मुंबई, 2 जून 2022

 

जादुगार जशी जादू रंगमंचावर करून दाखवतो तशीच जादू व्हिज्युअल इफेक्ट्स तंत्रामुळे चित्रपटाच्या पडद्यावर घडून येते. चित्रपटाच्या कथेवर हे तंत्र जादूची कांडी फिरविते आणि त्या कथेला एका वेगळ्याच उंचीवर घेऊन जाते असे बाहुबली चित्रपटाचे व्हीएफएक्स पर्यवेक्षक आणि सर्जनशील दिग्दर्शक पी.सी.सनथ यांनी म्हटले आहे.

ते म्हणाले, “जेव्हा एखादा चित्रपट निर्माता अथवा तंत्रज्ञ चित्रपट तयार करताना एखादी गोष्ट घडवू शकत नाहीत तेव्हा ते व्हिज्युअल इफेक्ट्स तंत्राची मदत घेण्याचा विचार करतात. व्हीएफएक्स तंत्रामुळे कोणतीही गोष्ट घडविता येते, सर्जकाची कल्पनाशक्ती जितकी अमर्याद तितकीच या तंत्राची आविष्काराची शक्ती देखील अपरंपार असते.”

सध्या सुरु असलेल्या 17 व्या मुंबई आंतरराष्ट्रीय चित्रपट महोत्सवामध्ये आज आयोजित करण्यात आलेल्या ‘व्हीएफएक्स : कथाकथनाकरिता सतत नव्याने उदयाला येत असलेले साधन’ या विषयावरील कार्यशाळेत बोलताना प्रख्यात व्हीएफएक्स पर्यवेक्षक सनथ यांनी हे प्रतिपादन केले.

व्हीएफएक्स तंत्राचे महत्त्व अधिक ठळकपणे सर्वांसमोर मांडताना ते म्हणाले की, आजच्या जमान्यात व्हिज्युअल इफेक्ट्स तंत्राचा वापर केलेला नाही असा एकही चित्रपट दिसत नाही. “नव्या तांत्रिक साधनांच्या आगमनामुळे, व्हीएफएक्स तंत्राचा परीघ अधिक रुंदावला आहे, मात्र एखाद्या व्हीएफएक्स तंत्रज्ञाने कधीही हे तंत्रज्ञान अथवा अशा इतर चित्रपटांमध्ये वापरण्यात आलेले तंत्रज्ञान यांच्या प्रभावाखाली राहता कामा नये. त्याने नेहमीच त्याच्या हातातील कथेचे सार जाणून घेतले पाहिजे,” एका प्रश्नाच्या उत्तरादाखल त्यांनी सांगितले.

ते पुढे म्हणाले की, चलतचित्रांच्या तंत्रज्ञानाच्या शोधापासूनच व्हिज्युअल इफेक्ट्स हा चित्रपटीय कथाकथनाचा अविभाज्य भाग बनून राहिला आहे. विसाव्या शतकात जेव्हापासून चित्रपट हे कथाकथनाचे लोकप्रिय माध्यम म्हणून उदयाला आले तेव्हाच व्हिज्युअल इफेक्ट्स हे तंत्र देखील अनेक नवी तंत्रे आणि तंत्रज्ञान यांचा स्वीकार करून चित्रपट निर्मात्यांना त्यांच्या गोष्टी चित्रपटाच्या माध्यमातून अधिक उत्तम प्रकारे सादर करण्यात मदत करत आहे.

चित्रपट तयार करणाऱ्यांना त्यांच्या चित्रपटीय स्वप्नांची कल्पना करण्यासाठी आणि ती स्वप्ने प्रत्यक्षात साकार करण्यासाठी व्हिज्युअल इफेक्ट्स तंत्राने कशा प्रकारे मदत केली आहे याचे देखील दर्शन या कार्यशाळेच्या वर्गामध्ये घडविण्यात आले. तसेच एआर अर्थात वाढीव सत्यता आणि व्हीआर अर्थात आभासी सत्यता यांसारख्या साधनांच्या मदतीने भविष्यातील चित्रपट निर्मात्यांना व्हीएफएक्स तंत्र नव्या सीमा पार करण्यासाठी उपलब्ध करून देऊ शकणाऱ्या शक्यतांकडे देखील यावेळी निर्देश करण्यात आला.

पी.सी.सनथ हे हैदराबाद येथील फायरफ्लाय क्रिएटिव्ह स्टुडिओचे सह-संस्थापक आणि संचालक आहेत. गेल्या अडीच दशकांपासून ते व्हिज्युअल इफेक्ट्स तंत्राचा उत्तम वापर करत आहेत. बाहुबली-द बिगिनिंग (2015), रोबो (2010), ईगा (2012), पुलीमुरुगन (2016) आणि मलिक (2021) या चित्रपटांसह अनेक तुफान लोकप्रिय ठरलेल्या चित्रपटांसाठी व्हीएफएक्स तंत्रज्ञ अनि सर्जनशील दिग्दर्शक म्हणून काम केले आहे. सर्वोत्तम व्हिज्युअल इफेक्ट्ससाठीच्या राष्ट्रीय आणि राज्य पातळीवरील चित्रपट पुरस्कारांसह त्यांनी अनेक प्रतिष्ठित पुरस्कार प्राप्त केले आहेत. चित्रपट उद्योग क्षेत्रातील टीव्हीएजीए (तेलंगणा व्हीएफएक्स,अॅनिमेशन अँड गेमिंग असोसिएशन ) सारख्या अनेक संस्थाच्या कार्यात ते सहभागी आहेत. पुण्याची चित्रपट आणि दूरचित्रवाणी संस्था, अहमदाबादची राष्ट्रीय डिझाईन संस्था आणि केरळच्या के.आर.नारायणन राष्ट्रीय व्हिज्युअल विज्ञान आणि कला संस्था यांसारख्या विविध कला आणि चित्रपट निर्मितीशी संबंधित शैक्षणिक संस्थांमध्ये व्याख्याते तसेच शैक्षणिक सल्लागार म्हणून देखील कार्यरत आहेत.

* * *

PIB MIFF Team | R.Aghor/S.Chitnis/Darshana/MIFF-47

चांगल्या सिनेमांची प्रसिद्धी तुमच्यासारख्या चांगल्या सिनेप्रेमींच्या कौतुकामुळेच होते, यावर आमचा विश्वास आहे. तुमचं सिनेमाबद्दलचं प्रेम समाज माध्यमांवर #AnythingForFilms /#FilmsKeLiyeKuchBhi and #MIFF2022 वापरून शेयर करा. चला सिनेमाबद्दलचं हे प्रेम सगळ्यांपर्यंत पोहचवूया !

#MIFF2022 मधल्या कुठल्या सिनेमानं तुमच्या काळजाचा ठोका चुकवला? #MyMIFFLove वापरून जगाला कळू द्या MIFF मधला तुमचा आवडता सिनेमा कुठला ?

जर कथा तुमच्या काळजाला भिडली असेल तर, आम्हाला संपर्क करा! तुम्हाला सिनेमा किंवा निर्मात्याबद्दल आणखी माहिती हवी आहे का? विशेषतः जर तुम्ही पत्रकार किंवा ब्लॉगर आहात आणि सिनेमाशी संबंधित लोकांशी बोलायचं आहे? पीआयबी तुमची त्यांच्याशी गाठ घालून देईल, आमचे अधिकारी महेश चोपडे यांच्याशी +91-9953630802 वर कॉल करा. किंवा miff.pib[at]gmail[dot]com वर आम्हाला मेल करा.

कोविड महामारी नंतर पहिल्यांदाच होत असलेल्या ह्या महोत्सवात, चित्रपट रसिक ऑनलाइन पण महोत्सवाचा आस्वाद घेऊ शकतील. ऑनलाईन प्रतिनिधी म्हणून आपण मोफत नोंदणी करू शकता (मिश्र स्वरूपाच्या महोत्सवासाठी) https://miff.in/delegate2022/hybrid.php?cat=aHlicmlk या संकेतस्थळावर तुम्हाला स्पर्धा विभागातले चित्रपट  उपलब्ध झाल्यावर  बघता येतील.

 

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com

(Release ID: 1830557) Visitor Counter : 157