অৱাং নোংপোক লমদমগী চাউখৎ-থৌরাংগী কেন্দ্র মন্ত্রী শ্রী জি. কিশন রেদ্দীনা ঙসি মনিপুরগী মুখ্য মন্ত্রী, শ্রী এন. বিরেন সিংহ, ৱার্কস/য়ুথ এফিয়র্স অমসুং স্পোর্তস মন্ত্রী, শ্রী কে. গোবিনদা সিংহ য়াওদুনা খুমন লম্পাক্কী নেস্নেল স্পোর্তস য়ুনিভর্সিতী কম্প্লেক্সতগী সেকমাইগী ইন্তর্নেস্নেল স্তেৎ ত্রক তর্মিনস ভর্চুএল ওইনা শঙ্গাখ্রে।

হৌদোকপগী থৌরম অসি আজাদী কা অমৃত মহোৎসব পালন তৌবগা মরী লৈননা নোর্থ ইস্ত রিজনেল স্পোর্তস ৱীক মনুংদা শঙ্গাবগী থৌরম অসি পাঙথোকপনি।

য়ুম্বু ওইরিবা তীম মনিপুর অমসুং ত্রিপুরাগী মরক্তা ইম্ফালগী খুমন লম্পাক স্পোর্তস কম্প্লেক্সকী মেন স্তেদিয়মদা শান্নখিবা স্পোর্তস ৱীক্কী ফুৎবোল ফাইনেল মেচ অসি কেন্দ্রগী মন্ত্রীগা লোয়ননা মুখ্য মন্ত্রীসু শরুক য়াখি।

থৌরম অসিগী অথোইবা মীথুংলেন ওইনা ৱা ঙাংবদা কেন্দ্রগী মন্ত্রী শ্রী জি. কিশন রেদ্দীনা মনিপুরদা চাউখৎ-থৌরাংগী খোঙজেল য়াংখৎলক্লি হায়না ফোঙদোকখ্রে। মহাক্না মুখ্য মন্ত্রী এন. বিরেন সিংহগী মখাদা মনিপুরনা মাংদা চংশিনগনি হায়না অচেৎপা থাজবা থম্মি হায়না মখা তাখি।

মহাক্না মীত অসি মাইপাক্না পাঙথোকখিবদা রাজ্য সরকার, নোর্থ ইস্ত কাউন্সিল অমসুং স্পোর্তস মীত অসিবু শীল-লাংলিবা মীওইশিংদা থাগৎপা ফোঙদোকখি। লৈবাক অসিগী নহা ওইরিবা শান্নরোয়শিংদা মহাক্না ঐখোয়গী মীশিং অসি য়াম্মি মসিগী মতুং ইন্না ঐখোয়না মেদলশিং লৌগদবনি হায়না ফোঙদোকখি।

মহাক্না মমা-মপা পুম্নমক্তা ঙাংশিংদা স্পোর্তস অমসুং গেমসনা দিস্সিপ্লিন লৈহল্লি অমসুং মশাদা থাজবা হেনগৎহল্লি  মরম অসিনা মখোয়গী অঙাংশিংবু স্পোর্তস অমা হেক্তা শান্নহনগদবনি হায়না ফোঙদোকখি।

কেন্দ্রগী মন্ত্রীনা বোক্সিং, বেদমিন্তন, ফুতবোল, আর্চরী অসিনচিংবা য়াওনা তোঙান-তোঙানবা স্পোর্তস মশান্নাশিংদা এন.ই. রিজনগী রাজ্য নিপান্না মেদলশিং লৌরখি হায়না ফোঙদোকখি। মহাক্না স্পোর্তিং ৱর্ল্দদা লমদম অসিগী নহারোলশিংনা তেলেন্ত কয়া উৎলি অমসুং লৈবাক অসিগী মীচৎ কয়া পুরকখি হায়না ফোঙদোকখি।

মনিপুরনা ঙসি ফাওবদা ওলিম্পিয়ন, মেদল ৱিনর কয়ামরুম পুথোকখি হায়রদুনা মনিপুরনা ঙসি লৈবাক অসিদা তমজনীংঙাই ওইবা খুদম অমা উৎলি হায়না ফোঙদোকখি।

ঐখোয় পুম্নমক্না পোলো হায়না খঙনরিবা সগোল কাংজৈ অসি মনিপুরদগী হৌরকখি হায়বা খঙই অমসুং মসি ঙসি লৈবাক শিনবা থুংবদা শান্নরি হায়না মহাক্না মখা তাখি।

কেন্দ্রগী মন্ত্রীনা প্রধান মন্ত্রী নরেন্দ্র মোদীনা মনিপুর অসি লৈবাক অসিগী স্পোর্তস পাৱরহাউসনি অমসুং রাজ্য অসিনা ইন্তর্নেস্নেল স্পোর্তস হব ওইগনি হায়না থাজৈ হায়না ফোঙদোকখি।

মখা তারদুনা মহাক্না হায়, প্রধান মন্ত্রীনা মনিপুরদা অহানবা নেস্নেল স্পোর্তস য়ুনিভর্সিতী লিংখৎনবা ৱারেপ লৌখি, ঐখোয়না স্পোর্তস য়ুনিভর্সিতী অসি চহি অনিগী মনুংদা শাবা লোইশিনবা ঙম্নবা পান্দম থম্বগা লোয়ননা মাংদা চংশিল্লি।

স্পোর্তস য়ুনিভর্সিতীনা লৈবাক অসিগীদমক ওলিম্পিক মেদলশিং পুরকপদা অচৌবা থৌদাং অমা লৌগনি অমসুং রাজ্য অসিগী অমদি লৈবাক্কীদমক মীংচৎ পুরক্কনি হায়না মহাক্না ফোঙদোকখি, মহাক্না মখা তারদুনা য়ুনিভর্সিতী অসিনা মনিপুরগী পাউজেলবু মালেম শিনবা থুংবদা শন্দোক্কনি হায়খি। মহাক্না য়ুনিভর্সিতী অসি শাবদা অমসুং মতুং তারকপদা মতেং পীবিনবা হায়খি।

পি.এম.না এন.ই.গী লমদমগী য়াইফনবা অমসুং চাউখৎনবা কত্থোকপগা লোয়ননা থবক তৌরি হায়না মহাক্না ফোঙদোকখি।

রাজ্য অসিবু স্পোর্তসকী পাৱরহাউস অমনি হায়না খল্লিবা প্রধান মন্ত্রী শ্রী নরেন্দ্র মোদীনা মনিপুরদা পীবিখিবা নেস্নেল স্পোর্তস য়ুনিভর্সিতীগী মহৈশিং ঙসিদি ফংবা হৌরক্লে হায়না মুখ্য মন্ত্রী শ্রী এন. বিরেন সিংহনা মহাক্কী প্রসিদেন্তগী ৱারোল পীবদা ফোঙদোকখি। য়ুনিভর্সিতী অসিদা লৈবাক শিনবা থুংবদগী মহৈরোয় ২৫০ হেনবনা তম্লি হায়না মহাক্না মখা তাখি।

স্পোর্তস য়ুনিভর্সিতী অসি শাবগী মতাংদা মুখ্য মন্ত্রীনা ইমপ্লিমেন্ত এজেন্সীনা য়ুনিভর্সিতী শাবা লোইশিন্নবগীদমক থা ৩০গী মতম পীবিনবা হায়রকখি; অদুম ওইনমক য়েংশিন মীফম অমদা মসি য়াম্না শাংমল্লি হায়খি অমসুং সরকারনা ২০২৪গী মীখলগী মাংওইননা য়ুনিভর্সিতী অসি খুৎশিন্ননবা হোৎনরি।

এন.ই.গী মীয়াম্না মমাংদা নাথৈবীরে হায়না ফাওরমখি অদুবু শ্রী নরেন্দ্র মোদীনা ২০১৪দা প্রধান মন্ত্রী ওইররবা মতুংদা লমদম অসিগী রোদ কন্নেক্তিবিতী অমসুং রেল কন্নেক্তিবিতী য়াওনা চাউখৎ-থৌরাংগী প্রোজেক্ত কয়ামরুম পাইখৎখি।

মুখ্য মন্ত্রীনা তুংদসু মসিগা মান্নবা স্পোর্তস মীত পাঙথোক্নীংবগী অপাম্বা অমদি অপুনবা এন.ই. অমসুং অপুনবা ভারত অমা শেমগৎপদা মতেং পাংগনি হায়না ফোঙদোকখি।

প্রোগ্রাম অসিদা শরুক য়াখিবা মীওইশিংগী মরক্তা কেবিনেৎ মিনিস্তরশিং শ্রী কে. গোবিন্দাস সিংহ, শ্রী লেতপাও হাওকিপ, হৈখাম দিঙ্গো সিংহ, শ্রী কশিম ভাশুম, শ্রী এল. সুসিনদ্রো, এম.এল.এ.শিং অমসুং চীফ সেক্রেতরী দা. রাজেশ কুমার য়াওরি।  

মরক অসিদা মুখ্য মন্ত্রীনা কেন্দ্রগী মন্ত্রী অমসুং অতোপ্পা ওফিসিএলশিংগা লোয়ননা নেস্নেল স্পোর্তস য়ুনিভর্সিতীগী মহৈরোয়শিংগা উনখি অমসুং মসিগী মতম খরগী কেম্পস অসিদা লৈরিবা য়ুনিভর্সিতীগী ফেসিলিতীশিং অসি য়েংশিনখি।

পনবা য়াবদি ইন্তর স্তেৎ ত্রুক তর্মিনস অসি ২০২১-২২দা শাবা লোইশিনখিবনি অমসুং মসি রাজ্য অসিদা লৈরিবা অমত্তা ঙাইরবা ত্রক তর্মিনস অমনি। মসি এন.ঐচ.-০২ দগী কি.মি. ২.৫ লাপ্না খুর্খুল অৱাং শেকমাই লম্বীদা কেম্পস এরিয়া ১৮.৩৪ চাউনা লৈ অমসুং রাজ্য অসিগী ইনবাউন্দ অমসুং আউৎবাউন্দ ত্রকশিং অমসুং পোৎচৈ হোল্লিবা ত্রকশিংগী ফোর্মেল ত্রাঞ্জিৎ পোইন্ত অমা পীনবা এ.ই.সি.গী ফন্দিং মখাদা শাখিবনি।

****