান্নদবা খুদোংচাদবা কয়াগা মাইয়োক্নবা ঙম্নবা শেলগী তঙাই ফদবা ওইরো, মীচম মীয়াম্বু সরকারনা হীরম খুদিংদা য়েংশিনখি।

ফাইনান্স সেক্রেতরী, দাঃ তি.ভি. সোম্নাথনগী তরাম্না ওকপগী ৱারোলদা মহাক্না প্রধান মন্ত্রীবু মন্ত্রালয় অসিবু পুক্নিং থৌগৎপীবা অমসুং মমাংগী চহি ৮ অসিদা ফিস্কেল পোলিসী শেম্বদা লমজিং লমতাকপীবগীদমক্তা থাগৎপা ফোংদোকখি। মহাক্না হৌজিক লাক্কদৌরিবা আইকোনিক ওইরবা চয়োলগী মতাংদা হায়রদুনা, শেল-থুম মন্ত্রালয় অমসুং কোর্পোরেত এফিয়র্স মন্ত্রালয়না মখোয়গী মপাঙ্গল অমসুং মায় পাকপশিং উৎনবা হোৎনবগা লোয়ননা, মীয়ামদগী পাউতাক অমসুং ৱাখল্লোনসু পীবীনবা হায়জগনি হায়খি। ঐখোয়গী পান্দমদি ইং ২০৪৭কী ভারতকীদমক্তা অনৌবা ৱাখল্লোনগী খুত্থাংদা অফবা লৈঙাক অমগী মঙলান মঙফাওনহনবনি হায়খি।

জন সামর্থ পোর্তেলগী মতাংদা ৱারোল খরাঃ

“জন সামর্থ”না সরকারগী স্কিম ১৩গী এপ্লিকেসন থাজিন্নবা অমসুং এম.এল.আই. ১২৫+ খনবগী (পব্লিক সেক্তর বেঙ্ক খুদিংমক য়াওবা) সিঙ্গল ৱিন্দোগী খুদোংচাবা পীগনি। সি.বি.দি.তি., জি.এস.তি., য়ু.দি.ৱাই.এ.এম., এন.ই.এস.এল., য়ু.আই.দি.এ.আই., এস.আই.বি.আই.এল.নচিংবগা লোন য়াম্না থুনা প্রোসেসিং তৌনবা রীএল তাইম চেক তৌবসু য়াগনি। “জন সামর্থ” পোর্তেলনা এগ্রিকলচর, লাইবলিহুদ অমসুং এজুকেসনগী কাঙলুপশিংগী ওইনা সরকারগী স্কিমগী মখাদা ক্রেদিত লৌবগী খুদোংচাবা পীগনি। জন সামর্থ পোর্তেলদা সরকারগী স্কিম ১৩ অমদি হান্নদগী য়াওরে অমসুং অহেনবা কয়া অমসু হাপখিগনি। পোর্তেল অসিনা মতিক চাবা/চাদবা য়েংগনি, প্রিনসিপাল সেঙ্কসন পীগনি, অমসুং এপ্লিকেসনশিংবু খনগৎলবা বেঙ্কশিংদা থাগনি। মসিনা বেনিফিশরীশিংবু খোঙচৎ অসিগী থাক খুদিংগী অপদেত পীগনি। বেঙ্কতা হঞ্জিন-হঞ্জিন্না চৎপগী মথৌসু তাররোই।

রুপয়া কা রোহচক সফর: 

জন সামর্থ পোর্তেল: 

ফাইনান্স অমসুং কোর্পোরেত এফিয়র্স মন্ত্রালয়গী দিজিতেল এগজিবিসন:

****