এজুকেসন, স্কিল দিবেলপমেন্ত এন্দ ওন্তপ্রিনোরশিপকী কেন্দ্রগী মন্ত্রী শ্রী ধর্মেন্দ্র প্রধান্না ঙসি অথোইবা মীথুংলেন ওইনা মেঘালয়গী নোর্থ ইস্তর্ন হিল য়ুনিভর্সিতী (নেহু)গী   XXVII শুবা কনভোকেসন্দা শরুক য়াখহরে অমসুং শিল্লোংগী কেম্পসতা পাঙথোকখিবা থৌরম অসিদা ২০২০ অমসুং ২০২১দা পাস আউত তৌখিবা মহৈরোয়শিংদা দিগ্রী পীখ্রে।                                                                                                                                                     

শ্রী প্রধান্না পাস আউত তৌখিবা মহৈরোয় পুম্নমক্তা নুংঙাইবা ফোঙদোকখি মহাক্কী মখোয়গী তুংগী পুন্সিদা অফবা ওইনবা য়াইফ-মঙ্গোল পীখি। মহাক্না মখোয়দা জোব প্রোভাইদরশিং ওইনবা নোলেদজ-বেজ রিভোল্যুসন অমদা শরুক য়াদুনা খুন্নাইদা অহোংবা পুরক্নবা হায়খি। ঐখোয়গী য়ুনিভর্সিতীশিং অসি আইদিয়া, ইনোবেসন অমসুং এস্পিরেসনশিংগী তুংনফমনি অমসুং য়ুনিভর্সিতীশিং অসি খুন্নাই অমদি মীওইবা জাতি চাউখৎহন্নবা অমসুং মখা তানা ইজ-ওফ-লিবিং হেনগৎহন্নবা রিসর্চকী ব্রিদীং গ্রাউন্দ অমা ওইগদবনি হায়না মহাক্না মখা তাখি।

মন্ত্রীনা এন.ই.পি. ২০২০ অসি গ্লোবেল সিতিজেন শেমগৎনবা ঐখোয় পুম্নমক্কী ওইনা অওনবা পুরক্কদবা লম্বেল অমনি হায়খি। নেস্নেল এজুকেসন পোলিসী অসিনা অর্লী চাইল্দহুদ ক্যের অমসুং এজুকেসন য়ুনিভর্সেলাইজেসন তৌবদা মীৎয়েং চংলি অমসুং মসিনা ভারতকী লোল পুম্নমক তমশিনবদা মীৎয়েং থম্লি। মহাক্না প্রধান মন্ত্রী শ্রী নরেন্দ্র মোদীনা ভারতকী লোল পুম্নমক্কী মরু ওইবা অদু নৌহৌনা খঙহনখিবগীদমক থাগৎপা ফোঙদোকখি। লোল অমনা অমদগী তাবা লৈতে হায়না মহাক্না মখা তাখি।

শ্রী প্রধান্না মুখ্য মন্ত্রী শ্রী কোনরাদ সংমানা এন.ই.পি. ২০২০গী মখাদা মেঘালয়দা অর্লী চাইল্দহুদ ক্যের অমসুং এজুকেসন্দা অখন্নবা মীৎয়েং চংবগীদমক থাগৎপা ফোঙদোকখি। মসিনা ঐখোয়গী অঙাংশিংনা মখোয়গী মপুং ফাবা মতিক ময়াই পুথোকপা ঙমহল্লগনি।

শ্রী প্রধান্না ঐখোয়না অমৃত মহোৎসব পালন তৌরিবা মতম অসিদা ঐখোয়গী নহারোলশিংনা হকশিংদগী থৌদাংশিংদা মখোয়গী মীৎয়েং থমগদবনি হায়খি। থৌদাং পাঙথোকপগী লম্বেলদা চংশিন্দুনা ঐখোয়গী লৈবাক অসিবু মথংগী দিকেদতা ঐখোয়না অনৌবা পনখৈ তম্না পুবা ঙম্লগনি হায়না মহাক্না মখা তাখি। মহাক্না মপাঙ্গল কনবা এলুমনি নেৎৱার্ক অমা শেমগৎনবা পুক্নিং থৌগৎখি। ঐখোয়গী স্কুল অমসুং য়ুনিভর্সিতীশিংদা মেতরিএল নত্ত্রগা ইন্তেলেকচুএল ওইনা লমন শীংলসি অমসুং ঐখোয়গী রাজ্য, লৈবাক অমসুং মীওইবা জাতিগী থৌদাং পাঙথোক্লসি। লমন শীংনবা মসিদগী হেন্না মতাং চারবা মতম লৈতে হায়না মহাক্না মখা তাখি।

কেন্দ্রগী মন্ত্রীগা লোয়ননা থৌরম অসিদা শরুক য়াখিবা মেঘালয়গী মুখ্য মন্ত্রী শ্রী কোনরাদ সংমানা পাস আউত তৌরিবা মহৈরোয়শিংদা মখোয়গী পুন্সিদা মথংগী থাক অদু য়ৌবা ঙম্নবা অনৌবশিং খঙদোক্নবা অমসুং কালক্যুলেতিব রিস্কশিং লৌনবা হায়খি। মাইথিবদা পুক্নিং শোন্থবা তৌদনবা অমসুং মাইপাকপদা নাপল কাদনবা মুখ্য মন্ত্রীনা মহৈরোয়শিংদা হায়খি।

ঙসিগী কনভোকেসন অসিদা পীখিবা অপুনবা দিগ্রী ১৫,৯৫৫গী মনুংদা পিঐচ.দি ১১৭, এম.ফিল ৮, পি.জি. দিগ্রী ১৫৫৯ অমসুং বেচেলর দিগ্রী ১৪,২৭১ ওইখি। মেঘালয়গী এজুকেসন মন্ত্রী শ্রী লাখমেন রিমবুই, নেহুগী ভাইস-চাঞ্চেলর প্রোফেসর পি.এস. শুখলা, নেহুগী ফেকলতী অমসুং মহৈরোয়শিংনা ঙসি পাঙথোকখিবা থৌরম অদুদা শরুক য়াখি।

মেঘালয়গী মুখ্য মন্ত্রী কোনরাদ কে. সংমা অমসুং রাজ্যগী এজুকেসন মন্ত্রী লাখমেন রিমবুইগা লোয়ননা কেন্দ্রগী মন্ত্রীনা কেন্দ্র সরকারগী মকোক থোংবা ওফিসরশিং য়াওবা এজুকেসন, স্কিল দিবেলপমেন্ত এন্দ ওন্তপ্রিনোরশিপকী য়েংশিন মীফম অমা পাঙথোকখি।

মেঘালয়না থবক ওইনা অমসুং হীরম পুম্নমক্তা এন.ই.পি. ইমপ্লিমেন্ত তৌরিবা অসিদা মন্ত্রীনা নুংঙাইবা ফোঙদোকখি। এস্পায়র মেঘালয় অমসুং প্রাইম মেঘালয়গুম্বা রাজ্য সরকারগী থৌরাং অসিনা তেলেন্ত দিস্কবরী ফোর্মেলাইজ তৌরি, স্কিলশিং মশক খঙদোক্লি, ওন্তপ্রিনোর্শিপ শৌগৎলি অমসুং মেঘালয়গী তৌবা ঙম্বা অদু পুথোক্লি।

মহাক্না মেঘালয়গুম্বা চাউখৎলক্লিবা রাজ্য অসিনা নেস্নেল দিজিতেল ইনফ্রাস্ত্রকচর মরু ওইবা মহৈরোয়গী রেজিস্ত্রেসন পোর্তেল অসি এন.দি.ই.এ.আর.গী শরুক অমা ওইনা লিংখৎনবা মাংজিল থানা হোৎনগদবনি অমসুং এন.আই.আর.এফ. অমসুং এন.এ.এ.সি. ফ্রেমৱার্ক্কী মখাদা মাগী ইন্সতিত্যুসনশিং পুশিন্নবা হায়খি। মহাক্না নেহুনা রাজ্য অসিদা লৈরিবা মরু ওইনা ফ্রন্তিয়র এরিয়াশিংদা স্কিল দিবেলপমেন্ত পীনবা ইন্সতিত্যুসনশিংগী নোলেদজ পার্তনর অমা ওইনা নেহুনা থৌদাং লৌনবা হায়খি। ভারতকী এজুকেসন মন্ত্রালয়না মেঘালয়বু এজুকেসন অমসুং ওন্তপ্রিনোরশোপতা মোদেল স্তেৎ অমা ওইহনবদা মতেং পাংগনি হায়খি।

নুমিৎ অদুদা শ্রী প্রধান্না উমস্নিং প্রেস্বিতেরিয়ন স্কুলদা চৎখি। মহাক্না মেঘালয়গী রি ভোই জিলাদা লৈবা স্কুল অসিদগী ন্যুরো-সর্জিয়ন, পাইলোৎ, ইঞ্জিনিয়র, সোস্সর প্লেয়র, ম্যুজিসিয়ন – আশা লৈবা তুংগী লুচিংবশিংনা ভারতপু নোলেজদ সোসাইতী অমা ওইনবা থাজবা থম্মি হায়খি।

****