রক্ষা মন্ত্রী শ্রী রাজনাথ সিংহনা ২০২২গী এপ্রিলগী ২৩দা অসামগী গুৱাহাতীদা পাংথোকখিবা ফংসন অমদা ১৯৭১গী ইন্দো-পাক লানগী ভেতরানশিংবু ইকাই খুম্নবা উৎখ্রে। লানগী ভেতরান ৩০০গী মথক্তা, বীর নরিস অমসুং মখোয়গী ইমুং-মনুংশিংনা অসাম সরকারনা শিল্লিবা ১৯৭১ লান্দা মথৌনা লৈনা, কৎথোকপগা লোয়ননা য়েক্নবশিংগা লান্থেনখিবা অমসুং মায় পাকপা পুরকখিবা থৌনা ফরবশিংবু ইকাই খুম্নবা উৎনবা থৌরমদা শরুক য়াখি। শরুক য়ারিবশিংগী মনুংদা পদ্মা শ্রী এৱার্দ ফংখ্রবা ১৯৭১গী বঙ্গলাদেশী ভেতরান অমা ওইরিবা, এল.তি. কোল. ক্বাজি সজদ অলি জাহির (রিতয়ার)সু য়াওখি। ১৯৬৫ লানগী ভেতরান খরসু শরুক য়াখি।  

শ্রী রাজনাথ সিংহনা মহাক্না ৱা ঙাংবদা লানগী হেরোশিং অমসুং বীর নরিস উনবা ফংবদা নুঙাইবা ফোংদোকখি অমসুং লৈবাক্কীদমক থৱায় থাখ্রবশিংগীদমক্তা ইকাই খুম্নবা উৎখি। মহাক্না ভেতরানশিংবু ভারত মচা পুম্বগী পুক্নিং থৌগৎনিংঙাই ওইরিবা লৈবাক্কী মরুওইবা ললনি হায়না ফোংদোকখি। “থবক্তা লৈরিবা লান্মী অমনা ভারতকী থৌনানি অমসুং ভেতরান অমনা থৌনা অসিগীদমক লেপ্লিবা মতম-চুপ্পগী ওইবা পুক্নিং থৌগৎপনি,” হায়না মহাক্না হায়খি। 

ভেতরানশিংবু ইকাই খুম্নবা পীবিবগীদমক অসাম সরারবু থাগৎপা ফোংদোক্লদুনা, রক্ষা মন্ত্রীনা হায়খি মদুদি থৌরম অসিনা আর্ম ফোর্সেসশিংবু ইকাই খুম্নবা উৎপা খক্তা নত্তনা লৈবাক্কী ওইবা দেমোক্রেতিক ভেল্যুশিংসু উৎলি। মহাক্না ফীল্দ মার্শল সাম মনেকশো, জেনেরেল জগজিৎ সিংহ অরোরা, এল.তি. জেন. জে.এফ.আর. জাকোব, মেজর জেনেরেল সুজন সিংহ উবান অমসুং এয়র চীফ মার্শল আই.ঐচ. লতিফপু ১৯৭১গী লান্দা পুৱারী ওইরগদবা মায় পাকপা অমগীদমক ভারতপু লুচিংবগীদক ইকাই খুম্নবা উৎখি। “১৯৭১গী লান্দা ঐখোয়গী লান্মীশিং ধর্ম্ম পুম্বদগী ওইখি। অদুবু মসিনা ঐখোয়বু লান মায় পাকহনখিবা নত্তে। মসিদা ভারতমচা ওইবগী কল্লবা থৌরিনা পুল্লদুনা ঐখোয়গী লান্মীশিং অমত্তা ওইনা পুরক্তুনা মায় পাকপা ঙমখিবনি” হায়না মহাক্না হায়খি। শ্রী রাজনাথনা মীয়ামদা লৈবাক অসিগী অপুনবা অমসুং অমত্তা ওইবগী ঙাক-শেনবা অসি ঙমখৈদা ঙাক্লিবা লান্মীশিংগী লৈবাক নিংবা অমসুং মমা লৈবাক নিংবগা চপ মান্ননা লৈনবা কন্না হায়খি।   

১৯৭১গী লান্দা খুমাং চাউশিনবা লালোং অমা ভারতনা ওইখি, হায়না শ্রী রাজনাথ সিংহনা মখা তাখি, হায়খি মদুদি নোংচুপ থংবা মমাংদা উবগুম্না ইন্দো-বঙ্গলাদেশকী ঙমখৈদা উংখৎনবা অমত্তা লৈতে মরমদি বঙ্গলাদেশ অসি মতম চুপ্পদা ভারতকা মরুপ-মপাং ওইদুনা লাকই। মহাক্না কেন্দ্র অমসুং অৱাং-নোংপোক্কী রাজ্যশিংবু ইন্দো-বঙ্গলাদেশকী ঙমখৈদা ইং-তপ্না অমসুং তংদু-লৈতানা লৈনবগীদমক মতেং পীনবা অমসুং মফম অসিবু চাউখৎ-থৌরাংগী অনৌবা এরা অমা ওইহনবগী মতেং পাংবগীদমক ক্রেদিৎ পীরি।

রক্ষা মন্ত্রীনা অমুকসু হায়রি মদুদি অৱাং-নোংপোক্কী মফম কয়াদা আর্ম ফোর্সেস (স্পেসিএল পাৱরস) এক্ত (এ.এফ.এস.পি.এ.) লৌথোকখিবা অসি মফম অসিদা মতম কুইনা ইং-তপ্না অমসুং তংদু-লৈতানা লৈরকপনা ওইরকপনি। “মীওই খরা থজবা লৈ মদুদি ইন্দিয়ন আর্মীনা এ.এফ.এস.পি.এ. লৌথোকপা পামদে। মসিদা ঐহাক্না হায়বা পাম্মী মদুদি মনুংগী ওইবা ঙাক-শেনবদা আর্মীগী থৌদাংশিং য়াম্না পিক্না লৈ। আর্মীনা পাম্মী মদুদি এ.এফ.এস.পি.এ. অসি মফম অসিদগীসু লৌথোক্নবা জম্মু অমসুং কশ্মিরদা মপুং ফানা মহৌশাগী পুন্সিদা লৈহনবা পাম্মী,” হায়না মহাক্না মখা তাখি। 

শ্রী রাজনাথনা ইন্তর্নেল অমসুং এক্সতর্নেলদা অকি-তুজুংবা পীরিবা অসিদা লৈবাক্কী ঙাক-শেনবগী মপাঙ্গল কনখৎহন্নবা সরকারগী লেঙদবা ৱাশক লৈরি হায়না কন্না হায়খি, অমদি মখা তাখি মদুদি “তেরোরিজমগী মওং অমা হেক্তা মুথৎনবা ঐখোয়না য়াম্না চেৎনা লেঙদনা লৈরি অমসুং ঐখোয়গী মীয়াম্বু চয়েৎনবা কয়াদগী ঙাকথোক্লি। ঐখোয়না উৎখ্রে মদুদি, করিগুম্বা তঙাইফদবা লৈরবদি, ঐখোয়না ঙমখৈ লান্না লৈরিবা তেরোরিজম মুথৎকনি”। মহাক্না লৈবাক মীয়ামদা থাজবা থমখি মদুদি অপুনবা অমসুং অমত্তা ওইবা ঙাক-শেন্ননবগী চাউরবা ৱারেপ লৌবদা সরকারনা নিংহন্নরোই অমসুং নিংহন্নবা লৈরোই।

রক্ষা মন্ত্রীনা ঙমখৈগী মফমশিংদা ইনফ্রাস্ত্রকচরবু মপাঙ্গল কনখৎহল্লিবা বোর্দর রোদস ওর্গানাইজেসন (বি.আর.ও.)বু থাগৎপা ফোংদোকখি, অমদি হায়খি মদুদি অরুনাচল প্রদেশতগীনা লদাখ ফাওবা থাপ্না লৈবা মফমশিং শম্নবদা হোৎনবা য়াবা হোৎনখি। মহাক্না বি.আর.ও.গী প্রোজেক্ত খরা মসিদা অতল তন্নেল অমসুং হৌজিক শেম্লিবা সেলা তন্নেল অসি পল্লদুনা মহাক্না হায়খি, মসিনা কুম্বী-কালেন নাইদনা থাপ্না লৈবা মফমশিংদা লম্বীশিং ফাওনহল্লগনি অমসুং দিফেন্সকী মথৌশিং শেম-শাবা হেনগৎহল্লগনি।

এক্স-সর্বিসমেনগী নুঙাই-য়াইফনবা অমসুং পেন্নবগীদমক তৌবা অসি সরকারগী মথৌনি হায়না হন্না হায়খি, শ্রী রাজনাথ সিংহনা ভেতরানশিংবু পাংবা য়াবা মতেং পাংগনি হায়না থাজবা পীখি। মহাক্না হায়খি, সরকার অসিনা এক্স-সর্বিসমেনশিংগী য়াইফনবগীদমক্তা তৌখিদবা থবক লৈতে, ঙসিগী লান্মী খুদিংমক হয়েংগী ইকাই খুম্নরবা ভেতরান ঙাক্তনি। “মতম কুইনা তান্দুনা লাক্লবা রেঙ্ক অমা পেন্সন অমা ঐখোয়না শক্তি হেক পায়বগা থুংহনখি। দিজিতেল ইন্দিয়াগী মখাদা, শ্মার্ত কেন্তিন কার্দ অমসুং এক্স-সর্বিসমেন আইদেন্তিতী কার্দ য়াওনা ওনলাইগী থবক কয়া অমা হৌখ্রে। পেন্সনরশিংগী অৱাবশিং কোকহন্নবা পেন্স গ্রিবেন্স পোর্তেল অমসু মথৌ তৌখ্রে। হৌজিক্তি ২০০৬কী মমাংদা থবক্তগী পোত্থাখ্রবা হবিল্দারশিং অমসুং ওনোরেরী নাইক সুবেদারগী রেঙ্ক ফংখিবশিংসু শেমদোক্লবা পেন্সনগী কান্নবা ফংলি। ২০২০গী দিসেম্বরদা থবক তৌখিবা সর্বিস অহুমগী পেন্সন রিগুলেসন হন্না শেমদোক্নবসু ওর্দর তৌখ্রে। ঐখোয়গী থৌনা লৈরবা লান্মীশিংদা, মখোয়না থবক তৌরিঙৈ মতম খক্তা নত্তনা, মখোয়না থবক্তগী পোত্থারবা মতমদসু য়েংশনবিবা অসিদা ঐখোয়না থাজৈ,” হায়না মহাক্না এক্স-সর্বিসমেনগীদক্তা সরকারনা লৌখৎপা খোঙথাংশিংগী লিস্ত পুথোক্তুনা হায়খি।  

প্রধান মন্ত্রীনা ‘আত্মানির্ভর ভারত’কীদমক থম্লিবা মিৎয়েং ফংননবা দিফেন্স মন্ত্রালয়না লৌখৎলিবা খোঙথাংশিং খরগী মরমদসু রক্ষা মন্ত্রীনা হায়খি। 'মমা‘দা ভারত অসি মপাল লমদগী পোৎ পুশিল্লকপদা মশিং পারম্বনি। ঙসিদি, মালেমগী ওইনা দিফেন্সকী পোৎলম মপালদা থাদোকপা ২৫গী মনুংগী রেঙ্কতা লৈরে। হৌখিবা চহি খরদা, ঐখোয়না দিফেন্সকী পোৎলম মপালদা থাদোকপা চাদা ৩৩৪ লোম হেনগৎখি। ঐখোয়না ২০২৪-২৫তা লুপা করোর ৩৫,০০০ মপালদা থাদোকপগী পান্দম থম্লি, হায়না মহাক্না হায়খি, য়াম্না কন্না থাজবা থমখি মদুদি মসিগী দিকেদ অসিদা ভারতকী দিফেন্স মেনুফেকচরদা ‘রোরিং ত্বেন্তীজ’ হায়না খঙনরগনি।

থৌরম অসিদা, রক্ষা মন্ত্রীনা ‘দ ব্রেবহার্ত ওফ ১৯৭১’ হায়বা লাইরিক অমা ফোংখি। ইকাই খুম্নবা উৎপা থৌরম অসিদা অসামগী রাজ্যপাল প্রোফেসর জগদিশ মুখি অমসুং মুখ্য মন্ত্রী দাঃ হিমন্তা বিস্বা শর্ম্মসু শরুক য়াখি।

****