অৱাং নোংপোক লমদম, তুরিজম অমসুং কলচরগী চাউখৎ-থৌরাং মন্ত্রী, শ্রী জি. কিশন রেদ্দীনা এক্সতর্নেল এফিয়র্স মন্ত্রালয় অমসুং ইনভেস্ত ইন্দিয়ানা শীন-লাঙবা “ইন্দিয়ন ফোরেন সর্ভিস ওফিসরশিংগী রাউন্দ তেবল”দা ৱা ঙাঙখ্রে। কনফরেন্স অসিদা কেন্দ্র সরকারগী তোঙানবা দিগ্নিতরী কয়া, দিপ্লোমেত, সেনিয়র ওফিসর অমসুং তোঙানবা সেগমেন্তশিংগী ইনভেস্তর কয়ানা শরুক য়াখি। লমদম অসিদা শাহৌ-লৌনীংবগী মপুং ওইবা অকোয়বগী ফিভম লৈরকপনা মরম ওইরগা অৱাং নোংপোক লমদমদা ইনভেস্তরশিংনা মিৎয়েং চঙবা হেনগৎলক্লিবা অসিগী মতাংদা মন্ত্রীনা ফোংদোকখি। সেক্যুরিতীগী ফিভমদা ফগৎলকপগী মতৌ, কন্নেক্তিবিতী ফগৎলকপা অমসুং কেন্দ্র সরকারনা য়াশিন্নবা লৈতনা লমদমসিদা রাজনিতীগী মিৎয়েং চঙলিবা অসিনা লমদম অসিদা চাউখৎ-থৌরাংগী অনৌবা য়ুগ অমা পুরক্লে হায়না মহাক্না ফোংদোকখি।

এপ্রিল ২৮দগী মে ৪ ফাওবদা হন্দক্তা পাংথোকখিবা নীংতম্বগী অমৃত মহোৎসব – এন.ই. ফেস্তিবেলনা অরুবা শিংনবা কয়াগী মতাংদা ৱারী শাবগী ফম্বাক শেমখি অমসুং পোলিসী শেম্বা অমসুং মীচম মীয়ামগী ওইনা য়াম্না মশক থোকপা থৌওং অমা ওইখি হায়না মন্ত্রীনা হায়খি। ৱারী শাখিবা কয়াগী মরক্তগী, লমদমসিগী মপাঙ্গল হেন্না লৈহনবগী মতাংদা হীরম অনি ময়েক শেংখি হায়না মহাক্না মখা তাখি। হীরম অনি অদুদি, হেন্না চাউবা পব্লিক প্রাইভেৎ পার্ত্নরশিপ অমা লৈবগী তঙাই ফদবা অমসুং তুরিজম, ওর্গানিক ফার্মিং, এগ্রিকলচর, হোর্তিকলচর, ফ্লোরিকলচর, তেক্সতাইল, হেন্দিক্রাফ, আই.তি. সেক্তর, বি.পি.ও. অমসুং সর্ভিস ইন্দস্ত্রীগুম্বা লমদম অসিগী চাউরবা মতিক্কী কান্নবা লৌবনি। 

এন.ই.গী পোত্থোকশিং মীয়াম্না য়াম্না পাম্নৈ অমসুং মীরমগী ইনভেস্তরশিংনা এন.ই.আর.দা পুক্নিং চঙই, অদুবু, এৱিয়র্নেস ৱাৎপা অমসুং নীংথিনা খঙদবগী শিংনবা কয়াদি লৈরি হায়না মন্ত্রীনা হায়খি।

মহাক্না আই.এফ.এস. ওফিসরশিংদা মখোয়না মালেম শিনবা থুংবদা লৈবদগী খঙলকপা লৌশিং শিজিন্নদুনা “অৱাং নোংপোক ভারতপু মপুং ফানা খঙদ্রিবা স্বররগ অমসুং চাংদম্নীংঙাই লৈতনা খুদোংচাবা লৈবা লদম” হায়বা ব্রান্দ অমা ওইনা শেমগৎনবা তেংবাংনবা হায়খি। অৱাং নোংপোক্কী চাউরবা কলচরগী কোনুং অমসুং তুরিজমদা মতিক লৈরিবা অসিগী মখোয়না এম্বেসেদর ওইনবা মহাক্না মখা তানা হায়খি।

মখোয়না মালেমগী ইনভেস্তমেন্ত কম্ম্যুনিতী অমসুং ইন্দস্ত্রীশিংনা অৱাং নোংপোক ভারত্তা মিৎয়েং চঙলকপগী থৌওং খোঙজেল য়াঙশিনহনগদবনি হায়না মন্ত্রীনা মরু ওইনা মিৎয়েং চঙখি।

আই.এফ.এস. ওফিসরশিংনা পুন্না হোৎনমিন্নদুনা, অমৃত কালগী খ্বাইদগী চাউবা কান্নবা লৌগদবনি অমসুং অৱাং নোংপোক্কী মপাঙ্গল শিজিন্নদুনা মসিবু আত্মানির্ভর ভারতকী গ্রোথ ইঞ্জিন ওইনা শেমগৎকদবনি হায়না মহাক্না ফোংদোকখি।

এক্সতর্নেল এফিয়র্স মন্ত্রালয় অমসুং ইনভেস্ত ইন্দিয়ানা শীন-লাঙখিবা থৌরম অসি সেনিয়র আই.এফ.এস. ওফিসরশিংগী মিদ-কেরিয়র ত্রেনিং প্রোগ্রামগী শরুক ওইনা পাংথোকখিবনি। ৱারী শাবগী সেসন্দা ব্রান্দ ইন্দিয়া শেমগৎনবগীদমক্তা ইনভেস্তমেন্ত খুমাং চাউশিলহনবা অমসুং সরকারনা পায়খৎপা অতোপ্পা কয়াগী মতাংদা খন্ন-নৈনখি।

****