প্রধান মন্ত্রী, শ্রী নরেন্দ্র মোদীনা ঙসি গুজরাতকী জাম্নগরদা দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন (জি.সি.তি.এম.)গী উরেপ উয়ুং তমখ্রে। প্রোজেক্ত অসি শাবা হৌবগী অহানবা নুমিৎকী থৌরমদা মোরিসসকী প্রধান মন্ত্রী, শ্রী প্রবিন কুমার জগনোথ অমসুং ৱর্ল্দ হেল্থ ওর্গনাইজেসন (দবল্যু.ঐচ.ও.)গী দাইরেক্তর জেনেরেল, দাঃ তেদ্রোস ঘেব্রেয়েসসনা শরুক য়াখি। আয়ুশ মন্ত্রালয় অমসুং ৱর্ল্দ হেল্থ ওর্গনাইজেসন (দবল্যু.ঐচ.ও.)না গুজরাতকী জাম্নগরদা মালেমগী অহানবা অমসুং অমত্তা ঙাইরবা গ্লোবেল সেন্তর ফোর ত্রেদিস্নেল মেদিসিন (দবল্যু.ঐচ.ও. জি.সি.তি.এম.) অসি লিংখৎপনি।

প্রধান মন্ত্রীনা থৌরম অসিদা ৱা ঙাংবদা অসুম্না হায়খি, “দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন অসিদি হীরম অসিদা ভারতনা শরুক তম্বা অমসুং মতিক লৈববু শকখঙবনি। ভারতকী নাৎকী হিদাক লাংথক্কী পথাপ্না লাইয়েংবা খক্তদা অকক্নবা লৈতে। মসিদি হীরম খুদিং মনুং চনবা পুন্সিগী সাইন্সকী পথাপ্নি। ভারতনা খুৎশম্নরিবা অসিবু মীওইবা খুন্নাই পুম্বদা তেংবাংনবা অচৌবা থৌদাং ওইনা লৌই”।

ঙসিগী হেল্থকেয়র ফংহনবগী থৌওংদা মালেম্না অনৌবা থৌরাং অমদা মিৎয়েং চঙলি হায়না প্রধান মন্ত্রীনা ফোংদোকখি। “দবল্যু.ঐচ.ও.না ‘গ্রহ অমা, ঐখোয়গী হকশেল’ হায়বা খোল্লাও অসি পীদুনা ভারতকী ‘পৃথিবী অমা, হকশেল অমা’ হায়রিবা মিৎয়েং অসি হেন্না খুমাং চাউশিলহনবা অসিদা ঐহাক্না নুংঙাইবা ফাওই। য়ুনাইতেদ নেসন্সনা ইং ২০২৩বু মালেমগী মিল্লেতকী চহি ওইনা খনখিবা অসিদি ভারতকী ওইনা য়াম্না চাউথোকচনীংঙাইনি”, হায়না মহাক্না মখা তাখি।

থৌরম অসিদা গুজরাতকী মুখ্য মন্ত্রী, শ্রী ভুপেন্দ্র পতেল, আয়ুশকী কেন্দ্র মন্ত্রী, শ্রী সর্বানন্দ সোনোৱাল, হকশেল অমসুং য়াইফ য়ুম্বাল অমসুং কেমিকেল অমদি ফর্তিলাইজরগী কেন্দ্র মন্ত্রী, দাঃ মনশুখ মন্দাবিয়া, আয়ুশ মন্ত্রালয়গী রাজ্য মন্ত্রী, দাঃ মুঞ্জপারা মহেন্দ্রভাই কালুভাই অমসুং আয়ুশ মন্ত্রালয়গা লোয়ননা গুজরাত সরকারগী সেনিয়র ওফিসরশিংনা শরুক য়াখি।

দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন অসিদি খা-নোংপোক এসিয়া লৈবাকশিংগী মশক থোকপা মরু ওইবা খোঙথাং অমনি। ৱাফম অসিবু বাঙ্গলাদেশ, নেপাল অমসুং ভুতানগী প্রধান মন্ত্রীশিংনা থৌরমদা অসিদা ভিদিও কনফরেন্সিংগী খুত্থাংদা থাদোকখিবা মশাগী ভিদিও মেসেজশিংদা য়াজখি।

দাঃ তেদ্রোস অধানোম ঘেব্রেয়েসসনা থৌরম অসিদা অসুম্না হায়খি, “নাৎকী হিদাক লাংথক্কী পথাপ অসি মালেম শিনবা থুংবগী লৈনৈ অমসুং কেন্দ্রনা ত্রেদিস্নেল মেদিসিনগী ৱারেপশিংবু মঙফাওনহন্নবা মতিক চানা তেংবাংগনি। অনৌবা সেন্তর অসিনা দেতা, অনৌবা থৌওং পাংথোকপা অমসুং তুং কোইনা চৎপগী পথাপ্তা মিৎয়েং চঙগনি অমসুং নাৎকী হিদাক লাংথকপু মতিক চাবা কান্নবা লৌদুনা শিজিন্নহনগনি”। দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন অসি তসেংনা মালেমগী ওইবা প্রোজেক্ত অমনি হায়না মহাক্না পনখি। ভারতনা মখোয়গী নাৎকী হিদাক লাংথকশিংবু মালেমদা সেন্তর অসিগী খুত্থাংদা য়ৌহনগনি অমসুং মান্নবা থৌওং ওইনা, মালেম্না ভারতকী নাক্তসু লাক্কনি। সেন্তর অসিবু ভারত্তা লিংখৎপদা তেংবাংবগীদমক্তা মহাক্না প্রধান মন্ত্রী নরেন্দ্র মোদীবু থাগৎখি।

আয়ুশকী কেন্দ্র মন্ত্রী, শ্রী সর্বানন্দ সোনোৱালনা থৌরম অসিদা তিল্লিবা মীয়ামদা ৱা ঙাংবদা অসুম্না ফোংদোকখি, “নীংশিংবা থোক্ত্রবা মতমদগী হৌনা, ভারতনা নাৎকী হিদাক লাংথক্কী হীরমদা মীয়াম্না শকখঙলবা লমজিংবা ওইদুনা লাক্লি। লৌশিং লান্নবা অমসুং তেংবাংনবগী ৱারোল কয়া পুৱারীদা ইদুনা লৈরি অমসুং থৌওং অসি মখা চত্থরকপা ওইনা, ভারত সরকারগী আয়ুশ মন্ত্রালয়না মিৎয়েং চঙবা থৌওং কয়া লেপ্তনা পায়খত্তুনা লাক্লি। মালেমগী সেন্তর অমা লিংখৎপা অসি হীরম অসিদা সীনর্জী অমসুং তেংবাংনবগী থৌওং পুরক্নবা হোৎনবগী শরুক অমনি অমসুং মসিনা মেম্বর স্তেত খুদিংদা কান্নবা ফংহনগনি”।

আয়ুশ মন্ত্রীনা মখা তাখিবদা, মন্ত্রালয় অসিনা ভারতকী প্রধান মন্ত্রী, শ্রী নরেন্দ্র মোদীবু মহাক্কী মশক থোকপা খোঙথাং অমসুং দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিনবু গুজরাতকী জাম্নগরদা লৈবা হায়বসিবু ওইথোক্নবা লেপ্তনা লমজিং-লমতাকপীবগীদমক্তা থাগৎপা ফোংদোক্লি হায়খি।

গুজরাতকী মুখ্য মন্ত্রী, শ্রী ভুপেন্দ্র ভাই পতেলনা হায়খি, “ঐখোয়গী প্রধান মন্ত্রীগী লমজিং-লমতাক মখাদা, য়োগ, আয়ুর্বেদ অমসুং নাৎকী ওইবা অতোপ্পা হিদাক লাংথকশিংগী লৌশিংবু মালেমগা লান্নরি অমসুং মসিনা মালেমগী মীয়ামগী অপুনবা হকশেল অমসুং হকশেল ফনা লৈবদা য়াম্না কান্নবা থৌওং অয়া ওইরি। অসিগুম্বা হীরম খুদিং মনুং চনবা লাইয়েংবগী থৌওং অসিনা মরম ওইরগা “মীয়াম খুদিংনা হকশেল ফবা” হায়রিবা সংস্কৃতকী সুত্র “বহুজন হিতে, বহুজন সুখে”গী ৱাহন্থোক চুম্না হল্লগনি”।

দবল্যু.ঐচ.ও. জি.সি.তি.এম.গী খ্বাইদগী মরু ওইবা পান্দম অসিদি মতমগা চুনবা সাইন্স অমসুং তেক্নোলোজী শিজিন্নদুনা মালেম শিনবা থুংবগী নাৎকী হিদাক-লাংথক্কী মতিকপু শিজিন্নবা অমসুং মালেমগী খুন্নাইগী পুম্বগী হকশেলদা অফবা ওইহনবনি। সেন্তর অসিনা নাৎকী হিদাক লাংথক্কী তসেংবা মতিক্তা মিৎয়েং চঙগনি অমসুং তেক্নোলোজীনা চাউখৎলকপগী কান্নবা লৌদুনা মসিগী তেক্ত-কায়দনা অমসুং কান্নবা ফংনা শিজিন্নবগী থৌওংবুসু হেন্না খুমাং চাউশিলহনগনি।

গুজরাতকী জাম্নগরদা লৈরিবা দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন অসিগী ইন্তেরিম ওফিসনা গুজরাতকী ইন্সতিত্যুৎ ওফ ত্রেনিং এন্দ রিসর্চ ইন আয়ুর্বেদ (আই.তি.আর.এ.)দা লৈগনি। সেন্তর অসিবু ভারত সরকারনা চাউরাকপা য়ু.এস.দি. মিলিয়ন ২৫০ থাদরিবা অসিনা শৌগৎকনি।

নাৎকী হিদাক-লাংথক হায়বসি হেল্থ কেয়র পীবগী পথাপকী মরু ওইবা য়ুম্বী অমনি অমসুং মসিনা ভারত্তা নত্তনা মালেমগী পুম্বগী হকশেল ফনা লৈহনবগী থৌওংদা মরু ওইবা থৌদাং য়ারি। নাৎকী হিদাক-লাংথক্না ইকুই কুইদ্রিবা চহিশিংদা আর্তিফিসিএল ইন্তেল্লিজেন্স, তেক্নোলোজীগী ওইবা অনৌবা থৌওং শিজিন্নদুনা মসিবু মীয়ামদা পাক শন্না ফংহন্দুনা অচৌবা অহোংবা পুরকপা উবা ফংখি। জি.সি.তি.এম.না নাৎকী হিদাক-লাংথক্কী কান্নবশিংগা মতমগী সাইন্সকী অনৌবা মায় পাকপশিংগা পুন্সিন্নবা অমসুং হকশেল ফবগী পাক শনবা থৌরাং য়াৎপগী পান্দম থমগনি।

***

(Release ID: 1818391) Visitor Counter : 134