রক্ষা মন্ত্রী, শ্রী রাজনাথ সিংহনা ভিএতনামগী নেস্নেল দিফেন্স মন্ত্রী, জেনেরেল ফান ভান গিয়াংনা পাউজেল পীরকপগী মতুং ইন্না জুন ৮-১০, ২০২২দা নুমিৎ হুম্নিগী ওইবা ভিএতনামগী ওফিসিএল খোঙচৎ চৎকনি। রক্ষা মন্ত্রীনা লৈখিদ্রবা রাস্ত্রপতি হো চি মিনগী হানোইদা লৈবা মৌজোলিয়মদা মহাক্কী মফমদা ইকায় খুম্নবা উত্তুনা খোঙচৎ হৌগনি।

শ্রী রাজনাথ সিংহনা জেনেরেল ফান ভান গিয়াংগা বাইলেতরেল ৱারী শাগনি অমসুং মসিগী মনুংদা মন্ত্রী অনিমক্না লৈবাক অনিগী মরক্তা লৈবা দিফেন্সকী মতাংদা তেংবাংনবগী মরীবু হঙ্গৎনা য়েংশিনগনি অমসুং দিফেন্সকা মরী লৈনবা থৌওং কয়া মপাঙ্গল কনখৎহনবা য়াবা খোঙথাং কয়া য়েংথোকমিন্নগনি। মন্ত্রীনা অনিনা অপাম্বা মান্নবা রিজনেল অমসুং মালেমগী হীরম কয়াগী মতাংদা মশাগী ৱাখল্লোন ফোংদোক্নগনি। রক্ষা মন্ত্রীনা ভিএতনামগী রাস্ত্রপতি শ্রী ঙুয়েন জুআন ফুক অমসুং প্রধান মন্ত্রী শ্রী ফাম মিন চিনগা ৱারী শাবগী থৌরাংসু লৈ।

ভারত সরকারনা ভিএতনামদা পীবা য়ু.এস. $ মিলিয়ন ১০০গী দিফেন্স লাইন ওফ ক্রেদিতকী মখাদা শাবা হাই স্পীদ গার্দ বোত ১২ ভিএতনামদা খুৎশিন্নবগী হাই ফোংদা লৈবা হোং হা শিপয়ার্দতা পাংথোক্কদবা থৌরমদা রক্ষা মন্ত্রীনা প্রিসাইদ তৌগনি। প্রোজেক্ত অসি ভিএতনামগা খুৎশম্নবা দিফেন্স ইন্দস্ত্রীনা চাউখৎলকপগা মরী লৈননা য়াম্না মরু ওইবা অমা ওইরি অমসুং প্রধান মন্ত্রী, শ্রী নরেন্দ্র মোদীগী ‘আত্মানির্ভর ভারত’, ‘মেক ইন ইন্দিয়া’ অমসুং ‘মেক ফোর দি ৱর্ল্দ’গী ৱাখল্লোনগী খুদম অমসু ওইরি।

শ্রী রাজনাথ সিংহনা খোঙচৎ অসিগী মনুংদা ভারত সরকারনা য়ু.এস. $ মিলিয়ন ৫ পীদুনা শেমগৎ-শাগৎখিবা আর্মী সোফৱেয়র পার্ক লৈবা তেলিকম্ম্যুনিকেসন য়ুনিভর্সিতী য়াওনা নহা ত্রাংদা লৈবা ভিএতনামগী ত্রেনিং ইন্সতিত্যুসনশিংদসু চৎকনি। মহাক্না  হানোইগী ভারতকী ইম্বেসীনা শীনবা কম্ম্যুনিতী থৌরম অমদসু শরুক য়াবগা লোয়ননা ভিএতনামদা লৈবা ভারতকী দাইস্পোরাগসু ৱারী শাগনি।

ভারত অমসুং ভিএতনাম্না ইং ২০১৬তগী হৌদুনা কম্প্রিহেন্সিব স্ত্রেতজিক পার্ত্নরশিপ অমা লৈনরক্লি অমসুং দিফেন্সকী মতাংদা তেংবাংনবনা পার্ত্নরশিপ অসিগী মরু ওইবা য়ুম্বী ওইরি। ভিএতনাম অসি ভারতকী এক্ত ইস্ত পোলিসী অমসুং ইন্দো পেসিফিক ভিজন্দা য়াম্না মরু ওইবা খোঙল্লোই অমনি। বাইলেতরেল দিফেন্স ইংগেজমেন্তনা মতমগী মতুং ইন্না পাকথোক-চাউথোরক্লি অমসুং মসিদা দিফেন্স পোলিসী দাইলোগ, মিলিতরী-তু-মিলিতরী এক্সচেঞ্জ, অৱাংবা থাক্কী খোঙচৎ, কেপাসিতী বিলদিং অমসুং ত্রেনিং প্রোগ্রাম, য়ু.এন. পিসকীপিংদা তেংবাংবা, জহাজকী খোঙচৎ অমসুং বাইলেতরেল এক্সর্সাইস য়াওনা লৈবাক অনিগী মরক্তা লৈবা পাক-চাউরবা কন্তেক্তশিংসু য়াওরি।

ভারত-ভিএতনাম দিপ্লোমেতিক মরী শাগৎখিবগী চহি ৫০ মপুং ফারকপা অমসুং ভারতকী নীংতম্বগী চহি ৭৫ মপুং ফারকপগী পুৱারী ওইরবা মতমসিদা চৎলিবা রক্ষা মন্ত্রীগী ভিএতনাম খোঙচৎ অসিনা বাইলেতরেল দিফেন্স কোওপরেসন অমসুং কম্প্রিহেন্সিব স্ত্রেতজিক পার্ত্নরশিপ্পু হেন্না মপাঙ্গল লৈহনগনি।

*********