প্রধান মন্ত্রীনা তুংগী মতমদা ঈশিং য়োকশিনবগী মিৎয়েংগা লোয়ননা অমৃত সরোবরগী মতাংদা এপ্রিল ২৪, ২০২২দা অনৌবা মিসন অমা হৌদোকখ্রে। মিসন অসিনা নীংতম্বগী অমৃত মহোৎসবকী নুংঙাইবা ফোংদোকপগী শরুক অমা ওইনা লৈবাক্কী জিলা খুদিংদা ঈশিং থোকফম ৭৫ শেমগৎপা নত্ত্রগা হান্নগী মতৌদগী হেন্না ফগৎহন্নবা পান্দম থম্লি। মসিনা অপুনবা ওইনা একর অমা নত্ত্রগা হেন্না চাউবা ঈশিং থোকফম/হৌরকফম ৫০,০০০ হেন্না শেমগৎ-শাগৎহনগনি।

মিসন অসি সরকারনা মপুং ওইনা শরুক য়াবা থৌওংগা লোয়ননা হৌদোকখিবনি অমসুং মসিদা মন্ত্রালয়/বিভাগ ৬, মিং ওইনা পল্লবদা, খুঙ্গং চাউখৎ-থৌরাং বিভাগ, লেন্দ রিসোর্স বিভাগ, থক্নবা ঈশিং অমসুং সেনিতেসনগী বিভাগ, ঈশিংগী রিসোর্স বিভাগ, পঞ্চায়তী রাজ মন্ত্রালয়, ফোরেস্ত, ইনভাইরনমেন্ত অমসুং ক্লাইমেত চেঞ্জ মন্ত্রালয়না শরুক য়ারি। মসিদা নত্তনা, ভাস্করচার্য়া নেস্নেল ইন্সতিত্যুৎ ওফ স্পেস এপ্লিকেসন অমসুং জিও-ইনফোর্মেতিক্স (বি.আই.এস.এ.জি.-এন.)পু মিসন অসিগী তেক্নিকেল পার্ত্নর ওইনা খল্লে। মিসন অসিনা মহাত্মা গান্ধী এন.আর.ই.জি.এস., ১৫শুবা ফাইনান্স কম্মিসন গ্রান্ত, অমসুং রাজ্যগী মশাগী স্কিমশিংগী মথক্তা ৱাতরশেদ দিভেলপমেন্ত কম্পোনেন্ত, হর খেৎ কো পানীগুম্বা পি.এম.কে.এস.ৱাই.গী সব স্কিমশিংদা অমুক হন্না মিৎয়েং চঙদুনা রাজ্য অমসুং জিলাগী খুত্থাংদা মথৌ পাংথোক্কনি। মপুং ওইবা পান্দম ফংনবগীদমক্তা মিসন অসিনা মীয়াম অমসুং নন-গবর্নমেন্ত রিসোর্স শিজিন্নববু পুক্নিং থৌগৎলি।

খুঙ্গং চাউখৎ-থৌরাংগী সেক্রেতরী, শ্রী নাগেন্দ্র নাথ সিনহানা মিসন অমৃত সরোবরগী থবক পায়খৎপগী হৌজিক ওইরিবা ফিভম য়েংশিন্নবা ফমখিবা মীফমদা লুচিংখি অমসুং মসিদা রাজ্য খুদিংগী খুঙ্গং চাউখৎ-থৌরাংগী এদিস্নেল চীফ সেক্রেতরী, প্রিন্সিপাল সেক্রেতরী অমসুং সেক্রেতরী, মিসন অমৃত সরোবরগী স্তেত নোদেল ওফিসর, জিলা ৭০০কী দি.এম./দি.সি./সি.ই.ও.গা লোয়ননা মিসন অসিগী জিলাগী নোদেল ওফিসরশিংনা শরুক য়াখি।

মিসন অমৃত সরোবর অসি ওগস্ত ১৫, ২০২৩ ফাওবগী মনুংদা লোইশিনগদবনি। লৈবাক অসিদা অসিগুম্বা অমৃত সরোবর ৫০,০০০ শেমগৎপা য়াই। অমৃত সরোবর অমমম্না ক্যুবিক মীতর ১০,০০০গী চাংদা ঈশিং থম্বা ঙমদুনা একর ১গী পাক চাউবা ওইগনি।

মীয়াম্না মিসন অসিদা শরুক য়াবা হায়বসিনা অহেনবা মিৎয়েং চঙলি। অমৃত সরোবর শেমগদবা মফমসিগী লোকেল ফ্রীদম ফাইতর, মখোয়গী ইমুং-মনুং, অথৌবশিংগী ইমুং-মনুং, পদ্মা এৱার্দ ফংলবা অমসুং লোকেল এরিয়াগী মীওই খুদিংনা থবক অসিগী থাক খুদিংদা শরুক য়াগনি। ওগস্ত ১৫ খুদিংগী অমৃত সরোবর মফম খুদিংদা লৈবাক্কী ফিরাল চিংখৎপগী থৌরম পাংথোক্কনি।

অমৃত সরোবর খুদিংবু থৌরাং য়াৎপগী মখা পোন্না শোইদনা লোইশিনবা ঙমহন্নবা রাজ্যশিংনা হোৎননবা সেক্রেতরীনা হায়খি। থবক অসি পাংথোকপগী থাক খুদিংদা তেক্নোলোজী শিজিন্নসি হায়না মহাক্না মরু ওইবা মিৎয়েং চঙখি। রাজ্যশিংনা ৱাতর স্ত্রকচর য়ুজর এসোসিএসন শেম্নবা অমসুং অমৃত সরোবরশিংবু নীংথিনা শেমগৎ-শাগৎনবা তঙাই ফদবা ত্রেনিং পীনবা হায়খি। রাজ্যগী তেক্নিকেল অমসুং অতোপ্পা হীরম কয়াবুসু খন্ন-নৈনখি। রাজ্য/য়ু.তি.শিংনা মিসন অসিদা মপুং ওইনা শৌগৎনখি।

হৌজিকা ফাওবগী ওইনা, রাজ্য/জিলাশিংগী ওইনা অমৃত সরোবর শেমগৎনবা মফম ১২,২৪১ লেপখ্রে অমসুং হায়রিবশিং অসিদগী অমৃত সরোবর ৪৮৫৬তা থবক হৌখ্রে।

*****

(Release ID: 1824550) Visitor Counter : 180