মাইক্রো, স্মোল অমসুং মেদিয়ম ইন্তর্প্রাইজেস মন্ত্রালয়
ৱাগী ইন্দস্ত্রীদা শেন্দোং হেন্না লৈহন্নবগীদমক ৱাগী মৈতালদা থম্লমবা “এক্সপোর্ত প্রোহিবিসন” লৈঙাক্না লৌথোকখ্রে
Posted On:
20 MAY 2022 3:34PM by PIB Imphal
ভারতকী ৱাগী ইন্দস্ত্রীদা ৱা মপুং ফানা শীজিন্নহনগদবা অমদি শেন্দোং হেন্না লৈহনগদবা খোঙথাঙ অমদা লৈঙাক অসিনা ৱাগী মৈতাল “মপান্দা থাদোকপদা থম্লমবা অথিংবা” লৌথোকখ্রে। লৈবাক অসিদা লৈরিবা ৱাদা য়ুম্ফম ওইবা ইন্দস্ত্রী লিশিং কয়াদা চৈঙাক পীরিবা খাদি এন্দ ভিলেজ ইন্দস্ত্রিজ কম্মিসন (কে.ভি.আই.সি.)না ৱাগী মৈতাল মপান্দা থাদোকপদা থম্লমবা অথিংবা লৌথোক্নবা লৈঙাক্কী মফমদা হনবা লৈতনা তক্নদুনা লাক্লিবনি। কে.ভি.আই.সি. চেয়রমেন শ্রী ভিনয় কুমার সক্সেনানা কম্মর্স অমসুং ইন্দস্ত্রিজ মন্ত্রী শ্রী পিয়ুস গোয়লদা ৱাগী ইন্দস্ত্রীদা হেন্না কান্নবা পীনবগীদমক ৱাগী মৈতাল মপান্দ থাদোকপদা থম্লমবা অথিংবা লৌথোক্নবা চে ইরকখিবনি।
“লিগেল ওইবা মফমদগী লৌবা ৱাদগী শেমবা ৱাগী মৈতাল খুদিংমক মৈতাল অদু পুথোকপদা শীজিন্নরিবা ৱা অদু আইন্না য়াবা মফমদগী লৌরকপনি হায়বগী মতিক চাবা চে-চাং/হৌরকফমগী শক্তাকচে য়াওরবদি মপান্দা থাদোকপদা অয়াবা পীরে,” হায়না দাইরেক্তরেৎ জেনেরেল ওফ ফোরেন ত্রেদ (দি.জি.এফ.তি.)না থোকপা চেরোল অদুদা পল্লি।
![](https://static.pib.gov.in/WriteReadData/userfiles/image/image001YTPL.jpg)
কে.ভি.আই.সি. চেয়রমেন শ্রী সক্সেনানা কম্মর্স অমসুং ইন্দস্ত্রিজ মন্ত্রী শ্রী পিয়ুস গোয়লবু পোলিসী শেমদোকপগীদমক থাগৎপা ফোঙদোক্লদুনা ৱারেপ অসিনা রো ৱাগী ইনপুৎ কোস্ত হন্থহন্দুনা মনুং হঞ্জিনবা খুঙ্গঙগী মফমশিংদনা নম্না লৈরিবা ৱাগী ইন্দস্ত্রীশিংদা শেন্দোং হেন্না লৈহল্লগনি হায়না ফোঙদোকখি। “ৱাগী মৈতাল মালেমগী কৈথেলদা দিমান্দ চাউনা লৈ অমদি লৈঙাক্না মপান্দা থাদোকপদা থম্লমবা অথিংবা লৌথোকখিবা অসিনা ভারতকী ৱাগী ইন্দস্ত্রীবু খুদোংচাবা অসিদগী কান্নবা লৌদুনা মালেমগী চাউরবা দিমান্দকী কান্নবা লৌবা ঙমহল্লগনি,” হায়না মহাক্না হায়খি।
পনবা য়াবদি, হৌজিক হৌজিক ভারতকী ৱাগী ইন্দস্ত্রী অসি ৱা মরাং কায়না শীজিন্নবা ঙমদবনা মরম ওইরগা শেঞ্জঙ য়াম্না ৱাংবগী ফীভম মায়োক্নরি। ভারত্তা ৱা অসি অয়ামবনা অগরবত্তি শাবদা শীজিন্নরি, অদুগা মসিদসু মচৈ ইৎপদা য়াম্লবদা ১৬% খক্তমক শীজিন্নরি অদুগা লেমহৌরবা ৮৪% অদুনা পোত্থি পোৎকুম ওইনা মাঙলি। মসিনা মরম ওইরগা ৱাগী চাংচত্তা লৈবা মমল এম.তি. অমদা লুপা ৪,০০০ দগী লুপা ৫,০০০ লৈবসিদা ৱাগী মচৈগী মমল অসি এম.তি. অমদা লুপা ২৫,০০০দগী লুপা ৪০,০০০ ফাওবা ওইরি।
অদুম ওইনমক, ৱাগী মৈতাল মপান্দা থাদোকপনা ৱাগী মথি মকুম অসি মপুং ফানা শীজিন্নবা য়াহন্দুনা ৱাগী শিন্ফম অসি হেন্না শেন্দোং লৈহনগনি। বার্বেক্যু, লৈহাউ ফগৎহন্নবা অমদি এক্তিভেতেদ চার্কোল শেম্নবগী মচাক অমা ওইনা ৱাগী মৈতাল শীজিন্নবনা মরম ওইরগা য়ু.এস.এ., জাপান, কোরিয়া, বেলজিয়ম, জর্মনী, ইতলী, ফ্রান্স অমসুং য়ু.কে.নচিংবা মালেমগী কৈথেলশিংদা মতিং চাউনা লৈ।
মমাঙদা ৱাগী ইন্দস্ত্রীশিংদা, অখন্ননা অগরবত্তি ইন্দস্ত্রীদা থবক হেন্না পীবা ঙম্নবগীদমক, কে.ভি.আই.সি.না, ২০১৯দা, রো অগরবত্তি পুশিল্লকপগী অমসুং ভিএতনাম অমসুং চাইনাদগী চাং ৱাংনা পুশিল্লক্লিবা ৱাগী মচৈশিংদা লৈরিবা ইম্পোর্ত দ্যুতীগী পোলিসী হোংদোক্নবা কেন্দ্র লৈঙাক্কী মফমদা হায়জখি। মতুং তারকপদা, সেপ্তেমবর ২০১৯দা, কম্মর্স মন্ত্রালয়না রো অগরবত্তি পুশিল্লকপা “থিংথি” অদুগা জুন ২০২০দা শেলথুম মন্ত্রালয়না ৱাগী মচৈ পুশিল্লকপগী দ্যুতী হেনগৎহনখি।
*****
(Release ID: 1827072)
Visitor Counter : 129