লমদম অসিদা লাইরিক হৈরবা নহাশিং স্কিল হেনগৎহন্নবা অৱাং-নোংপোক্তা, ইলেকত্রোনিক্স অমসুং আই.তি, ওন্ত্রেপ্রেনিউয়রশিপ অমসুং স্কিল দিবলপমেন্তগী রাজ্য মন্ত্রী শ্রী রজিব চন্দ্রসেখরনা নেসনেল ইন্সতিতুৎ ওফ ইলেকত্রোনিক্স এন্দ ইনফোর্মেসন তেক্নোলোজি(এন.আই.ই.এল.আই.তি) সেন্তর ৫ হাংদোকখ্রে। হায়রিবা এন.আই.ই.এল.আই.তি সেন্তর ৫ অদুদি দিব্রুগর, দিমাপুর, জোরহাত, পসিঘাত অমসুং সেনাপতিদনি।

মহাক্কী অৱাং-নোংপোক খোঙচৎকী হুম্নিশুবা অমসুং অরোইবা নুমিত্তা ঙসি দিমাপুরদা পাংথোকপা থৌরম অমদা সেন্তরশিং হাংদোক্লদুনা মহাক্না হায়খি, “লৈবাক অসিগী চাউখৎলবা মফমশিংগা থোং মান্ননা অৱাং-নোংপোক চাউখৎহনবা হায়বসি ঐখোয়গী প্রধান মন্ত্রী নরেন্দ্র মোদীগী থাজবনি”।

মহাক্কী মমাঙগী খোঙচৎ নিংশিংলদুনা রাজ্য মন্ত্রীনা হায়খি “থা ৭গী মমাঙদা মহাক্না লাক্লম্বা মতমদা কোহিমাদা শুপ্নগী সোফৱায়র তেক্নোলোজি পার্কস ওফ ইন্দিয়া(এস.তি.পি.আই) অমা খক লৈরমখি। হৌজিক এস.তি.পি.আই কোহিমা অসি ওন্ত্রেপ্রেনিউয়রশিংনা থল্লে। মসি নাগালেন্দগী তুংগী ফিবম নত্ত্রগা অৱাং-নোংপোক্কী তুংগী ফিবমগী খুদমনি”।

মহাক্না হায়খি, ২০১৪দা প্রধান মন্ত্রীনা দিজিতেল ইন্দিয়া হৌদোকপা মতমদা, মহাক্কী পান্দম অহুম থমখি। অহানবা পান্দম্না, লৈঙাক অমসুং গনতন্ত্র ফগৎহন্দুনা, মীচম মীয়ামগী পুন্সিদা অওনবা পুরক্নবা তেক্নোলোজি শীজিন্নবা অমসুং অনিশুবদা, ঐখোয়গী দিজিতেল ইকোনোমি অমসুং ইনভেস্তমেন্তশিং হেনগৎহন্দুনা ঐখোয়গী নহারোলশিংগী অহেনবা খুদোংচাবশিং শেমগৎপনি। অহুমশুবা পান্দম্না ভারত্তা মালেমগী লুচিংবা ওইবা থবকশিং পায়খৎপনি।

মিনিস্তরনা মখা তানা হায়খি, ঐখোয়গী পুন্সি কয়া অমসুং ঐখোয়গী লৈঙাক অওনবা পুরক্নবা তেক্নোলোজি শীজিন্নবা শিংথানিঙাই ওইনা হেনগৎলে। তেক্নোলোজিগী মতেংনা সরকারনা বেনিফিসরি খুদিংমক্কী একাউন্তদা হকথেংন্না “শেঞ্জা-থুমজা লৈতনা, নারোলদা লৌথোকপা লৈতনা, মতম থেংথবা তৌদনা” শেনফম খুদিংমক ফংহনবা ঙম্লে। মসি তেক্নোলোজিগী তৌবা ঙম্বা অদুনি।

অহেনবা খুদোংচাবশিং ফংহন্নবা অনিশুবা পান্দম অসিগী মতাংদা মহাক্না হায়খি হৌখিবা চহি অনি অসিদা করিগুম্বা তেক্নোলোজি শীজিন্নরমদ্রবদি, ঐখোয়গী ফিবম তোখায়বা অমা ওইরমগনি অমসুং মীওই কয়া শিরমগনি অমসুং হিংনবা লম্বী কয়া মাঙলমগনি অমসুং শেন-থুমগী অমাঙবা কয়া থোক্লমগনি।

সরকারগী মাইপাকপশিং নিংশিংলদুনা মহাক্না হায়খি, ঙসি ঐখোয় মালেমদা খ্বাইদগী য়াংনা চাউখৎপা ইকোনোমি ওইরে; মালেমদা য়াংনা চাউখৎপা স্তার্দঅপ অমসুং ইন্নোবেতিপ ইকোসিস্তেম ওইরে। ঐখোয়না য়ুনিকোর্ন ১০০ শেমগৎলে। মালেম অসিগী লৈবাকশিংগী মনুংদা ফোরেন দাইরেক্ত ইনভেস্তমেন্ত খ্বাইদগী য়াম্না ঐখোয়না ফংলে।

মহাক্না হায়খি, হৌখিবা চহিদা ঐখোয়না আই.তি অমসুং ইলেকত্রোনিক্সতা অনৌবা থবক লাখ ১০ ফংহল্লে। অনৌবা ভারত্তা দিজিতেল স্কিল লৈবা অমসুং দিজিতেল ত্রেনিং ফংলবা মহৈরোয়শিং থবক অমসুং ওন্ত্রেপ্রেনিউয়রশিপদা অনৌবা খুদোংচাবা কয়া ফংলগনি। ঐখোয়গী লৈবাক অসি য়ুনিকোর্ন ১০০ হায়বদি বিল্লিয়ন্নরি ১০০ শেমগৎপা লৈবাক অমনি। মখোয় মশাগী য়াইফনবা লন-থুম তানশিনবা, অনৌবা কয়া পুথোকপা থবক কন্না শুবা নহারোলশিংনি। মসি অনৌবা ভারতনি।

মিনিস্তরনা হায়খি ঙসি ঐখোয়না অনৌবা ভারত হায়রকপা মতমদা মদুগী ৱাহন্থোক্তি অনৌবা খুদোংচাবশিং অমসুং অনৌবা নুংঙাইবা হায়বনি, মসিনা তাক্লি মদুদি মথংগী য়ুনিকোর্নশিং নাগালেন্ত, কোহিমা,দিব্রুগর, জোরহাত নত্ত্রগা মফম অমদগী হেক্ত ওইবা য়াই। মসি নখোয়গী তৌবা ঙম্বশিং অদুনি। সেন্তর অসিনা দিজিতেল ইন্দিয়াগী দিজিতেল নোর্থ ইন্ত ওইহন্নবা পান্দম থম্লি।

মহাক্না হায়খি প্রধান মন্ত্রীনা হায়খি মদুদি ভারতকী তুংগী লম্বীদি তেক্নোলোজিনি অমসুং মথং চহি ১০ অসি মহাক্না তেকগেদ হায়না কৌখি। ভারতকী তেকগেদ থবক ওইনা পাংথোক্নবা, নাগালেন্দ, অসাম নত্ত্রগা অৱাং-নোংপোক লমদমগী অতোপ্পা মফম অমগী নহারোলশিংনা মসিগী দিজিতেল ইন্দিয়াগী অওনবা অসিদা শরুক য়াবা দরকার ওই।

মিনিস্তরনা মখা তানা হায়খি দিজিতেলগী পোৎথোকশিং অমসুং থবকশিংদা মালেম্না ভারত অসি থাজবা মরুপ অমা ওইনা লৌরি। ঙসিদি ঐখোয়গী লৈবাক অসি ইলেকত্রোনিক মেনুফেকচরিংদা বিল্লিয়ন দোল্লর ৪০০ য়ৌরগদবা লৈবাক অমা ওইরে অমসুং ইলেত্রোনিক্সতা মালেমগী সপ্লাই চেনশিংগী চাদা ১২ য়ৌবা ঙম্লে। হৌখিবা চহিদা তেক্নোলোজিগী থবকশিংদা বিল্লিয়ন দোল্লর ২০০ য়ৌদুনা ঐখোয় চাদা ১৬ য়ৌবা ঙম্লে। হৌজিক্কী মতম অসি অওনবা শরুক য়াগদবা অমসুং খুদোংচাবশিং লৌগদবা মতম অমনি। য়াম্লবা খুদোংচাবা কয়া নহাক্কী মাঙদা লৈরে অমসুং খুদোংচাবশিং অদু লৌহৌনবা থৌরাং তৌগদবনি।

অৱাং-নোংপোক রাজ্যশিংগী তোঙান-তোঙানবা খুন্নাইগী কাংলুপশিংগী দরকার ওইবা ইন্দস্ত্রিগী তেক্নোলোজিশিং পীনবা দিজিতেল স্কিলগী লমদা ত্রেনিং পীনবা অমসুং দরকার ওইবা মচাকশিং শেমগৎনবা মিনিস্তরনা এন.ই.সি.বি ২.০ প্রোজেকশু হৌদোকখি। প্রোজেক অসিগী শেনফম ভারত সরকারগী ইলেকত্রোনিক্স অমসুং ইনফোর্মেসন তেক্নোলোজি মিনিস্ত্রিনা পুথোকপনি। মসিগী সেন্তরশিং অগরতালা, আইজোল, গেঙতোক,গুৱাহাতি, ইম্ফাল, ইতানগর, কোহিমা অমসুং সিল্লোংদা লৈদুনা নেসনেল ইন্সতিতুৎ ওফ ইলেকত্রোনিক্স এন্দ ইনফোর্মেসন তেক্নোলোজি(এন.আই.ই.এল.আই.তি)না প্রোজেক অসি থবক ওইনা পায়খৎনবা এজে্ন্সি ওইরি।

মসিগী মমাঙদা মিনিস্তরনা দিমাপুরদা লৈবা নাগালেন্দ তুল রুম এন্দ ত্রেনিং সেন্তর য়েংখি। মহাক্না সেন্তর অদুগী থবকশিং অমসুং পায়খৎলিবা প্রোজেকশিং য়েংশিনখি। লিংখৎনবা থৌরাং তৌরিবা এক্সতেন্সন সেন্তরশিং অসিগী মখাদা মোন অমসুং কিফিরে জিলাশিংগী নহা ওইরিবা ওন্ত্রেপ্রেনিউয়রশিং শেমগৎনবা ইলেকত্রোনিক্স অমসুং ইনফোর্মেসন তেক্নোলোজি মিনিস্ত্রি অমসুং স্কিল দিবলপমেন্ত অমসুং ওন্ত্রেপ্রেনিউয়রশিপ মিনিস্ত্রিনা পীবা য়াবা মতেং পীগনি হায়না থাজবা পীখি।

মিনিস্তরনা দিমাপুরদা লৈবা আই.আই.এস.সি ত্রেনিং সেন্তরদশু চৎখি অমসুং ত্রেন্নরশিংগা ৱারি শানখি। হোস্পিতেলিতি এভিয়েসন য়াওনা তোঙান-তোঙানবা সেক্তরশিংদা সেন্তর অসিনা মাইপাক্না মহৈরোয় ৭৫০০ থবক ফংহনখ্রে।

মে ৫দা মিনিস্তরনা এস্পিরেসনেল দিস্ত্রিক অমা ওইরিবা কিফিরে জিলাগী ওফিসিএলশিংগা লোয়ন্না পায়খৎলিবা থবকশিং হন্না য়েংশিনবা মীফম অমা পাংথোকখি। চাউখৎ-থৌরাংগী থবকশিং মহাক্না হন্না য়েংশিনখি। হায়রিবা জিলাশিং চাউখৎনবা অমসুং অতোপ্পশিংনা মতৌ তম্নবা মহাক্না প্রধান মন্ত্রী নরেন্দ্র মোদীগী মঙলানশিং পাউদমখি। লম্বী-থোং অমসুং দেতা হায়ৱেগী মতাংদা থেংনরিবা খুদোংচাদবশিং কোকহন্নবা মতেং পাংগনি হায়না মহাক্না থাজবা পীখি।

*****